جۇما, 29 ناۋرىز 2024
قوعام 9629 0 پىكىر 26 ناۋرىز, 2014 ساعات 14:10

ە.ارىننىڭ جەكە باسىن قورلاۋ ارەكەتتەرى توقتاتىلسىن!

قازاقستان رەسپۋبليكاسىنىڭ پرەزيدەنتى ن.ءا.نازارباەۆقا

اشىق حات

اسا قۇرمەتتى نۇرسۇلتان ءابىشۇلى!

ءبىز، زيالى قاۋىم وكىلدەرى كورنەكتى عالىم، پاۆلودار وبلىسىنىڭ بۇرىنعى اكىمى ەرلان مۇحتارۇلى ارىننىڭ قازىرگى تاعدىر-تالايىنا اسقان الاڭداۋشىلىق سەزىممەن تىكەلەي ءسىزدىڭ وزىڭىزگە اشىق حات جازۋعا ءماجبۇر بولىپ وتىرمىز.

ەكونوميكا عىلىمدارىنىڭ دوكتورى، پروفەسسور، قر ۇعا-نىڭ قۇرمەتتى اكادەميگى ە.م. ارىن 250-دەن استام عىلىمي ەڭبەكتىڭ: ەنتسيوكلوپەديالار، مونوگرافيالار، سوزدىكتەر، وقۋ قۇرالدارىنىڭ اۆتورى. ە.م. ارىننىڭ جەتەكشىلىگىمەن جانە رەداكتسياسىمەن 9 تومدىق «قازاقتار» ەنتسيكلوپەديالىق سوزدىگى، «قازاق ادەبيەتى»، «قازاق ءتىلى»، «قازاق مادەنيەتى» ەنتسيكلوپەديالارى، سونداي-اق باسقا دا ىرگەلى ەڭبەكتەر باسپادان شىعىپ، عىلىمي جۇرتشىلىق پەن شىعارماشىل زيالىلار ورتاسىندا جوعارى باعالاندى.

ەرلان ارىننىڭ 30 شاقتى شاكىرتى دوكتورلىق جانە كانديداتتىق ديسسەرتاتسيا قورعادى، 4 شاكىرتى «دارىن» مەملەكەتتىك سىيلىعىنىڭ يەگەرى اتاندى. ونىڭ ءوزى دە ءبىرتالاي مەملەكەتتىك ماراپاتتاردىڭ يەگەرى. 1997 جىلى بۇقارالىق اقپارات قۇرالدارى ەرلان مۇحتارۇلىن قازاقستاننىڭ 5 قوعامدىق-ساياسي قايراتكەرى اراسىندا «جىل ادامى» دەپ تانىدى.

ە.م. ارىن س. تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ رەكتورى قىزمەتىندە ىستەگەن 2001-2012 جىلدارى قاتارداعى جوعارى وقۋ ورنىن رەسپۋبليكا بويىنشا رەيتينگىسى جوعارى وزىق وقۋ ورىندارىنىڭ قاتارىنا قوستى. ونىڭ باستاماسىمەن اۋليە ساناتىنداعى ايگىلى تۇلعا ءماشھۇر ءجۇسىپتىڭ كەسەنەسى سالىنىپ،تۇلعالىق ەنتسيكلوپەدياسى جارىق كوردى، ەڭبەكتەرى 20 توم كىتاپ بولىپ شىقتى.

ەرلان مۇحتارۇلى وبلىستىق ءماسليحاتتىڭ دەپۋتاتى كەزىندە قىزىل كوميسسار دزەرجينسكي اتىنداعى ورتالىق كوشە اتاۋىن اكادەميك ساتباەۆتىڭ اتىنا اۋىستىرۋ، وزگە دە ءبىرتالاي كوشەلەردىڭ اتاۋلارىن قازاقىلاندىرۋ ءىس-شارالارىنا جەتەكشىلىك ەتتى.

ول وبلىس اكىمى قىزمەتىندە ىستەگەن 2012-2013 جىلدارى ايماقتىڭ الەۋمەتتىك-ەكونوميكالىق دامۋى وبلىس اۋماعىنىڭ 2011-2015 جىلدارى دامۋ باعدارلاماسىندا بەلگىلەنگەن مىندەتتەر مەن ءىس-شارالارعا سايكەس جۇزەگە اسىرىلدى. جاڭا جۇمىس ورىندارىن اشۋ جوسپارى 25%-عا اسىرا ورىندالدى، اگرووندىرىس كەشەنى كورسەتكىشتەرى جاقساردى، جالپى ءونىم شىعارۋدىڭ ناقتى كولەمى ارتتى. اسىرەسە، وبلىستىڭ رۋحاني، مادەني دامۋى ىلگەرىلەپ، ساۋلەت ونەرىنىڭ عاجايىپ تۋىندىلارى دۇنيەگە كەلدى، اشارشىلىق جانە ساياسي قۋعىن-سۇرگىن قۇرباندارىن ماڭگى ەستە قالدىرۋعا ارنالعان مونۋمەنتتەر سالىندى. تىكەلەي ە.م. ارىننىڭ باسشىلىعىمەن ەرتىستىڭ كەرەكۋ-باياناۋىل وڭىرىنەن شىققان تاريحي تۇلعالار مەن الاش قايراتكەرلەرىنىڭ ەسىمدەرى قۇرمەتتەلىپ، وبلىستاعى عالىمدارعا، شىعارماشىل زيالىلارعا، مادەنيەت پەن ونەر ادامدارىنا قولداۋ كورسەتىلدى.

ە.م. ارىننىڭ وتارشىلدىق ءداۋىرى زاردابىن جۇرتشىلىققا ايگىلەپ، تاۋەلسىزدىك كەزەڭىن ۇلىقتايتىن ءىس-ارەكەتتەرى جانە ونوماستيكا ساياساتىنداعى بەلسەندىلىگى جاس ۇرپاقتىڭ ساناسىندا مەملەكەتشىلدىك، وتانسۇيگىشتىك، قازاقستاندىق پاتريوتيزم سەزىمدەرىن وياتتى. ايتسە دە، پاتشازادا پاۆەل رومانوۆتىڭ اتىنداعى پاۆلودار قالاسى اتاۋىن بارىنشا قۇرمەتتەپ، پاتشالىق-كەڭەستىك ءداۋىردى كوكسەپ جۇرگەن كەرىتارتپا توپ وعان «وبلىستىڭ باس وناماستى»، «ۇلتشىل اكىم» دەگەن ات بايلاپ، ايدار تاقتى. جۇزدەن استام ۇلت وكىلدەرى تۇراتىن ايماقتىڭ باسشىسى ەل ىنتىماعىن ساقتاۋدى كوزدەگەندىكتەن الگىندەي ارەكەتتەرگە توزىمدىلىك تانىتتى، ءتىپتى ءسىبىر كازاكتارى وداعى پاۆلودار بولىمىنەن «قۇرمەتتى اتامان» اتاعىن دا قابىلدادى. سوندا دا قارسىلاستارى تىنشۋ تاپپاي، ونىڭ بەدەلىن تومەندەتۋ ماقساتىندا بىرجاقتى سىني تەلەحابارلار ۇيىمداستىردى. وسىنداي حابارلاردىڭ بىرىندە 2012-2013 جىلعى اسا جايسىز قىستا كەيبىر شارۋا قوجالىقتارىنداعى مال شىعىنى وبلىس اۋماعىن تۇگەلدەي جايلاعان جۇت ءتارىزدى كورسەتىلدى.

زاڭ مەن مورال اياسىنا سىيمايتىن مۇنداي جايتتاردى – اسا جوعارى لاۋازىمدى شەنەۋنىكتەر اراسىندا ە.م. ارىنعا قارسى توپتىڭ قاسكويلىكپەن ۇيىمداستىرعان ارانداتۋشىلىق ارەكەتتەرىنىڭ كورىنىسى دەگەن ويدامىز.تەرگەۋ امالدارى كۇدىكتىنى قايتسە دە ايىپتىعا اينالدىرىپ، باس بوستاندىعىنان ايىرۋ جازاسىنا كەسۋ ماقساتىن جۇزەگە اسىرۋ باعىتىندا جۇرگىزىلۋدە ءتارىزدى. سوت شەشىمىنسىز كەز كەلگەن ازاماتقا ايىپ تاعۋ زاڭ بۇزۋشىلىق بولىپ تابىلسا دا، رەسپۋبليكالىق، وبلىستىق باسىلىمداردا تەرگەۋ بارىسىندا ەرلان مۇحتارۇلىنىڭ قىلمىستىلىعى انىقتالىپ، دالەلدەندى دەگەن سىڭايداعى اقپاراتتار تاراتىلۋدا! بۇل –زيالى قاۋىم وكىلدەرىنىڭ، سونداي-اق قاراپايىم ەڭبەك ادامدارى مەن ەڭبەك ارداگەرلەرىنىڭ دە نارازىلىعىن تۋدىرۋدا. جۇرتشىلىق ونى ءالى دە جامانشىلىققا قيماي، بىلىكتى باسشى، مەملەكەتشىل ساياسي قايراتكەر، سۇڭعىلا عالىم، ۇلتجاندى ازامات رەتىندە بىلەدى.

دەگەنمەن، اينالاسىنداعى قىزمەتكەرلەردىڭ بارلىعىنا بىردەي كامىل سەنەتىن ەرلان مۇحتارۇلى وبلىس اكىمى قىزمەتىن اتقارعان كەزىندە اڭعالدىعىنىڭ سالدارىنان قاتەلىككە ۇرىنۋى دا ىقتيمال. بىراق مۇنىڭ ءوزى ەسىمى ەلىمىز بەن شەتەلدەرگە دە بەلگىلى كورنەكتى تۇلعانى قاندىبالاق قاراقشى ءتارىزدى تۇتقىنداپ قاماۋدا ۇستاۋعا، قوقان-لوققى كورسەتىپ، ادامي قاسيەتتەرىنە قول سۇعۋعا نەگىز بولا المايدى!

قۇرمەتتى نۇرسۇلتان ءابىشۇلى!

ەرلان مۇحتارۇلى ارىننىڭ ۇستىنەن قوزعالعان قىلمىستىق ءىس بويىنشا تەرگەۋ امالدارىنىڭ زاڭ شەڭبەرىندە جۇرگىزىلۋىنە، سونداي-اق بۇقارالىق اقپارات قۇرالدارى ارقىلى ونىڭ جەكە باسىن قورلاۋ ارەكەتتەرىنە توسقاۋىل قويىلۋىنا اتا زاڭنىڭ كەپىلى رەتىندە ىقپال ەتۋىڭىزدى سىزدەن وتىنەمىز.

الەمدىك دەڭگەيدەگى تانىمال كوشباسشىلاردىڭ وندىعىنا ەنگەن جانە باتىس پەن شىعىستىڭ مودەراتورى اتانىپ، تالاي حالىقارالىق، مەملەكەتتىك اسا كۇردەلى ماسەلەلەردىڭ تۇيىندەرىن كەمەڭگەرلىكپەن شەشكەن اسا قادىرمەندى ەلباسىمىز، ەندى ءوزىڭىز زيالى قاۋىم وكىلدەرىنىڭ وسى ءوتىنىشىن ەسكەرە وتىرىپ، جۇرتشىلىقتىڭ تىلەگىنە سايكەس شەشىم قابىلدايسىز دەگەن سەنىمدەمىز.

 

ءوتىنىش بىلدىرۋشىلەر:

ارمان قاني، اقىن، جۋرناليست، قازاقستان جازۋشىلار وداعى باسقارماسىنىڭ مۇشەسى، قازاقستاننىڭ ەڭبەك سىڭىرگەن قايراتكەرى; جۇماعالي قوعاباي، اقىن، قازاقستان جازۋشىلار وداعىنىڭ مۇشەسى، قوعام

بەلسەندىسى; اقىن الاقانۇلى، جازۋشى، قازاقستان جازۋشىلار وداعىنىڭ مۇشەسى; سۇلەيمەن بايازيتوۆ، اقىن، قازاقستان جازۋشىلار وداعىنىڭ مۇشەسى; سايلاۋ بايبوسىن، اقىن، جۋرناليست، قازاقستان جازۋشىلار وداعىنىڭ مۇشەسى، قازاقستاننىڭ مادەنيەت قايراتكەرى; جانار قادىروۆا، اقىن، جۋرناليست، قازاقستان جۋرناليستەر وداعىنىڭ مۇشەسى; اسىعات تۇرعانبەكوۆ، ايتىسكەر اقىن; قۋانىش شارمانوۆ، ايتىسكەر اقىن; بەيبىت بوجەن، ايتىسكەر اقىن; بەيسەنبى مۇقاجانوۆ، ايتىسكەر اقىن; الماگۇل جۇگىنىسوۆا، ايتىسكەر اقىن; دانيال اسەنوۆ، اباي، شاكارىم شىعارمالارىن كوركەم وقۋ شەبەرى; تولەۋبەك قوڭىروۆ، قازاقستاننىڭ قۇرمەتتى ءجۋرناليسى; جۇماسەيىت بيجانوۆ، قازاقستاننىڭ قۇرمەتتى ءجۋرناليسى; سوتسيال ايتەنوۆ، جۋرناليستيكا ارداگەرى; جەڭىس مانانباەۆ، جۋرناليستيكا ارداگەرى; بەكەن ساعىندىقۇلى، فيلولوگيا عىلىمدارىنىڭ دوكتورى، پروفەسسور; ايمان زەينۋللينا، فيلولوگيا عىلىمدارىنىڭ كانديداتى، پروفەسسور، جەلتوقسانشى; رىسكۇل شاكامان، فيلولوگيا عىلىمدارىنىڭ كانديداتى، پروفەسسور، جەلتوقسانشى; بەيبىت ءشانىم، قازاقستاننىڭ مادەنيەت قايراتكەرى، جەلتوقسانشى; امانتاي قۇداباەۆ، فيلوسوفيا عىلىمدارىنىڭ كانديداتى، پروفەسسور; امانتاي تويشىباي، جۋرناليست، فيلولوگيا عىلىمدارىنىڭ كانديداتى; وسەرباي شورانوۆ، سۋرەتشى، قازاقستان سۋرەتشىلەر وداعىنىڭ مۇشەسى، قر كوركەمسۋرەت اكادەمياسىنىڭ اكادەميگى، قازاقستاننىڭ ەڭبەك سىڭىرگەن قايراتكەرى; عالىم عارجاسوۆ، سۋرەتشى، قازاقستان سۋرەتشىلەر وداعىنىڭ مۇشەسى، قر كوركەمسۋرەت اكادەمياسىنىڭ اكادەميگى; انۋار يگەمباەۆ، سۋرەتشى، قازاقستان سۋرەتشىلەر وداعىنىڭ مۇشەسى، قر كوركەمسۋرەت اكادەمياسىنىڭ اكادەميگى; توعايباي كەنتاي، «قازاق ءتىلى» قوعامى پاۆلودار وبلىستىق ۇيىمى باسقارماسىنىڭ توراعاسى; باقىتجامال ماكسيلوۆا، مۇسىلمان ايەلدەرى ليگاسى پاۆلودار وبلىستىق فيليالىنىڭ ءتورايىمى; قايروللا كاجەنوۆ، شەجىرەشى، قوعام بەلسەندىسى; جانىبەك مالىكوۆ، ءانشى، قازاقستاننىڭ مادەنيەت قايراتكەرى، جانات قوڭىروۆ، قوعام بەلسەندىسى; اعىباي جاسكەنوۆ، قوعام بەلسەندىسى; ناۋقانبەك رىسباەۆ، قوعام بەلسەندىسى; ماقسات عابدۋللين، قوعام بەلسەندىسى; جاقسىبەك وتەنوۆ، قۇقىققورعاۋشى، قوعام بەلسەندىسى; سۆەتلانا قوندىكەروۆا، قوعام بەلسەندىسى، اقسۋ قالاسىنىڭ قۇرمەتتى ازاماتى; قابدىراحمان سەيىلعازين، قوعام بەلسەندىسى; قاناتبەك نابيەۆ، قوعام بەلسەندىسى; قايىر جۇماجانوۆ، ءتىل جاناشىرى; ماحمەت دەمەسىنوۆ، پاۆلودار قالاسىنىڭ قۇرمەتتى ازاماتى، ءتىل جاناشىرى; ءمادينا قازانعاپوۆا، وقىتۋشى، ءتىل جاناشىرى; قۋاندىق بايازيت، قۇرمەتتى تەمىرجولشى، قولونەر شەبەرى، ءتىل جاناشىرى.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1565
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2260
عيبىرات

قايسار رۋحتى عازيز جان

مۇحتار قۇل-مۇحاممەد 3541