Seysenbi, 19 Jeltoqsan 2017
Körşiniñ köleñkesi 3292 71 pikir 12 Qazan, 2017 sağat 14:59

Atambaev "tüye-sayasatker" emes

Qırğız Prezidenti Almazbek Atambaevtıñ Ala-Arşa rezidenciyasında mwğalimderge marapat tapsıru kezinde emociyağa berilip, Qazaq eliniñ köşbasşısına til tigizdi. Jeke adam retinde ärine qanday oy aytsa da qwqılı edi. Biraq, Almazbek Atambaev körşi eldiñ prezidenti, resmi memlekettiñ birinşi adamı emes pe?. Osınday lauazımdı twlğanıñ özin-özi wstay almauınıñ astarında ne jatır? Sauatsızdıq pa, joq älde sırtqı küşterdiñ ıqpalı ma?

Almazbek Atambaevtıñ Qazaqstan ekonomikasına, onıñ işinde JİÖ men zeynetaqı mölşeriniñ säykessizdigi turalı aytqandarı şındıqqa janasatının joqqa şığarğımız kelmeydi. Qırğız basşısı qazaq wltın emes, biliktiñ ekonomikalıq sayasatın sınğa aldı.

Biraq, ne üşin? Bwl sınnıñ öz eli üşin paydası bar ma?

Ärine, Nwrswltan Nazarbaev Babanovqa jılı közqaras tanıttı eken dep, bükil eki eldiñ qarım-qatınasına sızat tüsiruge bolmaydı emes pe?

Jalpı, Almazbek Atambaev öziniñ qalıpqa sıymaytın azamattıq twlğasımen älem aldında talay külkige qalğanın eskersek, bwl jolğısın da jay sauatsızdıq deuge bolar edi. Biraq, "sonşalıq deñgeyde sauatsız bolsa, ol birneşe jıl körşi eldi qalay basqarıp keldi?" degen zañdı saual tuındaydı.

Özbekstanğa barıp, su jaña prezidentpen tös qağıstırıp kelip, Nazarbaevqa şüyligudiñ, Han-Keneniñ basın alğan eldiñ basşısı retinde "jas prezident bizden göri Qazaqstanğa kerek" dep kösemsudiñ astarında sırtqı küşterdiñ ıqpalı bar ekenin añğaruğa boladı.

Jalpı, eki eldiñ arasın uşıqtıru arqılı, sayasi alpauıttar öz degenin jasağısı keletini bayqaladı.

Atambaev qazaq biligine til tigizdi. Sosın Soçige barmaytın sıltau oylap taptı. Sıltauınıñ türi "lankestik pen köterilis boluı mümkin" degen dolbar. Bwl dolbar qazaq biligine şekaradağı tekseristi küşeytuine tolıq mümkindik alıp berip otır.

Atambaev bizde lankestik bolğalı jatır dep resmi mälimdeme jasasa, Qazaqstan tarapı saqtıq şaraların jürgizuge qwqılı bolıp şıqpay ma?

Bwl saqtıq Atambaevqa qımbatqa tüserin qırğız biligi endi ğana tüsine bastadı. Qanşama tauar şekarada qañtarılıp twr. Qanşama el şekaradan öte almay, zar qaqsap jatır.

Bwl kişkene ğana - kikiljiñ. Biraq, bw kikiljiñ wlğaya berse, eki el arasındağı beybitşilikke nwqsan kelui äbden mümkin.

"Eki tüye süykense, arasında şıbın öledi".

Atambaev "tüye-sayasatker" emes. Sondıqtan da "atanğa" barıp süykengenin tüsinip, eki el arasındağı tüsinispeuşilikti tez joyuğa tırısuı kerek.

Körşi eldiñ biligin minbede twrıp alıp Otınbaevanı, Tekebaevti sökkendey sögu - keşirilmeytin is.

Al, endi olarğa bizdiñ tarap kedendik qısım körsetumen jauap berse, bwl da aqtaytın qadam emes.

Şäriphan Qaysar

Abai.kz

71 pikir