Seysenbi, 19 Jeltoqsan 2017
Aytqış eken 1840 16 pikir 12 Qazan, 2017 sağat 15:26

«Jasasın, Jandayşapizm!»

Marhwm bop ketken S.degen bir ädebiet sınşısı änebir jılı Jazuşılar Odağındağı ädebiet mäselesine arnalğan bir jiında söylep twrıp äy-şäy joq bas salıp Amerikanı jamanday jönelipti. Onısı tipti wzaqqa sozılıp ketken körinedi. Sonda zalda otırğan T. degen jazuşı «Apır-ay, mına bizdiñ S. men Amerikanıñ arası tım aşılıp ketti-au, bwnıñ aqırı nemen biter eken?» - degen eken.

Sol aytqanday, änebir jolı Qırğızstan Prezidenti Qazaqstannıñ keybir sayasi da äleumettik jağdaylarına qatıstı keybir kemşilikterdi atap twrıp aytıp edi, äşeyinde töbesinen «Proton» qwlap, bala-şağası mügedek bolıp tuıp jatqanda jağı qarısıp qalğanday üni şıqpaytın bireuler «Otan üşin otqa tüsetin» patriot bolıp şığa keldi. Men bilmeytin, bwrın atı-jöni beymağlwm, bwğan deyin elimizdegi qazaq tiliniñ müşkil hali, iesiz qalğan auıldar men auıl twrğındarınıñ qayırşılıq twrmısı, üysiz-küysiz jetim-jesirler, sottardıñ ädiletsizdigi eldi jaylağan jemqorlıq  pen qılmıs elimizdegi üyrenşikti jağdayğa aynalğan tağı basqa adam şoşırlıq jağdayattar turalı közi aşıq, kökiregi oyau qazaq azamattarı janwşıra jazıp, aytıp jatqanda auzın buğan ögizdey üni bir şıqpağan sayasatkerler men sarapşı dep atalatındar şıqtı.

Bwlardıñ eşbiriniñ sözinde Atambaevtıñ aytqandarın teriske şığaratın eñ bolmasa birde-bir dälel, derek joq. Qwr baybalam, ötirik ökpeleu. Ne üşin namıstanıp jatqanı da tüsiniksiz. Al Qırğızstan basşısınıñ sözinde qazaq halqınıñ namısına tietin, qazaq pen qırğızdıñ ortasına ot jağatın eşqanday ziyankestik söz joq ekenin körip otırmız.

Iä, Qazaqstanda Qwdayğa til tigizgenderge eşkim tiispeydi, al atı-jöni äygili bireu turalı birnärse aytsañ,  Maugli turalı ertektegi banderloga-maymıldarşa jabıla ketuge dayın twratındar jetedi. Qalay deseñiz olay deñiz, Atambaevtı küstanalap jatqandar Jandayşaptıq pen Patriotizmniñ ne ekenin ayıra bilui kerek. Aytpaqşı, bwlar qazaq jeri tağı da Resey zımırandarınıñ talqandauına tüskeli jatqanda nege ünsiz otır eken ? Endi qazaqtarğa «Jasasın, Jandayşapizm!», «Jasasın, jaña zaman Jantıqtarı men Jılmaqayları!» dep wrandau ğana qalğan joq pa eken?

Mırzan KENJEBAY

Abai.kz

16 pikir