Сәрсенбі, 20 Қыркүйек 2017
«Соқыр» Фемида 3962 13 пікір 4 Сәуір, 2017 сағат 01:17

Сағадиевтің сөзі  құрғақ уәде болып қалғаны ма?

Сіз үшін мұғалім кім? Қоғамның айнасы, заманның жаршысы,  жеткіншек жас ұрпақтың мінсіз ұлы тұлғасы ма? Алқалы топта ақ жағалылармен иық тіресіп төрден орын алатын төреге лайық құрмет иесі ме?

«Айтқанның аузы жаман, жылағанның көзі жаман» дейді қазақ.  Мұғалім мәртебесі,  мұғалім беделі,  мұғалімнің жай-күйі жайлы сан мәрте айтылып та, жазылып та жүр.  Баяғы жартас сол жартас,  жаңғырық боп қалады, әрдайым. Ұстаздың жанайқайын саңырау-мылқау қу жартас қайдан ұқсын?

Міне, көктемгі науқан басталды. Бұл  суреттегілер «көше  тазалықшылары»  емес, ұстаздар!

Бұл  Алматы обылысы, Қарасай ауданы, Әл-Фараби атындағы дарынды балаларға арналған үш тілде оқытатын арнаулы гимназиясының мұғалімдері.

Алты алаштың басы қосылғанда төрден орын алатын  ұстаздарымыз қоқыс теріп, көше бойын тазалауда. Күні кеше ғана ұстаздар қауымына ара түсіп, əріптестерін «əкімшілік  жұмыстарынан арашалап аламын»  деген  министр Ерлан Кенжеғалиұлы Сағадиев мырза сөз беріп еді. Сол сөзі әншейін бір құрғақ уəде болып қалғаны  ма?  Əлде əкімдік  тегін  еңбек күшінен  оп- оңай айырылғысы келмегені  ме? Олар ұстаздар қауымын қойдай  тоғытып, қозыдай көгендеп қоғамдық жұмысқа сала бермек пе? ...

Бəзбіреулер бұны «отансүйгіштік» деп ақталатын болар, ал мен үшін бұл ұстаз мəртебесінің  тым  төмендігінің белгісі...   Ұстазының   жұпыны  киініп, күл-қоқысты  теріп  жүргенін  көрген  оқушы  қалай  ғана  мұғалімге еліктеп  өседі? Олар үшін ұстаз – көмпіс те, қораш, бейшара  қауым боп  көрінбейме?!.....

Мұғалімге қарап бой түзейтін қоғам мен оқушы жоқ қазір. Өйткені, мұғалім қолына күрек, сыпыртқысын көтеріп, қап арқалап көше тазалып жүрсе, оған қарап кім бой түземек? Әкім-қараның қол баласы болып, үй аралап, санақ жүргізсе, сайлаудағы үгіт-насихат үшін кім көрінгеннің есігін қағып, жәутеңдеп қабағын бақса, ұстаз қалай ғана төредей төрден орын алмақ? «Ит көзі түтін танымас» деген осы емес пе?

Алатаудай атынан  ат емес атан үркетін, өсер елдің ертеңі,  ұлт қамы,  ұрпақ болашығы үшін  жанын  салып жүрген ұстаздарымыздың қоғамдағы бүгінгі орны мен бейнесі осы.

Министр сөзінде тұрса, беті бері қарар еді-ау, мына қоғамның...

Дәлел Жанатұлы, ұстаз

Abai.kz

 

 

 

13 пікір
qazaq qyzy 2017-04-26 12:18:45
Сағадиев министр болмаған кезде мұғалімдер аула сыпырмаған ба еді? көше емес,мектеп ауласын бірігіп жинау қай заманнан келе жатқан жоқпа?!!! сенбілік тазалық деген тек ұстаздарға емес, барлығына да бірдей, яғни көктем шыға барлық мекеме мемлекеттік болсын ,жеке болсын ауланы бірігіп жинайды, онда тұрған не бар екен???
Рая 2017-04-25 11:44:54
Сол министр ешқандай уəдесін орынламайды себеб біреу бізде шыншыл жұмыс істейтін адам министр болмайды. Дəлел бірінші сынып оқушыларына жазылған кітап. Халыққа дұрыс білім беру ҚР басшыларына қызықты емес жəне қажет емес. Осыны түсінгеніміз абзал болар.
ұстаз 2017-04-20 22:58:35
Оң көзқарас. Сен өзің шықтың ба сенбілікке? Қолыңа қапшық алып мен сияқты қоқыс терсең көрер ем қалай сайрайтыныңды.
Мен 2017-04-20 17:15:09
Казир окушыларды тек масылдыкка тарбиелеп жатырмыз,
Мен 2017-04-20 17:13:32
Шыныменде мугалим коше тазалап жур, оны корген окушы мугалимди еш силамайды, сыйламагасын сабагын да окымайды, себеп когамдагы ен бишара мугалим болып тур казир, баласын тартипке шакырсан ата-ана келеди дедектеп, коркытады шындык осы
Оң көзқарас 2017-04-13 09:19:40
Құрметті ұстаздар қауымы! Тазалық сенбілігіне шыққан да тұрған ештеңе жоқ. Өз елімізді, жерімізді ешкім келіп тазартып бермейді.
Сламбек 2017-04-08 11:48:22
Елдегі орта мектептердегі әсіресе бастауыш класстарға сабақ өткізетін мұғалімдерді аяймын. Қолдарына қалам ұстатып, жазуды үйретіп, сауаттарын ашып, сөйлеуді үйретіп жүрген мұғалімдердің жалақылары әлі төмен. Оның үстіне, сол мұғалімдерге тыныштық жоқ. Қыршубай бір іс-шаралар мен бітпейтін "қағаз" жазу. Қағазға обал. Босқа кетіп жатқан.
Қанымды қайнатады 2017-04-06 23:32:51
Бұл əдейі білім саласын құлдыратып, қазакеңдерді сауатсыздандыру, қарап отырсаң сонау жылдардан бері алға жүрудің орынына жылдан-жылға кері қарай құлдырау болып жатыр, яғни бұның бəрі əдейі ұйымдастырылған болуы керек, əйтпесе неге жыл сайын реформа болады да жатады,
Айжан 2017-04-04 15:35:06
Мугалімнін проблемасы коше тазалап уй аралаумен гана бітпейді го. Ай сайынгы мерекеге жинайтын акшадан болек ешкім окымайтын газет журналдарга мажбурлі жаздыруы да бар. Айыны бір болмасада екі айда болатын мажбурлі семинарлар бул проблеманы жою үшін бас жактан біреу араласу керек деп ойлаймын.
Алматылық Ержан 2017-04-04 11:14:19
Уәдесін орындаған бір министр, депутат, әкім, басқа да бір басшы көріп па едіңіздер? Біздегі ұғым керісінше, уәдені орынған шенеунік "чмо" боп қалатын сияқты. Бір кісілер "Кувейттегіден жақсы тұратын боламыз" деген еді бір кездері. Біз дұрыс түсінбептік, ол халыққа емес, санаулы адмадарға айтылған сөз екен, "Форбс" деген жорналға қарасаң, жылына 200 миллион $ табыс табады екен бір отандастарымыз. Ал біз жүрміз, "кризис" деп, тапқан-таянғанымыз несиені төлеуге әрең жетіп (үйсіз, күйсіз, бала-шағамен пәтерден пәтерге көшіп, не жұмыс таба алмай жүрген жастарды айтпағанда, асыраушысыз қалған жартылай отбасыларды тіпті қойғанда). Алысқа бармай-ақ, 2014 жылы Ұзақбай Қарабалин ағамыз "2016 жылы мұнай өңдеу зауыттыры толық модернизацияланып бітеді, еліміз өзін өзі бензинмен толық қамтамасыз ететін болады" деген. Ол кісі сол уәдені орындаса, беделінен түк қалмас еді. Дәл сол сияқты Досаев та айтқан, тек сәл өзгеріспен, 2017-нің қаңтары мұнай өңдеу зауыттарын модернизациялау толығымен бітіп, халық бензинге қарық болады" деп. Досаев та ағаларынан үлгі алады, уәде орындап "чмо" боп қалмайды. Барлығы керісінше, бензин бағасы 10-20 күн сайын қымбаттайды. Яғни, барлығы керісінше, ойдағыдай, біздің ағаларымызда (бензин арзандап кетсе, барлық нәрсе арзандап масқара болмас үшін ғой барлығы). Яғни, мәселе тек бір Сағадиевта емес, бүкіл мемлекет басқару жүйесінде. Білім министрлігі, тіпті бір экпериментаторлар, мектеп оқушылары лабораториядағы кроликтер - ойларына келген өзгерісті жасап, сынап көргілері келеді де тұрады. Бірі "әлі жер бетінде жоқ мамандыққа оқытып" әлемге танылғысы келеді, бірі тілге тұғыр, яғни сирақ орнатып, "үш сирақты тіл" жасап, ертеңгі күнгі еден жуушы да, шопыр да, күзетші де, асханадағы даяшы мен аспаз да үш тіл білсін деген жарқын идеясын сол "кролитерге" сынап жатыр (3 тіл емес, 11 жыл ішінде бір тілді толық ұғып шықпайтын оқушылар болады, оларды не істейді екен?).
ХАЛЫҚ 2017-04-04 10:22:57
НҰРСҰЛТАН мырза - Халықтың сұрағанын орындап, мынау БІЛІМ мен ҒЫЛЫМ саласын дұрыстау үшін басқарушысын... Ерлан САҒАДИЕВТІ орнынан босатуды сұрады ғой. Халық пен Зыялы қауымды тыңдамауға бола ма ?..
Бəкен 2017-04-04 10:16:58
Бұларға айттың не, айтпадың не... Менің өз басым, осы күні, билік басындағылардың бір сөзіне де сенбеймін!
Айман 2017-04-04 10:03:23
Мектеп директорлары заңды орындамайды,, әкімнің бұйрығын орындайды. Негізі мұғалімді ауыр жұмыстарға жегу мәжбүрлі еңбекке жатады.Мәжбүрлі еңбек сотты болғанда немесе соғыс жағдайында ғана орын алады. Ал басқа уақытта арнайы көше тазалықшылары бар. Бұл мектеп облыстық білім басқармасына қарайды. Ләззат Базарқұлованың тікелей өзі басқаратын мектеп.

Үздік материалдар

Рухани жаңғыру

Қанат Әбілқайыр. Қарыз бен Парыз

Abai.kz 5723
Қауіп еткеннен айтамын

Қазақстанда жүрген қытайлар кімге сүйенеді? 

Н.Қошаманұлы 11979