سەنبى, 18 قاراشا 2017
ماسەلەنىڭ ءمانى 3016 10 پىكىر 29 ناۋرىز, 2017 ساعات 10:41

پاندەردى اعىلشىن تىلىندە وقىتۋ اتا-انانىڭ جازباشا رۇقساتىمەن جۇزەگە اسادى

ءبىلىم جانە عىلىم ءمينيسترى ەرلان ساعاديەۆ ايماقتاعى ۇستازدار قاۋىمىمەن كەزدەسۋىن جالعاستىرۋدا، - دەپ حابارلايدى اباي-اقپارات مينيسترلىكتىڭ ءباسپاسوز قىزمەتىنە سىلتەمە جاساپ. وڭتۇستىك قازاقستان، جامبىل، شىعىس قازاقستان، الماتى وبلىسىنىڭ مەكتەپ ديرەكتورلارى مەن مۇعالىمدەرى مينيسترلىك باسشىسىنان ءبىلىم مەن عىلىمنىڭ دامۋىنا قاتىستى جالپى جوسپار تۋرالى ءبىلىپ، وزدەرىن مازالاعان ساۋالدارعا جاۋاپ العان بولاتىن. ال جۋىردا مينيستر الماتى قالاسىنىڭ ۇستازدار قاۋىمىمەن كەزدەستى، جيىنعا 700-دەن استام ادام قاتىستى. ءمينيستردىڭ 10 ناۋرىزداعى الماتى مەن

 

مەكتەپكە دەيىنگى ءبىلىم

مەكتەپكە دەيىنگى ءبىلىم مەن تاربيە بەرۋ ماسەلەسى تۋرالى ايتقاندا ەرلان ساعاديەۆ مەملەكەتتىك-جەكەمەنشىك ارىپتەستىگى ءارى قاراي دا جالعاساتىنىن، ويتكەنى بۇل بالاباقشاداعى ورىن تاپشىلىعىن رەتتەۋدىڭ ءتيىمدى شەشىمى بولىپ وتىرعانىن ايتتى. 2016 جىلى 825 مەكتەپكە دەيىنگى ءبىلىم بەرەتىن مەكەمە اشىلسا، سونىڭ 600-ءى جەكەمەنشىك بالاباقشا ەكەن. وسىنىڭ ەسەبىنەن 3-6 جاس ارالىعىنداعى بالالاردى مەكتەپكە دەيىنگى تاربيەمەن قامتۋ 85%-عا وسكەن.

 

مەملەكەتتىك-جەكەمەنشىك ارىپتەستىگىن قولداي وتىرىپ، زاماناۋي تالاپتارعا ساي جاڭا سانيتارلىق نورمالاردى ەنگىزۋ جوسپارلانىپ وتىر. جاڭا سانيتارلىق نورمالار 3 اي بويى مامانداردىڭ قاتىسۋىمەن تالقىلانىپ، قازىرگى كەزدە قول قويۋ ءۇشىن جاۋاپتى مينيسترلىكتەرگە جىبەرىلگەن. سونداي-اق، مينيستر بالاباقشانىڭ كەزەگىن دە تارتىپكە كەلتىرۋ، جەمقورلىققا جول بەرمەۋ تۋرالى ايتتى.

 

بۇل ماقساتتا بۇكىل بالاباقشالاردىڭ كەزەگى بىرىڭعاي رەسپۋبليكالىق كەزەككە بىرىكتىرىلەدى، بالاباقشاعا جولداما بەرۋ اۆتوماتتاندىرىلادى جانە ەلەكتروندى ۇكىمەتتەن بەرىلەدى. وسىلايشا، اتا-انالار ەڭ ۇزدىك مەكەمەنى تاڭداي الادى (مەملەكەتتىك بولسىن، جەكەمەنشىك بولسىن), مەملەكەتتىك تاپسىرىس سول تاڭدالعان مەكەمەگە بەرىلەدى. 2016 جىلى تاربيەشىلەردىڭ بىلىكتىلىگىن كوتەرۋدىڭ بىرىڭعاي باعدارلاماسى جاڭارتىلعان بولاتىن، وسىنىڭ ەسەبىنەن بالاباقشا بۇلدىرشىندەرىنە ءبىلىم مەن تاربيە بەرۋدىڭ دە ساپاسى ارتپاق. مەكتەپكە دەيىنگى ءبىلىم مەن تاربيە بەرۋ سالاسىنا ەندى دايارلىق سىنىبى ەنگىزىلمەك. مەكتەپتەر مەن بالاباقشالاردىڭ دايارلىق سىنىبىندا بالالار «الىپپەنى» وقيدى. بيىل دايارلىق سىنىبى پيلوتتىق جوبا رەتىندە 1000 مەكتەپ پەن بالاباقشاعا ەنگىزىلمەك.

 

ورتا ءبىلىم

ورتا ءبىلىم بەرۋدەگى باستى جۇيەلى وزگەرىس رەتىندە جاڭارتىلعان مازمۇنعا كوشۋدى ايتۋعا بولادى. مينيستر قازاقستاننىڭ جاڭارتىلعان مازمۇندى كەشىگىپ ەنگىزىپ جاتقانىنا نازار اۋداردى. جاڭارتىلعان مازمۇنعا ساي، فۋنكتسيونالدى ساۋاتتىلىققا ەرەكشە ءمان بەرىلەدى، ياعني ءبىلىپ قانا قويماي، ىستەي الۋ كەرەك. ەىدۇ-عا كىرەتىن 35 ەل بۇل جۇيەگە 15 جىل بۇرىن كوشكەن، ويتكەنى 20 جىل بۇرىن زاماننىڭ تالابىن تۇسىنگەن، ناقتىراق ايتقاندا، ءار ەكى جىل سايىن اقپاراتتىڭ ەكى ەسەلەنەتىنىن، ال 5 جىلدا كەيبىر ماماندىقتاردىڭ جويىلىپ كەتەتىنىن تۇسىنگەن.

 

دەگەنمەن، ەرلان ساعاديەۆ 4 جىلدا بۇل اۋىسۋدى ءتيىمدى جۇزەگە اسىرۋعا بولاتىنىن ايتتى. 2016 جىلدان باستاپ ءبىرىنشى سىنىپتار جاڭارتىلعان مازمۇنمەن وقي باستادى، ال بيىل 2, 5 جانە 7-سىنىپتار جاڭا جۇيەگە كوشەدى. جاڭا باعدارلامانى يگەرۋ ءۇشىن 2016 جىلدىڭ جازىندا 74 مىڭ مۇعالىم كاسىبي بىلىكتىلىگىن ارتتىردى، ال پەداگوگتارمەن جۇمىس ىستەۋ جىل بويىنا جالعاسىپ كەلەدى. بيىل تاعى دا 75 مىڭ مۇعالىم وقىتىلادى.

 

مۇنىمەن ءبىر مەزگىلدە 5 كۇندىك وقۋ جۇيەسىنە كوشۋ جانە باستاۋىش سىنىپ وقۋشىلارى ءۇشىن بازالىق وقۋلىق ەنگىزۋ دە ءجۇرىپ جاتىر. مينيستر كوپشىلىكتى تولعاندىراتىن ۇشتىلدىلىك ماسەلەسىنە دە توقتالدى. ەرلان ساعاديەۆ قازاق تىلىنە باسىمدىق بەرىلىپ كەلگەنىن، سولاي جالعاسا بەرەتىنىن ايتتى. ونىڭ ۇستىنە، قازىر قازاق مەكتەپتەرىندە وقيتىن بالالاردىڭ جاعدايى دا قۋانتارلىق، قازاقشا سويلەيتىن بالالاردىڭ 90%-ى قازاق مەكتەپتەرىندە وقيدى. الايدا، ورىس مەكتەپتەرىندە وقىعان بالالار 11 جىل وقىعاننان كەيىن دە ءتىلدى ءتيىستى دەڭگەيدە مەڭگەرمەيتىنى نەگىزگى ماسەلە بولىپ وتىر. وسىعان وراي مينيسترلىك ورىس تىلىندە ءبىلىم بەرەتىن مەكتەپتەردە قازاق ءتىلىن وقىتۋدىڭ ادىستەمەسىن دە جاڭارتىپ، عىلىمي نەگىزدەلگەن، كوممۋنيكاتيۆتى ادىسكە سۇيەنگەن دەڭگەيلى باعدارلاماعا كوشىرمەك. بۇل ادىستەمە بيىل جەكەلەگەن مەكتەپتەردە سىناقتان وتكىزىلەدى. جاڭا ءادىس اۋىزەكى سويلەۋدى دامىتاتىن سوزدىك مينيمۋمىنا نەگىزدەلگەن، بۇرىنعىداي وقىپ، ءماتىن اۋدارۋ دەگەن مۇندا جوق.

 

مينيستر ورتا مەكتەپتەردەگى اعىلشىن تىلىنە قاتىستى دا ءسوز قوزعادى، بيىلعى جىلدان باستاپ پاندەردەن اعىلشىن تىلىندە ساباق بەرەتىن 5 مىڭ مۇعالىمدى 9 ايعا دەيىن مەكتەپتەن تىس تەرەڭدەتىلگەن تىلدىك كۋرستا وقىتۋ جوسپارلانىپ وتىر. بيىلعى كۇزدەن باستاپ بۇگىنگى كۇنگە دەيىن اعىلشىن تىلىندە وقىتىپ جۇرگەن 120-دان استام مەكتەپتەگى 2700 مۇعالىمنىڭ قاتارى كوبەيىپ، جۇزدەگەن سىنىپ اعىلشىن تىلىندە وقۋعا كوشەتىن بولادى. پاندەردى اعىلشىن تىلىندە وقۋ ەرىكتى تۇردە جۇرەدى، ول ءۇشىن اتا-انانىڭ جازباشا رۇقساتى كەرەك. ەرلان ساعاديەۆ بيىلعى جىلى كوپ سۇراقتىڭ جاۋابى تابىلاتىنىن، اتاپ ايتقاندا، دايىندىق ۋاقىتى، وقىتۋ ساپاسى، مۇعالىمدەر مەن بالالاردىڭ دايىندىعى سىندى ماسەلەلەر شەشىلەتىنىن ايتتى. ويتكەنى، وسى جۇمىستىڭ قورىتىندىسىنا ساي، جوعارعى سىنىپتا 4 ءپاندى اعىلشىن تىلىندە وقىتۋ كەستەسىنە كوشۋ 2018 جىلدىڭ اياعىندا قابىلدانادى.

 

بۇل وزگەرىستەردەن بولەك، مينيستر ەلىمىزدەگى مەكتەپ وقۋشىلارىنا بەرىلەتىن ءۇي تاپسىرماسىنىڭ كولەمىنە دە توقتالدى. بالالاردىڭ ءۇي تاپسىرماسىن ورىنداۋعا جۇمسايتىن ۋاقىتى جونىنەن قازاقستان 65 ەلدىڭ ىشىندە 4-ورىندا. ال حالىقارالىق زەرتتەۋ ناتيجەلەرى ءۇي جۇمىسىنىڭ كولەمى مەن ءبىلىم سالاسىنداعى تابىستىڭ اراسىندا تىكەلەي بايلانىس جوق ەكەنىن كورسەتەدى. بۇل ماسەلەنى تالقىلاۋ ءۇشىن ۇستازدار مەن ءبىلىم بەرۋ سالاسى ماماندارىنىڭ قاتىسۋىمەن 2 رەت اۋقىمدى جيىن ءوتىپ، ونىڭ قورىتىندىسى بويىنشا ءۇي جۇمىسىن وڭتايلاندىرۋدىڭ ەكى نۇسقاسى ۇسىنىلدى. ءبىرىنشى نۇسقا بويىنشا ءۇي جۇمىسى بارلىق پاننەن قىسقارتىلسا، ەكىنشى نۇسقا جەكەلەگەن پاندەر بويىنشا ءۇي جۇمىسىن قىسقارتۋدى ۇسىنادى. ەكى نۇسقا بويىنشا دا ءۇي تاپسىرماسىن ورىنداۋ ۋاقىتى ورتا ەسەپپەن كۇنىنە ءبىر ساعاتقا قىسقارادى.

 

مينيسترلىكتىڭ مەكتەپ مۇعالىمدەرىن وقۋ پروتسەسسىنەن تىس جۇمىس پەن جۇكتەمەدەن بوساتۋ ءۇشىن ءتيىستى شارالار قابىلداۋ تۋرالى قادامىن كەزدەسۋگە جينالعان ۇستازدار قاۋىمى قۋانا قولدادى. ەرلان ساعاديەۆ باسقا مەملەكەتتىك ورگان باسشىلارىمەن كەزدەسكەنىن، الداعى ۋاقىتتا اكىمدىك جانە ايماقتىق ءبىلىم بەرۋ باسقارمالارىنىڭ وكىلدەرىمەن جينالىس جاساۋدى جوسپارلاپ وتىرعانىن ايتتى.

 

مەكتەپتەگى اقشا جيناۋ ماسەلەسى دە ءمينيستردىڭ نازارىنان تىس قالعان جوق. ەرلان ساعاديەۆ دەمەۋشىلىك جاساۋدىڭ وركەنيەتتى جولى بار ەكەنىن، بۇكىل الەمدە سول كونتسەپتسيا قولدانىلاتىنىن ايتتى. گارۆارد سياقتى جەتەكشى وقۋ ورنىنىڭ ءوزى سول دەمەۋشىلەردىڭ قاراجاتىمەن دامىپ كەلە جاتقانىنا توقتالدى. مەكتەپتەگى اقشا جيناۋ ماسەلەسىن شەشۋ ءۇشىن ءار مەكتەپتە قامقورشىلىق كەڭەسى قۇرىلماق، وعان وقۋشىلاردىڭ اتا-اناسى، «اتامەكەن» پالاتاسى مەن ءماسليحاتتىڭ وكىلدەرى كىرمەك. سونداي-اق، مينيستر مەكتەپ وقۋشىلارىنا شكافتار قويۋ ءىسىن ۇكىمەت قولداعانىن جەتكىزدى.

 

ەرلان ساعاديەۆتەن كەيىن ءسوز كەزەگىن العان مۇعالىمدەر مەن مەكتەپ ديرەكتورلارى كوپتەگەن سۇراقتاردى قويىپ، ءبىلىم بەرۋ سالاسىن دامىتۋعا قاتىستى يدەيالارىن ۇسىندى. مۇعالىمدەر قاۋىمىن مازالاعان نەگىزگى ماسەلەلەردىڭ ءبىرى جاڭارتىلعان مازمۇنعا قاتىستى بولدى، ۇستازدار وقۋشىعا باعا قويۋ جۇيەسىن قايتا قاراۋدى ۇسىندى. مينيستر مامانداردىڭ ساۋالدارىنا جاۋاپ بەرىپ، پەداگوگتار مەن مەكتەپ باسشىلارىنىڭ قاتىسۋىمەن تالقىلاۋ ۇيىمداستىرۋعا ۋادە بەردى.

 

Abai.kz

10 پىكىر
Бақытбек 2017-04-10 19:32:33
КССРО- ның кезінде коммунизм идеологиясы мен "кіші інішек" синдромынан құтыла алмай жатқан қазақтарға (25-жыл аз уақыт) ағылшын тілі қаншалықты қажет болып қалды екен?! Ағылшын тілі біздің не теңіміз!!!! Аздап, үйде ешкім жоқта, белбеуді босатып "айнадан арт жаққа қарау" жоқ бізде, шиқан көксоққыр шығып келе жатқан жоқ па, деп. Өзімізше, мәдениетті, әлемдік өркениеттен қалыс қалмайтын, типа алдыңғы қатарлы" болғымыз келіп, шала-бүлініп жүреміз. Оу, ең құрығанда, елін-жерін шын сүйетін егемендік тұсындағы екі ұрпақ тәрбиелеп алайықсайшы !!!! Немене, жау қуып келеме??? Әлде, ағылшындар білдіртпей "қолды бұрап" болевойға алып жатыр ма? Жәй халыққа көрсетпей.
Бектас 2017-04-07 21:47:59
Қазақ тілді қазақтар, орыс тілді қазақтар, ағылшын тілді қазақтар, қытай тілді қазақтар, араб тілді қазақтар боламыз. Болсын, келісемін. Тек билік басында тек Қазақ тілді Қазақтар ғана отыруы керек деген заңды конституцияға енгізсе болды. Басқаша болмайды, басқаша болса қазақ ұлтын жою болады.
Ашынған қазақ 2017-04-05 23:01:30
Е. Сағадиев: "Пәндерді ағылшын тілінде оқу ерікті түрде жүреді, ол үшін ата-ананың жазбаша рұқсаты керек". Өйт , деген-ай!!! Бізде қай кезден бастап ерікті түрде жүріп еді? "Ерікті түрде" дегендері тек ШИРМА! Шын мәнінде , мектеп басшыларын пайдаланып, әртүрлі құйтырқы әдістермен, ата-аналарды қорқытып-үркітіп , алдап-арбап, МӘЖБҮРЛІ ТҮРДЕ қол қойғызатын болады немесе ата-аналар үшін мұғалімдерге қойғызып , ҰРАНДАТЫП, ЕСЕП береді , жалған ақпарат береді. Сайлау өткізген сияқты... КӨР ДЕ ТҰР , ОСЫ АЙТҚАНЫМ КЕЛМЕСЕ!
Дархан 2017-03-30 16:27:24
4 пән ағылшын тілінде оқытылады... Ал жоғары оқу орындарына барғанда ше? Айталық биологияны ағылшынша оқыған оқушы одан әрі де, ертең биология факультетіне түскенде де ағылшынша оқиды ма?
Сайран 2017-03-30 12:15:58
Ағылшынша оқытудың заманы өтіп бара жатыр. Қытайша, Қытайша оқыту - қазір өте-мөте қажет. Өйткені Англиядан Қытай жақын дегендей. Қытайлықтар Қазақстанға қаптап келеді дегендей. Қытайлық тақыр кедей жігіттер қазақтың шүйкебас, ақымақ, нақұрыс қыздарын қалыңдыққа алады дегендей. Содан кейін, қытайлық жиендер қаптайды (битше өріп) дегендей. Әрі қарай жаза беруге болады енді, дегендей. Бірақ, бұл, дегендей, ұзақ әңгіме болып кетуі мүмкін, дегендей. Тоқтатайық осының бәрін, дегендей. Қытайша, Қытайша, тек ғана Қытайша, әйтпесе жұмыссыз қаламыз. "Бичпакетті"- қазақша сұрасақ бермей қалуы мүмкін ғой дегендей.............
Қабыл 2017-03-30 11:54:20
Өйткені, осы жұмыстың қорытындысына сай, жоғарғы сыныпта 4 пәнді ағылшын тілінде оқыту кестесіне көшу 2018 жылдың аяғында қабылданады Бұл не шатпақ? "Көшу" қалай қабылдануы мүмкін? "Шешім қабылданады" деуші еді. Бұл арада шешім қабылданып қойған болса керек. Ендеше "жүзеге асырылады" деу керек. Осы бір шағын мысалдан -ақ Сағадиевтің министрлігінде бүгіннің өзінде қазақша білетін маман жоқ екенін байқауға болады. Ал қазақша білмейтіндер қашан қазақшаны қолдап шешім қабылдап еді?!
С 2017-03-29 20:32:35
Үш тілділік деген қазақ халқын үшке бөлу деген сөз. Үш тілді бірдей жақсы меңгеру мүмкін емес, кім қай тілді жақсы меңгерсе сол тілдің құлы мен сол елдің патриоты болатыны еш айтыссыз-ақ түсінікті ғой.
Сәкен Елеуұлы. 2017-03-29 20:28:22
Ойында жоқта министрдің креслосы мен портфеліне жарыған, енді оларынан айрылмау үшін жанталасып жүрген мына Сағадиевте қазақы намыстың бір түйірі де жоқ екен! Өзінше "теория" соғып, одан-бұдан оқығандарын жиып-теріп айтып әлек болып жүр. Шәкіртке 1-сыныптан бастап шетел тілін оқыту - шәкіртті өзінің Ана тілінің уызына жарытпау екенін, бұл қастандықтай қатерлі шара екенін неге ұқпайды? Портфельқұмарлық та - рухани дерт. Мынаның одан айығуы қиын болар. Бір ғана ем - орнынан кетіру, біріқ президент Назарбаевтың қалайда еркесіне айналған қу кете қоймас.
Руза 2017-03-29 18:24:12
Енді былай құбылдыма, қазақты ұлттығынан айыру жорлында жанын салып жатқан ібіліс?! Кетіру керек, орнынан, не ұлттығымызды жоюдың бағдарламасына ден қоямыз, қазақтар!
проф. Габбасов Совет-Хан 2017-03-29 17:28:34
Министр Сағадиев Ерлан мырза , бүгінгі Орта білім беретін МЕКТЕПТЕРДІҢ - ҚҰРЫЛЫМЫ (структурасы) дұрыс болмағандықтан... уақыт өткен сайын МАЗМҰНЫ да құлдырауын тоқтатар емес. Бұл- Мемлекетіміздің БІЛІМ саласына - аса ауыр салдарларын қалдырары анық. Мен -жазушы-ғалым, проф. Совет-Хан Ғаббасов - 1990 жылы Білім министрлігі қабылдаған, - " ҮЗІЛІССІЗ ҰРПАҚ ТӘРБИЕСІ мен ОҚУ-АҒАРТУ ЖҮЙЕСІНІҢ ҮЛГІСІ" - атты концепциямды ұсына отырып, Білім министрлігінің коллегиясында талқылауды өтінемін. Себебі, бүгінгі жалпы білім беру мен ұрпақ тәрбиесіндегі - КӨШІРМЕ ЖҮЙЕЛЕРДІҢ - Ұлтымыздың ұрпақ тәрбиесіне тигізіп отырған аса ауыр кемшіліктерін жоймаса болмайды. Тәуелсіз ЕЛ болғымыз келсе... жалпы РУХАНИ САЛАСЫНДАҒЫ - бұрынғы БОДАНДЫҚПЕН келген сандырақтарды тоқтату керек. Кезінде, ҚАЗАҚ ССР ХАЛЫҚҚА БІЛІМ БЕРУ МИНИСТРЛІГІ - "Жалпы білім беретін Қазақ орта мектебінің концепциясы" - атты жобасы кітапша болып шыққан, Алматы,1990ж. Осы кітапшада жоғарыда аталған Менің концепцияда жеке басылған... танысуға болады. Ерлан мырза... жауап күтемін ?!..

ۇزدىك ماتەريالدار

رۋحاني جاڭعىرۋ

قانات ابىلقايىر. قارىز بەن پارىز

Abai.kz 9975
قاۋىپ ەتكەننەن ايتامىن

قازاقستاندا جۇرگەن قىتايلار كىمگە سۇيەنەدى؟ 

ن.قوشامانۇلى 18057