دۇيسەنبى, 18 جەلتوقسان 2017
تالقى 1284 11 پىكىر 12 قىركۇيەك, 2017 ساعات 09:13

پاۆلودارلىق جاستار لاتىن الىپبيىنە كوشۋدى قولدايدى

پاۆلودارلىق جاستار لاتىن الىپبيىنە كوشۋ باستاماسىن قولداۋ ءبىلدىردى. بۇل تۋرالى «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەدتىڭ وڭىرگە جاساعان ساپارى بارىسىندا بەلگىلى بولدى.

پاۆلودار ءتۇستى مەتاللۋرگيا كوللەدجىنىڭ ستۋدەنتتەرىمەن كەزدەسكەن پارتيا توراعاسىنىڭ ءبىرىنشى ورىنباسارى زامانا كوشىنەن قالماۋ ءۇشىن لاتىن ءالىپبيىنىڭ ماڭىزى جوعارى ەكەنىنە ەرەكشە نازار اۋداردى.

«ءبىز لاتىن قارپىنە كوشۋ ارقىلى اعىلشىن تىلىنە قاراي ينتەگراتسيالانامىز. الەمدىك وركەنيەتكە ۇمتىلامىز. سوندىقتان بۇل ماڭىزدى قادامنىڭ اعىلشىن ءتىلىن ۇيرەنۋ ءۇشىن دە وتە ۇلكەن ءمانى بار. وسى رەتتە لاتىن ءالىپبيى جاستارىمىز ءۇشىن ەشقانداي قيىندىق تۋدىرمايدى دەگەن ويدامىن. سەبەبى، جاس بۋىن لاتىن ارىپتەرىن ينتەرنەت، ۇيالى تەلەفون جانە كومپيۋتەردى قولدانۋ كەزىندە كەڭىنەن پايدالانادى»، – دەدى مۇحتار قۇل-مۇحاممەد.

ءوز كەزەگىندە ستۋدەنتتەر دە بۇل باستامانى تولىعىمەن قولدايتىندارىن ايتىپ، ونىڭ ءساتتى جۇزەگە اسۋىنا بار كۇش-جىگەرىن جۇمسايتىندارىن ايتتى. كوللەدجدىڭ وندىرىستىك وقىتۋ شەبەرى سەرىك يبراەۆ جاستاردىڭ ساپالى ءبىلىم الۋى ءۇشىن بيىل وقۋ كورپۋسى جانىنان قۇنى 580 ملن. تەڭگە بولاتىن ستۋدەنتتەر ءۇيى سالىنعانىن ايتتى. «ءدۋالدى وقىتۋدىڭ ارقاسىندا بيىل كوللەدج بىتىرگەن 163 تۇلەكتىڭ 97 پايىزى تۇراقتى جۇمىسقا ورنالاستى»، – دەيدى س.يبراەۆ.

سونىمەن قاتار، «نۇر وتان» پارتياسى توراعاسىنىڭ ءبىرىنشى ورىنباسارى پاۆلودار وبلىسىندا يندۋستريالدى-يننوۆاتسيالىق دامۋ مەملەكەتتىك باعدارلاماسى اياسىندا ىسكە قوسىلعان كاسىپورىنداردا بولدى. اتاپ ايتقاندا، قوسپالى اليۋميني ونىمدەرىن دايىندايتىن «گيسسەنحاۋز» زاۋىتى مەن مينەرالدى تىڭايتقىشتار، وسىمدىكتەردى قورعاۋعا ارنالعان حيميالىق قوسپالار، شەگىرتكەگە قارسى بيولوگيالىق ءدارى-دارمەكتەر وندىرىلەتىن «اگروحيمپروگرەسس» زاۋىتىنا باردى. بۇل ەكى كاسىپورىن دا «پاۆلودار» ارنايى ەكونوميكالىق ايماعىندا ورنالاسقان. سونداي-اق، مۇحتار قۇل-مۇحاممەد پاۆلودار مەملەكەتتىك پەداگوگيكالىق ينستيتۋتى جانىنداعى «Margulan center» عىلىمي ورتالىعىنا «رۋحاني جاڭعىرۋ» باعدارلاماسىنىڭ وڭىردە جۇزەگە اسۋ بارىسىمەن تانىستى.

«ەلباسىمىزدىڭ ايرىقشا قامقورلىعىنىڭ ارقاسىندا پاۆلودار وبلىسىنىڭ ەكونوميكالىق، الەۋمەتتىك جانە رۋحاني دامۋىندا وراسان زور ورلەۋ ورىن الۋدا. تەك يندۋستريالدى-يننوۆاتسيالىق دامۋ باعدارلاماسى بويىنشا وڭىردە 35 ءىرى ونەركاسىپ ورنى اشىلىپ، وعان 1 تريلليون تەڭگەدەن استام قاراجات ءبولىندى. «نۇرلى جول» باعدارلاماسى بويىنشا كەيىنگى ەكى جىلدا عانا وبلىسقا 125 ملرد. تەڭگە قارجى جۇمسالعان. مۇنداي قارقىندى دامۋ ءوڭىر تاريحىندا بۇرىن-سوڭدى بولعان ەمەس. وبلىستا بالاباقشا، مەكتەپ ماسەلەسى دە ءبىرجولاتا شەشىلگەن. حالقىمىزعا قازاق عىلىمى مەن ادەبيەتىنىڭ ايتۋلى قايراتكەرلەرىن بەرگەن وڭىردە «رۋحاني جاڭعىرۋ» بويىنشا دا كوپتەگەن جوبالار جۇزەگە اسۋدا. پاۆلودارلىقتار ەلباسىنىڭ وسى قامقورلىعىن باعالاي ءبىلۋى كەرەك»، – دەدى «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد.

Abai.kz

11 پىكىر