سارسەنبى, 28 ماۋسىم 2017
20 ءساۋىر, 2017 ساعات 10:19 382 0 پىكىر

قىرعىزستان پرەزيدەنتتىك سايلاۋ وتەتىن كۇندى انىقتاي الماي جاتىر

قىرعىزستاننىڭ ورتالىق سايلاۋ كوميسسياسى پرەزيدەنتتىك سايلاۋ قاراشادا ءوتۋى ءتيىس دەگەن انىقتاما بەردى. بىراق وپپوزيتسيالىق "اتا مەكەن" فراكتسياسى پرەزيدەنتتىك سايلاۋدى بيىل تامىز ايىندا ۇيىمداستىرۋىن سۇراپ وتىر. سوتسياليستەر بولسا سايلاۋدىڭ قاراشادا ءوتۋى - زاڭعا قايشى دەپ مالىمدەدى.

"اتا مەكەن" فراكتسياسى جوگوركۋ كەنەشتەن پرەزيدەنتتىك سايلاۋدى بيىل 27 تامىزدا وتكىزۋىن سۇرادى. فراكتسيا جەتەكشىسىنىڭ مىندەتىن اتقارۋشى المامبەت شىكماماتوۆتىڭ ايتۋىنشا، كونستيتۋتسيا بويىنشا پرەزيدەنت ۋاكىلەتى 1 جەلتوقساندا اياقتالادى. سايلاۋ قاراشادا وتەتىن بولسا، مەملەكەت باسشىسىن اۋىستىرۋ پروتسەسى سوزىلىپ كەتەدى، ال زاڭدا كورسەتىلگەن مەرزىم ساقتالمايدى، دەيدى فراكتسيا جەتەكشىسى.

"جاڭا پرەزيدەنت قىزمەتىنە 1 جەلتوقساندا كىرىسەدى. سول ءۇشىن سايلاۋدى ەرتەرەك وتكىزۋ كەرەك. سايلاۋدان سوڭ وسك ءۇش كۇننىڭ ىشىندە ونىڭ ناتيجەسىن شىعارادى. جيىرما كۇندە كوميسسيا بارلىق ايماقتاردان تۇسكەن حاتتامالاردى ساناپ، قورىتىندى شىعارادى. 19 قاراشاداعى پرەزيدەنتتىك سايلاۋ ءوتتى دەپ تانىلسا، وندا قازىرگى پرەزيدەنت بۇل قىزمەتتە تاعى 41 كۇن وتىرادى. ەكىنشى تۋر وتەتىن بولسا، وندا پرەزيدەنت ۋاكىلەتى 82 كۇنگە ۇزارادى. زاڭ بويىنشا، پرەزيدەنت مەرزىمىن ەشكىم ءبىر ساعاتقا دا سوزا المايدى".

"كونستيتۋتسيالىق زاڭعا سايكەس، كەزەكتى سايلاۋ پرەزيدەنت مەرزىمى اياقتالاتىن ايدا، ياعني قاراشانىڭ ءۇشىنشى جەكسەنبىسىندە - 19 قاراشادا ءوتۋى ءتيىس", - دەپ ءتۇسىندىردى وسك ءبولىم باسشىسى كۋبات ۋمەتاليەۆ.

قىرعىزستان كونستيتۋتسياسى بويىنشا، پرەزيدەنت ءبىر مەرزىمگە عانا سايلانا الادى. پرەزيدەنت المازبەك اتامباەۆ ءوز ۋاكىلەتىن بەيبىت جولمەن تاپسىراتىنىن مالىمدەدى. پرەزيدەنتتىك سايلاۋعا تۇسكىسى كەلەتىنىن بىرنەشە ساياساتكەر مالىمدەپ ۇلگەردى.

اباي-اقپارات

0 پىكىر

ۇزدىك ماتەريالدار

انىق

ولار قالاي بايىدى؟

رۋسلان احماعانبەتوۆ 18775