جامبىل وبلىسىنىڭ اكىمى بەردىبەك ساپارباەۆ قوردايداعى شەتىن وقيعانىڭ زارداپتارىن جويۋ جونىندەگى وبلىستىق شتابتىڭ جيىنىن وتكىزدى. بۇل تۋرالى جامبىل وبلىسى اكىمدىگىنىڭ ءباسپاسوز قىزمەتى حابارلاعان.

بەردىبەك ساپارباەۆ قورداي اۋدانىنا جۇمىس ساپارىمەن بارىپ، ونداعى بىرقاتار الەۋمەتتىك نىسانداردىڭ جۇمىسىمەن تانىسىپ، اۋىل تۇرعىندارى تىرشىلىگىنىڭ قالىپتى جاعدايعا ءتۇسۋ جايىن تالقىلاعان.

وبلىستىق شتابتىڭ مالىمەتىنشە قوردايداعى شەتىن وقيعادان 185 ادام زارداپ شەككەن. ولاردىڭ 34-ءى  اۋرۋحانالارعا جاتقىلعان. سونداي-اق، 39 ءۇي، 20 كوممەرتسيالىق نىسان، 47 اۆتوكھولىك ورتەنگەن.

"ال 1-13 اقپان ارالىعىندا قورداي، قاراسۋ، اۋقاتتى جانە سورتوبە اۋىلدارىنان قىرعىزستانعا 23 131 ادام وتكەن. ال قازاقستانعا كىرگەندەرى 21 261 ادام", دەپتى جەرگىلىكتى اكىمدىك.

سونىمەن قاتار، اۋىلداردى قالپىنا كەلتىرۋ جانە تازارتۋ ءۇشىن 250 ادام مەن 53 تەحنيكا جۇمىلدىرىلىپتى. بارلىعى 680 توننا قۇرىلىس قوقىسىن شىعارعان.

قازىرگى ۋاقتا 55 دۇكەن، 3 ءدارىحانا، 14 جانارماي بەكەتى مەن 30-عا جۋىق باسقا دا كوممەرتسيالىق نىساندار قالىپتى جۇمىس جاساپ جاتىر.

ال جوعالعان قۇجاتتاردى رەتتەۋ ءۇشىن ارنايى ءموبيلدى ورتالىقتار ىسكە قوسىلعان. ول سورتوبە اۋىلدىق وكرۋگىنىڭ اكىمدىگىندە ورنالاسقان.

778 وتباسىنا گۋمانيتارلىق كومەك كورسەتىلگەن. ولاردىڭ دەنى ازىق-تۇلىك، تۇرمىستىق تاۋارلار. جالپى كولەمى 57,2 توننا.

Abai.kz