جەكسەنبى, 17 جەلتوقسان 2017
قاۋىپ ەتكەننەن ايتامىن 8712 22 پىكىر 18 مامىر, 2017 ساعات 10:34

كرەملدىڭ كوكبەتى قازاقستاندى تاعى دا تىلدەدى

ورىس تەلەەيفرىنىڭ توسەكتەگى تەورەتيگى ۆلاديمير سولوۆەۆ كەزەكتى رەت قازاقستاننىڭ سولتۇستىگىنە شۇيلىكتى.

"روسسيا 1" ارناسىنان تىكەلەي ەفيردە تارايتىن "ۆەچەر س ۆلاديميروم سولوۆەۆىم" دەيتىن باعدارلامادا ۆلاديمير سولوۆەۆ ورىستىڭ شولاقبەلسەندى ساياساتكەرسىماقتارىن جيىپ، ۋكراينا پرەزيدەنتى پەتر پوروشەنكونىڭ جاڭا جارلىعىن تالقىعا سالعان. ءسويتىپ، رەسەيلىك الەۋمەتتىك جەلىلەر مەن تەلەارنالاردى ۋكراينا تەرريتورياسىندا جاۋىپ تاستاعان پرەزدەنت پوروشەنكونى جەردەن الىپ، جەرگە سالدى.

وزگەنىڭ اۋلاسىنا تاس لاقتىرماسا، باسى اۋىرىپ، بالتىرى سىزدايتىن كرەملدىڭ سارجاعال ساياساتكەرلەرى ءسوز اراسىندا قازاقستاندى تىلگە تيەك ەتەدى. دالىرەك ايتساق، سولتۇستىك قازاقستاندى "ورىس الەمى" دەپ اتاپ، پرەزيدەنت نۇرسۇلتان نازارباەۆتىڭ لاتىن الىپبيىنە كوشۋ باستاماسىنا نارازىلىق تانىتتى.

ەفير 2017 جىلدىڭ 16-مامىرى كۇنى جاريا بولدى.

ۆلاديمير سولوۆەۆ پەن ونىڭ سپيكەرىنىڭ اراسىنداعى شاعىن ديالوگ تومەندەگىدەي ءوربىدى:

س: -نازارباەۆقا كەڭەس بەرۋ كەرەك ەدى. ال ول ەندىگى اۋدارىپ  جاتىر (كيريليتساداعى قازاق ءالىپبيىن لاتىنشاعا اۋدارىپ جاتىر دەگەندى نۇسقادى دەپ تۇسىندىك - رەد.). ال سىزدەر ونى سىنامايسىزدار...

ۆ.س: -نازارباەۆ اۋدارىپ جاتسا، جاقسى، بوپتى. وعان سول ۇنايدى. ءبارى جاقسى. ءسىز نە قازاقتار دا ورىس دەگىڭىز كەلە مە؟

س: -ال ولاردىڭ ورىس الەمىنەن الشاقتاپ كەتكەنى شە؟

ۆ.س: -ول تۇسىنىكتى. ەگەر تاريحىن الىپ قاراساڭىز، قازاقتار ءاۋ باستان قانداي تايپالارعا، توپتارعا كىرەتىن ەدى؟

-س: -ال سولتۇستىك قازاقستان شە؟ سولتۇستىك قازاقستان - ورىس الەمى ەمەس پە ەدى؟ تسەلينوگراد، قازىرگى استانا...

ۆ.س: - قاراڭىز، مۇنى ءسىز ايتتىڭىز. ەندى ءسىزدى ەشقايدا كىرگىزبەيدى. وكىرىپ جىلاي بەرىڭىز. جيرينوۆسكيدىڭ دوسىن تىڭداپ وتىرمىز با ءوزى؟!

(9:50 مينۋتتان باستاپ قازاقستان تۋرالى كۇرەسىندى سوزدەر ايتىلا باستايدى.)

ءبىز قازاققا جانى قاس سولوۆەۆ تۋرالى بىرنەشە مارتە جازعانبىز. ول "قازاقستان ۋكراينانىڭ كەبىن كيەدى" دەدى. ول "قازاقستانداعى تولقۋلار پرەزيدەنتتى تاقتان تايدىرادى" دەدى.

جانە كرەملدىڭ ءدالدۇرىش ديپلوماتتارىنىڭ اۋزىنان ايتىلعان شوۆينيستىك سارىنداعى پىكىرلەردى اشىق ناسيحاتتادى.

ءوزى ەۆرەي بولا تۇرا، "مى رۋسسكيە! س نامي بوگ!" دەپ كىتاپ جازىپ، ءوزىن پايعامبارعا تەڭەدى. سويتكەن، سولوۆەۆ كەزەكتى رەت قازاقستاندى تىلدەدى.

ورىس كوگىلدىر ەكرانىنىڭ كوكبەتى وز باعدارلاماسىندا قازاقستان تۋرالى نەبىر سۇمدىقتى ايتىپ ءام ايتقىزىپ قانا قويعانىنا قاراماي قازاقستانعا ەمىن-ەركىن كەلىپ ءجۇر.

قر ءسىم باستاعان بىرقاتار قۇزىرعى ورگانداردىڭ نازارىنا! ەلىمىزدى تىلدەپ، شەكاراسىنا شۇيلىككەن، تاۋەلسىز قازاقستاننىڭ تەرريتوريالىق تۇتاستىعىن بۇزعىسى كەلەتىن شوۆينيست ۆلاديمير سولوۆەۆتىڭ قازاقستانعا كەلۋىنە تىيىم سالىنسىن!

نۇرگەلدى ابدىعانيۇلى

Abai.kz

Автор

نۇرگەلدى ابدىعانيۇلى

كونتەنت-رەداكتور

نۇرگەلدى ابدىعانيۇلى - قر اقپارات سالاسىنىڭ ۇزدىگى. ساياسي شولۋشى.
22 پىكىر