Senbi, 21 Säuir 2018
210 0 pikir 16 Säuir, 2018 sağat 08:55

Özbek wlttıq telearnasındağı arnayı qızmettiñ «kuratorı» qızmetinen ketti

Özbekstan wlttıq teleradiokompaniyası törağasınıñ qauipsizdik mäseleleri jönindegi orınbasarı Abdusalom Şodmonov qızmetinen alındı dep habarlaydı Azattıqtıñ Özbek qızmeti (Ozodlik).

Wlttıq teleradiokompaniyağa qaraytın telearnalardıñ biriniñ bas redaktorınıñ Ozodlikke aytuınşa, 44 jastağı Şodmonov säuirdiñ 6-sı küni jwmıstan bosatılğan. Qızmet mindeti boyınşa ol wlttıq teleradiokompaniya qwramın "jappay baqılaudı wstau", sonımen birge qızmetkerlerdi jwmısqa qabıldau jäne bosatu mäselelerimen aynalısıp kelgen.

Abdusalom Şodmonov jwmıstan bosatılğannan keyin Özbekstan wlttıq teleradiokompaniyasında ol atqarıp kelgen törağa orınbasarı lauazımı da qısqartılğan dep habarladı Ozodlik tilşisine memlekettik telekompaniyada isteytin jurnalisterdiñ biri.

- Bwğan deyin Özbekstan mwsılmandarı dini basqarmasındağı Wlttıq qauipsizdik qızmeti (qazir Memlekettik qauipsizdik qızmeti dep ataladı – Azattıq.) kuratorı bolıp istegen adam jwmıstan ketkennen keyin onıñ atqarıp kelgen lauazımı qalay qısqarsa, Şodmonov istegen qızmet lauazımı da tura solay qısqartıldı, - deydi özbekstandıq jurnalist.

Özbekstan wlttıq teleradiokompaniyasında 21 jıl jwmıs istegen, qazir Taşkentte twratın täuelsiz jurnalist Malohat Eşankulova "wlttıq teleradiokompaniya törağasınıñ qauipsizdik mäseleleri jönindegi orınbasarı qızmetine tağayındalatın Wlttıq qauipsizdik qızmetiniñ ökili wjımdağı jurnalisterdiñ qızmetin baqılaumen aynalısqanın" aytadı. Onıñ sözinşe, osı qızmetti atqaratın orınbasardıñ basşılığımen telearnada "oppoziciya ökilderin, dindarlardı, paraqorlıq ayıbı tağılğan şeneunikterdi qaralaytın arnayı bağdarlamalar dayındalğan".

Bwğan deyin Özbekstan mwsılmandarı dini basqarması men meşitterde arnayı qızmetterden tağayındalğan "kuratorlardıñ" jwmıstan bosatılğanı turalı habarlanğan.

Abai.kz

0 pikir