جۇما, 29 ناۋرىز 2024
4432 10 پىكىر 29 قاراشا, 2019 ساعات 19:09

اپەللياتسيا سوتى كونستانتين سىروەجكيندى ازاماتتىقتان ايىرماۋدى بۇيىردى

28 قاراشادا الماتى قالاسى سوتىنىڭ قىلمىستىق ىستەر بويىنشا القاسى وتكەن ايدا "مەملەكەتكە وپاسىزدىق جاسادى" دەگەن ايىپپەن 10 جىلعا سوتتالعان قىتايتانۋشى كونستانتين سىروەجكيننىڭ اپەللياتسيالىق شاعىمىن قاراپ، ۇكىمدى ءىشىنارا وزگەرتتى.

سوتتىڭ ءباسپاسوز حاتشىسى مىندەتىن اتقارۋشى اباي جارىلقاسىننىڭ جۋرناليستەرگە حابارلاۋىنشا، سوت القاسى سىروەجكيندى قازاقستان ازاماتتىعىنان ايىرۋ جانە ەل اۋماعىنان شىعارىپ، قازاقستانعا كىرۋىنە تىيىم سالۋ تۋرالى قوسىمشا جازانى جويعان. ۇكىمنىڭ قالعان بولىگى كۇشىندە قالدى دەپ حابارلادى جارىلقاسىن.

الماتى قالاسى سوتىنىڭ 15 قازاندا تاراتقان اقپاراتىندا كونستانتين سىروەجكيندى 10 جىل قاتاڭ رەجيمدەگى كولونياعا قاماۋ، ال جازا مەرزىمىن وتەپ شىققان سوڭ ونى ەلدەن شىعارىپ، بەس جىل بويى قازاقستان اۋماعىنا كىرۋىنە تىيىم سالۋ تۋرالى ايتىلعان.

2017 جىلى زاڭعا قازاقستان ازاماتىن "تەرروريستىك قىلمىستار جاساعانى ءۇشىن، سونداي-اق قازاقستان رەسپۋبليكاسىنىڭ ومىرلىك ماڭىزى بار مۇددەلەرىنە وزگە دە اۋىر زيان كەلتىرگەنى ءۇشىن" سوت شەشىمىمەن ازاماتتىقتان ايىرۋ تۋرالى تۇزەتۋ ەنگىزگەن.

كونستانتين سىروەجكين بيىل اقپاندا مەملەكەتتىك قۇپيا اقپاراتتار تاراعانى جايلى ءىستى تەكسەرۋ بارىسىندا قاماۋعا الىنعان. ونىڭ تۇتقىندالعانى تۋرالى العاشقى اقپارات باق-تا مامىر ايىندا جاريالانعان. كەيىن ۇلتتىق قاۋىپسىزدىك كوميتەتى سىروەجكين "مەملەكەتكە وپاسىزدىق جاسادى" دەگەن ايىپپەن 19 اقپاننان باستاپ قاماۋدا وتىرعانىن راستاعان. بىراق رەسمي ورىندار ءىستىڭ ءمان-جايىن تۇسىندىرمەگەن.

63 جاستاعى كونستانتين سىروەجكين الماتىدا دۇنيەگە كەلگەن. سسسر مەملەكەتتىك قاۋىپسىزدىك كوميتەتىنىڭ (كگب) جوعارى مەكتەبىن بىتىرگەن، 2006 جىلدان قازاقستان پرەزيدەنتى جانىنداعى ستراتەگيالىق زەرتتەۋلەر ينستيتۋتىندا باس عىلىمي قىزمەتكەر بولىپ جۇمىس ىستەگەن كونستانتين سىروەجكين قازاقستانداعى بەلگىلى قىتايتانۋشىلاردىڭ ءبىرى سانالادى.

ونىڭ ۇستىنەن قوزعالعان قۇپيا ءىس جايلى كەي دەرەكتەردى بۇعان دەيىن امەريكالىق Wall Street Journal گازەتى جازعان. شىلدەنىڭ 10-ى كۇنى جاريالاعان ماقالاسىندا باسىلىم قازاقستاننىڭ قارسى بارلاۋ قىزمەتكەرلەرى سىروەجكيندى ءوز پاتەرىندە قۇپيا وپەراتسيا بارىسىندا ۇستاعان دەپ حابارلادى. بۇل ىستەن حاباردار دەرەك كوزىنە سىلتەمە جاساعان گازەت "سىروەجكين قىتايدىڭ بارلاۋ ورگانىمەن بايلانىسى بار ادامدارعا قۇپيا قۇجاتتار بەرگەن بولۋى مۇمكىن" جانە "سول ءۇشىن اقشالاي سىيلىق الۋى ىقتيمال" دەپ جازدى. WSJ قىتاي بيلىگىنىڭ سىروەجكيننىڭ ءىسىن "جوقتان بار جاساپ قۇراستىرىلعان جاڭالىق" دەپ اتاعانىن ايتادى. باسىلىمنىڭ پايىمداۋىنشا، عالىمدى تۇتقىنداۋ "قازاقستاندا قىتايدىڭ ىقپالىنا بايلانىستى الاڭداۋشىلىق كۇشەيىپ كەلە جاتقانىن جانە وسالدىق سەزىمى ءورشي تۇسكەنىن" كورسەتەدى. سونىمەن بىرگە گازەت قازاقستاننىڭ قازىرگى پرەزيدەنتى قاسىم-جومارت توقاەۆ پرەمەر-مينيستر بولعان جىلدارى سىروەجكين ونىڭ قىتاي ماسەلەلەرى بويىنشا كەڭەسشىسى بولعانىنا نازار اۋدارعان. گازەتتىڭ دەرەگىنشە، سىروەجكين توقاەۆقا قىتايمەن شەكارانى بىرلەسىپ دەماركاتسيالاۋ تۋرالى كەلىسسوزدەر كەزىندە كەڭەس بەرگەن.

Abai.kz

10 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3551