e-Конференция

e-КОНФЕРЕНЦИЯ: Азаматхан ӘМІРТАЙ(Жауаптар)

Әріптің көлемі: Қалыпты
  • Қалыпты
  • Үлкен
  • Көлемді

Интернет-конференциямыздың кезекті қонағы - «Инвесторлар альянсы» қоғамдық бірлестігінің төрағасы Азаматхан Әміртай.  Ол бүгінге дейін ақпараттық технологиялар және бизнесті дамыту бағытында еңбек етіп келеді.

Азаматхан Сайлауұлы - 1978 жылы 21 наурызда Жамбыл облысында дүниеге келген.

Алматы Энергетика және Байланыс институтын «компьютерлік телекоммуникациялар инженері» мамандығы бойынша үздік бітірді(2000).

2005 жылы «Мемлекеттік және жергілікті басқару» мамандығы бойынша Қазақ Ұлттық Аграрлық университетін үздік дипломмен тамамдаған.  

1996 жылы ЖОО арасындағы жоғары математика бойынша халықаралық олимпиядадан бірінші орын иесі. 2008-2009 жылдары Ұлыбританияда және АҚШ-та білім алған.

 «KAZCOMNET» компаниясының президенті (2002-2005),

Қазақстан софтверлік компаниялар қауымдастығының вице  президенті(2005-2008),

"Қазақстан темір жолы" ұлттық компаниясы Вице Президентінің кеңесшісі (2005-2006) және "Қазақстан темір жолы" ұлттық компаниясы Президентінің (2006-2008) ақпараттық кеңесшісі қызметін атқарған.

Қазақстан софтверлік компаниялар қауымдастығының  президенті (2008-2014)

Ол, 2014 жылдың тамыз айынан бастап «Инвесторлар альянсы» республикалық қоғамдық бірлестігінің төрағасы.

Азматхан Әміртай - Интеллектуалды меншік нысандарын мемлекеттік тіркеуге алу туралы куәлік беруші «InfoSystem» корпоративті ақпараттық жүйесінің, Интеллектуалды меншік нысандарын мемлекеттік тіркеуге алу туралы куәлік беруші  жергілікті атқарушы орган “Doс akim” жүйесінің авторлық иесі.

Естеріңізде болса, қонағымыз бұған дейін де Abai.kz сайтының интернет-конференция қонағы болып, оқырмандардың экономикалық мәселелер төңірегіндегі сауалдарына жауап берген болатын.

Азаматхан Әміртай мырза Қазақстандағы экономикалық өзекті деген мәселелер бойынша оқырмандардан түскен сауалдарға жауаптарын беріп, ДСҰ төңірегінде жан-жақты пікір білдірді. 

Abai.kz

33 пікір 7535 рет оқылды Қосылған: 13.08.15
    • #1
    • Жамиля Хамиди
    • дн, 03/08/2015 - 10:19

    Мен автокөлік иесі болғым келеді. Қазақстан Дүниежүзілік Сауда ұйымына ресми мүше болуы қандай жеңілдік береді автокөлік ала тұратын азаматтарға?

    • Жауап
    • бн, 13/08/2015 - 15:11

    Азаматхан Әміртай:

    Қазақстанның ДСҰ-ға мүше болуымен қандай да бір көлік түрлерінің бағасы арзандайды деген байлам бар екені рас. Бұған себеп біреу-ақ, Жәмила. Қазір жаңа көліктер үшін импорттық баж алымының орташа межесі 27,9 процент айналасында. Ал біз ДСҰ-ға енгеннен кейін осы алымдар 13,3 процентке дейін кемиді. Одан әрі жыл сайын импорттық баж алымдары 0,5-0,6 процентке түсе берсе, соңында 10,8-11 проценттің төңірегінде тоқтауы тиіс деп отыр. Демек, көлікке салынатын баж алымының екі есеге дейін кемуі бағаны әжептеуір түсіреді. Логикаға салсаң осылай, бірақ өмірде сәл басқаша болатынын білесіз. Мысалы, бізде жоғары импорттық баж алымдары шетелдік көліктерге біразға дейін сақталады, отандық аутоиндустрияны сақтау үшін салықтық жеңілдіктер жасалады, ескі көліктерді әкелуге тиымдар күшейеді. Сондықтан, арзан көлікке қатты иек арта беруге болмайды.

    • #2
    • Сарыарқа
    • дн, 03/08/2015 - 11:29

    Ассаумағалайком! Азаматхан Сайлауұлы!! еңбегімен өрге жүзетін өзыңыз сияқты қазақтың жастары коп болсын илайм!!
    менің айтар ойым қазақелі жақында алем алдында ДСҰ ға мұше болу сынды ұлкен қадам жасады! құттықтаймыз арине!! брақта осы шараның бізге акелер зяны басымдау сияқтыма алде қалай? мысалы бұл ұйымға мүше болмай түрғанда бірер жыл бүрын қазақ нарығындағы көп тауарлардың нақтыбағасы өз құнынан алде артық болп тұрды солай боладыдыда , кеден салығы дейсызбе жеке монополия дейсызбе әсері боладығой , ал енді сырттан кіретін тауарлар құні арзандайды, ұйымға мүше болау халықты алгіндегі монополдардан құтқарып өзі талғамына қолжеткізу құқығына жеткізсе енді бір жағынан елде енді өркен жайіп келе жатқан шағын кәсіп орндардың ахуалы қыйндамақ, бізде еңбек кұші мен тағыда басқа факторлар асермен келіп шығатын заттың құні қазірдің озінде сырттан кіретін тауарлардан қымбаттау , бұл дегеніміз олармен нарықта бәсекелесе алмайды деген сөз ал осы жайт шағын касіпорндардың жабылуна алып келмейме? жане үш ел арасындағы келсім бойнша рессей мен беларус жане қазақелі арасында еркін тауар айналымы болу керек еді бырақ көршіміз қазрге бұл талапты орндамай отқан тұрі сезіледі, қайта-қайта кері қайтқан қазақ тауары, әуелі жақында қазақ елінен ет өнімін кіргізуге рессей тйымсалды деген ақпарат бар қаншалықты шындық? бүнің бәрі қазақ экономикасын туншықтырмайма? онсызда енді дамып келе жатқан өндіріс саласы кері кетпейме? жане ДСҰ-дан алатын алдын ала дайндық мерзімі деймызбе әлде сынақ мерзімі қанша жыл болмақ? бұл мерзім ішінде өндіріс саласы дайндалып ұлгірер мекен!!

    • Жауап
    • бн, 13/08/2015 - 15:12

    Азаматхан Әміртай:

    Рахмет, тілегіңізге! Қазақстан ДСҰ-ға 162-ші ел болып қосылды және бұл ұйымға кіру процесі аз емес, 19 жыл уақытымызды алды. Демек, жалғыз емеспіз, демек ерте емес. Мысалы, Қырғызстан бар-жоғы 2,5 жыл дайындалды да, ДСҰ-ға кіріп кетті. Жеткіліксіз дайындықтың зардабын біразға дейін тартып келді. Біз болсақ, тыңғылықты дайындалып үлгердік. «Шегірткеден қорыққан бидай екпейді» демекші, бәсекеден қорықсақ, басымыздан ыз, аяғымыздан сыз өтпеген күйі сол бәсекенің көлеңкесінен қорқып-ақ, пигмей қалпымызда қала береміз. Ал бұл бізге керек емес. Иә, қатал бәсекелестік біздің әлсіздерімізді жұтады, бірақ күштілерімізді іріктеп береді. Саны көп әлсіз керек пе, аз болса да сапалы керек пе? Қазақстанға бұдан былай келетін тауарлардың бағасы біршама төмендеуі мүмкін. Себебі, бәсекелестік күшейеді. Мысалы, Қазақстан футболының УЕФА аясында болуы қателік деген қаншама адам болды, бірақ өткенде «Астана» финдік «ХИКті» жеңгенде сол адамдар да қуанған шығар, сірә. Біз осы кезге дейін бойымызда сақтап келген алымдылық, кәсібилік, әбжілдік, білімділікті енді сыртқа шығаруымыз керек. Ресейдің біздің кейбір тауарларды өткізбей тастауы деген ақпарларға келетін болсақ, бұларды үрейлене қабылдаудың қажеті жоқ. Ортақ экономикалық кеңістік болғанмен, өз нарығын артық тауардан сақтауы үшін біз де, басқалар да осындай амалдарға барып қалуымыз мүмкін. Бұл соншалық талқылайтын мәселе емес деп білемін. Ал ДСҰ-ға кіргеннен кейінгі сынақ мерзімі деген түсінік мүлде болмайды. Біз үшін сынақ мерзімі сол 19 жыл мен осы аралықтағы ауылшаруашылығына субсидия бөлу, мал тұқымын асылдандыру, Үдемелі индустриялық-инновациялық даму бағдарламаларының бірнеше кезегі деп білемін. Бұлар нәтиже берді ме, бермеді ме – екінші сұрақ, бастысы олар кәсіпкерлерге расында демеу берді.Сынақ мерзімі деп 1993 жылдан бері Елбасымыздың «Болашақ» шәкіртақысымен 10 мыңнан астам жастың шетелден білім алып, тәжірибе жинап қайтқанын айтар едім. Бұдан бөлек басқа қорлардың грантымен, өз қаржысымен оқып қайтқандар қаншама.. Бұрын халықаралық стандарттармен жұмыс істеуге жағдай болмаса, енді сол лайықты жағдай міне, орын алды. Ендеше, осы сапалы адам капиталы бізді алға сүйреуі қажет.  

    • #3
    • Орал
    • дн, 03/08/2015 - 12:45

    Келімбетов деген кісі қазақстандықтарға валютаны теңгемен сақтаңдар деп ылғи ақыл айтады. Негізі кім ақшасын қай валюта сақтайды өз еркі емес пе? Ол кісі халықты тағы алдап отырған жоқ па? Алдағы теңгенің жайы не болмақ?

    • Жауап
    • бн, 13/08/2015 - 15:14

    Азаматхан Әміртай:

    Мен кәсіпкер, инвестор ретінде қандай қаржыны болмасын, қандай валютада болсын тастүйін қылып сақтауға қарсымын. Ақша бар болса, оны кәсіп ашуға салу керек. Қаржының өлі күйінде банкте тұрғаны бір бөлек те, оның кәсіпке салынып, инвестиция күйінде қайтып жатқаны бір бөлек. Мысалы, сіз 20 мың долларға бір шағын дүкен аштыңыз делік. Ол дүкеннен ай сайын орташа есеппен 2 мың доллар табыс түсіп тұрсын деңіз. Сонда 20 мыңдық тауар айналымы бар дүкеннен сіз бір жылда 24 мың долллар пайда шығарып отырасыз. Ол ақшаға енді екінші дүкен ашсаңыз болады. Тіпті 50 пайыздық инфляция болса да, сіз аз болса да бәрібір табыс табасыз. Солай емес пе? Сондықтан, ақшаны кәсіпке салуды ақшаны ең жақсы түрде сақтау деп айтар едім.

    • #4
    • Берік
    • дн, 03/08/2015 - 12:48

    ДСҰ-ға мүше кейбір елдерді көріп отырмыз. Қырғызстан, Армения, сол елдер ДСҰ-дан не ұтты. Біз сол жем болған қалпымызда, шикізатымыз бен бидайымызды шетелге тегін сатып қана қалмаймыз ба? Бір шенді ретінде емес, Азамат ретінде айтыңызшы. ДСҰ Қазақстанға несімен пайдалы? Мынау-мынау деп тізіп беріңізші.

    • Жауап
    • бн, 13/08/2015 - 15:15

    Азаматхан Әміртай:

    ДСҰ-ға кірсең, көктен теңге саулайды деп түсінбеу керек. Оның оң әсері орта және ұзақ мерзімдегі перспективада ғана көріне бастайды. Қырғызстан 1998 жылы ұйымға кіргенімен, негізгі сауда әріптестері – Қазақстан мен Ресейдің бұл ұйымда болмауы себепті, жемісін біразға дейін көре алмады. Солай бола тұра, ДСҰ-ның шеңберінде барлық елдермен тең дәрежедегі өркениетті сауда жасауға мүмкіндік алды, сауда-саттықтағы техникалық бөгеттер азайып, ел экономикасының құқықтық базасы реттеліп қалды. Ал өнім мен қызметтерге деген халықаралық стандарттардың келуімен елдің инвестициялық рейтінгі де жақсарды, бәсекеге қабылеттілігі де артты. Мысалы, Қырғызстанның жеңіл өнеркәсібі қазір сапасы бойынша Түркия, Үндістан текстиліне дес бермейді. Кейінгі 5-6 жылда олар төрт түлік өнімдерін Жапонияға экспорттап жатқанын анық білемін. Яғни, Қырғыз экономикасы қарқынды болмаса да, жүйелі түрде дамып келе жатыр. Ал Арменияға келсек, Қырғызстан жағдайында сипаттаған өзгерістерді осы елге қатысты да айтуға болады. Жалпы, қандай ұйымға мүше болсаң да, экономиканның дамуы ішкі-сыртқы саясатқа тығыз байланысты. Мысалы, Арменияның ауыл шаруашылығы жақсы дамығанымен, оның көршілес Түркия мен Әзірбайжанмен жаулық қатынаста болуы бәрін жоққа шығарады. Елдің ІЖӨ-сінің 75 пайызын жеке сектор, қызмет көрсету саласы беретінін, халықтың тең жартысы аграрлық салада екенін, елдің энергия бойынша Ресейге тәуелді екенін ескерсек, ДСҰ бұл жерде жалғыз өзі еш әсер бере алмайды. Бұның бәрін айтып отырған себебім, бір елдің жағдайы екінші елге келе бермейді. Енді Қазақстанға келсек, бұл ұйымнан алатын пайдамыз негізі көп. Тек соны пайдалана білуіміз керек. Айталық, енді бізде кәсіп жасауда жалпыға ортақ ойын тәртібі орнайды. Қайбір шаруа осы елдің сотынан әділдік көрмесе, енді әлемдік экономикалық соттарға жүгінуге хақы бар дегендей... Кедендік алым-салық азайып, ішкі нарықта бәсеке күшейеді, баға төмендеп, тауар сапасы артады, елімізге инвестиция тартылады, жаңа технология келеді. Қысқаша осы.

    • #5
    • Сая
    • дн, 03/08/2015 - 12:49

    «Инвесторлар альянсы» қоғамдық бірлестігі деген немен айналысатын мекеме?

    • Жауап
    • бн, 13/08/2015 - 15:16

    Азаматхан Әміртай:

    Инвесторлар альянсы биыл ғана құрылғанымен, бастысы - бизнесті банктен несие алмай-ақ бастауға мүмкіндік туғызады. Қазақстандық инвесторлар ақшасының шекара аспай, іште қалуына жағдай жасайды. «B to B», яғни «Бизнестен Бизнеске» қағидаты негізінде инвестор мен кәсіпкердің бір-бірімен байланысып, ортақ бизнес ашуына мүдделі болады. Жаңа идеялар мен мүмкіндіктерге жол ашады. Краудфандинг, яғни қоғамдық қаржыландыру жүйесін кеңінен насихаттау. Былайша айтқанда, Инвесторларлар альянсы идея мен қаржы арасындағы көпір іспеттес. Бұдан бөлек альянс шетелдік инвесторларды Қазақстанға тартуды да қатар алып жүреді. Осы мақсатта биылдың өзінде АҚШ, Ресей, Қытайда болып, ірі инвесторларымен кездесіп, еліміздің инвестициялық тартымдылығын таныстырып жатырмыз. Бұйырса, ірі сомадағы келісім-шарттарға қол қойылар күндер де алыс емес. Айтпақшы, Альянстың www.ainvest.kz порталына кіріп, біздің ұйымның жұмысымен толығырақ таныссаңыз болады. Сіз де бизнес-идеяңызды сол жерге ұсыныс ретінде қалдырсаңыз, мүмкін, инвесторларға керек жоба сіздікі болып шығар... Бәрі де мүмкін!

    • #6
    • Орыс
    • дн, 03/08/2015 - 12:56

    Азеке, сізді шетелге жиі сапарға шығады деп естідік. Шетелдің бізден артық өмір сүруінің себебі не деп топшыладыңыз? Қазақстанның шетелден қандай да бір артық тұстары бар ма?

    • Жауап
    • бн, 13/08/2015 - 15:18

    Азаматхан Әміртай:

    Бұл сұраққа жауап сондай бір ғылыми жіктеуді талап етпейтін шығар. Шетел деп дамыған елдерді меңзеп отырсаңыз, олардың бізден артықшылығы, уақыт пен жерден ұтқаны ғана. Бірнеше ғасырдан бері мемлекеттің ішіндегі халықтың тұрақтылығы, нарықтық қатынастарға ерте түсуі, жоғары құқықтық сананы қалыптастырып алуы, мұхит жолдарына жақындығы, ғылымға ден қоюы және т.б. Ал біздің олардан артықшылығымыз банальды болса да, жеріміздің кеңдігі, мол пайдалы қазбамыз, халқымыздың дархан пейілі, талантты жастарымыз, экологиялық таза өнімдеріміз болса керек. Ұзағынан да, қысқаша да жауабым осы. 

    • #7
    • Мұхаммед
    • дн, 03/08/2015 - 13:01

    Ассаламагаләйкүм Азаматхан Сайлауұлы!
    Іргемізде тұратын қытай елінің бір бөлігі саналатын ШЫҒЫС-ТҰРКІСТАН(аталмыш СУАР)дағы он миллиондай ұйғырлар қазіргі күнде, Windows жүйелік системасын, microsoft office, Word тағыда басқа үнемі қолданылатын программаларды ұйғырша сөйлетті. Отаны, мемлекеті болмасада, ал біз егемен болғалы 25 жыл болсада, көп нәрселер істелмей жатыр, сізден суранарым:
    1)компьютер тілі қашан қазақшаланады?
    2) Біздің елде моб. телефон және интернеттің тұтыну құны, қасымыздағы көршіміз қытаймен салыстырғанда әлде қайда қымбат, ал интернеттің жылдамдығы сапасы жағынан сөз ашуға болмайды, бұл қашан ЕВРО өлшемге толымды болады?
    3)Нарықтың негізгі заңы бәсекелестік, ал қазақ елінде интернет тағыда басқа моб. телефон жүйесінің қожайыны тек қана ҚАЗТЕЛЕКОМ, бүл баяғы социалистік жүйеден еш айырмашылығы жоқ, ол енді қашан нарық заңына сәйкестендірліп, бір неше бәсекелес КОМПАНИЯларға бөліп беріледі? рахмет.

    • Жауап
    • бн, 13/08/2015 - 15:19

    Азаматхан Әміртай:

    Уағалейкумассалам, Мұхаммед бауырым! Бізде Уиндоус операциялық жүйесі әлдеқашан қазақшаланған. Мысалы, Уиндоус 7-ні Language Interface Pack (LIP) қолданбасы арқылы қазақ тілінде толық пайдалануға болады. Бұл өнім тегін және оны мына жерден - https://www.microsoft.com/kk-kz/download/details.aspx?id=1231 көшіріп алуға да болады. Оның қасында Уикипедия қазақшаланып, Google Translate аударма жүйесіне біздің ана тіліміз қосылғалы жатқанда, сіздің сұрағыңыз өз өзектілігін әлдеқашан жойған деп білемін. Ал бізде ұялы байланыс бағасы жоғары дегенді жиі естіп те, оқып та жүрмін. Бірақ, маған осы миф секілді көрінеді. Қытайда ұялы байланыс арзан болатын себебі, бір шаршы шақырымға шаққанда адам саны көп, бәсекелес операторлар көп болғандықтан да шығар... Қазақстанда халық аз, жер байтақ болды деп сылтау еткенімен, жақсы өзгерістер болып жатыр, білсеңіз. Шведтік ТЕЛЕ2 операторының келуі бағаны біраз түсірді, биыл «мобилдік құлдыққа» (MNP) тиым салынады, интернет-телефония дамып жатыр, өте ыңғайлы тарифтік акциялар жүріп жатыр. Сондықтан, бұл жерде де мәселе көріп тұрған жоқпын. Тек өзіңізге ыңғайлы тарифті таңдап алсаңыз болды. Интернет жылдамдығына келсек, Қазақстан 196 елдің ішінде биыл 58-ші орында. Аустралия мен Түркия, Италияның өзін артқа тастап кетіпті.. Мені ұялы байланыстың да, интернеттің де қызметі толық қанағаттандырады. Ал үшінші сұрағына келсек, «Қазақтелекомға» бәсекелестер қазір жетіп артылады. «Транстелеком» өзінің талшықты-оптикалық кабель жолдарын салып алды, «Қазтранском», «Астел» қарқынды жұмыс істеп жатыр. «Картел» компаниясының атынан «Билайнның» өзі қаншама нарықты өзіне алып жатыр. Сондықтан, «Қазақтелекомды» енді монополист деп айта алмаймын. 

    • #8
    • Бекжан
    • дн, 03/08/2015 - 13:02

    Біз ДСҰ-ға кірдік деп мақтанып жүрміз. Сіз Қазақстанда өндірілген, 10 тауардың тізімін жатқа айта аласыз ба?
    ЕАЭО мен ДСҰ қазақстандықтарды банкрот ететін ұйым емес пе?

    • Жауап
    • бн, 13/08/2015 - 15:21

    Азаматхан Әміртай:

    Қарағандының «Нәтиже» сүт фабрикасының өнімдері, «Еурофарма» фармацевтикалық компаниясының дәрілері, «Kazmeat» ет өнімдері, Оралдағы «Кублейдің» балық қалбырлары, «Alit» құрғақ құрылыс қоспалары, «Ақтөберентгеннің» медициналық жабдықтары, Өскемен мен Қостанайдағы көлік құрастыру зауыттары, «Абзал және К» компаниясының экспорттық күріші, «Қарағанды кәмпиттері», «KAZ-TEL» компаниясының кабель өткізгіштері және т.б. Сұрақтың екінші жалғасына ілгеріде жауап берген сияқтымын...

    • #9
    • Арғын Бейсенғали
    • дн, 03/08/2015 - 13:51

    Сарапшылардың айтуы бойынша Авто-көлік жөнінен қуантарлық ештңе жоқ.Былтырдың өзінде біздің үкімет 20-милард теңге бөлген екен Бипек-Автомен Қостанайдағы корей автосын құрастырушы зоводтарға сақтап қалу үшін бонкроттықтан.Оның сыртында Ресей елі ВТО-ның Ресей, Беларуспен біздің құрған кеден одағына қарсы жерлері көп оны Қазақстан қалай шешетінін әзірге білмейміз деді Ульюкаев мырза сіз не айтар едіңіз бұған.Әлемде 100-ден аса көлік құрастырушу елдердің кәзір көп болса 30-дайы қалды .Бәсекелестікке қабілеті жоқ бағасы жоғары сапасы сын көтермейтін мұндай Авто пром ВТО-ға бәсеке емес күлкі болмайма.Оданда Астана моторыстағы көлктердің бағасын ретке келтіріп Н Смағұлов мырзаны жерге түсірген жөн сияқты.Осы уақытқа дейін елді тонағаны жетер көліктеріне 2/3-есе баға қойып сіз не айтасыз бұған.

    • Жауап
    • бн, 13/08/2015 - 15:22

    Азаматхан Әміртай:

    Құрметті Арғын Бейсенғали! ХХ ғасырдың орта шеніне қарай әлемде 100-ден аса аутокөлік өндірушілер болса, ғасырдың 70-80 жылдары олардың саны 50-ге кеміді. Қазір солардан тек жиырма шақты алып концерндер қалды. Бұлар баяғыда-ақ бір елдің өнеркәсібі деген сипатынан шығып, трансұлттық корпорацияларға айналып кетті. Сондықтан, Қазақстан өз алдына бөлек көлік нарығын жасай алмайды. Бір ғана «Тойотаның» жылдық айналымы 200 миллиард доллардың үстінде. Өзіңіз ойлай беріңіз! Сондықтан, бізге әлемдік трендтерге бой ұсына отырып, отандық өнеркәсібіміздің өнімдерін алдымен өзіміз алу мәдениетін сіңіру керек. Баяғы Генри Фордтың «зауыттағы әр жұмысшым алдымен сол өзі құрастырып шыққан көлікті алатындай мүмкіндігі болу керек» деген принципі секілді. Статистикаға қарасақ, биыл сәуір айында 1 161 қазақстандық көлік сатылса, осы маусым айында 2 500-дей көлік сатылыпты. Динамика бар! Мемлекет те қолдан келгенін жасап жатыр – қосымша құн салығын алып тастады, жеңілдікпен несие беру бағдарламасын бастады, қытай инвесторлары келгелі жатыр. Сондықтан, өз басым байбалам салудан аулақпын.

    • #10
    • Технократ
    • дн, 03/08/2015 - 15:15

    Қазақстан қазіргі техникалық прогреске жауап беретін өндіріске ие болуы үшін мынадай қадамдар жасаса құба-құп болар еді:
    1. Жаңа материалдар өндірісі (алғашқы шикізат металдар, мұнайгаз бұйымдары елімізде шығарылады)
    2. Жаңа машиналар және қондырғылар өндірісі оның ішінде қорғаныс -әскери құралдары
    тек тиісті материалдарға ( конструкциялық, шалаөткізгіш т.б. ) сұраныс артар еді
    3. халқымыздың саны өссе, (бекерге шетелдердің әсіресе ұлыдержавалық ойы бар үндістан Премьер -Министрінің біздің елдің халқы аз екенін бірнеше айтқаны, қандай ойы болды саясаткердің) осы ойландырады

    • Жауап
    • бн, 13/08/2015 - 15:23

    Азаматхан Әміртай:

    Жауабыңызға ырза болдым! Сіздей озық ойлы азаматтарымыз көбейсе, еліміздің ертеңі жарқын болмақ!

    • #11
    • Таңжарық
    • дн, 03/08/2015 - 16:58


    Ассалаумағалайкум، Азаматхан Әміртай аға، менің сізден сұрайын дегенім. бүгінгі күнде, халықтың жүміспен қамту жағы өте өзекті мәселе، қәзіргі таңда «жүміспен қамту жол картасі 2020» деген бағдарламалар жүзеге асырылып жатыр.
    Бырақ шыны керек, қазыр қаншалған жастар жұмыссыз жұр. қолдарында ұстағаны еліміздегі ұлттық жоғары оқу орындарының дипломдары.

    статистика агенттігінде.

    «2014 жылғы маусымдажұмыссыздық деңгеиі 5، 0% құрады»،- делінген хабарламада.

    Билғы жылдың статистиска мәлеметін таба алмадым، егер бар болса олда осындай өтіріктің аржақ бержағы болар.

    Мынау 2015 жылғы әлемдегі дамыған елдердің жұмыссыздықтың көрсеткіші Франция10. 3%,Канада6. 8%,Англия5. 4%,Америка5. 3%,Германия4. 7%,
    Ал енді біздің 5,0 дік көрсеткішімізді көшеде жүрген кез келген адамды ұстап алып сұраңызшы осыған сенерме екен?

    Жеке өз отбасымды айтайыншы, ауданда тұрамын. отбасымда 5 жан сан бар, әке- шешем екі апекем және мен. екі апекемде жоғары оқу орнын тамамдаған، үлкен әпекем ылайқты жұмыс тауа алмаған соң базарда ким- кешек саудасімен шұғылданады، ал екінші апекем олда оқу орнын тамамдаған соң ауылға келіп жұмыс жасамақшы болды. бырақ көрсетілген жалақысы 28 мың теңге болып ол жұмыстан бас тартты. " өзіңіз ойлаңыз, 28 мың теңге ай сайынғы телефон ақшаңызбен, ким- кешегіңіз, тұрмыстық бұйымызға әрең жетеді. тіпті жетпеиді де".
    Мен өз басым оқу орнын тамамдаған соң Маңғыстау облысындағы мұнай кен орнында, бұрғышының көмекшісі болып жұмыс атқардым. былтырдан бері жұмыс тоқтап қалған себепті үйдемін.
    Міне осылай қаншалаған тепсе темір үзетін жастар екі қолға бір күрек таба алмай отыр. аулдағы қазақтың бәрі таксист. жұмыссыздық жайлаған соң қоғам азғындап, жастарымыз құмар ойындарына, ішкілікке, түрлі теріс жолдарға түсіп бара жатыр.
    Мемілекет даму қоры арқылы жеке шаруашылықты қолдау мақстаныда өсімі төмен қарыз беру ұймын құрды. бырақ шыны керек، менің досым артынан 1 жыл жұрып бил шаққа алды. ал оңтайлы қарыз алайын десең қазақстандағы банкылардің өсімінің өзі 20- 25 пайыз. өсімінің өзін төлей алмай, өмір бойы қарыздар болып өтесің.
    Барын айтта бірін айт, мемілекет шара қолданып жатыр бырақ неге нақты өнімі болмайды?жұмыссыздық неге күннен күнге етек алып бара жатыр.
    Қазақ жалқау деп өзімізді бір мінеген орыстардың тауып берген сөзі бар. қазақ жалқау емес, соны жалқау қылып отырған осы төбе билер емеспе деген сұрақ мазалайды. . .
    Кеибір ақілгөйлер айтады, 20- 30 мың теңге де ақша, жалқау болмай соны барып істеуің керек деп, дал соны айтып отырған шата 20- 30мыңдық жұмысты өзі істерме екен? жұмысқа бару үшін қоғамдық көлікке отырасың, түсте тамағыңды көшеден сатып жеисің, қоғамдық ортада жүрген соң таза ретті жұру үшін ким- кешек аласың т. б лар. 20- 30 мың теңге тек осылардың өзіне жетпеиді، оданша үйде тыныш қозғалмай отырғаның тиымдырақ. жеке өзіңді асырай алмай отырған біздер отбасымызды қалай асырамақпыз?

    Сөздің тоқ етер түйініне келгенде өкіметке қарап отырсақ, "қошқардікі түседі деп жүріп, қасқыр аштан өліпті" дегендеи аузымыздың суы құритын түрі бар. сізден сұрамақшы болғаным; Шағын орта бизнес жасау үшін жастар қандай жұмысқа бет алу керек? қазіргі қоғамда, осы кезде қандай бизнес өтімді, қандай жеке шаруа істеуге болады, өкіметтен қандай тиымды саясат бар осыны егіжей- тегіжеилі айтып берсеңіз. алла разы болсын сізден! ! !

    • Жауап
    • бн, 13/08/2015 - 15:24

    Азаматхан Әміртай:

    Уағалейкумассалам, Таңжарық мырза! Иә, сіз айтып отырған мәселелердің қазір орын алып отырғаны рас. Жұмыссыздық әлі де сол 5 пайыз көлемінде. Қазіргі экономикалық теорияда жұмыссыздықтың фрикциондық, құрылымдық және циклдық түрлерін айырып жатады. Бірақ, бізде бұлар да емес, көбіне оқу-бейім алу (сіз айтқан жоғары дипломдылар) кезіндегі қателіктер мен еңбек нарығындағы сәйкессіздіктер-ау шамасы. Мысалы, ата-ана болсақ та, балаларымыздың қандай да бір салаға бейіміне мән бермейміз, олардың табиғи қаблеттерін ескерусіз қалдырамыз. Жас кезінен оларды кәсіпкер болуға, өз бетінше ойлап, ақша тауып, жоспар жасауға тәрбиелемейміз. Ал жоғары оқу орнының дипломы қандай бір керемет карьераға кепілдік беретіндей сана қалыптасып қалған. Еңбек нарығын зерттеу, оның келешекте өзгеруіне сараптама жасау тәжірибесі әлі қалыптаспаған. Содан соң, бізде жұмыссыздар қайдан шықты деп таң қаламыз. Ал шағын және орта бизнеске келу үшін алдымен сізде бизнес-идея болу керек. Ол идеяңыздың аймақтық ерекшелікке, адамдардың сұранысына, инвесторлардың қолайына жақын екенін әбден тергілеп, әбден пысықтауыңыз қажет. Мысалы, қазір облыс орталықтары тұрмақ, аудан орталықтарында да шағын кәсіпкерлікті қолдау орталықтары, «Атамекен» ұлттық кәсіпкерлер палатасының өкілдіктері бар. Соларға барсаңыз, бизнес-жоспарлауды, бизнес-смета жасауды тегін үйретеді. Ары қарай ілкіміңіз бар болса, ісіңізге қажет қаражатты инвестор тауып не өкіметтен несие алып бастап көрсеңіз болады.

    • #12
    • Кедей
    • дн, 03/08/2015 - 17:09

    Қашан кредиттердің өсімі 2-3 пайыздан аспайтын межеге жетеміз?

    • Жауап
    • бн, 13/08/2015 - 15:25

    Азаматхан Әміртай:

    Голландияда 1 млн еуродан артық соманы жылына 1,68% өсіммен алуға болады. Қарыз сияқты. Осы мысалды енді алып келіп, біздегі жағдайлармен бетпе-бет салыстыру дұрыс емес. Әр елдің өзіне тән макроэкономикалық моделі, инфляция өлшемі, мемлекеттік реттеу тетіктерінің ерекшелігі бар. Біздің қазіргі даму жағдайымыздағы несиелеріміздің пайызы осындай болса, демек шамамыз осы деген сөз. Ал оны жылдан жылға түсіре беру мемлекеттік машина мен қаржылық машинаның келісіміне байланысты...

    • #13
    • Төкен
    • дн, 03/08/2015 - 23:19

    Қырғызстан бізден 10 жылдан аса бұрын мүше болды, Осы ДСҰ ға.Ал, біздің осынша созбалауымыздың сыры неде. Қандай кедергі болды және қазіргі уағдаластықта не ұттық, неден ұтылуымыз мүмкін?

    • Жауап
    • бн, 13/08/2015 - 15:27

    Азаматхан Әміртай:

    Бұл сұраққа лажы болса, қысқа жауап берейін, Төкен! Қазақстан ДСҰ-ға кіру үшін 19 жыл жоғалтса, «Күлшелі бала сүймекке жақсы» деген мәтелді есіңізге сала кетейін. Әрбір ел біздің кандидатурамызды қолдамастан бұрын, өзіне тиімді сауда-экономикалық шарттарына қол қойғызып алғысы келді. Себебі, ДСҰ экономикадан бұрын, саяси да ұйым. Басқасын айтпағанда, Моңғолияның өзі бертінге дейін осындай саясатқа салып, өзіне тиімсіз шарттар үшін қол қоймай келгенін білеміз. Мысалы, Қытай ДСҰ-ға кірерде ДСҰ ережелерін тұрақты негізде 100 мың адам қараған деседі. Бізде келіссөзбен айналысатын мамандардың азшылығы да болды. Одан соң ДСҰ-дан бұрын біз Еуразиялық экономикалық одаққа кіріп алғанымыз бар. Кейінгі жылдарымыз сол одақтағы тарифтеріміз бен ДСҰ-ның арасындағы айырмашылықтарды реттеуге кетті. Ақыр аяғында, Еуразиялық экономикалық одаққа да, ДСҰ-ға да, бізге де тиімді шарттарға қол жеткіздік деп ойлаймын.   

    • #14
    • Жарас
    • сс, 04/08/2015 - 8:40

    Азаматқан мырза,
    Біздің елде ең тиімді қызмет ұсынатын банк қайсысы деп ойлайсыз?

    • Жауап
    • бн, 13/08/2015 - 15:30

    Азаматхан Әміртай:

    Бұл сұраққа жауап беруді өзіме оғаш деп таптым. Бірақ сонда да жауап беретін болсам, маған клиенттерге қызмет көрсету жағынан Forte Bank, Cassa Nova банктері ұнайды.

    • #15
    • Нұрғали НҰРТАЙ
    • сс, 04/08/2015 - 8:51

    Амансыз ба? Сізден бірнеше сұрақтарыма жауап алсам деп едім:
    1, Қазақ елінде қашан ұлттық буржуазия қалыптасады? Тәуелсіздіктің ширек ғасырында неге қалыптасып үлгермеді?
    2, Қазір әлем Ресей мен Иранның саясаттағы орны ауысты деп жатыр. Батыс пен АҚШ Иранға салған санкцияларын қайтарып жатыр. Бұл өз кезегінде Иран мұнайының нарыққа шығуына жол бастаса керек. Мұнайды өндіруі Қазақстаннан әлде қайда оңай, әрі, мұнайы сапалы Иран шындап өндіріске кіріссе әлемде мұнай бағасы елу пайызға құлдырауы, сәйкесінше Қазақстан сияқты дамушы елдерде 100 пайыз девальвация болуы мүмкін екені(1 доллар 400 теңгеге тең келуі мүмкін) айтылуда. Ішкі өндірісі, өнеркәсібі дамымаған Қазақстанның бұл тұрғыдан болашаққа деген қандай да бір дайындығы бар ма?
    3, Сіздің ойыңызша, Қазақстан толық мағынасындағы дамыған отыз елдің бірі болуы қаншалықты мүмкін, және оған қандай шарт-жағдай бар?

    • Жауап
    • бн, 13/08/2015 - 15:29

    Азаматхан Әміртай:

    Лениннің өзі «Буржуазия ұлттың бейбітшілігі үшін үлес қосуы тиіс» деп айтып кеткен болатын. Бізде буржуазия бар, бірақ қоғамымыздың әртекті болғаны себепті, олар біртекті емес. Тілегі-ниеті бір емес... Олар бар, бірақ стихиялы түрде жұмыс істейді. Байыса, ауылына мешіт салады. Өз бабасына ескерткіш салады, ары кетсе соған апарар жолды жөндеп береді. Одан әрі үлкен, мемлекеттік маңыздағы жобаларға араласуға азаматтық-ұлттық саналары әлі пісіп-жетілмей жатыр. Жастарға қолдау жасауға, олардың дарындыларын іріктеп, кәсібін ашып, кітабын шығарып беруге ниеттенуге әлі де ұстанымдары жібермей жатыр. Сондықтан, біз оларға уақыт беруіміз керек. Ұлттық буржуазиядан ұлттық элита шығатын уақыт әлі-ақ туады. Ал «Иран мұнайды қарқынды өндірсе, Қазақстан құлдырап кетеді» деген пессимистік болжамыңызды қуаттай алмаймын. Біздің ризық тек мұнайда емес. Түсті және қара металлымыз, газ-көміріміз тағы бар. Әрі өкіметтің мұнай бағасы ең төменгі шекке жеткенге дейінгі экономикалық даму бағдарламасы бар, мұның бәрі ескерілген, қатты алаңдаудың қажеті шамалы. Қазақстан дамыған 30 елдің қатарына кіре ме? Әрине, кіреді. Қазірдің өзінде бірнеше параметрлер бойынша «отыздықтың» кейбір елдерінен озып кеткенімізді білетін шығарсыз. Ендеше, бұл жерде де тек уақыт пен төзім мәселесі алдымыздан шығады. 

    • #16
    • Кызылордадан
    • сс, 04/08/2015 - 11:32

    Егемен ел болғалы 24 жыл. Осы жылдарды кәсіпкерлікті дамытып жатыр. Бірақ келісесіз ғой, ол өте әлсіз. Неге бізде кәсіпкерлік баяу дамып жатыр. Қолдау аз емес мемлекет тарапынан. Әлде, оның ғылыми негізі әлсіз бе, кәсіпкерлік білім жетіспей ме? Қалай ойлайсыз?

    • Жауап
    • бн, 13/08/2015 - 15:31

    Азаматхан Әміртай:

    Кеңестің жоспарлы экономикасы құлағаннан кейін, біз ондаған жылдар бойы сол кездегі психологиялық санамен күресумен болдық. Байды қор, кедейді зор тұтқызған псевдоғылыми стратификация да өз зардабын тигізді. 90-шы жылдар амалсыздан ала дорбамен барахолкаға шығып кеткен жабайы саудасымен ерекше, білесіз. Тек 2000-шы жылдардың басынан бастап бұқараның ішінде кәсіпкерлікке, бизнеске деген дұрыс көзқарас қалыптаса бастады. Қазір, шүкір, кез-келген жастан сұрасаңыз, бизнеспен айналысқысы келетін арманы бар. Бастысы, біз өз санамыздағы бизнеске қарсы иммунитетті жоя білдік. Ең қиын кез артта қалды. Ендігісі оңайлай береді. Иә, өкімет қанша жерден көмегін аяғанмен, одан біз байып кетпейміз. Біз өзіміз құлшыныс танытуымыз керек. Біз жалқаулықты жөргегінде қалдырып, еңбекқорлықтың үлгісін көрсетуіміз қажет. Әйтпесе, мемлекет бесігіне салып бөлей бергенін күтсек, онда біздің кәсіпкерлігімізден не пайда? Ал сол бизнесті халықаралық деңгейге жеткізу енді бұл басқа әңгіме. Бұл жерде енді ілкім мен ептен басқа, бизнесті басқару, нарықты зерттеу бойынша үлкен ілімдерді игеру қажет. Мысалы, Проктер энд Гэмбл компаниясы өзінің тұрмыстық химиясын қолданатын әрбір үй қызметшісінің психологиясын, мінезін үйіндегі күйеуінен артық біледі десем, артық айтпаймын. Бұл деңгей. Бұл ғылым. Бұл құйылған қаржы. Міне, осындай деңгейлерге жетуді біз мақсат етуіміз керек сияқты..

    • #17
    • Кәсіпкер
    • сс, 04/08/2015 - 12:17

    Мемлекет тарапынан ішкі өнімнің үлесін арттыруға миллиардтаған ақша бөлінді. Бағдарламалар жасалынды. Қазақстандық өнімдердің экспортын жылжытуға KAZNEX жобасы іске қосылды. Айтарлықтай нәтиже бере алды ма осы жобалар? Нақты қандай өнімдерді көрсетуге болады осы жоба аясында шетел нарығына жол тартқан? Қалай игеріліп жатыр қаражат? Сіздің пікіріңізді білгім келеді.

    • Жауап
    • бн, 13/08/2015 - 15:32

    Азаматхан Әміртай:

    Бұл мемлекеттің арнайы бағдарламасынан бөлек, сол мемлекеттегі кәсіпкерлердің қаншасының білімі-қарымы өз өнімін халықаралық нарыққа шығаруға жетіп тұр, міне осыған тіреліп тұр. Мемлекет қанша жерден қаржы құйса да, кәсіпкер оған өзі іштей дайын болмаса, ештеңе істей алмайсың. Мысалы, маған ара-тұра АҚШ-тағы елшілігімізден қоңырау шалады: «АҚШ нарығына шығара алатындай өніміміз бар ма? Біз соны шығаруға көмектесейік». Жоқ! АҚШ-қа экспорттайтындай жоғары технологиялы өнім бізде жоқтың қасы. Сондықтан, бұл әлгі қазақ көрерменін жарылқамай жатып, Венеция не Канны байқауы үшін кино түсірген режиссердің тірлігі сияқты. Біз әлі ол деңгейге шыққан жоқпыз. Оған дейін ортамызды күшейтіп, бірлігімізді бекемдеп, ақшамызды көбейтіп, технологиямызды жаңалап алу қажет.

    • #18
    • Шәріпжан Кәрім
    • сс, 04/08/2015 - 12:38

    Құрметті Азаматхан Сайлауұлы, менің сізден сұрағым мынадай. Байқауымша теміржол саласында да қызмет атқарған екенсіз. Жалпы тауар қатынасында тасымал мәселесі, көлік байланыс мәселесі ең маңыздысы шығар. Біздің темір жол қатынастарымыз дүние жүзілік бәсекелестікке қаншалықты сай? Сапасы жағынан, қолжетімді бағыттар дейсіз бе, теміржол саласы дайын ба бұл тұрғыда? Неге теміржолдың, пойыздардың сапасын жақсартпаймыз? Жүк айналымынан түскен қаржы қайда кетіп жатыр?

    • Жауап
    • бн, 13/08/2015 - 15:33

    Азаматхан Әміртай:

    Сұрағыңыз өте орынды. Иә, бұл салада қызмет жасағаным рас. Кеңес кезеңінде қалыптасқан біздің теміржол жүйеміз дүниежүзілік бәсекелестікке шыны керек, шыдас бермейді. Оны бәрі біледі. Локомотиві де, вагоны да ескі, жылдамдығы төмен, жолдардың дені тозған, бұған модернизацияны қарқынды өткізбесе болмайды. Жасалып та жатқан сияқты – қазір біраз облыс орталықтарын Астанамен жүрдек «Тальго» пойызы жалғайтын болды. Теміржол саласында жұмыс істеп жатқан 145 мыңдай адамның алдындағы әлеуметтік жауапкершілік те оңай емес. Сол үшін «Қазақстан темір жолы» қазір логистикалық бағытты жақсы дамытып жатыр. Тіпті жол құрылысына да араласып жатқанын білемін. Бұл қадамдары құптауға тұрарлық.

    • #19
    • Алия
    • сс, 04/08/2015 - 12:41

    Азаматхан аға, бұл алып бәсекелестік алаңында отандық өнімдерімізді қалай дамыта аламыз? Кәсіпкерлерге қандай кеңес берер едіңіз?

    • Жауап
    • бн, 13/08/2015 - 15:34

    Азаматхан Әміртай:

    Біз ең алдымен қазақстандық брэндтерді қалыптастыруымыз керек. Ол брэндті жасаудағы промоушнның рөлін білесіз. Ол дүниені әдемілеп бумалаудан бастап, жарнамасын жасау, халықты сендіру, жылдам жеткізу деген кезеңдерді дұрыс атқара алсақ, біздің өнімдеріміз негізі ешкімнен кем емес. Мысалы, Шардараның балығы аз да болса Еуропаға экспортталатынын білемін. Бірақ, арзан бағаға. Себебі, брэнд емес тағы да...

    • #20
    • Мухтар
    • сс, 04/08/2015 - 13:03

    Азаматхан бауырым, жаңалықтарды жаны сүйетін, бастамашыл жастардың бірі ретінде танимын сені. Кәсібің алға бассын!
    Осы тұрғыда өзіңнен сұрарым, губернатор Саакашвили Одессаға әлемдік авиакомпанияларды кіргізу жөнінде мәселе көтерді. Соның есебінен бұл саладағы монополияға тосқауыл қоймақ. Қарапайым халық 2 есе арзан бағада билеттер алатын болады. Бізда арзан авиакомпаниялар кашан ұшатын болады? Air Astana сияқты жеке авиакомпаниялардың қатары қашан артады? Авиабилеттердің құны қашан арзандайды? Бұл мәселе көтерілер мек екен?

    • Жауап
    • бн, 13/08/2015 - 15:36

    Азаматхан Әміртай:

    Рахмет, Мұхтар бауырым! Сіз көтеріп отырған сұрақтың бәрі қазір жайымен шешіліп жатыр. Алдыңғы жауаптағы Шардара дегеннен шығады ғой, білуімше Шымкенттен Шардараға ұшып бару құны 5 000 теңге. Осыдан жарты жылға дейін Астанадан Таразға, Тараздан Астанаға барып қайту 54 000 теңгеге шығып жүрсе, қазір 32 мың теңгеден аспайды. Жергілікті авиабайланыстағы бәсекелестік күшейгені себепті, билеттердің бағасы түсіп жатыр. Бұған енді Елбасының тапсырмасымен құрылған Qazaq Air компаниясын қосыңыз. Ол толыққанды жұмыс істеп бастады, демек билет тағы да арзандайды. 

    • #21
    • Ажикенова Мадина
    • сс, 04/08/2015 - 14:46

    ДСҰ деп жүріп, біздің экономикамыздың құраушы бөлігі ауылдың жайын қайда қалдырамыз. Халқымыздың 50 пайызы ауылды жерлерде тұрады. Солардың жағдайын неге ойламаймыз? Индустрияландыруға байланысты улкен кәсіпорындар қалалы аймақтардан ашылып жатыр. Ауыл экономикасын қалай көтере аламыз? Ондағы жастардың жұмыс мәселесі өз алдына бір мәселе. Кәсібін ауылдан ашқысы келгендерге берер кеңесіңіз бар ма? Кәсіпкер ретінде, инвестор ретінде ауылға ақша салуға дайынсыз ба?

    • Жауап
    • бн, 13/08/2015 - 15:37

    Азаматхан Әміртай:

    Дәл осы ДСҰ-ның арқасы – сіз айтып отырған ауылдарға инвесторлар тартып, технологиялар әкелу мүмкіндігі туады. Бұдан бөлек, ауыл балаларын шетелге оқытқызып келуге де көп мүмкіндіктер ашылатын сияқты. Ал ауылдағы бизнес түріне келсек, ең алдымен ауыл-аймақта өндірілетін өнімдерді, мысалы, ет-сүтті қалаға жеткізу жағын, шіркін, жақсылап қолға алса.. Ауылдағы сауда-саттықты жаңа деңгейге көтеру, миникомбинаттар ашу ісі, мысалы. Өз басым ауылға инвестиция салуға дайынмын. Оның бір мысалы ретінде, қазір сол ауыл жолдарын жөндеуге байланысты ірі жобаларға араласып жатырмыз. Бұйырса, жолдарды жөңдеп, халықтың батасын да алып қалармыз.

    • #22
    • Мұрат
    • сс, 04/08/2015 - 16:01

    Құрметті Азаматхан мырза. Ішкі жалпы өнім бойынша алдыңғы қатарлы 50 елдің қатарына кірдік деп жүрсіңдер, ал еңбекақылары бойынша мұғалім, дәрігер, қарапайым мемлекеттік қызметшілердің еңбек ақысы сол 50 елден қанша есе кем екенін білесіз бе. Шынында сол қызметшілердің көбі кедейшілікте өмір сүріп жатыр.

    • Жауап
    • бн, 13/08/2015 - 15:38

    Азаматхан Әміртай:

    «Бақытты боламыз десек, бақытты боламыз»... Иә, статистика мен нақты өмірдің арасындағы байланыс кейде берік бола бермейді. Бірақ, сол мұғалім не дәрігердің қазір ешқайсысы кедейшілікте өмір сүріп отыр деп айта алмаймын. Олар да баласына тойын жасап, қызын ұзатып, құдасын сыйлап, алыс-жақын туысына барып, ел қатарлы емес, елдің алды болып отыр. Менің де біраз туыстарым осы бюджеттік салада. Бірақ, маған алақан жайып келгені болған емес.

    • #23
    • Азамат
    • бн, 06/08/2015 - 11:34

    Азаматхан мырза, ассалаумағалейком! Қазақта сөз бар досыңды көрсет өзіңнің кім екеніңді айтып берем деген. Сіздің достарыңыз кім? Қандай ортақ кәсіптеріңіз бар?

    • Жауап
    • бн, 13/08/2015 - 15:39

    Азаматхан Әміртай:

    Мен О.Жәутіков атындағы Республикалық мамандандырылған дарынды баларға арналған физика-математика орта мектеп-интернатын бітіргенмін. Және қазір қасымдағы негізгі достарым да сол «физмат мектебінен» қалды. Олардың біразы әртүрлі деңгейдегі әкімшілік орындарда, енді біразы бизнес саласында. Ортақ істеріміз де жоқ емес.

    • #24
    • Самат
    • бн, 06/08/2015 - 11:37

    Елбасыға көзқарасыңыз қандай?

    • Жауап
    • бн, 13/08/2015 - 15:40

    Азаматхан Әміртай:

    Елбасыға көзқарасым басқа да миллиондаған қазақстандықтардікі секілді – ол даусыз лидер. Және ең бастысы, еліміздегі және сырттағы алып күштік, қаржылық ықпалды топтар, кландар мен қарапайым халықтың арасында нәзік балансты ұстай отыра, көп жағдайда мәселені әлеуметтің пайдасына шешіп отырады.

    • #25
    • Жасұлан
    • бн, 06/08/2015 - 16:46

    Азаматхан мырза!
    Елдегі депутаттардың жұмысына көңіліңіз тола ма? Оларға қандай ұсыныс айтар едіңіз?

    • Жауап
    • бн, 13/08/2015 - 15:41

    Азаматхан Әміртай:

    Қызық болғанда, көңілім толады. Маған бір-біріне жұдырық алып жүгіретін шоу-Парламент қызық емес. Сәл іш пыстырар болса да, маңызды заңдарды кезек күттірмей қабылдап беретін Парламент, иә біздікі, иә, оған көңілім толады. Мысалы, бизнеске қажетті ең басты заңдар бізде басқалардан бұрын қабылданып қойды.

    • #26
    • Ораз
    • бн, 06/08/2015 - 16:50

    Ислам даму банкі деген банк туралы еститін едік. Сол банк ешқандай өсімсіз кредит береді дейтін еді. Бірақ біздің елімізге кірмеді. Әлде кіргізбеді ме білмеймін. Негізі Ислам даму банкі қандай банк? Ол банк біздің елімізге қаржылық қолдау жасап жатыр ма?

    • Жауап
    • бн, 13/08/2015 - 15:41

    Азаматхан Әміртай:

    Ислам банкингі біздің елге келіп жетті. Бірақ, біздің алып елде олар әлі теңізге тамған тамшы секілді. Олардың саны көбейген кезде, жүйесі де реттеліп, бәріне қолжетімді шарттар пайда болады деп сенемін.

    • #27
    • Дана
    • бн, 06/08/2015 - 16:56

    Сәлеметсіз бе! Дүние сауда ұйымына мүше болып, кейін мүшеліктен шығып кеткен қандай да бір ел бар ма? Осы ұйымның қызығын көріп, байып отырған қандай елдер бар?

    • Жауап
    • бн, 13/08/2015 - 15:43

    Азаматхан Әміртай:

    ДСҰ-ның құрамында болып, одан шығып кеткен мемлекетті білмейді екенмін. Керісінше, оның құрамына әлі кіре алмай отырған 30-дай елді білемін) Ал ДСҰ-ның арқасында экономикасын көтеріп алған ел деп бәрін айтар едім. Бірақ, әрине 2001 жылдың желтоқсанында қосылған Қытайдың орны ерекше. 2002 жылы Қытайға келген тікелей инвестицияның көлемі 35 пайызға артты, экономикасы толық реструктуризациядан өтті, экспортқа шығатын тауары көбейді. Бізге де пайдасы тиеді әлі. Біз әлі нарықтағы бар нишаларымызды таба алғанымыз жоқ. Содан да, пайдасын сәл кеш көретін шығармыз...

    • #28
    • Света
    • бн, 06/08/2015 - 17:06

    Айтыңызшы, WTO ұйымы Қазақстанда қандай да бір зауыттар салуға, өндіріс орындарын ашуға, немесе қандай да бір заттарды өндірудің құқығын тек қазақстанға беруге, және Қазақстанның осындай өнімдерін яғни осындай өнімдерді тек Қазақстаннан сатып алыңдар деп ұйымның басқа мүшелеріне бұйырық беруге құзыреті жетеді ме?

    • Жауап
    • бн, 13/08/2015 - 15:44

    Азаматхан Әміртай:

    ДСҰ-ның сіз көрсеткендей қатал директивалар беретіндей құзыреті жоқ. Бірақ одан да қатал бастықты білемін – ол нарық. Қай тауарға сұраныс бар, сол өндіріледі, басқалай реттеушіні мен білмедім.

    • #29
    • Толғанай
    • бн, 06/08/2015 - 17:14

    Дүниежүзілік сауда ұйымының еліміздегі мұнай бағасына ықпалы қаншалықты болмақ. еліміздегі жанар-жағар май қашан арзандайды? Керісінше қымбаттап кету қаупі бар ма? Ал, Қазақстан тарапы Астығын шетелге сата ала ма?

    • Жауап
    • бн, 13/08/2015 - 15:45

    Азаматхан Әміртай:

    Нақты ұйымға кіруден не кірмеуден мұнай бағасына өзгерісті білмедім. Себебі, біз осы ДСҰ-ға ресми кірместен бұрын-ақ, кемі 5-6 жылдың көлемі сол ДСҰ-ның шарттарымен жүрген едік. Сондықтан, нақтылай бұл ұйымның мұнай бағасына еш ықпалы жоқ. Ал жалпы мұнай бағасын өзімізге тағы да тиімді ету үшін менің ойымша, шағын мұнай өндеу зауыттарын көбейту керек. Осылай ғана бәсекелестікті арттырып, бензин құнын түсіруге болады.

    • #30
    • Сағымбай
    • бн, 06/08/2015 - 17:16

    Мынау Еуразиялық экономикалық деп, осы ұйымның "еуро" сияқты өз ақшасы шығады деп жүргендердің сыбысына не дейсіз? Ол мүмкін бе? Көктемде біраз қауесеттер тарады ғой үлкен басшылардың аузынан. Егер ондай валюта шыға қалса теңгенің күні не болады? Ол валюта қалай аталуы мүмкін.

    • Жауап
    • бн, 13/08/2015 - 15:46

    Азаматхан Әміртай:

    Еуразиялық экономикалық одақтың аясында мейлі, алтын, мейлі теңге деп аталсын, қандай валютаның шығуына әлі ерте, өте ерте. Себебі, бұл одаққа кіретін елдердің ішкі үлесінде импорттың орны әлі де көп, экономикасы әлсіздеу, нарығы кішкене. Сондықтан, жаңа валюта шығарғанымен, экономикалық қиындықтарға оның төтеп беруі өте қиын болмақ. Әрі ортақ валюта шығару үшін осы одаққа кіретін елдердің арасындағы саяси ауызбіршіліктің болуын естен шығармау керек. Қысқасы, бұл әлі талқылауға тұрмайтын тақырып.

    • #31
    • Ақмарал
    • жм, 07/08/2015 - 10:01

    Осыдан 1-2 жыл бұрын БАҚ беттерінде ақпараттық қауіпсіздікке байланысты сұхбаттарыңыз жарияланып жүрді. Әлемдік тұрғыдан қарағанда, ақпараттық қауіпсіздікті қорғау деңгейі қазір елімізде қандай дәрежеде? Мемлекеттік органдарда жолға қойылды ма бұл мәселе? Кім бақылайды? Қазір оларда ақпарат қауіпсіздігі қаншалықты қорғалған?

    • Жауап
    • бн, 13/08/2015 - 15:08

    Азаматхан Әміртай:

    Ақпараттық қауіпсіздік саласын қорғау қазір тек Қазақстан емес, әлемде бірінші орында тұрған мәселе. Бізде ең алдымен ақпараттық қауіпсіздік мәселесін шешкеннен кейін барып, ақпараттандыруға кіріскен жөн. Ал жалпы ақпараттық қауіпсіздік бойынша Қазақстан соңғылардан емес. Мемлекет тарапынан электрондық құжат айналымы, электрондық үкімет, электрондық мұрағат және оларды қорғау бойынша қыруар жұмыс атқарылды. Барды бар деп айту керек.    

    • #32
    • Қасым
    • сс, 11/08/2015 - 16:18

    Cіз коррупцияны қалай азайтуға болады деп ойлайсыз. 20 жылдан бері көптеген жақсы заңдар қабылданды, көптеген шаралар жасалып жатыр, бірақ С. Жемқорлық әлі күшінде тұр. Бұл билік басындағылардың сөзі мен ісі алшақ жатқандығы, халықтық бақылаудың жоқтығы, билікті халық сайламауынан, ата заңымызды жоғары қойып сақтамаудан т.б. емес пе. Елімізде жасөспірімдер арасындағы суицидтен дүние жүзі бойынша 1-3 орын алуымыз қоғамымыздың аурулы екенін көрсетпей ме?

    • Жауап
    • бн, 13/08/2015 - 15:06

    Азаматхан Әміртай:

    Жемқорлық мәселесіне келгенде мен халықтың да, мемлекеттің де атына пәлендей айып таға алмаймын. Себебі, сол халықтың арасындамыз, билік деген де сол арамыздан үкілеп шығарған өз қатарымыз, біреудің ұлы, біреудің әкесі.. былайша айтқанда, екі ат қойғанымен, бір кемедегі жанбыз. Біздегі жемқорлықтың өрістеуіне кешегі кеңестік кезеңнен қалып кеткен патерналистік сана өз ықпалын берді, «балапан басымен, тұрымтай тұсымен..» кеткен өтпелі кезеңде «біреуден тартып болсын, алдап болсын, әйтеуір күн көр» деген сана да салқынын тигізбей қалмады. Ақсақалымыз қалмады, жастарымыз желең қағып, арзан дүниеге әуестеніп кетті. Бастысы, бізде аманат деген ұғым арзаңдап кетті. Мысалы, мемлекеттің ақшасы – ол саған берілген аманат. Жол жөндеуге берілген қаржы ол сенің мойныңдағы қарыз, оны жөндеу енді саған парыз. Білесіз бе, біз балаларымызға аманат, қарыз, парыз, борыш деген түсініктерді сіңірмей жатып, «әйтеуір бастық бол», «папка көтер де әкім болшы» деп жоғарыға құйрығынан итермелеп жатамыз. Қасиетті ұғымдарға иланып, иманы берік болып өспеген соң, ол қолына түскен тиынды олжа көреді емес пе? Сондықтан, рухани кемелдену, рухани жандүниеміздің таза болуын қаласақ қана, қылмысқа да, жемқорлыққа да ұрынбаймыз. Әйтпесе, әркімнің ризығы өзінде. Байлық бәріне жетеді. Тек ынсап пен иман керек деген ойдамын. Сіз айтқан суицидтің де шешімі осында жатыр.

    • #33
    • admin
    • сс, 18/08/2015 - 15:22

    Кезекті интернет-конференция қонағымызға сауалдар қойып, ой бөліскен барша оқырмандарға және сауалдарға мейлінше еркін, толық жауап берген Азаматхан Әміртай мырзаға алғыс білдіреміз!

Вход