جۇما, 29 ناۋرىز 2024
ءدىن 4941 7 پىكىر 21 ءساۋىر, 2017 ساعات 09:52

دىندەگى كونسەرۆاتيزمنەن الشاق بولۋىمىز قاجەت

ءدىن ىستەرى جانە ازاماتتىق

قوعام ءمينيسترى

ن.ب. ەرمەكباەۆتىڭ

ءىى رەسپۋبليكالىق يمامدار

فورۋمىنداعى بايانداماسى

 

قۇرمەتتى ءدىن قايراتكەرلەرى!

قۇرمەتتى فورۋم قاتىسۋشىلارى مەن قوناقتارى!

ەڭ الدىمەن، ەلوردامىز استانادا ءوتىپ جاتقان ءىى يمامدار فورۋمىنا قاتىسۋشىلارعا ءوز ريزاشىلىعىمدى بىلدىرۋگە رۇقسات ەتىڭىزدەر.

بۇل وتە ماڭىزدى كەزدەسۋ دەپ ويلايمىن.

قوعامدا جوعارى رۋحانيات نۇرىن ورنىقتىرىپ، حالىقتى بىرلىككە، بەيبىتشىلىككە، كەلىسىم مەن ءوزارا تۇسىنىستىككە شاقىراتىن ازاماتتارمەن جۇزدەسىپ وتىرعانىما قۋانىشتىمىن.

ءدىني قايراتكەرلەر وسىنداي ءىس-شارالاردا باس قوسقان كەزدە مورالدىق جانە رۋحاني نەگىزدەردى ساقتاۋ قاجەتتىگى تۋرالى ايتادى، سەبەبى بۇل – ءبىزدىڭ ورتاق مىندەتىمىز.

سىزدەردىڭ جۇمىستارىڭىزعا ءوز العىسىمدى بىلدىرە وتىرىپ، جاھاندىق قاۋىپ-قاتەرلەرگە – ءدىني ەكسترەميزمگە، فاناتيزمگە جانە تەرروريزمگە قارسى تۇرۋ جولىنداعى وزەكتى پروبلەمالار مەن قازاقستاننىڭ كوپكونفەسسيالى حالقىنىڭ ورتاق مۇددەسى ءۇشىن مەملەكەت پەن مۇسىلمان ءدىنباسىلارىنىڭ قارىم-قاتىناستارىن دامىتۋ جولدارى تۋرالى اڭگىمەلەسكىم كەلەدى.

فورۋمنىڭ ويلارى، يدەيالارى مەن شەشىمدەرى باسقا دا كونفەسسيالار وكىلدەرىنىڭ، تۇتاستاي العاندا كوپكونفەسسيالى مەملەكەتىمىزدىڭ بارلىق ازاماتتارىنىڭ قىزىعۋشىلىعىن تۋدىرادى دەپ سەنەمىن.

قازاقستاننىڭ گۇلدەنۋى، كوپتەگەن فاكتورلارعا، ونىڭ ىشىندە ءدىننىڭ ءرولى مەن ورنىن دۇرىس تۇسىنۋگە بايلانىستى.

قازاقستان – مۇسىلمان تۇرعىندارى باسىم ەل. قازاقستان پرەزيدەنتى نۇرسۇلتان نازارباەۆ يسلامنىڭ الەمدەگى جەتەكشى دىندەردىڭ ءبىرى ەكەندىگىن، ونىڭ ءبولىنۋ مەن وشپەندىلىككە ەمەس، بەيبىتشىلىك پەن بىرلىككە شاقىراتىنىن ۇنەمى ايتىپ ءجۇر.

يسلامداعى مەكتەپتەر مەن اعىمداردىڭ الۋان ءتۇرلى بولۋىنا قاراماستان، رەسپۋبليكانىڭ مۇسىلمان ۇمبەتى قوعامعا قىزمەت ەتۋدە بىرتۇتاستىق تانىتۋدا. سوندىقتان مەملەكەتتىڭ ۇلتتىق-مادەني قۇندىلىقتار مەن داستۇرلەردى، ەتنوسارالىق جانە كونفەسسياارالىق كەلىسىمدى ساقتاۋدا ءوزىنىڭ ستراتەگيالىق ارىپتەسى رەتىندە ەلىمىزدەگى ءداستۇرلى يسلامنىڭ بىردەن-ءبىر مويىندالعان قۇرىلىمى – قازاقستان مۇسىلماندارى ءدىني باسقارماسىن كورۋىنىڭ تولىق قيسىنى بار.

ءدىني قاتىناستار سالاسىن رەتتەيتىن «ءدىني قىزمەت جانە ءدىني بىرلەستىكتەر تۋرالى» زاڭدا مەملەكەتتىڭ حالقىمىزدىڭ رۋحاني ومىرىندە حانافي مازحابى مەن پراۆوسلاۆيەلىك حريستياندىقتىڭ ورنى مەن ءرولىن تانيتىنى ناقتى بەكىتىلگەن.

يسلاممەن ۋاعىزدالاتىن جوعارى قۇندىلىقتاردى ءاردايىم مەملەكەت قولدايتىن بولادى. دەسەك تە، ءبىز قازاقستاننىڭ زايىرلى مەملەكەت ەكەندىگىن  ۇمىتپاۋىمىز كەرەك.

قازاقستاننىڭ زايىرلىلىق قاعيداتتارى يسلامنىڭ جانە قۇقىقتىق الاڭدا ارەكەت ەتەتىن بارلىق دىندەردىڭ رۋحاني مۇراسىن قۇرمەتتەۋگە، سونداي-اق ءار ادامنىڭ ءدىني سەنىمدى تاڭداۋ بوستاندىعىن قامتاماسىز ەتۋگە نەگىزدەلەدى.

مەملەكەت باسشىسى اتاپ وتكەندەي «...كونستيتۋتسيانى، زاڭداردى ساقتاۋ مەن ەلدىڭ بىرلىگىن نىعايتۋ ماسەلەلەرىندە ەشقانداي بولىنۋشىلىك بولماۋى كەرەك».

1990 جىلى قازاقستان مۇسىلماندارى ءدىني باسقارماسىنىڭ قۇرىلۋى تاۋەلسىز مەملەكەتىمىزدىڭ جاڭا تاريحىنداعى ماڭىزدى وقيعا بولدى.

ءدىني باسقارمامەن وسى شيرەك عاسىر ىشىندە باسقا دا ءداستۇرلى دىندەردىڭ وكىلدەرىمەن كونسترۋكتيۆتى ديالوگ ورناتۋعا جانە  مۇسىلمانداردى بىرىكتىرۋ ارقىلى يسلامدىق ءىلىمنىڭ سەنىمدى جانە دۇرىس تۇسىندىرۋگە باعىتتالعان اۋقىمدى جۇمىستار اتقارىلدى.

ەتنوسارالىق جانە كونفەسسياارالىق كەلىسىمدى ىلگەرىلەتۋ، قازاقستاندىق ءپاتريوتيزمدى نىعايتۋ، قازاقستان حالقى ءۇشىن ءداستۇرلى بولىپ تابىلاتىن ادامگەرشىلىك جانە مورالدىق قۇندىلىقتاردى قورعاۋ، قايىرىمدىلىق پەن مەيىرىمدىلىككە نەگىزدەلگەن گۋمانيزم يدەالارىن بەكىتە ءتۇسۋ ىستەرىندە قمدب تاراپىنان قولعا الىنىپ، ىسكە اسىرىلىپ وتىرعان جۇمىستار مويىنداۋعا تۇرارلىق.

تاۋەلسىزدىك جىلدارىندا ءبىزدىڭ ەلىمىزدە ءدىن سالاسىنداعى ۇدەرىستەردى باسقارۋ جانە ءدىني مۇددەلەردى قامتاماسىز ەتۋ جۇيەسى جولعا قويىلدى.

2016 جىلى ءدىن ىستەرى جانە ازاماتتىق قوعام مينيسترلىگى قۇرىلدى.

مەملەكەت باسشىسى اتاپ وتكەندەي، ءدىني كونفەسسيالار مينيسترلىكتىڭ كومەگىمەن مەملەكەتكە قاتىستى مەرزىمى جەتكەن ماسەلەلەردى شەشە الادى.

مينيسترلىك ءدىني احۋالعا مونيتورينگ جۇرگىزىپ وتىرادى، بىراق مەملەكەت ءدىني بىرلەستىكتەردىڭ ءدىني-كانوندىق ارەكەتتەرىنە ارالاسپايدى.

ۋاكىلەتتى ورگاننىڭ نەگىزگى مىندەتى كانوندىق جانە ءدىني ماسەلەلەردى زەرتتەۋ ەمەس، ءدىني بىرلەستىكتەردىڭ قىزمەتى ءۇشىن جاعداي جاساۋ، سونداي-اق ءدىن سالاسىنداعى تۇراقتىلىقتى ساقتاۋ.

اعىمداعى جىلعى 15 اقپاندا مينيسترلىك پەن قمدب اراسىندا «ءوزارا ىنتىماقتاستىق تۋرالى كەلىسىمگە» قول قويىلدى. بۇل مەملەكەت پەن ءمۇفتيات اراسىنداعى بايلانىستىڭ دەڭگەيى مەن ىقپالداسۋىن ايتارلىقتاي ارتتىراتىنى انىق.

ءدىني ۇراندى جەلەۋ ەتەتىن  ەكسترەميزمگە جول بەرمەۋ، ءدىني ىلىمدەردى ساياسيلاندىرۋعا قارسى تۇرۋ، جات جالعان ءدىني كوزقاراستار مەن يدەالاردى قوعامعا تىقپالاۋعا قاتىستى مەملەكەت پەن ءمۇفتياتتىڭ ۇستانىمى بىردەي.

قازىرگى تاڭداعى قوعامدىق سۇرانىستارعا سايكەس بولۋ ءۇشىن وتاندىق مۇسىلمان ءدىني قىزمەتشىلەرىنىڭ بەدەلىنىڭ جوعارى بولۋىن قامتاماسىز ەتۋدىڭ قاجەتتىگىن وسى اۋديتوريادا ايتۋعا بولادى. وسىعان وراي، مەملەكەت يمامدارعا قولداۋ كورسەتۋدى، ولاردىڭ كاسىپتىك دەڭگەيلەرىن ارتتىرۋدى قولعا الدى.

ارينە، ءبىز مەشىت يمامدارىنىڭ شەشىلمەگەن ماتەريالدىق جانە الەۋمەتتىك ماسەلەلەرىنىڭ بار ەكەندىگىن بىلەمىز.

قوردالانعان ماسەلەلەردى شەشۋ ءۇشىن ۋاقىت قاجەت.

مەن مينيسترلىكتىڭ وسى ماسەلەلەردى شەشۋمەن اينالىسىپ جاتقاندىعىنا جانە ونى بىرلەسىپ شەشەتىنىمىزگە سەندىرگىم كەلەدى.

 

قۇرمەتتى فورۋمعا قاتىسۋشىلار!

پرەزيدەنتتىڭ «بولاشاققا باعدار: رۋحاني جاڭعىرۋ» اتتى ماقالاسىندا ايتىلعان تۋعان جەرگە، ونىڭ مادەنيەتى مەن سالت-داستۇرلەرىنە دەگەن ايرىقشا كوزقاراس − بۇل كەز كەلگەن حالىقتى شىن مانىندە ۇلت ەتەتىن مادەني-گەنەتيكالىق كودىنىڭ نەگىزى.

ءبىز ەسكىرگەن قۇندىلىقتارعا بايلانباي، اشىق دۇنيەتانىمعا يە بولۋىمىز كەرەك. ءوزىمىزدىڭ تابىستى دامۋ جولىمىزدى جاساۋ ءۇشىن جات يدەولوگيالارعا يممۋنيتەت قالىپتاستىرۋىمىز قاجەت.

قازاقتاردىڭ وزىندىك باي مادەنيەتى، ەرەكشە ءداستۇرى، ال كوپەتنوستى قازاقستان حالقىنىڭ  وزگەلەرگە ۇقسامايتىن بىرەگەي تاريحى بار.

سوندىقتان ءبىز، باسقا ايماقتاردا ءومىر سۇرەتىن، وزىندىك سالت-داستۇرلەرىمەن جانە قالىپتاسقان زاڭدارىمەن ءومىر سۇرەتىن باسقا حالىقتارعا كوزسىز ەلىكتەمەيمىز.

ءبىز فاناتيزمگە، ءدىني كونسەرۆاتيزم مەن دوگمالارعا كوزسىز ىلەسۋدەن الشاق بولاتىن ءوز ءومىرىمىزدى قۇرامىز.

قازاقستان حالقى بوتەن مۇددەلەردى ناسيحاتتايتىن فاناتيك «كەڭەسشىلەرگە» الاڭداماي، مەملەكەتتىك-كونفەسسيالىق قارىم-قاتىناستىڭ وزىندىك قازاقستاندىق مودەلىن قالىپتاستىراتىنداي تولىق قۇقىققا يە.

ءبىزدىڭ وزىندىك مودەلىمىز بۇگىنگى كۇننىڭ شىنايىلىعىن ەسكەرۋگە جانە ۇلتتىق داستۇرگە نەگىزدەلەدى.

بۇل مودەل ءدىندى سوقىر بۋكۆاليستىك تۇرعىدان قابىلداماۋعا، ءدىني كانوندارداعى وڭدى قۇندىلىقتارعا، ياعني قايىرىمدى، ونەگەلى جانە بەيبىت قاتار ءومىر سۇرۋگە نەگىزدەلۋى قاجەت.

 

قۇرمەتتى ءدىني قىزمەتشىلەر!

قوعامعا قاتىناس تۇرعىسىنان سىزدەر يسلامنىڭ ەلشىسى مىندەتىن اتقاراسىزدار.

سول سەبەپتى سىزدەردى مەشىت مىنبەرىنەن، باق جانە الەۋمەتتىك جەلىلەردەن حالىققا ءدىن سالاسىنداعى مەملەكەتتىڭ ساياساتىن جەتكىزۋلەرىڭىزدى جانە شىنايى قۇندىلىقتاردى تۇسىندىرۋلەرىڭىزدى  سۇرايمىز.

وزدەرىڭىزگە ءمالىم، مەملەكەت ءدىندار مۇسىلماندار ءۇشىن ءدىني قاجەتتىلىكتەرىن وتەۋگە قاتىستى بارلىق قاجەتتى جاعدايلاردى جاساۋدا. ازاماتتاردىڭ ۇسىنىستارى مەن وتىنىشتەرىن ەسكەرە وتىرىپ، مينيسترلىك قازىرگى تاڭدا عيبادات  عيماراتتارىنان تىس جەرلەردە ءدىني راسىمدەردى ورىنداۋعا قاتىستى تالاپتاردى قايتا قارادى.

مەملەكەتتىك مەكەمەلەرگە جاقىن جەرلەردە، تەمىرجول جانە اۆتوۆوكزالداردا، اەروپورتتار مەن پورتتاردا نامازحانالارعا قاتىستى تىيىمدى الىپ تاستاۋ ماسەلەسى وڭىنان قارالدى.

قمدب جۇما ۋاعىزدارىن دايىنداۋدى رەتكە كەلتىرۋدى ازىرلەدى.

قمدب مەشىتتەرگە كەلۋشىلەر ءۇشىن مەشىتتىڭ ىشكى ەرەجەلەرىن بەلگىلەدى.

قازاقستاندا ءداستۇرلى يسلامنىڭ وڭدى وبرازىن جاساۋعا، مۇسىلمان بىرلەستىگىنىڭ قىزمەتىنىڭ جاريالىعىن قامتاماسىز ەتۋگە باسىمدىق بەرىلەتىن بولادى.

مۇسىلماندىق ءدىني ىلىمدەردىڭ نەگىزگى ماتىندەرى مەن شەتەلدىك جەتەكشى يسلام عالىمدارىنىڭ تەولوگيالىق جاريالانىمدارىن مەملەكەتتىك تىلگە اۋدارۋ ماڭىزدى بولىپ تابىلادى.

الەمدىك جانە ءداستۇرلى دىندەر ليدەرلەرى سەزىن شاقىرىپ وتىرعان ءبىزدىڭ ەلىمىزدىڭ مۇسىلماندارىنىڭ داۋىسى حالىقارالىق ارەنادا جانە جاھاندىق يسلام الەمىندە تەرەزەسى تەڭ ەستىلەدى دەپ كۇتەمىز.

جوعارىدا ايتىلعانداردى ەسكەرە وتىرىپ، مەن مينيسترلىكتىڭ اتىنان سىزدەرمەن بىرلەسكەن جۇمىسىمىزبەن بولىسكىم كەلەدى.

ءبىرىنشى. مەملەكەت دىنگە سەنۋشىلەردىڭ سەزىمدەرىن قۇرمەتتەگەن جانە قۇرمەتتەي بەرەتىن بولادى. ءبىز ءدىني بىرلەستىكتەردىڭ قىزمەتى ءۇشىن بارلىق جاعدايلاردى جاساۋدامىز.

سونىمەن قاتار، مەملەكەتىمىزدىڭ زايىرلى سيپاتى قازاقستاننىڭ تابىستى دامۋى مەن گۇلدەنۋىنىڭ ماڭىزدى شارتى رەتىندە قالا بەرەدى.

گەوساياسي فاكتورلار مەن حالقىمىزدىڭ كوپكونفەسسيالىلىعىن ەسكەرەتىن بولساق، بۇل – قوعامداعى بەيبىتشىلىك پەن تۇراقتىلىقتى ساقتاۋدىڭ جالعىز جولى.

ەكىنشى. ەلباسى تاراپىنان قمدب وكىلدەرىنە ماڭىزدى مىندەت قويىلدى – ولار تەك ءدىني سالادا عانا ەمەس، سونداي-اق الەۋمەتتىك قىزمەتتىڭ وزگە دە ماڭىزدى سالالارىندا تابىستى ەڭبەك ەتۋلەرى قاجەت.

ءدىني وقۋ ورىندارى ءبىلىم بەرۋ باعدارلامالارىندا كورىنىس تاپقان زايىرلىلىق پاندەرىن وقىتۋلارى قاجەت.

ءۇشىنشى. سىزدەردىڭ نازارلارىڭىزدى ەلباسى ماقالاسىنداعى حالىقتىڭ ساناسىندا جالپىۇلتتىق قاسيەتتى ورىندار ۇعىمىن سىڭىرۋگە باعىتتالعان «رۋحاني جاڭعىرۋ» - «تۋعان جەر» بولىمىنە اۋدارعىم كەلەدى.

پرەزيدەنت بىزگە «قازاقستاننىڭ قاسيەتتى رۋحاني قۇندىلىقتارى» جوباسى قاجەت ەكەندىگىن اتاپ ءوتتى.

ءبىز جات يدەولوگيالىق اعىمداردىڭ ارتىندا باسقا ەلدەردىڭ مادەني سيمۆولدارى، وزگە قۇندىلىقتارى مەن مۇددەلەرى تۇرعانىن ءبىلۋىمىز كەرەك. ولارعا تەك ءوزىمىزدىڭ ۇلتتىق قۇندىلىقتارىمىز ارقىلى عانا توتەپ بەرە الامىز.

سىزدەردى وسى جوباعا بەلسەندى قاتىسۋعا شاقىرامىز جانە ۇسىنىستار كۇتەمىز.

ءتورتىنشى. پرەزيدەنت ۇسىنعان ستراتەگيا حالقىمىزدى ورتا عاسىردا ەمەس، ءححى عاسىردا ءومىر سۇرۋگە دايىندايدى. مەملەكەت پەن ەلىمىزدىڭ ازاماتتارى راديكالدىق پەن دىندە شەكتەن شىعۋشىلىقتىڭ (فاناتيزم) كەز-كەلگەن كورىنىستەرىنە ءبىرتۇتاس شەپتە قارسى تۇرۋى كەرەك.

ءبىز دىندەگى كونسەرۆاتيزمنەن الشاق بولۋىمىز قاجەت. بۇل ءسوزدىڭ قازاق تىلىندەگى ماعىناسى «كەرتارتپالىق»، ياعني العا ۇمتىلۋدىڭ ورنىنا، كەرى قاراي تارتۋشى دەگەن ماعىنانى بىلدىرەدى.

يمامدار كورپۋسى قوعامداعى، اسىرەسە جاستار ورتاسىنداعى ءدىني راديكاليزمنىڭ الدىن الۋدى كۇشەيتۋى ءتيىس. سونداي-اق، جالعان ءدىني اعىمدار مەن ولاردىڭ يدەولوگتارىنىڭ قىزمەتىنە قاتاڭ توسقاۋىل قويۋى كەرەك.

وسىعان وراي، مينيسترلىك مۇددەلى مەملەكەتتىك ورگاندارمەن، ءدىني بىرلەستىكتەرمەن، عىلىمي جانە ساراپشىلار قاۋىمداستىعىمەن بىرلەسىپ، ءدىن سالاسىنداعى مەملەكەتتىك ساياساتتىڭ 2017 - 2020 جىلدارعا ارنالعان تۇجىرىمداماسىن ازىرلەۋ جانە ءدىن سالاسىنداعى ۇلتتىق زاڭنامانى جەتىلدىرۋ بويىنشا تىعىز جۇمىستار جۇرگىزۋدە.

ءدىني ەكسترەميزم مەن تەرروريزمگە قارسى ءىس-قيمىل جونىندەگى مەملەكەتتىك باعدارلاما ازىرلەندى. بۇل مەملەكەت تاراپىنان ەكسترەميزم مەن راديكاليزمنىڭ كەز كەلگەن وشاقتارىنا توسقاۋىل قويىلاتىندىعىن بىلدىرەدى.

بەسىنشى. قوعام تاراپىنان قمدب قارجى قىزمەتىنىڭ اشىقتىعىن قامتاماسىز ەتەتىن قارجى ەسەبىن ەنگىزۋ تەتىكتەرى تۋرالى ماسەلەلەر ءجيى  كوتەرىلۋدە.

بۇل ازاماتتاردىڭ يمامدارعا دەگەن سەنىمىن ارتتىرار ەدى.

بۇل ماقساتقا قول جەتكىزۋ ءۇشىن  دەپۋتاتتار مەن قوعامدىق بىرلەستىكتەردىڭ وكىلدەرىنەن تۇراتىن توپ  قۇرىپ، ءىرى مەشىتتەردىڭ اي سايىنعى قارجىلىق تۇسىمدەرىن تەكسەرىپ وتىرۋدى ۇسىنامىز.

التىنشى. يسلام ءدىنىن تۇسىندىرۋدە مەشىت قىزمەتكەرلەرىنىڭ ءرولى مەن جاۋاپكەرشىلىگى ارتا تۇسۋدە.

مەملەكەت باسشىسى «يسلام ءاردايىم قايىرىمدىلىق جاساۋى قاجەت. مۇسىلمان سوزىمەن دە، ىسىمەن دە ەشكىمگە زياندىق جاساماۋى كەرەك. ەگەر مۇسىلماندار اراسىندا تۇسىنىكسىز جايتتار تۋىنداپ جاتقان بولسا جانە ونىڭ تازا دىنگە قاتىسى بولماسا، ونداي جايتتارعا باسقاشا قاراۋ كەرەك، ونىڭ يسلام كانوندارى مەن حاديستەرگە سايكەس كەلمەيتىنىنى ايتىپ اشكەرەلەۋ قاجەت» دەپ اتاپ وتكەن بولاتىن.

سوڭعى جىلدارى قوعام وزگەردى، اقپاراتقا دەگەن قولجەتىمدىلىك كەڭەيدى، حالىقتىڭ ۇكىمەتكە جانە يمامدارعا دەگەن سۇرانىستارى ارتتى.

تەك تەرەڭ بىلىممەن، تازا بەدەلمەن، مەيىرىمدىلىكپەن جانە اينالاداعى ادامدارعا كوڭىل بولۋمەن تۇرعىنداردىڭ ىقىلاسىنا بولەنۋگە  جانە ولاردىڭ سەنىمدەرىن ساقتاۋعا بولادى.

ادامدارمەن جۇمىس جۇرگىزۋ جازعىرۋعا، كۇنا ارتۋعا جانە «قارعىستارمەن» قورقىتۋعا نەگىزدەلمەۋى كەرەك. «كاپىر»، «توزاقى»، «كۇناھار» دەگەن سوزدەردى قولدانۋدان ساق بولعان ءجون. مۇنداي سوزدەر راديكاليزمنىڭ بەلگىلەرى.

مەملەكەت پەن مۇسىلماندار بىرلەستىگى بىرلەسە وتىرىپ، دىنگە قاتىستىلىعىنا قاراماستان زاڭدى ساقتاپ جۇرگەن ازاماتتاردىڭ  ورتاسىندا ادامدىق قاسيەتتەردى قۇرمەتتەيتىن اتموسفەرا قالىپتاستىرۋلارى قاجەت.

زاماناۋي قوعام مەشىت يمامدارىنان تۇرعىندارمەن، اسىرەسە جاستارمەن جۇمىس جۇرگىزە بىلەتىن پسيحولوگ بولۋ دا تالاپ ەتىلەدى. وسى رەتتە، ولاردىڭ دەسترۋكتيۆتى اعىمداردىڭ نە ۇسىناتىندىعىن، ال ءداستۇرلى يسلامنىڭ نە ەكەنىن تۇسىندىرە بىلۋلەرى اسا ماڭىزدى.

قمدب مەشىت يمامدارى ءۇشىن پسيحولوگيا جانە وراتورلىق ونەرگە قاتىستى ارنايى قىسقا مەرزىمدى وقۋ مودۋلدەرىن دايىنداۋدى، ال ءدىني ءبىلىم بەرۋ وقۋ ورىندارىنىڭ باعدارلامالارىنا پسيحولوگيا جانە وراتورلىق ونەر پاندەرىن قوسۋدى ۇسىنامىن.

بۇگىنگى كۇنى قازاقستان مۇسىلماندارى داستۇرلەردى ساقتاي وتىرىپ، ءدىني راسىمدەردى ءبىرىزدى وتكىزۋگە تىرىسۋدا.

ەلىمىزدىڭ ءارتۇرلى وڭىرلەرىن ايتپاعاننىڭ وزىندە، ءتىپتى ءبىر قالانىڭ وزىندە مۇسىلماندىق راسىمدەر ءارتۇرلى وتكىزىلەدى. مۇنداي جاعداي تۇسىنىسپەۋشىلىككە، يمامدار مەن تۇرعىندار اراسىندا تۋىنايتىن كيكىلجىڭگە دەيىن الىپ بارادى.

كەيدە اس بەرۋ كەزىندە يمامداردان بولەك، تەولوگيالىق ءبىلىمى جوق ادامداردىڭ قۇراننان ۇزىندىلەر وقىپ، ۋاعىز ايتىپ وتىرعانىن كورۋگە بولادى.

سوندىقتان ءاربىر مۇسىلماندىق ءراسىمدى جۇزەگە اسىرۋ ءتارتىبىن ايقىندايتىن بىرىڭعاي ءتىزىمدى قابىلداۋ ارقىلى قوعامداعى مۇسىلماندىق راسىمدەردى جۇيەلەۋ مەن بىرىزدەندىرۋدىڭ كەزى كەلدى دەپ سانايمىز.

 

قۇرمەتتى، ءمۇفتي حازرەت، قۇرمەتتى ءدىن قىزمەتكەرلەرى!

مەنىڭ بۇگىنگى فورۋمداعى ءسوزىمدى مەرزىمى جەتكەن كوپتەگەن مىندەتتەردى شەشۋدىڭ ايقىن ءارى كونسترۋكتيۆتى مۇمكىندىكتەرىن ىسكە اسىرۋعا شاقىرۋ دەپ قابىلداۋلارىڭىزدى قالايمىن.

شەشىمىن تاپپاعان ماسەلەلەر مەن مىندەتتەردى تالقىلاۋ بارىسىندا تولىقتىراسىزدار دەپ سەنەمىن.

ءبىزدى الدىمىزدا ۇنەمى تۇراقتى نازار سالۋدى، ديالوگ پەن ءوزارا ءىس-قيمىلدى تالاپ ەتەتىن كۇردەلى دە جاۋاپتى جۇمىستار كۇتىپ تۇر جانە وعان ءبىزدىڭ بۇگىنگى فورۋم ءوز سەپتىگىن تيگىزۋى ءتيىس.

وسى ماڭىزدى جۇمىستا «...كەڭەسە وتىرىپ شەشكەن شەشىمنىڭ كەمىسى بولماس» دەگەن حالىق دانالىعىن باسشىلىققا الۋدى ۇسىنامىز.

ناتيجەسىندە بارلىعىمىزدىڭ ورتاق ءۇيىمىز بولىپ تابىلاتىن قازاقستاندا بەيبىتشىلىكتى ساقتاۋعا جانە تۇراقتىلىقتى نىعايتۋعا  ءوز ۇلەسىن قوساتىن دايەكتى پىكىرالماسۋلار ورنايدى دەپ سەنەمىز.

بارشاڭىزعا ساتتىلىك، جۇمىستارىڭىزعا تابىستار تىلەيمىن.

نازارلارىڭىزعا راحمەت

Abai.kz

 

 

 

 

 

 

7 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1563
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2257
عيبىرات

قايسار رۋحتى عازيز جان

مۇحتار قۇل-مۇحاممەد 3537