Düysenbi, 18 Jeltoqsan 2017
Bolğan oqiğa 1307 1 pikir 12 Qırküyek, 2017 sağat 08:40

WQK-niñ bwrınğı basşısı sottaldı

Aqmola garnizonınıñ äskeri sotı biıl 24 tamızda WQK-niñ bwrınğı törağası Nartay Dütbaevtıñ qılmıstıq isi men oğan qatıstı üş adamğa ükim şığarğan. Sot procesi jabıq türde ötti. Sot ükimi turalı resmi aqparat keşe ğana Qazaqstan Äskeri sotınıñ saytında jariyalandı.

Ükim boyınşa, Nartay Dütbaev memlekettik qwpiyanı jariyaladı jäne qızmet babın asıra paydalandı dep tanılıp, jeti jıl altı ay bas bostandığınan ayıru jazasına kesildi. Bwğan qosa Dütbaevtıñ memlekettik lauazımdı qızmet atqaruına ömir boyına tıyım salınıp, onı "general-leytenant" äskeri şeninen jäne memlekettik nagradalarınan ayıruğa wsınıs jasalğan.

"Dütbaev isi" boyınşa sotqa tartılğan Rais Mwratov pen Nwrlan Hasen de tap osınday qılmıs jasadı dep ayıptalıp, ekeuine de bes jılğa bas bostandığınan jäne ömir boyı memlekettik lauazımdı qızmet atqaru qwqığınan ayıru jazası tağayındalğan. Nwrlan Hasenniñ memlekettik nagradalarınan ayıruğa wsınıs jasalğan.

"Dütbaev isindegi" soñğı sottaluşı Erlan Nwrtaev "memlekettik qwpiyanı jariyalauğa bolıstı" dep ayıptalıp, üş jıl altı ayğa bas bostandığınan ayıru jäne memlekettik lauazımdı qızmet atqaru qwqığınan ayıru jazası kesilgen.

Äskeri sottıñ aqparatına qarağanda, ükim zañdı küşine äli enbegen.

Nartay Dütbaev – Qazaqstan täuelsizdigin jariyalağalı beri ötken şirek ğasırda sottalğan arnayı qızmettiñ ekinşi basşısı. Birinşisi – arnayı qızmetti eki ret basqarğan, al 2008 jılı "memleketke opasızdıq jasadı" jäne "memlekettik töñkeris jasauğa ärekettendi" degen ayıptar boyınşa sırttay sottalğan Älnwr Mwsaev. WQK basşıları retinde Mwsaev pen Dütbaevtıñ atı-jönin WQK saytınan alıp tastağan.

Nartay Dütbaev WQK-ni 2001 jılğı jeltoqsannan 2006 jılğı aqpannıñ 22-sine deyin basqarğan. Ol oppoziciya jetekşisi Altınbek Särsenbaywlın qastandıqpen öltiruge WQK-niñ "Arıstan" arnayı jasağı qızmetkerleriniñ qatısı barı anıqtalğannan keyin otstavkağa ketken. Dütbaev otstavkağa ketken soñ WQK akademiyasınıñ basşısı, prezident Nwrswltan Nazarbaevtıñ keñesşisi boldı, az uaqıt "Qazatomönerkäsibi" wlttıq kompaniyasınıñ vice-prezidenti qızmetin atqardı.

Abai.kz

1 pikir