دۇيسەنبى, 18 جەلتوقسان 2017
اقمىلتىق 1157 1 پىكىر 18 مامىر, 2017 ساعات 12:57

شەگىرتكەلەر شەرۋى ەكسپو-عا قوناقتاردان بۇرىن كەلىپ تۇرماي ما؟..

شەگىرتكە شابۋىلىنان قورعانۋدى ۇسىنعان دەپۋتات وبلىس باسشىلىعىنان ۇرىس ەستىپ، جالامەن سوتتالىپ وتىر…

استانا حالقى 1999 جىلعى بۇكىل رەسپۋبليكانى شارپىعان «شەگىرتكە شاپقىنشىلىعى» كەزىندە تاۋلىگىنە 500 شاقىرىم جەرگە دەيىن الاتىن بۇل جاندىكتىڭ  ەلوردامىزدى دا باسىپ العانىن ۇمىتا قويعان جوق بولار. سول كۇندەرى ونىڭ جانىبەك كارىپجانوۆتى «اۋىل شارۋاشىلىق ءمينيسترى» دەگەن بيىك لاۋازىمىمەن قوشتاسۋعا ءماجبۇر ەتكەنى دە ەسىمىزدە…

سول شەگىرتكە بيىل تاعى وڭتۇستىك قازاقستان وبلىسىنا سۋ تاسقىنىنان دا جامان اپات بولىپ تۇر. سارىاعاش، شاردارا، ارىس اۋدانىنان حابارلاسقان ەل ازاماتتارى نە دەيدى: «شەگىرتكە ەگىندى باۋداي ءتۇسىرىپ بارادى. وتكەن جىلى ءبىزدىڭ دەپۋتاتىمىز امانكەلدى سوپبەكوۆ (وبلىستىق ماسليحاتقا ەكى رەت سارىاعاشتان، ءبىر رەت شاردارا اۋدانىنان سايلانعان دەپۋتات – اۆتور) «شەگىرتكەگە جەم بولمايىق!» دەپ شىرىلداعان بولاتىن. بىراق، سول كەزدەگى وبلىس باسشىلىعى دەرەۋ قولداۋ كورسەتۋ ورنىنا جينالىستاعى كوپشىلىك الدىندا: «سەن بەكەرگە ەلگە ۇرەي تۋعىزبا، ەشقانداي دا شەگىرتكەدەن ءتونىپ تۇرعان قاتەر جوق!»  دەپ ۇرسىپ، باسىپ تاستاعان ەدى. 2008 جىلى دا امانكەلدى سوپبەكوۆ شەگىرتكەنى ايتامىن، جۋرناليستەردى شاقىرامىن دەپ، باسشىلاردان تاياق جەگەن بولاتىن…

بىلتىر قانشا ديحان ەگىنىنەن ايرىلدى! قانشا جەكە شارۋا بانكتەن العان قارىزىن وتەي الماي قالدى. ال، بيىلعى جاعداي ودان دا جامان. ويتكەنى، بىلتىر جاز جاۋىندى بولىپ، ءشوپ وتە قالىڭ شىقتى-داعى، شەگىرتكە تۇقىمىن كوپ جەرگە تاستادى. ەندى بيىل دالانى قويىپ، اۋىلعا كىرىپ جاتىر. بىراق، «شەگىرتكە شابۋىلعا شىعادى!» دەپ شىرىلداپ جۇرگەن دەپۋتاتتاردى كورمەيمىز. ال، ءبىز سايلاعان حالىق قالاۋلىسى جالامەن سوتتالىپ، ۇيىندە جۇمىسسىز وتىر ەكەن…

ءبىز ونىڭ قانداي ايىپ، كۇناسى بارىن بىلمەيمىز، بىراق، قارتتار ءۇيى مەن بالالار ءۇيىن ەكى جىل ەتپەن قامتاماسىز ەتكەن، سارىاعاش اۋداندىق ارداگەرلەر كەڭەسىنە اۋدي-6 اۆتوكولىگىن ساتىپ اپەرگەن، جەتىم-جەسىردىڭ قولىن قايتارماي، كومەك كورسەتىپ جۇرگەن، سارىاعاش اۋدانىنداعى «ىنتىماق» اۋىلىندا بۇزاقى تاجىك ولتىرگەن قازاق جىگىتتىڭ وتباسىنا قول ۇشىن سوزعان، ونىڭ جەتى كۇندىك، قىرىقكۇندىك، جىلدىق اسىن كوتەرگەن، دەپۋتات رەتىندە «ىنتىماقتا» ىنتىماق، بىرلىك بولسىن دەپ ءبىر اي بىتىمگەرشىلىكتە جۇرگەن، بىلتىر اقتوبەدە اسكەري بورىشىن وتەپ ءجۇرىپ قايعىلى قازاعا ۇشىراعان شاردارالىق سولدات جىگىتتىڭ دە وتباسىنا (2016 جىلى شاردارا اۋدانىنان سايلانعان دەپۋتات رەتىندە) جاردەم بەرگەن، ەلگە وتە كوپ قايىرىمدىلىق كورسەتىپ جۇرگەن جان ەكەنىن جاقسى بىلەمىز. ءبىر مەشىت سالعان، 34 مەشىتتى جوندەۋدەن وتكىزىپ بەرگەن جانى ىزگى جاننىڭ ءىسىنىڭ اق-قاراسى انىقتالسا ەكەن, ادىلەتسىزدىككە جول بەرىلمەسە ەكەن. ءبىزدىڭ وسى ءوتىنىشىمىز قر جوعارعى سوتىنىڭ توراعاسى قايرات ءمامي مىرزا مەن قر باس پروكۋرورى  جاقىپ اسانوۆ مىرزالاردىڭ قۇلاعىنا شالىنسا ەكەن دەيمىز» دەيدى مارات بەكشوراەۆ، ءابۋتالىپ سايماحانوۆ، تۇردالى ەسكەروۆ سەكىلدى اۋىلداعى ەل اعالارى.

شىنىندا دا، امانگەلدى سوپبەكوۆ 2015 جىلى ۇلتتىق «التىن جۇرەك» سىيلىعىنىڭ «جىلدىڭ قايىرىمدى ادامى» نومينانتى.  سودان بەرى ونى جاقسى بىلەتىندەر «التىن جۇرەك امانگەلدى» دەپ اتايدى. ونىڭ قايىرىمدىلىق ءىس-شارالارىنىڭ شەت-جاعاسىن عانا اتاپ وتەر بولساق، ولار:

-2006 جىلى كەلەستەگى سۋ تاسقىنى كەزدە ءبىر اۋىلعا 2 كاماز ۇن تارقاتىپ، نانمەن قاماتاماسىز ەتكەن;

– مەكتەپ سالعان;

-وقو ماقتاارال اۋدانىندا 3 كوپىر سالعان;

-داربازا اۋلىنا اۋىز سۋ كىرگىزۋگە 2,5 ملن.تەڭگە بولگەن;

-2010 جىلى شقو، تارباعاتاي اۋدانىنىڭ تاسقىننان زارداپ شەككەن 500 ۇيىنە ۇن مەن ازىق-تۇلىك جەتكىزىپ بەرگەن;

-ارىس قالاسىنىڭ № 1 تاجىباەۆ اتىنداعى بالالار ۇيىنە 2010 جىلى 50 قوي، 2014 جىلى رامازان ايىندا وبلىسىمىزدىڭ 16 مەشىتىنە 5 قويدان 80 قوي بەرگەن، ت.ت.

شاردارالىق ازاماتتار سىرداريانىڭ سول جاعىنداعى ەگىستىك جەرلەردە شەگىرتكەگە قارسى ناقتى كۇرەس جۇرگىزىلگەنىن، بىراق، الداعى ءبىر-ەكى اپتادا سارىاعاش اۋدانىنا قارايتىن بوزاي اۋىل وكرۋگى اۋماعىنان، سونداي-اق ارىس اۋدانى جاعىنان شەگىرتكە شابۋىلىنا ۇشىرايمىز با دەپ الاڭداپ وتىرعانىن جاسىرعان جوق. ال، بوزاي، جامبىل، ءالىمتاۋ اۋىل وكرۋگىندەگىلەر شەگىرتكەنىڭ شىنداپ جەتىلىپ ۇشۋى ءالى الدا، مامىردىڭ 25-ىنەن كەيىن باستالاتىنىن ايتادى. «قىستان امان شىققان شەگىرتكەلەر سانى جىلداعىدان 3-4 ەسە كوپ. ونىڭ قالىڭ سەپكەن تۇقىمى قايتا-قايتا باس كوتەرەتىندىكتەن، بىلتىر از قارجىمەن بەتىن قايتارۋعا بولاتىن جاۋعا بيىل سونشا ەسە ارتىق شىعىن جۇمسالىپ جاتىر. كۇن ءالى قاتتى ىسىعان جوق، قاتتى ىسىعان كەزدە ونىڭ ءبارى ءدۇر ەتىپ كوتەرىلەدى» دەيدى ماماندار.

وڭتۇستىكتە ەگىس القابىن تاۋىسقان شەگىرتكەلەر ەندى جۋساندى وتاپ جاتىر: https://www.ktk.kz/kz/news/video/2016/06/13/70093 

ال، ارىس اۋدانىنداعى ديحانداردىڭ احۋالى قانداي ەكەنىن تىلمەن ايتىپ جەتكىزۋ قيىن. ونى تەك مىنا بەينەتۇسىرىلىمدەردى كورگەن ادامدار عانا شىن سەزىنە الۋى مۇمكىن…

بۇگىنگىدەي بەيقامدىق استانا حالقىن تاعى دا شەگىرتكەگە تالاتۋى ابدەن مۇمكىن. 25 كۇننەن كەيىن ءسان-سالتاناتپەن اشىلاتىن ەكسپو-2017-گە شەتەلدىك مارتەبەلى قوناقتارمەن بىرگە شەگىرتكە دە قاپتاپ كىرىپ جاتسا تاڭعالماڭىز. سەبەبى، «جاۋدى كورمەي تۇرىپ قورىق» دەپ الدىن-الا دابىل قاعاتىن ەلدىڭ جاناشىر ازاماتتارى ۇيقاماقتا وتىر.

شەگىرتكەگە شەكارا جوق..

شۋاق ايبالتاۇلى

Abai.kz

1 پىكىر