سەنبى, 16 جەلتوقسان 2017
601 1 پىكىر 11 قىركۇيەك, 2017 ساعات 08:34

استانادا يسلام ىنتىماقتاستىعى ۇيىمىنىڭ ءسامميتى ءوتىپ جاتىر

استانادا 10 قىركۇيەكتە الەمنىڭ 14 ەلىنىڭ ليدەرى مەن 80 مەملەكەت وكىلدەرىنىڭ باسىن قوسقان يسلام ىنتىماقتاستىعى ۇيىمىنىڭ (يىۇ) ءسامميتى ءوتىپ جاتىر. «يسلام الەمىندەگى عىلىم، تەحنولوگيا، يننوۆاتسيا مەن مودەرنيزاتسيا» دەپ اتالاتىن سامميتتە ساياسي مالىمدەمەلەر دە جاسالدى.

قازاقستان پرەزيدەنتى نۇرسۇلتان نازارباەۆ يسلام الەمىندە عىلىم، ەكونوميكانى دامىتۋ ءۇشىن "ۇلكەن جيىرمالىق" (G20) سەكىلدى يىۇ-عا مۇشە 15 ەلدىڭ باسىن قوساتىن بيرەسمي توپ قۇرۋدى ۇسىندى. ول سونىمەن بىرگە يسلام الەمى مەن باتىستىڭ اشىق ديالوگىنا جول اشاتىن باسقوسۋلاردى ءجيى وتكىزىپ، "عاسىرلار بويى قالىپتاسقان تۇسىنبەستىك تۋدىراتىن ستەرەوتيپتىك كوزقاراستاردان باس تارتقان ءجون" دەپ اتاپ ءوتتى.

پرەزيدەنت نازارباەۆ ميانماداعى جانجالعا قاتىسۋشى تاراپتاردى زورلىق-زومبىلىقتى توقتاتىپ، بۇۇ اياسىندا ديالوگتى جالعاستىرۋعا شاقىردى.

ميانمادا زورلىق-زومبىلىق ورشىگەننەن كەيىن ول ەلدەن مىڭداعان روحيندجا مۇسىلماندارى باس ساۋعالاپ كورشى بانگلادەشكە قاشىپ بارعان ەدى. بۇۇ باس حاتشىسى انتونيو گۋتەرريش بۇۇ قاۋىپسىزدىك كەڭەسىنە ميانماداعى زورلىق-زومبىلىقتى توقتاتۋ شارالارىن جاساۋدى ۇسىنعان.

1969 جىلى قىركۇيەكتە نەگىزى قالانعان يسلام ىنتىماقتاستىعى ۇيىمىنا قازىرگى كەزدە 1,5 ميللياردقا جۋىق ادامدى قامتيتىن 57 ەل ەنىپ وتىر. قازاقستان 1995 جىلدان بەرى حالىقارالىق ۇيىمنىڭ تولىق قۇقىلى مۇشەسى.

Abai.kz

1 پىكىر