سارسەنبى, 17 قاڭتار 2018
الاڭ 2308 28 پىكىر 13 قاراشا, 2017 ساعات 08:10

الاش جولى. بيلىككە بەس تالاپ

«الاش جولى» قوزعالىسى» رەسپۋبليكالىق قوعامدىق بىرلەستىگى «جەر تاعدىرى»، «حالىق بىرلىگى» قوعامدىق بىرلەستىگىمەن ءبىرلەسە وتىرىپ، قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆقا، پارلامەنت سەناتىنىڭ توراعاسى قاسىمجومارت توقاەۆقا، پارلامەنت ءماجىلىسىنىڭ توراعاسى نۇرلان نىعماتۋلينگە، پرەمەر-ءمينيسترى باقىتجان ساعىنتاەۆقا ناقتى بەس تالاپ قويادى.

1-تالاپ:

قازاقستاننىڭ اۋىلشارۋاشىلىق جەرلەرى بۇگىنگى كۇنى ءتۇرلى جولدارمەن قازاقستاندىقتارعا دا، شەتەلدىكتەرگە دە ساتىلۋدا جانە جالعا دا بەرىلىپ جاتىر.

وتكەن جىلى پرەزيدەنت نۇرسۇلتان نازارباەۆ «حالىققا ۇنامايتىن زاڭنىڭ كەرەگى جوق بىزگە»، - دەپ، قر جەر كودەكسىنە حالىق ۇسىنعان، حالىق قالاعان وزگەرىستەر مەن تولىقتىرۋلار ەنگىزۋدى قر ۇكىمەتى مەن پارلامەنتىنە تاپسىرعان بولاتىن. بىراق، پرەزيدەنتتىڭ بۇل تاپسىرماسى ورىندالعان جوق.

سوندىقتان، «اۋىلشارۋاشىلىق جەرلەرى قازاقستاندىقتارعا دا، شەتەلدىكتەرگە دە ساتىلمايدى. شەتەلدىكتەرگە جالعا دا بەرىلمەيدى»، - دەگەن باپ قر كونستيتۋتسياسىنا دا، جەر كودەكسىنە دە ەنگىزىلسىن.

2-تالاپ:

قازاقستاندا ادام ولتىرگەندەر دە، جەمقورلار دا، پاراقورلار دا جازاسىز كەتىپ نەمەسە كەشىرىم جاسالىپ، مەرزىمىنەن بۇرىن قاماۋدان بوساتىلۋدا.

بىراق، بيلىكتىڭ، پرەزيدەنتتىڭ، سوتتىڭ «مەيىرىم-شاپاعاتى» ساياسي قۋعىن-سۇرگىنگە ۇشىراعان ازاماتتارعا جەتپەي كەلەدى. بۇل جاعداي ءوزىن دەموكراتيالىق، قۇقىقتىق مەملەكەت دەپ سانايتىن قازاقستان ءۇشىن جول بەرۋگە بولمايتىن، ورىن الماۋى ءتيىس جاعداي.

سوندىقتان، ماكس بوكاەۆ، تالعات ايان، مۇحتار جاكىشەۆ، ارون اتابەك، ۆاديم كۋرامشين بوستاندىققا شىعارىلسىن.

3-تالاپ:

جىلدار بويى ەكىنشى دارەجەلى جەكە مەنشىك بانكتەر مەملەكەتتەن اسا ءىرى كولەمدە قارجى الىپ كەلەدى.

باسقانى ايتپاعاننىڭ وزىندە بتا بانك پەن كازكوممەرتسبانكتىڭ ۇلتتىق قور مەن زەينەتاقى جيناقتاۋشى قورىنان العان بىرنەشە تريلليون تەڭگەسىن ەسكە الساق تا جەتكىلىكتى.

بانكتەرگە بەرىلگەن قاراجات جالپى حالىقتىڭ نەسىبەسى، جيناعان قارجىسى، تولەگەن سالىعى ەكەنى انىق. حالىق ەسەبىنەن جەكە مەنشىك بانكتەردىڭ قارىزى جابىلىپ، ولارعا اسا ءىرى كولەمدە كومەك كورسەتكەن جاعدايدا، بانكتەر دە حالىققا كومەك قولىن سوزۋى ءتيىس. ول تۋرالى ارنايى جارلىق شىعارىلىپ، زاڭ قابىلدانۋى ءتيىس. بۇل ۇسىنىستى ازاماتتار ءار كەزدە كوتەرىپ كەلەدى.

سوندىقتان، پرەزيدەنت، ۇكىمەت جانە پارلامەنت قازاقستان ازاماتتارى العان 1 ء(بىر) ميلليون تەڭگەگە دەيىنگى نەسيەگە ءبىر رەتتىك امنيستيا جاريالاۋ تۋرالى شەشىم قابىلداسىن.

4-تالاپ:

قازاقستان شيرەك عاسىردان اسا ۋاقىت تاۋەلسىز، دەربەس مەملەكەت رەتىندە قالىپتاسىپ جاتسا دا مەملەكەتتىك ءتىلدىڭ قولدانىس اياسىن كەڭەيتىپ، مارتەبەسىن ارتتىرۋدا ناقتى جەتىستىكتەرگە قول جەتكىزە المادى.

سونىمەن بىرگە پرەزيدەنت جارلىعىمەن لاتىن ءارىپىن پايدالانۋ ءىسى بەكىتىلىپ، باستالدى. بىراق، كونستيتۋتسيادا جازىلعانداي مەملەكەتتىك ۇيىمداردا جانە جەرگىلىكتى ءوزىن-ءوزى باسقارۋ ورگاندارىندا ورىس ءتىلى رەسمي تۇردە قازاق تىلىمەن تەڭ قولدانىلاتىن بولسا وندا لاتىن ءارىپىن ەنگىزۋدىڭ ەش قاجەتتىلىگى بولمايدى. بۇل باپ مەملەكەتتىك ءتىلدىڭ دامۋىنا دا، لاتىن ءارىپىنىڭ كەڭ قولدانىسقا ەنگىزىلۋىنە دە جول بەرمەيدى.

سوندىقتان، قر كونستيتۋتسياسىنىڭ 7-بابىنىڭ 2- تارماعى الىنىپ تاستالسىن.

5-تالاپ:

قازاقستاننىڭ سىرتقى قارىزدارى كاريم ماسيموۆ ۇكىمەتتى باسقارعان جىلدارى ەسەلەپ ارتتى.

اۋىلشارۋاشىلىق جەرلەرىن شەتەلدىكتەرگە ساتۋ نەمەسە جالعا بەرۋدىڭ، ونىڭ ىشىندە جەردىڭ قىتاي كومپانيالارى مەن ولاردىڭ قاتىسۋىمەن قۇرىلعان سەرىكتەستىكتەردىڭ قولىنا وتۋىنە كاريم ماسيموۆتىڭ تىكەلەي قاتىسى بولۋى مۇمكىن.

بۇعان قوسا فرانتسيا پروكۋراتۋراسى كاريم ماسيموۆ Airbus Group كومپانياسىنان 12 ملن ەۆرو پارا الدى دەپ قىلمىستىق ءىس قوزعادى.

سوندىقتان، كاريم ماسيموۆ قىزمەتىنەن الىنسىن!

وسى بەس تالاپ تۋرالى پرەزيدەنت، ۇكىمەت، پارلامەنت ءوز جاۋاپتارىن، ۇستانىمدارىن 01 جەلتوقسان 2017 جىلعا دەيىن رەسمي تۇردە جاريالاۋى ءتيىس.

ولاي بولماعان جاعدايدا 17 جەلتوقسان 2017 جىلى جالپىحالىقتىق بەيبىت ميتينگ ۇيىمداستىرۋ تۋرالى باستاما كوتەرىلۋى مۇمكىن.

بۇل شەشىمدى «الاش جولى» قوزعالىسى» رەسپۋبليكالىق قوعامدىق بىرلەستىگىنىڭ باسقارماسى «جەر تاعدىرى»، «حالىق بىرلىگى» قوعامدىق بىرلەستىگىمەن بىرلەسە وتىرىپ قابىلدادى.

Abai.kz

28 پىكىر