بەيسەنبى, 28 ناۋرىز 2024
جاڭالىقتار 5581 0 پىكىر 30 ناۋرىز, 2017 ساعات 00:39

جەر داۋىنان كەيىن ازىرلەنگەن زاڭ جوباسى پارلامەنتكە ءتۇستى

ءماجىلىس "قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى” زاڭ جوباسىن جۇمىسقا قابىلدادى، - دەپ حابارلايدى stan.kz سايتى.

بۇل زاڭ جوباسى جەر رەفورماسى جونىندەگى كوميسسيا جۇمىسىنىڭ قورىتىندىسى بويىنشا ازىرلەندى.

“زاڭ جوباسىنىڭ نەگىزگى ەرەجەلەرى اۋىل شارۋاشىلىعى ماقساتىنداعى جەرلەردى پايدالانۋ قۇقىعىن بەرۋدىڭ ايقىن تەتىكتەرىن بەلگىلەۋگە، سونداي-اق اۋىل شارۋاشىلىعى ماقساتىنداعى جەرلەردى ءتيىمدى پايدالانۋعا تۇراقتى مونيتورينگ جۇرگىزۋ ارقىلى جەر پايدالانۋشىلاردىڭ وزدەرىنە العان مىندەتتەمەلەرىن باقىلاۋدى كۇشەيتۋگە قاتىستى. زاڭ جوباسىمەن مەملەكەتتىك ورگاندارعا قازاقستاندىقتارعا جالعا بەرىلەتىن اۋىل شارۋاشىلىعى ماقساتىنداعى جەر ۋچاسكەلەرىنىڭ شەكتى ماكسيمالدى كولەمىن انىقتاۋ بويىنشا قۇزىرەت بەرىلەدى”، — دەدى ءماجىلىستىڭ جالپى وتىرىسىندا اگرارلىق ماسەلەلەر كوميتەتىنىڭ توراعاسى ساپارحان وماروۆ.

بۇدان باسقا، زاڭ جوباسىندا مەملەكەت مۇقتاجى، جەكە تۇرعىن ءۇي قۇرىلىسىنىڭ دامۋى جانە اۋىل تۇرعىندارىن جايىلىمدىق جەرلەرمەن قامتاماسىز ەتۋ ءۇشىن جەردى الىپ قويۋعا مۇمكىندىك بەرەتىن ەرەكشە جاعدايلاردىڭ تىزبەسى كەڭەيتىلگەن. قورعانىس مۇقتاجى جانە ۇلتتىق قاۋىپسىزدىك ءۇشىن جەرلەردى بەرۋمەن بايلانىستى ماسەلەلەر دە قاراستىرىلىپتى. سونىمەن بىرگە، شەكارا ماڭىنداعى اۋماقتاردا اۋىل شارۋاشىلىعى جەرلەرىن بەرۋگە تالاپتار انىقتالعان.

“جالپى ۇسىنىلىپ وتىرعان زاڭ جوباسىنداعى نورمالار جەرگىلىكتى اتقارۋشى ورگاندار قىزمەتىنىڭ جاريالىلىعىنىڭ دامۋىنا جانە اۋىل شارۋاشىلىعى جەرلەرىن بەرۋ جۇيەسىنىڭ اشىقتىعىنا باعىتتالعان. اگرارلىق ماسەلەلەر كوميتەتى اتالعان زاڭ جوباسىن جۇمىسقا الۋعا جانە ول بويىنشا قورىتىندى ازىرلەۋگە دايىن”، — دەدى وماروۆ.

ايتا كەتەيىك، بىلتىر ەلىمىزدە جەر داۋى تۋىنداپ، حالىق ءبىراز دۇرلىككەن بولاتىن. ەل ازاماتتارى جەر كودەكسىنە ەنگىزىلگەن بىرنەشە وزگەرىسكە، اتاپ ايتقاندا اۋىلشارۋاشىلىعى ماقساتىنداعى جەردى ساتۋ جانە شەتەلدىكتەرگە جالعا بەرۋ مەرزىمىن ۇزارتۋعا قارسىلىق تانىتىپ، بىرنەشە وڭىردە شەرۋ دە ءوتتى. وسىدان كەيىن پرەزيدەنت جەر كودەكسىندەگى بۇل وزگەرىستەردىڭ كۇشىنە ەنۋىنە موراتوري جاريالاپ، جەر رەفورماسى جونىندەگى كوميسسيا قۇرۋدى تاپسىردى. ۇكىمەت باسشىسى باقىتجان ساعىنتاەۆ، كەيىن ونىڭ ورىنباسارى، اۋىل شارۋاشىلىعى ءمينيسترى اسقار مىرزاحمەتوۆ توراعالىق ەتكەن، قۇرامىنا جەتپىستەن استام ادام كىرگەن كوميسسيا جاز بويى جۇمىس ىستەدى. ونىڭ جۇمىسىنىڭ قورىتىندىسى بويىنشا ماڭىزدى ۇسىنىستار ازىرلەنىپ، زاڭ جوباسى ازىرلەنىپ وتىر. كوميسسيانىڭ ۇسىنىسى بويىنشا قازاقستان پرەزيدەنتى قولدانىستاعى ءموراتوريدىڭ مەرزىمىن 5 جىلعا، ياعني 2021 جىلدىڭ 31 جەلتوقسانىنا دەيىن ۇزارتتى.

اباي-اقپارات

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1559
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2249
عيبىرات

قايسار رۋحتى عازيز جان

مۇحتار قۇل-مۇحاممەد 3499