Düysenbi, 9 Jeltoqsan 2019
Bizdiñ şeneunik 2188 11 pikir 14 Qazan, 2019 sağat 18:09

Bojko deputattıqqa layıq pa?

Qoğam belsendileri Mäjilis deputatı, onda da Mäjilistiñ kişi spikeri, bwrınğı ministr Vladimir Bojkonı "äleumettik azardıqtı qozdırdı" dep ayıptap, deputattıq ökiletin toqtatudı talap qılıptı. Bwl turalı elişilik aqparat qwraldarı jazdı.

Erteñ, yağni 15 qazan küni Almatıda qoğam belsendileriniñ baspasöz jiını ötedi eken. Jañağı deputat Bojkonıñ mäselesi sol jiında söz bolmaq körinedi. Dälirek aytsaq, qoğam belsendileri deputat Vladimir Bojkonı deputattıq mandattan ayırudı talap etip, Qazaqstan Prezidentine, Elbasına, Mäjilis törağasına, OSK törağası men WQK basşısına ündeu jasamaq.

BAQ-ta tarağan baspasöz bayanında osılay dep habarlanğan eken.

"Mäjiliske "QR orıs, slavyan jäne kazak wyımdarı" ZTB wsınuımen, QHA tizimimen ötken Bojko Vladimir Karpoviçti qızmettik tekseris jürgizu qajettiligi jäne onıñ deputat kezindegi söylegen sözderi men is-äreketteri qoğamdıq narazılıqtı, äleumettik arazdıqtı, tudırğanı t.b. üşin qwqıqqorğau organdarına jüginuge baylanıstı QR Mäjilisi deputatı ökilettiginen, sonday-aq, "WQK general-leytenantı" arnayı atağına beriletin jeñildikterden ayıru", mäselesi söz boladı dep jazılğan.

Aqparatta baspaöz jiınına kimder qatısatını da jazılıptı. Olar:

Asılhan Artıqpaev, "Qazaqstannıñ orıs, kazak jäne slavyan wyımdarınıñ Koordinaciyalıq keñesi" ZTB törağasınıñ orınbasarı;

Vasiliy Rezvan, Zañger;

Mihail Kindalev, "Qazaqstannıñ orıs birlestigi" RQB törağasınıñ orınbasarı;

Viktor Taranov, "Qazaqstannıñ kazaktar birlestigi QB" ZTB jetekşisi, ataman;

Hasen Qoja-Ahmet, Qazaqstannıñ slavyan-türik berligi qozğalısınıñ törağası, "Azat" Qazaqstannıñ azamattıq qozğalısı.

Vladimir Bojkoğa qarata bwnday ayıptaudıñ tuındauı teginnen-tegin emes. Miına kelgen oqıs oyların oylanbastan ayta salatın deputat mırza soñğı kezderi erkinsip-aq ketti. Sondıqtan da ärbir mälimdemesi üşin dau-damaydıñ astında qaladı.

Esteriñizge sala keteyik, 3 qırküyek küni Mäjilis deputatı Vladimir Bojko Qazaqstan halqı Assambleyasınıñ keñeytilgen otırısınan soñ eldegi äleumettik kömek aluşılar turalı eki auız pikir aytıp, el-halıqtıñ aşuın tudırğan edi. Ol kezde Bojko: "tizerlep twrıp memleketke rahmet aytuları kerek" degen edi. Keyin  ol tipti öz sözi üşin halıqtan keşirim swramaytının aşıq jetkizgen.

Bojkonıñ bwdan özge de "beypil sözderi" jetip artıladı. Ol Ukrainalıq sayasatkerdi «jezökşege» teñedi. Ol qazaq tilin üyrenbeytinin, memlekettik telde söylemeytinin aşıq ayttı. Ol ministr bolğan twsta tabiğat apattarınan, ölim-jitimnen qorqudıñ qajeti joq ekenin aytqan. Onıñ aytuınşa, elde qwrılıs jwmıstarı qarqındı jürip jatadı. Demek, qwrılıstıñ atı qwrılıs: birli-jarım adam qwlamay, sürinbey twrmaytın körinedi. Almatıda bazar köp. Soğan say, köp bazar äredik örtenip twruı qajet eken.

Al 2017 jılı Bojko "auıl jastarın qalağa kirgizbeu kerek" degen sıñayda pikir bildirgen. Onıñ bwl sözi de qalıñ halıq tarapınan qarsılıqqa wşırap, qızu talqılanğan.

Odan da säl erterek, 2016 jılı ol ukrainalıq sayasatker Irina Farionğa til tigizgen edi. Resey men Ukraina arasındağı jağdaydı mısal etken ol Farionnıñ mälimdemesin sınğa aldı. "Tarih älgi jezökşeni, Fariondı ornına qoyıp beredi dep ümittenemin. Ärine, keşirim ötinemin, ol "Ukrainada orısşa söyleytinder adam emes, olardıñ qwqığı joq, orısşa änderdi tıñdaytın taksisterge ayıppwl salu kerek" - degen edi.

Jası jetpiske jetse de sözden sürinip, tilinen tayaq jep jürgen Bojkonıñ bülinui bwl ğana emes. Demek, memlekettik qızmetkerdiñ etikasına jat pikirlerimen tanılğan deputatqa qızmettik tekseris jürgizilui kerek degen qoğam belsendileriniñ wsınısı jön-aq...

Abai.kz

11 pikir