بەيسەنبى, 21 قىركۇيەك 2017
اتتەڭ... 788 3 پىكىر 19 ءساۋىر, 2017 ساعات 23:10

اقىن باس پروكۋرورعا حات جازدى

قازاقستان رەسپۋبليكاسىنىڭ
باس پروكۋرورى
ج.اسانوۆ مىرزانىڭ نازارىنا!

قازاقتا «ايتايىن دەپ ايتقام جوق، ايتاشىمنان وبال-دى» دەپ كەلەتىن كونە ولەڭ بار. سول ايتپاقشى، مەنىڭ دە ايتپاسىما بولمايتىن ماسەلە تۋىنداپ تۇر. تۋىنداپ ەمەس، بۇل ماسەلە سوڭعى كەزدە بالالاپ، كوبەيىپ، دەرتتەپ، بالاقتان باسقا شىعىپ كەتكەلى قاشان؟! سونداعى ايتپاعىمىز تومەندەگىشە:
بىلتىر عانا ءوزىنىڭ تاباندىلىعىمەن، قابىلەتىمەن، سوڭعى كەزدە جۇرت شۋلاي جونەلىپ، شۇبىرتپالاتاتىن «شىمكەنتتىك ۆاريانت» جاساماي، ءوز كۇشىمەن، ماڭداي تەرىمەن سارىاعاش اۋداندىق ءبىلىم بولىمىنە ءادىل كونكۋرس ارقىلى باسشىلىققا تاعايىندالعان مۇرات ماحانوۆ جازىقسىزدان جازىقسىز ءىستى بولىپ جاتقانىنان قالىڭ جۇرت حاباردار.

مەن مۇرات مىرزانىڭ اۋدان حالقىنا، اۋداندىق ءبىلىم سالاسىنا سىڭىرگەن ەڭبەكتەرىن تىزبەلەپ جاتپايمىن. سەبەبى، ول تۋرالى تولىق مالىمەتتەر سىزدەرگە جەتىپ تە ۇلگەرگەن بولۋى كەرەك. ەگەر اسا مارتەبەلى نازارلارىڭىزدى سالساڭىزدار. مەنىڭ ايتپاعىم باسقا...

مەن سوناۋ التى اتادان جالعىز كىندىك بوپ كەلە جاتقان، ءوزىنىڭ دە جالعىز تال ون-اق جاسار ءبۇلدىرشىن ۇلى بار (ونى دا جالعىز ءوزى تاربيەلەپ وتىرعان), وسى قازىر پالەن ايدان بەرى تەرگەۋ يزولياتورىندا جازىقسىزدان جازىقسىز تەمىر تورعا تەلمىرىپ وتىرعان مۇراتتىڭ جەكە باسىنا توقتالماقپىن.

مەن سول مۇراتپەن شىمكەنت پەداگوگيكالىق ينستيتۋتىنىڭ فيليولوگيا فاكۋلتەتىندە ءتورت جىل بىرگە وقىپ، ءبىر جاتاقحانادا جاتقان، جارتى قۇرتتى ءبولىپ جەگەن اداممىن. ونىڭ مىنەز-قۇلقىن، ازاماتتىعىن، جان بالاسىنا جانىن قيا سالۋعا دايىن تۇراتىن جاناشىرلىعىن جاقسى بىلەمىن. جالعىز انانىڭ قولىندا جالبىراپ جالعىز وسكەن ۇل ەكەنىن، قينالىپ ءجۇرىپ جەتىلگەنىن، وقۋعا دا جوعارىدا ايتىلعان «شىمكەنتتىك ۆاريانتپەن» ەمەس، قۇرىلىستا جۇمىس ىستەپ، ودان اسكەر قاتارىنا بارىپ كەپ، ەس جيىپ تۇسكەنىن دە بەسكە تانيمىن.

ءبىزدىڭ دامىعان، تولىققاندى قوعام بولامىز، پالەن ەلدىڭ قاتارىنان كورىنەمىز دەپ كەۋدە قاعىپ، شىرەنگەندە ۇزەڭگىمىزدى ءۇزىپ جىبەرە جازدايتىنىمىز وتىرىك ەمەس. ال ەندى مىنانداي سوراقىلىقتان سوڭ، كورەر كوزگە ءادىل جولمەن ءجۇرىپ، كىسى اقىسىن جەۋگە ارلانعان، ادالدىققا عانا ادىمداعان ازاماتتى قورلاپ، جاپتىم جالا، جاقتىم كۇيە دەپ ءجۇرىپ قايدا بارامىز؟! قاي جەرلەرگە جەتە الامىز؟!

مەن 111 جاس عۇمىر كەشكەن، ەكى سوعىسقا كۋا بولعان قاريانىڭ بالاسىمىن. ىلگەرىدە قارتتار بار بولاتىن. قازىر شە؟! سول ماحانوۆتىڭ جاڭاشىلدىعى مەن جاناشىرلىعىنا، سوڭعى كەزدە بەدەلى ابدەن ءتۇسىپ بارا جاتقان مۇعالىم، ۇستاز اتاۋلىنىڭ بەدەلىن قايتا كوتەرىپ، ەڭسەسىن تىكتەۋگە اتسالىسقان تىرلىگىنە سارىاعاش اۋدانىنداعى بىرەر «توپتاردىڭ» قارسى ارەكەت ەتكەنىنەن بۇكىل اۋدان حاباردار. ولار قارتتار ەمەس. ولار «دەجۋرنىي شالدار» عانا. يا، ولار شالدار عانا. الاش بالاسىنا اتالى ءسوز ايتىپ، اۋزىنا قاراتىپ، قارا قىلدى قاق جاراتىن جاسقا جەتكەندە ءناپسىسى تازا ادامنىڭ ارتىنا شالا بايلاپ، جالا جاباتىن جاسقا كەلگەن كىسى قاريا ياكي قارت بولا الۋشى ما ەدى؟! جوق!

ءوز باسىم سۋدى دا، وتتى دا، وقتى دا، سوتتى دا كوپ كورگەن اداممىن. سوندىقتان، ەشتەڭەدەن ءھام ەشكىمنەن (ەگەر ول ادامزات بالاسى بولسا) قورىقپايتىنىم وزىمە ايان. كىم نە دەسە و دەسىن، دەگەنمەن مەنىڭ ءوزىمنىڭ ازاماتتىق ۇستانىمىم، اقىندىق كوزقاراسىم مەن داۋسىم بار. ەندەشە، مەن مۇرات ماحاناوۆتىڭ جازىقسىزدان جازىقسىز ءىستى بولىپ، جابىلىپ جاتقانىن وتە ۇلكەن ساياسي جانە قوعامدىق، الەۋمەتتىك قاتەلىك دەپ ەسەپتەيمىن. كەزىندە تالىستاي عىپ سۇلاتىپ، اتىپ تاستاعان ارىسىمىز احمەت بايتۇرسىنۇلى «ماعان قاتتى باتاتىنى بارىنەن، ءوز اۋىلىمنىڭ يتتەرى ءۇرىپ، قاپقانى» دەمەپ پە ەدى؟! وندا نەگە ارى تازا، جانى جۇمساق، پەيىلى پەرىشتە ازاماتتىڭ ارتىنان بىرەر شاۋىلدەكتەردى ءشاۋ-ءشاۋ ۇرگىزىپ، جالعان جالا جاپتىرىپ، قاراپ وتىرۋىمىز كەرەك؟!

قاسيەتتى قۇراندا «اسىلىندە بىرەۋدىڭ ارتىنان جالعان ءسوز ايتىپ، ناھاق جالا جاپقان پەندەنىڭ كۇناسى دۋا جاساعان پەندەنىڭ كۇناسىمەن بىردەي» دەگەن ءسوز بار. ال، دۋا جاساۋ دەگەنىڭىز ەڭ اۋىر، كەشىرىلمەس كۇنا. ونى ويلايتىن پەندە، ساناسى قۇلدىقتان ازات قاريا ءاز-ازىرگە تابىلماي تۇرعانى وتە وكىنىشتى. بۇدان دا كوپ جازۋعا، قۇلاش-قۇلاش، بەت-بەت ەتىپ شيمايلاۋعا مۇمكىندىگىم بارشىلىق. بىراق، مىنانداي ادىلەتسىزدىككە، ميسىزدىققا، ارسىز ارەكەتكە ىزاسى كەپ وتىرعان ادامنىڭ جۇرەگى شىدامايدى ەكەن.

اسا قادىرلى جاقىپ دەپ اسا ۇلى پايعامبارىمىزدىڭ (ع.س) ەسىمىن بەرگەن ەل اعاسى، قالىڭ قازاقتىڭ قازىلىق تارازىسى!

ءسىزدى جۇرتشىلىق تەك قانا ادىلدىككە جۇرەتىن، ادالدىقتى تۋ ەتكەن ازامات دەپ باعا بەرەتىنىن تالاي ەستىدىك. كورىپ تە ءجۇرمىز. سوندىقتان، وسى ماسەلەگە سوڭعى ءارى ءادىل نۇكتەنى ءوزىڭىز قويىپ، ءىستىڭ اق شەشىلۋىنە، ارلى ازاماتتىڭ ناپسىگە قۇل بولىپ جۇرگەن بىرەر مۇددەلى «توپتىڭ» قۇربانى بولىپ كەتپەي، قوعامداعى ءوزىنىڭ ءادىل ءارى تازا ورنىنا قايتا ورنىعۋىنا ىقپال جاسايتىنىڭىزعا سەنىم ارتامىن. ءتامات-ءتامام!!!

وزىڭىزگە دەگەن ۇلكەن قۇرمەتپەن جانە ۇكىلى ۇمىتپەن،
اقىن، قازاقستان جازۋشىلار وداعىنىڭ مۇشەسى،
قازاقستان جازۋشىلار وداعى وڭتۇستىك قازاقستان
وبلىستىق فيليالىنىڭ ديرەكتورى،
كوپتەگەن حالىقارالىق، رەسپۋبليكالىق سىيلىقتاردىڭ،
رەسەي فەدەراتسياسى قارۋلى كۇشتەرىنىڭ ەڭ جوعارعى
«سلاۆا روسسي» وردەنىنىڭ ەڭ سوڭعى التىنشى تولىق
كاۆالەرى، باسقا دا كوپتەگەن وردەن-مەدالداردىڭ يەگەرى
باقىتجان الديار

Abai.kz

3 پىكىر
Мақсұт 2017-04-20 14:24:47
Ақ, қарасын білмеген іске не айта аларсың... Тек қана -Ақиқатқа араша түсем -деген адам ғана Ақын. Көлеңкеде көпіршітіп өлең "шығара" беру -ақындық емес. Олай болса -Б. Алдияр айтам -дегенін ақындық арымен айтып отыр.... Олай болса -оның сөзі рас, шындық! "Сақалын сатқан кәріден, еңбегін сатқан бала артық" -деп со-онау өткен ғасырларда Абай ақын төрелік етіп еді... Енді осы күні сақалын ғана емес (Сақалы жоқ болса -қайтсін) арын, абыройын сататын "шалдар" пайда болғаны дүниені бүлдіріп барады. Әр қала, әр ауыл, әр көшеде осындай белсенді, "Атейст кәрілер" , ойнақтаған кәрі түйедей араласпасқа араласып, ақша, мүлікке бола биліктегілердің қолжаулығына айналып, күнә арқалап жүр. Мейлі ғой, өз күнәсін өздері көтерер -дегенмен, жарылып, желі шығып кеткен дөңгелектей осы бір бейпайда жандар алға тартқан қоғамға ауырлық әкелуде. Барлық әділетсіздік пен зорлық, зомбылықтың құралы болып, күштінің қолында ойнап жүргендер де осындай көк иек кәрілер...
Дидар 2017-04-20 12:13:50
Бақытжан, жазғаның 100 пайыз шындық. Мұрат Маханов артына сөз ермеген, ешкімнің бір тиынын алмаған жігіт. Азамат екенсің, қорғағаныңа тәнтімін
Ерсін 2017-04-20 09:28:30
Қазақта: "ілгері жүрген жасты кері қайтқан қария қайтарады" деуші еді әлі де арамызда "қырт" шалдар бар.

ۇزدىك ماتەريالدار

رۋحاني جاڭعىرۋ

قانات ابىلقايىر. قارىز بەن پارىز

Abai.kz 5739
قاۋىپ ەتكەننەن ايتامىن

قازاقستاندا جۇرگەن قىتايلار كىمگە سۇيەنەدى؟ 

ن.قوشامانۇلى 12011