الماتى قالاسىنداعى №2 مەدەۋ اۋداندىق سوتىندا «فەنيكس» كينوفيلمىن تۇسىرۋگە بولىنگەن قاراجاتتى جىمقىرۋ فاكتىسى بويىنشا «ش. ايمانوۆ اتىنداعى «قازاقفيلم» اق-نىڭ لاۋازىمدى تۇلعالارىنا جانە «T.K. Turan Universal Business» جشس-ءنىڭ قىزمەتكەرلەرىنە قاتىستى سوت وتىرىسى ودان ءارى جالعاستى. سوتتا سويلەگەن كۋاگەرلەر «فەنيكسكە» قاتىستى بىرقاتار بىلىقتاردى راستادى.

 سوتقا تۇسىنىك بەرگەن كۋاگەر راۋشان ماحنو ءوزىن كينوفيلمگە رەجيسسەردىڭ اسسيستەنتى رەتىندە ونىڭ كۇيەۋىنىڭ اپكەسى ناتاليا يۋدينا جۇمىسقا شاقىرعانىن اڭگىمەلەدى. «مەن 2014 جىلدىڭ جەلتوقسانىنان 2015 جىلدىڭ ساۋىرىنە دەيىن اي سايىن 140 مىڭ تەڭگە الىپ، ن. يۋديناعا بەرىپ وتىردىم. اقشا مەنىڭ «تسەنتركرەديتبانكتەن» العان كارتوچكاما ءتۇستى»،- دەدى كۋاگەر. الايدا ول كينوفيلم تۇسىرۋگە ەشقانداي جۇمىسقا قاتىسپاعانىن اشىق ايتتى.

بۇگىن سوتقا جاۋاپ بەرگەن تاعى ءبىر كۋاگەر - قازبەك ءامىرجانوۆ ەسكى تانىسى جانىبەكوۆتىڭ ءوتىنىشى بويىنشا «فەنيكس» كينوتۋىندىسىن تۇسىرۋگە قاتىسادى. ستسەناري بەكىتىلگەن سوڭ ول «ش. ايمانوۆ اتىنداعى «قازاقفيلم» اق-مەن اۆتورلىق كەلىسىمشارتقا قول قويادى.

كەيىنىرەك ءامىرجانوۆ كينوفيلمنىڭ الدىن-الا دايىندىق شارالارىنا، سونداي-اق اشىق عارىشتاعى ساحنا كورىنىسىنە قاتىسادى. كەلىسىمشارتقا سايكەس، ول ءوز جۇمىسىنا 2 ملن-عا جۋىق تەڭگە قالاماقى الۋ كەرەك بولعان. الايدا قويۋشى-وپەراتورعا ءىس جۇزىندە تەك 800 مىڭعا جۋىق تەڭگە تولەنىپتى. اقشانى «قازاقفيلم» اق تولەگەن كورىنەدى.

ول سوت وتىرىسىندا ەسەپ-قيساپ قۇجاتتارىنىڭ زاڭسىز جولمەن جاسالعانىن اشكەرەلەدى. تەرگەۋ بارىسىندا وعان ءوزىنىڭ جانە فيرمانىڭ اتىنان جاسالعان ەسەپ-قيساپ قۇجاتتارىن كورسەتكەندە كەزدە، ول جەردە ءوز قولىنىڭ جالعان ەكەنىن جاسىرمادى. ءسويتىپ، 800 مىڭ تەڭگەگە كورسەتىلگەن قىزمەت تۇرلەرى جاسالعان كەلىسىمشارت، اتقارىلعان جۇمىستاردىڭ اكتىسى جالعان بولىپ شىقتى. ول «T.K. Turan Universal Business» جشس-ىنەن ەشقانداي اقشا الماعانىن ايتىپ، ءىستىڭ اق-قاراسىن اجىراتىپ بەردى.

«T.K. Turan Universal Business» جشس-ءنىڭ بۇرىنعى ديرەكتورى ەرجان ءابدراحمانوۆ تا سوتتا «فەنيكسكە» قاتىستى بىرنەشە بىلىقتىڭ بەتىن اشتى. اتاپ ايتقاندا، كەلىسىمشارتتارعا ونىڭ قولىن سىرتىنان بىرەۋلەر قويىپ وتىرعان. «مەنىڭ قولىمدى كەيبىر قۇجاتتارعا وزدەرى قويىپتى. ول جەردەگى قولىمنىڭ وزىمدىكى ەمەستىگىن ايتىپ، ساراپتاماعا بەردىم»،- دەدى ول سوتتاعى جاۋابىندا.

«مەن 2012 جىلدىڭ كۇزىندە ورتاق تانىسىمنىڭ كومەگىمەن «T.K. Turan Universal Business» جشس-ءنىڭ ديرەكتورى بولىپ ورنالاستىم. الايدا، اتالعان فيرمانىڭ قۇرىلتايشىسى تۇڭعىشباي جامانقۇلوۆ مەنىڭ فيرمادا فورمالدى تۇردە قىزمەت ىستەيتىنىمدى ءتۇسىندىردى. 2012 جىلدىڭ سوڭىندا ت. جامانقۇلوۆپەن ارادا اڭگىمەدە ول ماعان «فەنيكس» اتتى فانتاستيكالىق فيلم تۇسىرۋگە دايىندىق ءجۇرىپ جاتقانىن جەتكىزدى. كەيىنىرەك، 2013 جىلى جازدا «T.K. Turan Universal Business» جشس-ءنىڭ كەڭسەسىندە تۇڭعىشباي جامانقۇلوۆ جانە تالعات جانىبەكوۆ ۇشەۋمىز ءفيلمنىڭ ستسەناريىن تالقىلادىق»،- دەپ اڭگىمەلەدى كۋاگەر.

ال 2014 جىلدىڭ ساۋىرىنەن باستاپ ت. جامانقۇلوۆ پەن ت. جانىبەكوۆ وعان فيرمانىڭ قىزمەتىنە قاتىستى كوپتەگەن قۇجاتتارعا قول قويۋىن وتىنەدى. «مەن تۇڭعىشباي قادىرۇلى ايتقان سوڭ سول قۇجاتتارعا قول قويدىم»،-دەدى ول. الايدا، ول «فەنيكستى» ءتۇسىرۋ جۇمىستارىنا قاتىسپاعاندىقتان باسقا ەسەپ-قيساپتىق جانە جۇمىس قۇجاتتارىنا قولىن قويماعان. ە. ءابدىراحمانوۆتىڭ قولىن بوگدە بىرەۋلەر قويىپ وتىرعان.

ءامىرلان ءالىمجان

دەرەككوزى: inform.kz

اباي اقپارات