الماتى وبلىسىندا شارۋا قوجالىقتارى مەن وڭدەۋشى كاسىپورىندار اراسىنداعى تىعىز بايلانىس جولعا قويىلعان،- دەپ حابارلايدى وبلىستىق اكىمدىكتىڭ ءباسپاسوز قىزمەتى.

ماسەلەن، كوكسۋ قانت زاۋىتىنا ءوڭىردىڭ 560 شارۋا قوجالىعى قانت قىزىلشاسىن تاپسىراتىن بولسا، جاركەنت كراحمال-سىرنە زاۋىتىمەن 540 جۇگەرى ءوسىرۋشى شارۋاشىلىق جۇمىس ىستەيدى. ال تەكەلى اشىتقى زاۋىتى 100-دەن استام شارۋاشىلىقتى بىرىكتىرىپ وتىر.

جالپى وبلىستا اگروونەركاسىپتىك كەشەننىڭ اۋىل شارۋاشىلىعى ونىمدەرىن وڭدەۋدىڭ 9 باسىم باعىتى بەلگىلەنگەن. اتاپ ايتقاندا، استىق، مايلى داندەر، قانت قىزىلشاسى، كوكونىستەر مەن جەمىستەر، ەت، ءسۇت، بالىق جانە ءجۇن وڭدەۋگە باسىمدىق بەرىلمەك.

وبلىستا وڭدەۋ كاسىپورىندارىنىڭ 2021 جىلعا دەيىنگى ورنالاسۋىنىڭ ەگجەي-تەگجەيلى كارتاسى ازىرلەنگەن. ونى جۇزەگە اسىرۋ اۋىل شارۋاشىلىعى ونىمدەرىن وڭدەۋ سالاسىن يندۋستريالاندىرۋعا، كووپەراتسيا ماسەلەلەرىن شەشۋگە مۇمكىندىك بەرەدى دەپ كۇتىلۋدە. بۇل ورايدا زاۋىتتار وڭدەۋشى كاسىپورىن رەتىندە نەگىزگى وزەك بولا وتىرىپ، ماڭايىنا شارۋا قوجالىقتارىن توپتاستىرۋدا. بۇگىنگى كۇنى كوكسۋ قانت زاۋىتى، جاركەنت كراحمال-سىرنە زاۋىتى مەن تەكەلى اشىتقى زاۋىتتارى وسىنىڭ ايقىن ايعاعى بولىپ وتىر.

الداعى ۋاقىتتا بۇل قاتارعا اقسۋ قانت زاۋىتى، يراندىق «يمپەريا فۋد» كومپانياسىمەن بىرلەسكەن، ەكسپورتقا باعىتتالعان، جىلىنا 8 مىڭ توننا ءونىم شىعاراتىن ەت وڭدەۋ زاۋىتى جانە باسقا دا نىساندار قوسىلاتىن بولادى.

Abai.kz