جەكسەنبى, 17 جەلتوقسان 2017
539 0 پىكىر 12 قازان, 2017 ساعات 09:39

جۋرناليستەر بىلىكتى مامانداردان ساباق الدى

استانادا Astana Media week جوباسى اياسىندا وڭىرلەردەگى قازاق ءتىلدى باق وكىلدەرىنە ارناپ سەمينار وتكىزىلدى. جۋرناليستەردىڭ بىلىكتىلىگىن ارتتىرۋعا باعىتتالعان جاڭا فورماتتاعى سەمينار «قازمەديا ورتالىعىندا» ءوتتى. ايتا كەتەيىك، اتالعان ءىس-شارانى قازاقستان رەسپۋبليكاسى اقپارات جانە كوممۋنيكاتسيالار مينيسترلىگىنىڭ تاپسىرىسىمەن «ەل-شەجىرە» قوعامدىق قورى ۇيىمداستىردى.

ترەنينگكە «قازاقستان» تەلەراديوكورپوراتسياسىنىڭ فيليال جەتەكشىلەرى، وبلىستىق، قالالىق جانە اۋداندىق باسىلىمداردىڭ رەداكتورلارى مەن تىلشىلەرى، بارلىعى 160-دان استام ادام قاتىستى.

سەمينار ەكى بلوكتان تۇردى. تۇسكە دەيىن جاڭا مەدياداعى كونتەنتتى دامىتۋ، اقپاراتتىڭ راس-وتىرىگىن تەكسەرۋ (فاكتچەكينگ) ماسەلەلەرى تالقىلاندى. بۇل تۋرالى ترەنينگكە قاتىسۋشىلارعا «مىنبەر» جۋرناليستەردى قورعاۋ ورتالىعى جانىنداعى جاڭا مەديانى زەرتتەۋ توبىنىڭ جەتەكشىسى اسحات ەركىمباي جانە «ۇلان» گازەتىنىڭ رەداكتورى، Factchect.kz قازاق ءبولىمىنىڭ رەداكتورى، مەدياترەنەر جۇلدىز ءابدىلدا ايتىپ بەردى.

تۇستەن كەيىن ترەنينگكە قاتىسۋشىلاردىڭ الدىندا جۋرناليست، باس رەداكتورلار كلۋبىنىڭ ۆيتسە-پرەزيدەنتى بيبىگۇل جەكسەنباي جانە جۋرناليست، بلوگەر وركەن كەنجەبەك ءدارىس وقىدى. ولاردىڭ ءدارىسى باق-تىڭ دامۋ بولاشاعىنا (كونۆەرگەنتتى جۋرناليستيكاعا), كۇردەلى ايتىس-تارتىستاردى باق-تا جاريالاۋ ماسەلەلەرىنە ارنالدى.

سونىمەن قاتار ترەنينگ بارىسىندا كۇندەلىكتى ومىردەگى ءارتۇرلى جاعدايلاردى جاڭا ادىستەر ارقىلى مودەلدەۋ، ساراپتاۋ جانە تالداۋدى ۇيرەتەتىن پراكتيكالىق ساباقتار وتكىزىلدى.

سەميناردىڭ ارقاسىندا وڭىرلىك باق وكىلدەرى تەك تىڭ ءبىلىم الىپ قانا قويماي، ءوزارا تاجىريبە الماسىپ، باسقا وڭىرلەردەن كەلگەن ارىپتەستەرىمەن ىسكەرلىك بايلانىس ورناتتى.

انىقتاما ءۇشىن: «Astana Media week» قازاقستاندىق مەديا-اپتالىعى ەلوردادا 2017 جىلدىڭ 4-6 قازانى ارالىعىندا ءوتتى. ءىس-شارا قازاقستان رەسپۋبليكاسى اقپارات جانە كوممۋنيكاتسيالار مينيسترلىگىنىڭ تاپسىرماسى بويىنشا «قازمەديا ورتالىعىندا» وتكىزىلدى، وندا ۇيىمداستىرىلعان 10 ءىس-شاراعا 2000 ادام قاتىسىپ، 103 سپيكەر ءسوز سويلەدى. سونىمەن قاتار «كونتەنت-ماركەت» كورمەسىنە 25 رەسپۋبليكالىق جانە وڭىرلىك تەلەارنا، ەلىمىزدىڭ بارلىق ايماقتارىنان 100 پروداكشن-كومپانيا قاتىستى.

جاسۇلان ناۋرىزاليەۆ

Abai.kz

0 پىكىر