Jwma, 23 Aqpan 2018
Satira 501 1 pikir 12 Aqpan, 2018 sağat 10:08

Jezde men baldız aytısı

Ämir men Gülnär wzaq jıldar boyı bir mekemede qızmet istedi. Ämirdiñ äyeli men Gülnär rulas bolğandıqtan Ämir men Gülnär birin-biri  «jezde», «baldız» dep äzildesip twradı. Äzildeskende de keyde tipti qattı ketetin kezderi bar. Biraq oğan eşqaysı da renjimeydi. Ämir 70-ke deyin qızmet istep, jwmıstan ketse de, «tuğan» mekemesine ara-twra kelip twradı. Gülnär bolsa 40-ta, qızmet isteydi. Boydaq. Ekeuiniñ de öleñ jazatını bar.

Bügin de Ämir «öz» mekemesine kirip, dälizben kele jatır edi, aşıq twrğan esikten Gülnärdiñ «jezde» dep ayqay salğan dauısın estidi. Kabinette zatı äyel eki adam otır eken.

— Jezde, apam qalay? — deydi Gülnär közi oynaqşıp.

Sonda Ämir säl ünsiz otırıp, bılay deydi:

Men seni bayağıdan baldız deymin,

Jetedi sağan sirä qay qız deymin.

Apañ qartayıp, qasına jolatpaydı,

Jezdeñ qalay jatadı jalğız deymin,

Osını bir oylaşı baldız deymin.

Otırğandar du küledi. Ämir kabinetten şığıp ketedi. Bir sağattay jigittermen äñgimelesip, qaytıp kele jatqanında «jezde» dep ayqaylağan Gülnärdiñ dauısı tağı estiledi. Kabinetke kirgen Ämirge Gülnär bılay deydi:

Men seni bayağıdan jezde deymin,

Qız izdep, köşelerdi kezbe deymin.

Aytqanın baldızıñnıñ tıñdamasañ,

Qalarsıñ 70-iñde sözge deymin.

— Oy, bärekeldi, baldız, — dep quanıp qalğan Ämir säl ünsizdikten keyin:

Bwl mağan «tiış jür» dep tıyğanıñ ba,

Joq älde basqalarğa qimadıñ ba?

Qız izdep, köşe kezip qayteyin men,

Balpanaqtay baldızım twrğanında, —

dep kabinetten şığıp ketedi.

 

Bir sağattan keyin onıñ telefonına SMS keledi. Onda bılay dep jazılğan eken:

 

Jılannıñ qwyrığın sen basıp kettiñ,

Jeñdim dep meni öziñşe tasıp kettiñ.

Bir şumaq öleñiñdi ayta salıp,

Jezdeke, nege jıldam qaşıp kettiñ?

 

Ämir az oylanıp otırıp, oğan SMS-pen bılay dep jauap qaytaradı:

 

Mañdayğa tağdır jazğan bwyrıqpenen,

Jaqsı ğoy basıp jürseñ qwyrıq degen.

Jılan bolıp qaytesiñ, baldızım-au,

Qorqıtpa meni onday «swmdıqpenen.

 

Aytıs SMS arqılı odan äri qaray jalğasadı.

 

Baldızı:

Üyde jatıp, jezdeke, erigesiñ,

Jas jigittey qiyalğa berilesiñ.

Quarıp, sualğan şaq  jetpisiñde,

Nemeneñe jetisip, jeligesiñ?

Jezdesi:

Quarıp, sualdıñ dep tabaladıñ,

«Asıp-tasqan» köñilime qaramadıñ.

Men de bir wrpağımın sekseninde,

Serilik qwrğan keşe babalardıñ.

Baldızı:

Mıqtı boldı ol ras babalarım,

Olarğa qalay kinä tağa alarmın.

Jas et jep, qımız işip, serilik qılsa,

Bilgen ğoy, sirä öziniñ şamaların.

 

Quarıp, sualmay ma jetpisinde,

Araq işse bügingi ağalarım.

Jezdeke, «sau siırdıñ» biri emessiñ,

Sondıqtan köñiliñe qaramadım.

Jezdesi:

Bwl araq köñiliñdi lepirtedi,

Maqtanşaqtıñ sau auzın köpirtedi.

Quarğan ne 100 gramm işke barsa,

Qalt-qwlt etken şaldı da «sekirtedi».

 

Swluğa söz aytudan wyalmadım,

Jetpiste de özimdi tıya almadım.

Qartaydıñ dep baldızjan tabalama,

Sezine almay jürmin ğoy sualğanım.

Baldızı:

«Jan-jaqqa» «şalabıñdı» şaşıp bolıp,

Jetpisiñde jürsiñ be tasıp-tolıp.

Bwl siqıñmen, jezdeke qalt-qwlt etip,

Sekseniñde jürersiñ ğaşıq bolıp.

 

Jezdesi:

Ğaşıq qılsañ, baldızjan seksenimde,

Boladı bar tilegiñ eskeruge.

«Qalt-qwlt» etken şağımda jezdekeñniñ,

Kelip twr küş-quatın tekseruge.

Baldızı:

«Senemin», küş-quatıñ tasqanına,

«Senemin» senen qarttıq qaşqanına.

Küte twr, äli «jastau» emessiñ be,

Kelermin kerek qılsañ toqsanıñda.

Jezdesi:

«Senim artıp» küşimniñ tasqanına,

Rizamın tağı on jıl qosqanıña.

Köñili «alıp-wşıp», Jambıl babam,

Swlularğa söz aytqan toqsanıñda.

 

On jıl degen nemene, o, täyiri,

Öte şığar zırıldap, qas-qağımda.

Kempir bolmay, qwlpırğan qızday bop kel,

On jıl boyı sağınıp, tosqanımda.

Baldızı:

Qwp boladı, jezdeke, tilegiñiz,

Şaması asıl şığar süyegiñiz.

Ölip-öşip barasız bozbaladay,

Basıñızşı aptığın jüregiñiz.

 

Qız degende jeligip jetpisinde,

Jemtik körgen qıranday tülediñiz.

«Qalt-qwlt» etip seksenge kelgenimde,

Ğaşıq qıl dep baldızdan tilediñiz.

 

Sağınıp, sarğayğan kez toqsanıñda,

Moynıñızğa oralar bilegimiz.

Balqıp-şalqıp, bal ayın ötkizermiz,

«Aljıp» eger ketpese «şümegiñiz».

Osımenen aytıstı ayaqtaymın

Üzilmesin eşqaşan küderiñiz.

Jezdesi:

Baldızjan, üzbeymin eş küderimdi,

Qayradıñ jetpistegi jigerimdi.

Öziñ aytqan qıranday «qiqulatıp»,

Sezip em tübinde bir ilerimdi.

 

Sağıntıp, toqsanıñda kelemin dep,

Jiberdiñ nwrğa bölep jüregimdi.

Bwrqıratıp isiñdi qwlpırıp kel,

Joğaltpay qırıqtağı reñiñdi.

 

Nazdanıp, jezdeke dep «köziñ süzseñ»,

Üzermin jürek tulap, «jügenimdi»...

Toqsannıñ otına orap küydirgende,

Bilmessiñ jılarıñ ne küleriñdi.

Balqıp-şalqır bal ayın añsap jürseñ,

Qwdayım qabıl qılsıñ tilegiñdi.

 

Damir Äbişev

Abai.kz

1 pikir