Düysenbi, 18 Jeltoqsan 2017
Dat 2786 20 pikir 11 Tamız, 2017 sağat 15:29

«Ay-hay, 25» pen «Pay-pay, 25» turalı

 

Äriptesim Bibigül Däuletbekqızı äleumettik jelide mağan qatıstı bazınasın aytıptı. Bwl bazınanıñ meniñ naqtı qolıma alğan jwmısıma tikeley qatısı bolğandıqtan, Sizderdiñ nazarlarıñızğa öz jauabımdı wsınğım keledi dep jazdı belgili telejurnalist, "Habar" Agenttigi" AQ-nıñ Basqarmalar törağasınıñ orınbasarı Rinat Kertaev FB-dağı jeke paraqşasında.

Birinşiden, «Habar» Agenttiginiñ Körkemdik keñesine Bibigül Däuletbekqızınan «Ay-hay, 25» degen atpen eşqanday bağdarlamanıñ jobası resmi wsınılğan joq. Biraq, menimen kezdesuinde birneşe jobasımen qatar «Ay-hay, 25» turasında da auızşa bayandağanı ras. Bıltır, yağni Täuelsizdiktiñ 25 jıldığına oray şirek ğasır işinde elimizdiñ jetken jetistikteri körsetiletin basqa da jobalar Körkemdik keñeske wsınılğan bolatın. Sonıñ biri – «Fresh TV» kompaniyasınıñ ideyası. Bağdarlamanıñ avtorları jäne scenaristeri – Äsel Qayrolla jäne Almas Toqabaev. Atalğan avtorlar jäne öndiruşi kompaniya bağdarlamanıñ atauına qatıstı mınaday wsınıstar bergen: «Ösken örken», «Pay-pay, 25», «Şirek ğasır». Körkemdik keñestiñ şeşimi boyınşa atalğan joba efirge şığaruğa layıq dep tanılıp, onıñ «Pay-pay, 25» degen atauına toqtağan bolatın.

Ekinşiden, «Pay - pay, 25» jobası avtorlıq qwqıq talaptarına tolıqtay say jüzege asırılğan bağdarlama. «Fresh TV» kompaniyası bağdarlama jasau jäne prokat talaptarına say «Habar» Agenttigine bağdarlamanıñ avtorlıq qwqıqtarın tapsırdı. Avtorlıq qwqıq salasındağı zañnama talaptarı tolıqtay saqtalğan jäne «Habar» Agenttigine tiesili.

Ärine, «Pay - pay, 25» degen sözdiñ «Ay - hay 25» degen sözge wqsastığı bar bolğanmen, qwrılımı müldem basqa. Bizdiñ arnadan ötken bağdarlamada el ömirindegi eleuli oqiğalardıñ jay-japsarı jan-jaqtı bayandaldı. Studiyağa kelgen tanımal twlğalar (sayasatkerler, sportşılar men ziyalı qauım ökilderi) öz estelikterimen bölisip, elimizdiñ ötkeni men keleşegin talqılaydı. Osılayşa, Bibigül Däuletbekqızı wsınğan «Ay - hay 25» jobasımen eşqanday wqsastığı joq jäne bwnı menimen kezdesuinde özi de moyındağan bolatın. Qajet bolğan jağdayda, Agenttik zañ jüzinde öz qwqığın qorğap şığuğa dayın.

Bibigül Däuletbekqızınıñ osı jazbalarınan tek bir wyğarımına tolıq kelisemin. Eşqanday qızmet te, mansap ta mäñgilik emes. Men üşin halıqtıñ müddesi alğı orında. Sondıqtan, bwl müdde jolında kimmen bolsın, kezdesuge dayınmın, qanday ideya bolsın qarastıruğa äzirmiz. Bizdiñ Agenttikke qarastı efirden ötetin jobalardıñ bäri Körkemdik keñeste qaralatının eskertkim keledi. Jobanı qarau ya onı efirge jiberu boyınşa şeşimdi men jalğız qabıldamaymın. Tağı da qaytalap aytamın, memleketşildik sananı bekitetin, azamattıq qoğamnıñ deñgeyin arttıratın, är azamattıñ tuğan jerine degen süyispenşiligin köteretin kez-kelgen jobanı qarastıruğa äzirmiz.

P.S. «Pay-pay, 25» bağdarlamasınan beyhabar, onıñ erekşeligin bilmeytin, tanıs emes adamdar köremin dese, tömendegi silteme arqılı ötuge boladı:

http://khabar.kz/kz/m-ra-at-paj-paj-25

Abai.kz

20 pikir