جەكسەنبى, 8 جەلتوقسان 2019
1180 4 پىكىر 15 قاراشا, 2019 ساعات 12:31

«جاڭا ءالىپبي: ەملە، ادىستەمە جانە حالىقارالىق تاجىريبە» اتتى كونفەرەنتسيا ءوتتى

بۇگىن نۇر-سۇلتان قالاسىندا قازاقستان رەسپۋبليكاسى مادەنيەت جانە سپورت مينيسترلىگىنىڭ ءتىل ساياساتى كوميتەتى ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ ۇيىمداستىرۋىمەن «جاڭا ءالىپبي: ەملە، ادىستەمە جانە حالىقارالىق تاجىريبە» تاقىرىبىندا رەسپۋبليكالىق كونفەرەنتسيا ءوتتى.

كونفەرەنتسيا قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا كورسەتىلگەن مەملەكەتتىك ءتىل ساياستىن جۇزەگە اسىرۋدىڭ وزەكتى ماسەلەلەرىن تالقىلاۋ ماقساتىندا ۇيىمداستىرىلدى.

كونفەرەنتسيا بارىسىندا جاڭا ءالىپبي مەن ەملە ەرەجەلەرىنە قاتىستى عىلىمي-تەوريالىق جانە ادىستەمەلىك ماسەلەلەر، لاتىن ءالىپبيىن مەڭگەرتۋدىڭ ءتيىمدى ادىستەمەسى، جاڭا ەملە ەرەجەلەرىندەگى وزەكتى ماسەلەلەر، ءالىپبي اۋىستىرعان تۇركى تىلدەرى ەملەسىنىڭ قالىپتاسۋ، جەتىلۋ جولدارىن سارالاۋ تالقىلاندى.

كونفەرەنتسيادا احمەت بايتۇرسىنۇلى اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى، پروفەسسور نۇرگەلدى ءۋالي جاڭا ءالىپبيدىڭ ورفوگرافيالىق ەرەجەلەرىنىڭ عىلىمي نەگىزدەرى جونىندە، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ پروفەسسورى تاڭات اياپوۆا شەت تىلىنەن ەنگەن سوزدەردى جاڭا الىپبيدە جازۋ نورمالارى تۋرالى، ى.التىنسارين اتىنداعى ۇلتتىق ءبىلىم اكادەمياسىنىڭ اعا عىلىمي قىزمەتكەرى جانبوتا ەسەپباي ورتا ءبىلىم جۇيەسىنە لاتىن ءالىپبيىنىڭ ەنۋى جونىندە جانە ت.ب. عالىمدار جاڭا ءالىپبيدىڭ، ونىڭ ەملە ەرەجەلەرىنىڭ ءار الۋان ماسەلەلەرى جونىندە باياندامالار جاسادى.

سەكتسيالىق ماجىلىستەردە ءالىپبيدىڭ ادىستەمەلىك ماسەلەلەرى، لاتىن ءالىپبيىن ەنگىزۋدىڭ حالىقارالىق تاجىريبەسى تۋرالى عىلىمي پىكىرالىسۋلار بولدى. كونفەرەنتسيا اياسىندا لاتىن ءالىپبيىنىڭ  مينيسترلىككە ۇسىنىلعان نۇسقالارى ساراپتالدى. ولار:  ەسكەندىر تاسبولاتتىڭ جوباسى، ماناس ساپارباەۆتىڭ جوباسى، نۇرلان تۇلتەباەۆ جوباسى, ابزال داۋرەنبەكۇلىنىڭ جوباسى. وسى جوبالار بويىنشا ورفوگرافيالىق جۇمىس توبىنىڭ مۇشەلەرى، عالىمدار جانتاس جاقىپوۆ، قارلىعاش سارەكەنوۆا، زەينەپ بازارباەۆا، جانار  جۇماباەۆالار عىلىمي ساراپتاما جاسادى. سونىمەن بىرگە بۇل ءالىپبي جوبالارىنا اقپاراتتىق سۇيەمەلدەۋ جانە تەحنيكالىق جەتىلدىرۋ جۇمىس توبىنىڭ مۇشەلەرى ءىت ماماندارى رىمبەك ىزعالي، ارشات وراز، نارتاي اشىمدەر وزدەرىنىڭ ويلارىن ايتتى. سونىمەن قاتار، كونفەرەنتسيا اياسىندا گەوگرافيالىق اتاۋلار مەن كىسى ەسىمدەرىنىڭ جاڭا الىپبيدە جازىلۋ ەرەجەلەرى وسى عىلىمي ماجىلىسكە قاتىسقان عالىمدار اراسىندا كەڭىنەن تالقىلاندى.

وسى عىلىمي رەسپۋبليكالىق جيىننىڭ قورىتىندىلارى بويىنشا ورفوگرافيالىق جانە ادىستەمەلىك جۇمىس توپتارىنىڭ  كونفەرەنتسيادا ايتىلعان مىندەتتەرى ناقتىلانىپ، ۇسىنىستار سارالاندى.

Abai.kz

4 پىكىر