Düysenbi, 18 Jeltoqsan 2017
Janayqay 46670 104 pikir 10 Säuir, 2017 sağat 11:07

Qırqınan şıqpağan qızdıñ janayqayı Qayrat Mämige jete me?

QR Joğarğı sotınıñ törağası

Qayrat Mämidiñ nazarına!

Qwrmetti Qayrat ata!

Men Käuker Janerke Janbolatqızı 2017 jıldıñ 27 aqpanında düniege keldim. Men düniege kelmey twrıp, yağni ötken 2016 jıldıñ tamız ayınıñ 3-i küni äkem kisi qolınan qaza taptı. Basınan qattı tigen soqqınıñ kesirinen äkeşim Äbdikerimov Janbolat Käukerwlı bw düniemen qoştasıp kete bardı.

Şeşem qaldı, zar eñirep. Äjem men atam qaldı, qaraşañıraqtıñ iesi sanalatın wldarınıñ qabirin qwşaqtap. Mektep esigin biıl ğana aşqan äpkem qaldı, äkesiz jetim bolıp. Äkemniñ bauırları qaldı, «qanğa-qan, janğa-jan» dep inileriniñ kegin ne qaytararın, ne qaytarmasın bilmey... Men ol kezde dünie esigin äli aşpasam da, anamnıñ qwrsağında jatıp, sol bir auırtpalıqtıñ bärin twla boyımmen sezinip jattım.

Qayrat ata, qazaq jetimin jılatpağan el edi ğoy. Bizdi jılatıp, äkesiz jetimek etken Kerimjan Rüstem attı azamat qazir bostandıqta «gölayttap» jür. Meniñ äkemniñ sonda swrauı bolmağanı ma? Bireudiñ malın öltirse de, jazağa tartatın zañımız bar edi ğoy. Meniñ äkemniñ mal ekeş mal sekildi de qwnı bolmağanı ma? Osını oylasam, jan-düniem titirkenip, twla-boyım qalşıldap ketedi. Dünie esigin äli aşıp ülgermegen säbidiñ jüregine jara salu – Täuelsiz, damığan, älemdegi 30 eldiñ sapına qosıluğa talpınğan memleket üşin wyat emes pe? Bir üyli jandı qayğınıñ teñizine batırğan qılmıskerdi bostandıqqa jibere salu bükil qazaq eli azamattarınıñ aşuın tuğızarına bek senemin. Sondıqtan da, Sizge hat jazıp, kömek qolıñızdı sozuıñızdı ötinip swraymın.

Qayrat ata! Sizdiñ men sekildi nemereñiz bar ma? Qwday onıñ betin arı qılsın, sol nemereñiz meniñ küyimdi keşip jatsa, tınış wyıqtar alar ma ediñiz?. «Är qazaq – meniñ jalğızım» deytin wlttıñ wlı emes pe edik?!. Demek, men Sizdiñ de nemereñizbin. Meniñ sözimdi jerge tastay körmeñizşi.

Äkem Äbdikerimov Janbolat Käukerwlı kisi qolınan qaza taptı. Qarağandı oblısına qarastı Balqaş qalalıq sotı qılmıstı isti qarap, Kerimjan Rüstemdi 106 babtıñ 3-tarmağımen (Densaulıqqa qasaqana auır ziyan keltiru) qılmıstı dep tauıp, 9 jılğa bas bostandığınan ayırdı. Kerimjan Rüstemniñ zañgerleri bwl jazamen kelispey, Qarağandı oblısınıñ sotına jüginedi. Oblıstıq sot Balqaş qalalıq sottıñ ükimin özgertpey küşinde qaldıradı. Osılayşa äkemdi öltirgenderdiñ qılmıstıq isi Joğarğı sotqa deyin jetedi. Nege ekenin qaydam, Joğarğı sot Kerimjan Rüstemniñ qılmısına belgilengen 106 babtıñ 3-tarmağın 104-baptıñ 1-tarmağına özgertip (Abaysızda qazağa wşıratu 1. Abaysızda qazağa wşıratu – üş jılğa deyingi merzimge bas bostandığın şekteuge ne sol merzimge bas bostandığınan ayıruğa jazalanadı), sosın Elbasınıñ täuelsizdiktiñ 25 jıldığına jariyalağan Raqımşılığına ilip, sot zalınan bosatıp jiberdi.

Qwrmetti Qayrat ata! Elbasımızdıñ raqımşılığı qılmıskerge bwyırıp, bizge bwyırmay ma? Bizdi töbemizden tas tüskendey eseñgiretip tastağan bwl ükimniñ soñı nege aparatının öziñiz oylap köriñizşi.

Äjem Külzipaş Seyitova 

Birinşiden, äjemdi ayaymın. Äkemniñ qazasınan keyin densaulığı kürt naşarlap ketip edi. Joğarğı sottıñ şeşiminen keyin tipti jağdayı tömendep, öz ayağımen jürgen äjem mügedek arbasına tañılıp qaldı.

Atam Äbdikärimov Käuker

Ekinşiden, atam «balaları (äkemniñ bauırları) «kek quamın» dep bir bälege wşırap qala ma dep janı şığarday şırıldap jür.

Üşinşiden, äkemniñ bauırları Qazaqstan mwsılmandar dini basqarmasına barıp, qazaqı jolmen «qanğa qan, janğa jan» dästürin jañğırtuğa pätua swradı. Müftiyat pätuä beruden üzildi-kesildi bas tartıptı. Mwnıñ soñı tağı da qılmısqa jalğasıp ketse, kim jauaptı?

Anam Äbdikerimova Ğaliya Batırjanqızı men äkem Äbdikärimov Janbolat Käukerwlı

Törtinşiden, otız jasında azamatınan ayrılıp, jesir qalğan şeşem Äbdikärimova Ğaliya Batırhanqızı zañ jolımen ädildik tappasa, joğarğı sottıñ aldına barıp özin-özi örteui äbden mümkin ğoy. Mwnday jağday bola qalsa, äkemniñ isin qarağan Joğarğı sottıñ qızmetkerleri jauaptı bolmay ma?

Käuker Zere Janbolatqızı

Besinşiden, mektep tabaldırığın biıl attağan Käuker Zere Janbolatqızı men düniege jaña kelgen meniñ keybir şeneunikterdiñ kesirinen küştik qwrılımdarğa degen keri közqarasımız qalıptasıp ketse, bwl Täuelsiz Qazaqstan üşin eñ ülken qauip emes pe? Bir üyli jandı bağıp otırğan äkemniñ janınıñ keybir sud'yalarğa kök tiındıq qwnı joq şığar. Biraq, keudesinde şırıldağan janı bar jetimekterdiñ köz jasınıñ qwnınıñ qanday bolatının Elbasımız jaqsı biledi.

Qwrmetti Qayrat ata!

Äkemniñ nwrlı jüzin ömirde bir ret köre almağan meniñ tağdırımdı eşbir balağa Qwday körsetpese eken. Sol üşin de Elbasınıñ halıqqa jasağan jaqsılığın, raqımşılığın öz müddelerine paydalanıp, bizdi jılatqandarğa şara qoldanuıñızdı swraymız.

Qazaqstan zañı barlıq adamğa birdey. Biz ol zañğa qwrmet etemiz. Qwrmet etkendikten de, Sizge hat jazıp, kömek swrap otırmız.

Äkemdi öltirgen adam bostandıqta jürgen kezde Täuelsiz Qazaqstan jerin basıp jüru men üşin öte qorqınıştı, üreyli.

Twla-boyımdı bilegen osı üreydi seyiltiñizşi, Qayrat ata!

Mınau - menmin!

Sälemnen Käuker Janerke Janbolatqızı

Abai.kz

 

 

 

104 pikir