جۇما, 29 ناۋرىز 2024
جاڭالىقتار 2605 0 پىكىر 5 ناۋرىز, 2013 ساعات 08:03

ءومىرجان ابدىحالىقۇلى. الاش كوكتەمى

 

«تۇگەن دەگەن حان، پالەن دەگەن بي، باتىر وتكەن، ەرلىگى، ەڭبەگى كوپ دەپ ماقتانامىز. ولار سونداي بولسا، قازاق نەگە سورلى؟ ءبىزدىڭ كەمشىلىگىمىز - اركىم تاريح ارقالاتقان جۇكتى بەلگىلى جەرگە اپارماي، سوڭىنداعىلارعا تاستاپ كەتەتىندىگى»

ءاليحان بوكەيحان

05 ناۋرىز - ءاليحان نۇمۇحامەدۇلىنىڭ تۋعان كۇنى

الاشقا اۋىز جول ەمەس!

 

 

«تۇگەن دەگەن حان، پالەن دەگەن بي، باتىر وتكەن، ەرلىگى، ەڭبەگى كوپ دەپ ماقتانامىز. ولار سونداي بولسا، قازاق نەگە سورلى؟ ءبىزدىڭ كەمشىلىگىمىز - اركىم تاريح ارقالاتقان جۇكتى بەلگىلى جەرگە اپارماي، سوڭىنداعىلارعا تاستاپ كەتەتىندىگى»

ءاليحان بوكەيحان

05 ناۋرىز - ءاليحان نۇمۇحامەدۇلىنىڭ تۋعان كۇنى

الاشقا اۋىز جول ەمەس!

 

ءاليحان مىرزا پۇتقا اينالاما  دەپ قورقامىن. سەبەبى، ءاليحان، الاش دەگەندە سوزگە بار، ىسكە جوق ادامداردىڭ قاراسى سوڭعى ءبىر-ەكى جىلدىڭ بەدەرىندە كوبەيگەنى بايقالادى. وسىلاي جالعاسا بەرسە، ءاليحان دا پۇتقا اينالعان ابايدىڭ اياعىن قۇشادى - اۋزىمىزدا بار، ىسىمىزدە جوق. جارىق دۇنيە ەسىگىن تىرشىلىك باستاۋى كوكتەمدە اشىپ، ءوزى دە قازاققا ساياسي  كوكتەم بولىپ كەلىپ، ەسكىنى جاڭاعا اۋىستىرىپ، ۇلتتى قايتا تۇلەتكەن ءاليحاننىڭ ءىسىن، الاشتىڭ ساياسي مەكتەبىن قايتا جاڭعىرتىپ جۇرگەن جان بار ما؟ ءاي، جوق. بار بولسا، ءدال قازىر جارقىراپ شىعاتىن ۋاقىتى عوي. دەمەك، الاشتىڭ ساياسي ءىسى توقتاپ تۇر. سوندا ءبىز نە ىستەپ ءجۇرمىز؟ ءبىز، ءبارىمىز الاشتانۋشىلاردىڭ باقشاسىندا ءجۇرمىز: كونفەرەنتسيا ۇيىمداستىرامىز، كىتاپ شىعارامىز، دوڭگەلەك ۇستەل وتكىزەمىز، الاشقا قاتىستى داتالى كۇندەردە «الاششىل» ەكەنىمىز ەسىمىزگە ءتۇسىپ، جوقتان بار جاساپ ءبىر نارسە جاسايمىز (مۇنىڭ ءبارى قالاي وتەدى، سولاي ۇمىتىلادى. تەك جارىق كورگەن كىتاپتار عانا قالادى), ونى جاتىپ كەپ جارنامالايمىز - وسى ءبىزدىڭ ءىس. بۇل ارەكەتىمىزدىڭ اتىن - اعارتۋشىلىق دەپ اتايمىز تاعى. ال، الاشتىڭ ءىسى بولسا، جالعاستىرۋشىسىن كۇتىپ سارعايىپ جاتىر.

 

جارايدى، الاش ءۇشىن ءىس جاساعامىز كەلەدى ەكەن. وندا نەگە مىرجاقىپتىڭ اتىنداعى كوشە استانانىڭ شەتىندە، ەسكەرتكىش تاقتا كورەر كوزگە قوراش جەردە تۇر؟ ءاليحاننىڭ اتىنداعى استاناداعى كوشە نەگە ءبىر تۇتام، ءبىر قۋىستا جاتىر؟ ەكى ءىرى قالادا ءاليحاننىڭ ەسكەرتكىشى نەگە جوق، قۇرمەتتى «الاششىل» مىرزالار!  يا، الاش داڭقى ولمەك ەمەس، بىراق، الاشتىڭ سوزىنەن تسيتاتا كەلتىرۋ، ناتيجەسىز ءىس قىلۋ - الاششىلدىق ەمەس.

تاعى ءبىر نارسە - الاشتىڭ يدەياسىن قايتا تۇلەتىپ، ءىسىن جالعاستىرۋ ءوزىمىز ءۇشىن كەرەك. ايتپەسە، الاشقا ءبىزدىڭ تاڭ قالىپ، ماداقتاۋىمىزدىڭ كوك تيىنعا قۇنى جوق.

الاش كوكتەمى

ءاليحان نۇرحمۇحامەدۇلى قازاق دالاسىنا ساياسي كوكتەم الىپ كەلگەن ادام ەكەنىن ايتتىق. الاش ءىسى - تاريحتىڭ سارعايعان بەتتەرىندە سايراپ جاتىر. ءتىپتى بۇگىنگى تاۋەلسىز قازاقستاننىڭ تەرريتورياسىن دا قۇجاتپەن بەكىتىپ بەرگەن ءاليحان ەدى. ال، سول الەكەڭ باستاپ كەتكەن ساياسي جول ءىزباسارلارىن جوقتاپ ءالى جاتىر.

جاسىرىپ-جابارى جوق، قازىرگى قازاقستاننىڭ قوعامدىق-ساياسي جاعدايى وزگەرىستى جان-تانىمەن قالاپ تۇرعانى راس. تەك ساياسي ۇرەيدەن ءتىلى كۇرمەلىپ تۇر. ايتپەسە، ءار قازاقتىڭ جۇرەگى وزگەرىس دەپ سايراپ تۇر. وزگەرىستى - تابيعاتقا دا، ساياساتقا دا كوكتەم اكەلەدى. ال، قازاققا كەرەگى - الاش ءىسىنىڭ جالعاسقانى. الاشتىڭ، ءاليحاننىڭ ساياسي ءىسى جالعاسسا، ونىڭ ءىزىن باسىپ بۇگىنگى قازاققا دا ساياسي وزگەرىس بولىپ، الاش كوكتەمى ورالادى. انە، سول كەزدە قۇداي تاعالا ءبىزدى قاتارىنان جاراتقان ۇلتىمىز دۇركىرەپ قايتا ورلەيدى.

ءيا، ءبىز تىعىرىققا تىرەلدىك. تىرەدى. دەمەك، ەندى اداسپاۋىمىز ءۇشىن باستاۋىمىزعا قايتا ورالۋىمىز شارت. باستاۋ - الاش!

الاش پارتياسىنىڭ قاتارىندا، الاش كوكتەمىن كورىپ، كوك تۋدى ۇستاپ كۇلىمدەپ جولىعۋعا جازسىن!

«جاساسىن، الاش، جاساسىن!»

Abai.kz

 

P.S.

«ءبىزدىڭ كەمشىلىگىمىز - اركىم تاريح ارقالاتقان جۇكتى بەلگىلى جەرگە اپارماي، سوڭىنداعىلارعا تاستاپ كەتەتىندىگى»، دەيدى ءاليحان. بۇل كەمشىلىك بىزدە دە بار. «جاستارعا سەنەمىن، ولار ءبىز جاساماعاندى جاسايدى، ءبىز الماعان اسۋدى الادى» دەپ كەلەتىن ءارى ءجيى ەستيتىن تىركەستەر ۇلت بولاشاعى ءۇشىن ەڭ سۇمپايى سوزدەر. بۇل - جەڭىلگەن ادامنىڭ ءسوزى. دەمەك، ءار بۋىن ۇرپاق تاريح ارقالاتقان جۇكتى دىتتەگەن جەرىنە دەيىن جەتكىزىپ بارىپ قانا ساپارىن اياقتاۋ ءتيىس. ءوز جۇگىن بالاسىنا قالدىراتىن اكەلەردىڭ ءوز ءىسىن اياقتاماي ولۋگە قاقى جوق.

ءبىزدىڭ جۇك اۋىر. ويتكەنى، بۇگىنگى بيلىك بىزگە وتە اۋىر جۇك قالدىرىپ بارادى. ونىڭ ۇستىنە ءوز جۇگىمىز تاعى بار. دەمەك، بىزگە سالماق ەكى ەسەگە اۋىر تۇسەدى. بۇل بىزگە تاريح ارقالاتقان جۇك. سول جۇكتى جەرىنە جەتكىزۋ مىندەت.

سۋرەت بولات ءمۇرسالىمنىڭ "الاشوردا" كىتاپ-البومىنان الىندى

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1584
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2284
عيبىرات

قايسار رۋحتى عازيز جان

مۇحتار قۇل-مۇحاممەد 3622