Beysenbi, 18 Qañtar 2018
46 - söz 1308 4 pikir 13 Qaraşa, 2017 sağat 08:02

Platon meniñ dosım, biraq aqiqat odan qımbat"

Şirek ğasırdan beri jurnalistikanıñ "otımen kirip külimen şığıp" jürip jinaqtağan äri audandıq gazettiñ korrektorlığınan bastap qalalıq, oblıstıq basılımda, respublikalıq jekemenşik jäne memlekettik aqparat qwralında jwmıs istep kele jatqan täjiribeme süyene otırıp birden aytsam bügingi baspasözdiñ "bas auruına" aynalğan tok şou köñilimnen şıqqan joq. Nege? Birinşiden taqırıp aşılğan joq. Bolmasa taqırıptı tım auqımdı etip ayqaylatıp qoymay "Telearnadağı jolbike jürgizuşiler qaydan payda boldı?" dep şeñberdi qısqalau sızu kerek edi. Äbden jauır bolğan taqırıp bwl tok şoudıñ da altın uaqıtınıñ köp böligin alıp tağı şiırlay tüsti.

Ekinşiden spikerler dwrıs tañdalmağan. Törteudiñ üşeui telearnada ter tökkender, bireui ğana gazetti jaqsı biledi. Jurnalistikanıñ bastauı gazetten bastaladı desek te "bwrın şıqqan mwrttan keyin şıqqan saqal ozğan" zamanda telearnanıñ tegeurini, ıqpalı qanşalıqtı zor degenmen qazirginiñ twz köziri-aqparattıq portaldıñ jelkenin kerip eskegin esken bir adam osı talqılaudıñ bel ortasında bilek sıbanuı kerek edi.

Üşinşiden jurnalistika fakul'tetin aşu, jabu mäselesi "mayşammen" talqılanğan twsta osı mamandıqqa jaqsılı-jamandı şäkirt dayarlauğa atsalıp jürgen bir wstaz mindetti türde qatısuı qajet bolatın. Büginde köldeneñnen qosılğan kök attılar är salada da az emestigin eskersek onda ädildik üşin oqu orındarındağı barlıq mamandıqqa twsau saluğa tiispiz, al Arman Şoraevtıñ jurnalistika fakul'tetin jabu turalı oyı suda malti almaytın adamğa jüzudi üyretudiñ ornına töbesinen basıp twnşıqtıra tüsu bolıp şıqpay ma?

Törtinşiden bwl jolı aytılğan ötkir pikirler dwrıs şığar, biraq aqparat salasında oñ özgerister barın da müldem joqqa şığarmay nelikten jurnalister arqılı eldiñ, qoğamnıñ damuına qosıp jürgen jaqsı jaqtar, jañaşa bastamalar tarazığa tartılmadı? Basqalardıñ topıraq şaşıp jürgeni azday olarmen jarısıp "öz körimizdi özimiz qosıla qazğannan" ne wtamız?

Besinşiden özimizben aralas-qwralas jürgen äriptesimiz-dosımız Berik Uäli basqaların aytpaymın däl osı jolğı tok şouda tikeley özine qabırğasınan qoyılğan naqtı swraqtarğa jauap bere alğan joq. Büytip Qojanasır siyaqtı özi otırğan "bwtaqtı keskenşe" dwrısı "kötere almas şoqpardı belge baylamau"... "Platon meniñ dosım, biraq aqiqat odan qımbat" degen osındayda aytılsa kerek sirä!

Altınşıdan telearna tizginin wstağan Erlan Qarindi jañadan Amerika aşqan adamğa teñeu asıra silteu siyaqtı. Wlttıq arna Şerxan Mwrtaza, Ğalım Dosken basqarğan jıldarı dañqı qalay dürkiregenin el wmıta qoyğan joq, wmıtpaydı da. Äriptester Pozner-Pozner dep auızdarınıñ suı qwrığanşa mısal üşin tağı eki-üş adamdı aytsaq, aldıñğı buınnan Nwrtileu Imanğaliwlınıñ, keyingi buınnan Qasım Amanjoldıñ qalay teleswqbat qwratının talay jastar jata-jastana äli aytatının şınımen estimey jür me?

Jetinşiden...Osılay ayta tüssek bwl taqırıpqa qatıstı on sausaqtı da bügip twrıp oy ayta beruge boladı. Bwl jolı osımen şekteleyin. Ärine, jwrt jabıla maqtauğa köşkende qarsı pikir qozğasam öz sözim özimdiki. Aqiqat pikirtalastan tuadı.

Ğalımjan Elşibay

Facebook-tegi paraqşasınan

 

4 pikir