Jwma, 23 Aqpan 2018
345 0 pikir 13 Aqpan, 2018 sağat 09:26

Özbek ziyalıları prezidentten sayasi emigrant Mwhammad Salihtıñ elge oraluın swraydı

Özbekstannıñ tanımal aqın-jazuşıları prezident Şavkat Mirziyaevtıñ atına aşıq hat jazıp, «Özbekstannıñ halıqtıq qozğalısı» lideri äri tanımal aqın 69 jastağı Mwhammad Salihtıñ elge oraluına kepildik beruin swraydı.

Aşıq hat Facebook äleumettik jelisinde keñinen taraldı.

Özbekstan jazuşılar odağınıñ bwrınğı birinşi hatşısı, özbek parlamentiniñ eks-deputatı, elde «Birlik» dep atalğan sayasi qozğalıstıñ jäne «Erik» dep atalatın demokratiyalıq partiyanıñ negizin qalağan Mwhammad Salih 1992 jıldan beri şetelde twrıp keledi.

«Biz sizdiñ tağı bir tarihi şeşimiñiz aqın Mwhammad Salihqa qatıstı bolğanın qalaymız. Ol 25 jıldan beri otanınan jıraqta jür. Bwrınğı rejim jürgizgen bwrıs nasihattıñ saldarınan qoğamda Mwhammad Salihqa degen ürey qalıptastı. Biraq şığarmaşıl ziyalı qauım onıñ wlı aqındığın wmıtqan joq. Mwhammad Salih birinşi kezekte aqın. Sosın barıp sayasatker. Ol eldiñ täuelsizdigi üşin sayasatpen aralasuına tura keldi», – delingen aşıq hatta.

2017 jıldıñ naurız ayında Mwhammad Salih birinşi ret prezident Mirziyaevtıñ atına aşıq hat jazğan. Biraq osıdan keyin Wlttıq qauipsizdik qızmeti (WQQ) «eldegi konstituciyalıq jüyeni küştep bwzbaq boldı» degen ayıppen, onıñ üstinen qılmıstıq is qozğadı. Osı iske baylanıstı jurnalist Bobomurod Abdullaev ta twtqındalğan. Mwhammad Salih bwl ayıptaulardı WQQ-nıñ bwrınğı basşısı Rustam Inoyatovtıñ elge kirgizbes üşin, ädeyi jasap otırğanı dep atağan.

1993 jıldıñ säuirinde Salih «memleketke satqındıq jasadı» dep wstalğan. Biraq halıqaralıq wyımdardıñ qısımımen ol bostandıqqa şıqtı. Osıdan keyin ol Türkiyağa qaşıp ketken. Sodan beri Stambwlda twrıp keledi. 1999 jılı Özbekstannıñ Joğarğı Sotı Taşkentte jarılıs wyımdastırdı degen ayıppen, wzaq merzimge sırttay türme jazasına kesken.

Abai.kz

0 pikir