Сәрсенбі, 20 Қыркүйек 2017
Білгенге маржан 1081 7 пікір 19 Мамыр, 2017 сағат 10:02

Елдің еңсесін еңбек көтереді

Қазіргі ғылым мен жаңа технология жетілген заманда экономикалық даму рухани дамуды басып озды. Бүгінгі күні тек қана қоғамның заттық сұранысын қанағаттандыратын, жаппай жайлы өмірді насихаттайтын «дамыған» елдердің саясаты оның мүшелерін бір-бірімен байланыстыратын адамгершілік, мейірімділік, қайырымдылық, обал, сауап, қанағат, рақым, адалдық, кішіпейілділік, еңбекқорлық сияқты адамзаттық ізгі құндылықтарды аяқасты етуде. Рухани дамуы кенжелеген қоғам ашкөздікке ұрынып, азғындайтынына тарих куә. Сондықтан, қай кезеңде де адамзат игілігі мен ел дамуын қамтамасыз ететін еңбек тәрбиесіне көңіл бөлу керек.

Жаһандық дағдарыс ешбір елді тасада қалдырмайтындықтан, әлем елдерінің күш біріктіруін уақыт талап етуде. Дегенмен, әрбір ел өзінше әрекеттенбей, жаһанданған әлемнен ортақ ұстаным іздеп, өзгеден берекелі бастама күтсе, онда ұтылатыны анық. Экономикалық тәуелсіздігімізге де көлеңке түсіргісі келмейтін Елбасымыз «Әлеуметтік жаңғыртудың жаһандық трендін» ойлап, «Қазақстанның әлеуметтік жаңғыртылуы: Жалпыға Ортақ Еңбек Қоғамына қарай 20 қадам» атты бағдарламасын ұсынғаны белгілі.

Келмеске кеткен кеңестік кезеңнен қалған тұтынушылық пиғыл қоғамда масылдық психология қалыптастырды. Жаһандық дағдарыстың басты себебі де әлеуметтік масылдық болғанын айта келіп, ұлт көшбасшысы: «Жалпыға Ортақ Еңбек Қоғамы идеясы көз жетпейтін көкжиекте ойлап табылмаған. Бұл – практикалық, прагматикалық идея. Ол маған тіпті етене жақын, өйткені, мен қазақстандықтар жақсы білетіндей, өзімнің кәсіби жолымды «ақ саусақтар» секілді кабинетте де, паркетте де емес, жұмысшы-металлург болып бас­тадым», деп «Жалпыға Ортақ Еңбек Қоғамы» атты сындарлы идея ұсынды.

Онда ең бірінші тұтынушылыққа бейімделген идеологиямен, жаппай масылдықпен күресу үшін әрбір қазақстандықтың еселенген еңбегіне, еңбек өнімділігі мен еңбек құндылығына баса мән беру қажеттілігі сарабдалдықпен талданған. Демек, әрбір қоғам мүшесі «еңбек етсең ерінбей, тояды қарның тіленбей» қағидатын терең түсініп, адал еңбек етуге әрекеттену керек.

Мемлекет басшысы сол бағдарламада ұлттың бәсекеге қабілеттілігін арттырып, елді ұйытатын мәселелерді айқындап, «Жалпыға Ортақ Еңбек Қоғамына» қарай қадам жасау арқылы ғаламды жайлаған дағдарыстан қорғануға болатынын жан-жақты талдап түсіндірген.

Елдің еңсесін көтеретін игі бастаманың маңызын қоғамның әрбір мүшесі түсініп, әлеуметтік жаңғыртуға шамасы келгенше үлес қосса, ол өзі үшін де, еліміз үшін де тиімді. Кім не береді деп жалтақтағаннан, әркім қолынан келетін іспен айналысса, өмірі берекелі болатыны айқын.

Әлемдік өркениеттің бар­лық құндылықтары, мәдени бай­лықтар адам ең­бегімен жасалатындықтан, әлеу­меттік жаңғырту да өнімді ең­бектің арқасында жүзеге асады. Бүкіл қоғам адал еңбекке бет бұрып, тынымсыз әрекеттенсе, азаматтардың тұрмысы түзеліп, мемлекеттің даму деңгейі артатыны мәлім. Мұндай игілікке бастайтын жол – масылдықтан арылу.

Әлеуметтік жаңғырту бүкіл қоғамның, әрбір қазақстандықтың өміріне шынайы оң өзгерістер әкелуге бағытталған нақты қадамдар жасауды, соны сезіндіретін шешімдерді талап етеді. Бұл жаңғырту қоғамның әрбір мүшесінің өмірін жақсартуға бағытталғанын терең түсінсе, әркім өзі үшін қимылдайды. Аз жұмыс істеп, көп табыс табу, жан қинамай байлыққа бату секілді алдамшы ойлардан арылып, игілікке жетудің оңтайлы жолдарын ойластыратын уақыт жетті. Сағым қуғандай алдамшы елеспен жүрудің күні өткенін, әркім қолынан келетін іспен айналысып, қабілетіне қарай еңбектенсе, ол нәтижесіз болмайтынын қазіргі таңда әр адамның санасына жеткізу өте маңызды.

«Жалпыға ортақ Еңбек Қоғамының» бағдарламасында көрсетілгендей, әлеуметтік жаңғыру үшін қоғамды индустриялық-инновациялық экономика жағдайындағы жаңа өмірге дайындау, Қазақстанның үдемелі эконо­ми­ка­лық дамуы мен кең көлем­ді игіліктермен қамтамасыз ету жолындағы оңтайлы тепе-тең­дік орнату, құқық пен әділеттілік қағидат­тары­на негізделген әлеуметтік қатынастарды бекіту, сондай-ақ жеке сектор мен кәсіби бірлестіктердің әріптестігін жолға қоятын әлеуметтік-еңбек қаты­насының тиімді үлгісін құру маңызды.

Ол үшін жергілікті басқару органдары азаматтар­дың әлеуметтік бастамаларын жүзеге асыратын өз міндеттерін адал атқарып, қоғамды заманға бейімдейтін алтын көпір болғаны абзал. Сондай-ақ, ғаламтор мен ақпараттық технологияның мүмкіндіктерін тиімді пайдаланып, мемлекет пен халықтың арасында тығыз байланыс орнауына мүмкіндік жасаса нұр үстіне нұр. Сонда инновациялық экономиканың басты қозғаушы күші орта таптың үздіксіз өсуіне, тың идеялар мен тиімді жаңалықтар ойлап табатындардың дамуына жан-жақты мүмкіндік туып, еңбек өнімділігі артады.

Елбасы жаңғырту үрдісінің табысты болуына қажетті қағидаттарды да эволюциялық (мүмкіндіктерді пайдалана отырып жүйелі даму), ортақ жауапкершілік (мемлекет қана емес, жекеменшік құрылымдар мен жалпы қоғам), әріптестік қарым-қатынас (мемлекеттің, қоғамның және жеке адам мүддесінің тепе-теңдігі), ынталандыру (азаматтардың мүмкіндігі жетпейтін жағдайда ғана мемлекеттен жәрдем алып, қолынан келетін шаруаны өзі атқаруы, мемлекеттің табысты еңбекті қоғамдық ынталандыруы), кәсібилік (шешім қабылдамай тұра, егжей-тегжей есеп жүргізіп, ғылыми дәлелденген әлемдік тәжірибені оқып-үйрену) жеке-жеке талдап, маңызын  түсіндірді.

Жоспарланған жұмыс жүйелі жүзеге асып, нақты экономикалық табыстар әкелетін жаңғыртуға, ол жаңғырту индустриялық-инновациялық дамуға негізделсе ғана жемісті болатыны Жалпыұлттық тұжырымдамада айтылған, индустриялық-инновациялық дамусыз ешқандай жаңғырту болмайтынын қазір көзі қарақты, көңілі ояу адамның бәрі түсінсе керек.

Халықтың әл-ауқатын жақсартып, елді көркейтудің ең төте жолы – тоталитарлық жүйе қалыптастырған жаппай тұтынушылық пиғылмен және масылдық санамен күресу. Ұлттық руханият пен елдің экономикалық тұрақты дамуына негіз болатын жалпыадамзаттық құндылық – еңбекті алдыңғы орынға қойып, мазмұнын қайта жаңғырту мемлекет үшін маңызды. Еңбек – елдің де, жеке адамның да өсіп-өркендеуінің кепілі.

«Жал­пыға Ортақ Еңбек Қоғамы» идея­сы қоғамды дамытатын еңбекке баса мән беріп, ел игілігі мен жеке бастың ауқатты өмірін қамтамасыз ететін қажыр­лылыққа шақырады. Халықтың әл-ауқаты жақсы болса, мемлекеттің де келешегі кемел болатыны белгілі.

Соңғы жылдары елдегі өндірістердің көптеп ашылуы жұмыс орындарына деген сұранысты қанағаттандырғанмен, кейде маман мен жұмысшы тапшылығына қатысты мәселе туындап жатады. Осы орайда Елбасының: «Егер біздің қа­білетті ұлт болғымыз ке­летіндігі рас болса, бұл психо­логиядан арылу қажет! Жаңа білік­тілікті меңгеру және зауыт­қа, өн­діріске бару керек. Қазақстандық жас болсын, ересек болсын бос отырып, бәрін сынай бермей жұ­мыс бар жерге, нәпақа табатын жерге қарай ұмтылулары керек!» деген пікірі ойға оралады.

Жалпы, трансұлттық компаниялардың әлемдік нарықты мейлінше аз уақытта барынша кеңінен жаулап алуға жанталаса ұмтылуы, жаһандық ірі мәдениеттердің ұсақ мәдениеттерді жұтып қою қаупінің уақыт өткен сайын артуы, экономикалық тәуелді елдердің өз тілі мен ділін, мәдениеті мен болмысын сақтап қалу қабілеті әлсіреп бара жатқан мына заманда Қазақстанның да жарқын болашаққа тек экономиканы дамытумен ғана жетуі мүмкін емес екенін түсініп, экономикалық дамуға күш беретін рухани қуаттылықты арттыруға әрбір қазақстандық үлес қосуы маңызды. Ол үшін қоғамның еңбекші күшінің санасын жаңғыртып, қоғамдық сананы өзгертуге ұмтылу керек. Қоғамдық сананы өзгерту – қоғамды өзгертумен бара-бар, сондықтан қоғамдық сананы өзгертуге ықпал ететін қазақтың ұтымды сөздерін орнымен жұмсап, халыққа түсінікті әрі жүйелі жеткізу маңызды. Нарықтық экономикаға бейімделген қоғамдық қатынастарды реттеу барысында еңбекке басымдық беру жеке адам үшін де, қоғам үшін де тиімді болатынын қарапайым халыққа қарапайым тілмен түсіндіру қажет. Өзіне пайдалы нәрсе ұғымды сөзбен айтылса, кез келген адам құлақ түреді.

«Жалпыға ортақ еңбек қоғамын» құрып, көпшілікті өзі үшін де, елі үшін де өнімді еңбекке жұмылдырып, оның нәтижесін бүкіл қоғамның ортақ игілігіне пайдалану үшін өтімді ойларды жүйелі сөзбен жеткізе айтудың маңызы зор. Өйткені, қазіргі замандағы басты мәселелердің бірі – өз идеяларыңды тыңдаушыларға орамды тілмен жеткізе білу. Уақыт сұранысына лайық, заман талабына сай болу үшін де қоғамға қажетті осы біліктілікті әркім өз бойында дамытып, сөйлегенде негізгі үш мақсаттың орындалуын (түсіндіру, сезімін ояту, толқытып-тебіренту) қадағалау керек.

Ұлттық құндылықтар мен қоғамдық өзгерістерді сабақтастырып, үрдісті үзбей, дәстүрді бұзбай, тілді шұбарламай, еңбекке икемді ұрпақты тәрбиелеу үшін жүйелі сөзді орнымен қолдана білу – уақыт талабы. Ақыл-ой тәрбиесінің бастау-бұлағы сөз өнері әлсіресе, ұлт та әлсірейді. СӨЗ – қазақ үшін құдіретті күш. Осы күшпен өскелең ұрпақты рухани байытып, адал еңбек пен кәсіпкерлікке жұмылдыру – қай жағынан алғанда да тиімді.

Сөз салмағын ұғынған қазақ – табиғатынан еңбексүйгіш халық! Жаны таза, ниеті адал қазақ арам жолмен табылған нанды дастарқанына қоймаған, күдіктенсе, бөтеннің дастарқанынан дәм татпаған. Алла молынан несібе берсе, шүкірлік етіп, аз берсе, қанағат қылған. «Еңбек етпеген ішіп-жемейді» деген бабаларымыз арамтамақтарды «жалқаудың жаны – тәтті» деп мысқылдаса, өзгенің еңбегін пайдаланатындарды «арамтамақ» деп бағалаған.

Дана халқымыз «Еңбектің наны – тәтті» деп маңдай термен, адал еңбекпен келген несібенің берекелі болатынын меңзесе, адал еңбектің рақатын «бейнет түбі – зейнет» деп тұжырымдаған. Себебі ауа-райы сан құбылған, табиғаты әр қилы – шөлі мен шөлейті, батпағы мен тауы, орманы мен ойпаты бар кең даланы өмірі мен кәсібіне бейімдеу үшін бабаларымыз бел шешпей еңбектенген. Демек, ұлан-байтақ жерімізді ата-бабамыз ақ найзаның ұшымен, ақ білектің күшімен сақтаған. Айналысқан кәсібі мал болған соң, оның қилы қиындықтарына төзіп, шөл даладан құдық қазып, қысы-жазы еңбек еткен. Дала қазағы үшін төрт түлікті күтіп-бағып, мал басын арттыру, асыл тұқымдыларын көбейту, киіз үйдің жасау-жабдығын әзірлеу, ал қала қазағы үшін қала соғу, диқаншылық жасау, бау-бақша салу т.б. секілді еңбек түрлері ата-бабамызға таңсық болмағанын тарихшы, археологтарымыз дәлелдеп келеді. Тарих толқынымен ұрпақтар ауысқанымен, жасампаз халық ұлтының асыл құндылықтарын ардақтап, кейінгіге қалдырып отыратыны – өмір заңдылығы.

Әрбір қоғам мүшесі «Жалпыға ортақ Еңбек Қоғамы» идеясының тиімділігін түсініп, халқымыздың қанында бар еңбексүйгіштікті қайта жандандырса, өзіне де, қоғамға да пайдалы болмақ.

Халқының қамын ойлап, кейінгіге өлмес мұра қалдырған қазақтың әлемдік деңгейдегі ұлы ақыны Абайдың:

«Сенбе жұртқа тұрса да қанша мақтап,

Әуре етеді ішіне қулық сақтап,

Өзіңе сен, өзіңді алып шығар,

Ақылың мен еңбегің екі жақтап», деген дана тағылымын өскелең ұрпақ жадында сақтап, адал еңбекке бейімделсе, замана көшінен қалмай, еліміздің абыройын асқақтата түсетіні анық.

С.А.Дуанаева, ф.ғ.к., ҚР ДІАҚМ Дін істері комитеті Дін мәселелері жөніндегі ғылыми-зерттеу және талдау орталығының ғылыми хатшысы

Abai.kz

 

 

 

 

7 пікір
Алмагуль апай 2017-05-23 22:32:46
Саясатты толық білу, түсіну де тек парыз жолында еңбектеніп жүргеннен келедідеп отыр бұл авторымыз. Қазір саясаттың заманы болғандықтан өмірге бір жақтама саясатпен ғана күшті мемлекет бола алмайсың,оған ұлттық артықшылығың мен қазіргі артықшылығың қосылып,күшті держава -мемлекет болу үшін, артықшылығымызды жөнді көрсете алуымыз керек. Ол да шынайылық еңбек арқылы келеді. Тіптен өткен кеткен сыншыл болған Кеңестегі кесіп айтушылықпен ешкімді түзете алмаспыз, себебі ол тек сол системада ғана жарасымды еді, халықтың бой түзетіп,сенген нанымы да басқа еді. Сол кездегі саясатшылдықпен әлде де міндет алған коммунистше, әр қайсымыз міндет артып,өзгешеленіп, тек қарсыластарды көбейту методикасы көп болып, халықтың әр басындағы қиялын жандандырып та сөндіріп те әлі "общесто" деп жүрудеміз!? Әр біреуіміз дерес,дұрыс қимылдап,содан барып дұрыс қоғам болсақ дегені өте реалды бұл жүйеде. Бүл адамымыз жанды сөзді жұмсақ политикамен айтып отыр қайта . Ендеше мың сан түрлі саясатты секунд сайын айыра білгеніміз дұрыс деуде қазіргі білімділер. Мейлі құлықтылығы болсын, мейлі басқасы болсын сол саясатты айыру ғана емес, сол жолдаған саясатымен де жауап алып, жауап бере алатын заман туса неге оларды да,тілімен бірге түсіну үшін қақпанға құр түсе бермей, құр бекері қасқырша күштіміз көк бөріміз дей бермей ,тірі жан тіршілігін қазіргі жоғарғы тілектегі адамша еңбегімен жасай беруі ықтимал ғой!!? Тіптен барлық жаны барлар да ертеңгі тамағын ертеңге жасырады ғой!!?? Тілін білгеніміз, жеңілмегеніміз болар едік қайта дос болып,дәл солай айыра біліп , жауапты бере алып, жауапты ала алып та алғанымыз да шарт екен . Құр елдің өсегі мен өтірік өлшемі бар саясаттың көлемін арттыра бермей, өз еңбегіңмен арпалысып, білімділігіңмен мемлекетіңді тұрақтандыра алсаң ғана ,ондайларды шебер саясаты бар халық дейді екен. Капитализм саясатының тереңдігін, жан- жақтылығын, реалдылығын Өзбек туысқан елімізде, бізден бұрын түсінгені болар ендеше . Бар нәрсеңді жоқ демей, дұрысты бұрыс демей , шынайы/искренность/ көңілді болғандықты- мінезді бұзық демей өз пайдаңа қисайтпай фактылы ойға жақындап, инемен құдық қазғандай,оқып, тоқып ғалымдарша түсіне білген уақыт келді міне. Болмасаңда болып бақ деген дана атамыздың да терең ойлы өсиетінде -тек еңбектен дегені екен,, Тек терең шынайы болатын фактылы оймен ,жұмсарта айта отырып, ашықтан ашық өз ойыңмен әсіресе ішкі саясатты жөндей білуіміз қажет екен. Қазақстан халқы болып, содан кейінде сыртқы саясатты да тек таза еңбегіңмен таба білу деген сөз, қай саладан болмасын еңбек тек сізді қорғайды деп отыр. Әр АДАМЗАТ БАСЫНДА бір жаман қиял ЗАТЫ көбеймеуі үшін, білімсіз адамға ұқсамай, еңбектене беріп, мықты болуымыз шарт екен... Ол жағы да тыраншалықпен, құр өтірік өсекпен емес, басты істетететін тереңшілдік оймен -сүзе алатын еңбегіңмен,жалпылық системасы бар адал ойыңмен, еліңді күшейте аласың екен, бұл реалды системада да әлі де Жер бетінде солай!! Бұрмалап,тіптен ондай еместі жоғарылата берсең ауруға ғана шалдырасың өзіңді де басқаны да, ол да үлкен тылсым дүниедегі жаман инерция әдеті, ол тек трагедиясы бар позитивті емес қарау күнге айналады екен . Капитализм дегі шынайы достық тек терең ойшылдықпен бола алады, сізді басқа жолға салу үшін де.ол еңбекпен де терең оймен келеді , сол терең дікте батып кетпей, жүзе білгеніміз шарт екен онда. Ата- бабамыз сондықтан да адамдарын шашыратпай,бұрмалатпай өтірікпен жау болғансытпай барлығы өзіміздікі деп біріктіре отырған, сырт көзгеде саясатын державалыққа айналдыра алған.. Оның барлығы тек еліңдегі әрбір адамдармен бірге үлкендеріміздің жауапты,парызды ортақ милы қызметімен біріккеннен ғана келген,ендеше мақтануға тұрарлықтай еңбектеріміз тек терең ойлы еңбекпен келген соны айтып отыр дана атамыз да басқаларымызда!!!? Президентіміз де және оның семьясы да еңбегімен жүрсе де жаман адамдарға тіптен жатпағаны болар, көп сансыз жақсылығы мол болғандықтан қадірін кейін ғанабілерсіздер осал емес саясатымен шындығын уақыт пен Құдірет эволюциясы көрсетер болар. Маңдайға біткен бір туар жаңа, күшті де , таза ойлы еңбегін -қазақ еңбегін, кішкене балаша бағалай алмау да ауырдың үстімен жүргеніміз болар... Үлкен су кемесінің қадіріне ұқсатып, жамандай бермей уйіңді бала шағаңа арнап, соның рухы мен адами түсінігін түзей беруіміз қажет қай жағынан болса да, қай мемлекетте болсаңда, жөнді МЕМЛЕКЕТ АТАНУЫҢ ҮШІН ТЕК ЕҢБЕК АРҚЫЛЫ КЕЛЕМІЗ ДЕ ТҰРАМЫЗ!! !!?? Ол деген сөз халқыңды көбейтумен бірге , бір- бірімізбен сиыса алатын /ерте де болсын қазірде болсын/ біріміз дос , біріміз нағыз қазақ та болып және де болуымыз қажет екен. Майдалықпен күндей беріп, өтірікпен өсегімен құтырта бермей , сиысу амалын да таба алуымыз қажет еді сонда біздер де көп болар едік... Әрі сол алған білімімізбен де көп алтын қоры мен бриллиант материяларды көбейте беріп күшті мемлекет болар елдік, себебі Құдіретт күші де берген екен БҰЛ ЖЕРІҢДІ. Атамыздың еңбектерін қасиеттілікпен бағаласаңыз, -БІЗ БАТЫРЛЫҒЫМЫЗБЕН ҚОРШАДЫҚ ДЕП ҚҰР БОСҚА АШЫТКАН НАНДАЙ КӨТЕРІЛЕ СӨЙЛЕГЕНШЕ практикада көрсетіп, өте көп байлығымызды,мұнайымызды ашып байыр едік сол ми еңбегімен бірге күш еңбегімен бірігіп жүрер едік . Келесілерімізге жоғарыдағы еңбектеріне өтірік сын айта алғандылық ол тыраншалық қой құр бекер, одан да сол өркенниетті мемлекеттердің тіптен қулық пен құлықтығы да бар болсада теориясымен практикасын үйрене алсақ қой еш болмаса. Ақша мол болу үшін,ақшаны табатын адамдар бар жерде тіптен Жер философиясымен пенделікке жаралған ақшаларыңыз кей кезде қулықпен де келеді. Оны қазіргі жұмсақ саясат дейді.. Еш болмаса құр сөзбен емес бата беріп жүре алсаң ,ол шеберлік батаңды практикада орындап отырсақ қой дегені де онда... ӨМІР КӨРСЕТУДЕ кімнің кім екенін,бір өркен ниетті қаланың санындай ғана мемлекет саны болып отырып, көкірегіміз текірек қағып,өз өзіңнен буына бергенше сиыса алмай, оны да жарытпай отырғанымыз өзіміз ендеше, өнеріміз болған мал бағуды да басқаларымыздың жарытып жатқаны шамалы, тағы да бөлінген үкімет ақшасы өте көп болғаны сонша киіктерді де басқаны да микробтан, удан залалдандыру дегенді үмытып, тек еңбектену дегендібілмей келдік, тек қалтамызды ойлап......?!... Бірақ өтірікпен ,көре алмаушылықпен,өшпенділікпен бірінші жау болуға ұста болып, өзімізді айтылған бос сөзбен ғана айқайлап көпсіп мақтанып ,/елі де әлі түсінбейді оны,нені нендей жетістік рухын мақтанып жүргенін/ болдыра алмағанбайлығымызбен, санымызбенде жарытып көбейтеміз деген ойлармен құр жалаңдаған бір ғана сөзбен әлек болып, біреудің таза жолын кесіп те тастап, иықтасуға шеберлікпен жүргеніміз сонша , қайтадан феодалдық дәуірмен де дос болып, өтірікпен бір бірімізді мұқата қалғандай күш алып сондай майдалық өмірден нәр алып, қазанымызды дер кезінде жабумен жауып тынышталып, тіптен сіңірімізді мәңгілікке созып жүргеннен көбейтпей көбеймей , біздер әлі де көбіміз ғасырларға баратын ұйқыдамыз!!?? Бірақта барлық саладан біздердің құр бос баркемшіліктерімізді 65-70 % тегі аянбаған еңбек адамдарымыз барлық арқаланған ауыр еңбегімен жауып отырып,/ білімі де , таза халық еңбегіде үлкен күш болса ,/ әр адамның бір өзі мыңын жеңе алғандықтанда еңбектері асылданып, мемлекетімізді шеберлік пен қорландырып , нағыз бриллиантша асылдылығын тездікпен көрсетуде !!! Авторымыз өте дұрыс мәселе құрып отыр кайта, әлі де манаусыраған - сеңді қозғау мықты сөздеріне мыңда бір рахмет екен, қалғаны да болса көштен қалмаса екен деп,жан дүниесі рухталған адамдарымыз жүзге жете беріп , мол болса екен деп отыр!!!?
Серік Әлиханұлы 2017-05-23 09:53:11
Автор өз мақаласында қоғам мүшелерінің әрқайсысының қолынан келетін іспен айналысып, қабілетіне қарай еңбектенсе оның өмірінде үндестік болатынын, бақытқа қол жеткізетінін меңзейді. Қоғамдық сана және адал еңбек тәрізді маңызды мәселелерді көтереді. Алайда, оқырмандардың кейбірі негізгі ойды бұра тартып, тисе терекке, тимесе бұтаққа деген ниетте пікір қалдырыпты. Құрметті отандастар! Кез-келген мақалаға пікір қалдырардан бұрын ойланып алайық. Лақап атты жамылып алып, аузымызға келгенді жаза бермейік. Егер біреуге жақсылық жасау қолымыздан келмесе, онда ісімізбен де, сөзімізбен де ешкімге жамандық жасамайық. Біреудің көңіліне келетін сөз жазсам, кешірім өтінемін...
Абдусамат 2017-05-23 09:19:54
МАҚАЛА ЖАҚСЫ ЖАЗЫЛЫПТЫ. ТҮСІНІКТІ ТІЛМЕНЕН ЖҮЙЕЛІ ЖАЗЫЛЫПТЫ. РАХМЕТ САЛИХА АПАЙ.
Нұрғали 2017-05-23 09:13:31
"Рухани дамуы кенжелеген қоғам ашкөздікке ұрынып, азғындайтынына тарих куә" - депті мақала авторы. біз қазір кім болып барамыз? Екі аяқты, жұмыр басты пенді әр сәт ойлану қажет. Қайдан келіп, қайда кетіп бара жатқанын. Қоғам ешуақытта азбайды. Қоғамды аздыртатын адам. Абай тілімен өрнектесем "қарны тоқ, жұмысы жоқ, аздырар адам баласын" деген қанатты сөзін тілге тиек етуге болады. Елдің жүгін арқалаған Елбасы «Жалпыға ортақ Еңбек Қоғамының» бағдарламасын бекерден бекер жоспар етіп бекіткен жоққой. Кейбір бауырларымыз неге сонша жат пікір айтуға асықты екен. Адам дегеннің ақылы болса мақаланы дұрыстап оқып, санасы болса саралап барып пікір жазбайма? "Төре" деп өзіне жалған ат қойып, теріс пікіріңіз қалдыруға Құдайдан қорықпайсызба? "Жақсы сөз жарым ырыс" деген даналар. Келер ырыстың жолын кеспесең жақсы болар еді, бастысы өзіңе! Салиха Дуанаеваның жасына жетіп, ғылым жолын игергеннен кейін барып салихалы пікір қалдырарсыз. Ретсіз, жүйесіз пікір қалдыра бермей....
Че 2017-05-19 19:29:44
***Халқының қамын ойлап, кейінгіге өлмес мұра қалдырған қазақтың әлемдік деңгейдегі ұлы ақыны Абайдың:*** Ата бабамыз өлең жазып өлмес мұра кең байтақ қазыналы жерді президент оның туыс жақындарына олигархтарға қалдырыптыма Дуанаев мырза ??? Қазақтың соңғы 100 жыл көрген қуғын сүргін озбырлық отаршылдықтың азабын көргенін бүгінгі күнде ашкөз билік бағаламай халықтың еңбек жалақысын осыған сай қылмай бəрі далбаса сөз.
Курылысшы 2017-05-19 17:35:33
Егемберди енбек етеди,Рахымберди рахатын кореди!
Төре 2017-05-19 15:46:11
"Елдің еңсесін еңбек көтереді". Осы ӘЛЕМДЕ теңдесі жоқ "іргелі" ғылыми жаңалығыңызды ашып, негіздегеніңіз үшін ф.ғ.к. атағын алған боларсыз?

Үздік материалдар

Рухани жаңғыру

Қанат Әбілқайыр. Қарыз бен Парыз

Abai.kz 5693
Қауіп еткеннен айтамын

Қазақстанда жүрген қытайлар кімге сүйенеді? 

Н.Қошаманұлы 11913