بەيسەنبى, 18 قاڭتار 2018
انىق 816 1 پىكىر 13 قاراشا, 2017 ساعات 17:18

"بايقوڭىر": ايلاقتىڭ ءبىر بولىگى قازاقستانعا قايتتى

 

رەسەي ۇكىمەتى قازاقستاننان جالعا العان اقاي جانە تورەتام كەنتتەرىنىڭ ماڭىنداعى 11,6 مىڭ گا جەردى قايتاردى، دەپ حابارلايدى قر قورعانىس جانە اەروعارىش ونەركاسىبى مينيسترلىگىنىڭ ءباسپاسوز قىزمەتى. 

چەليابينسكىدە وتكەن رەسەي مەن قازاقستان وڭىرارالىق ىنتىماقتاستىعىنىڭ حIV فورۋمىندا «روسكوسموس» مەملەكەتتىك كورپوراتسياسىنىڭ عارىش قىزمەتى جونىندەگى باس ديرەكتوردىڭ ءبىرىنشى ورىنباسارى الەكساندر يۆانوۆ پەن قر اۋىل شارۋاشىلىعى ءبىرىنشى ۆيتسە-ءمينيسترى قايرات ايتۋعانوۆ 1994 جىلعى 10 جەلتوقسانداعى قازاقستان رەسپۋبليكاسى ۇكىمەتى مەن رەسەي فەدەراتسياسى ۇكىمەتى اراسىنداعى «بايقوڭىر» عارىش ايلاعىن جالعا بەرۋ كەلىسىمىنە وزگەرىس ەنگىزۋ تۋرالى حاتتاماعا قول قويدى.

قۇجاتقا سايكەس اقاي جانە تورەتام كەنتتەرىنىڭ ماڭىنداعى 11,6 مىڭ گەكتار اۋماق رەسەي تاراپىنان جالعا الۋدان شىعارىلدى جانە ول جەردە الەۋمەتتىك-ەكونوميكالىق ينفراقۇرىلىمدى ودان ءارى دامىتۋ ءۇشىن قىزىلوردا وبلىسىنا بەرىلدى.

سونداي-اق، رف دەنساۋلىق ساقتاۋ ءمينسترى ۆەرونيكا سكۆورتسوۆا مەن قر دەنساۋلىق ساقتاۋ ءمينيسترى ەلجان ءبىرتانوۆ  2009 جىلعى 17 قاراشاداعى قازاقستان رەسپۋبليكاسى ۇكىمەتى مەن رەسەي فەدەراتسياسى ۇكىمەتى اراسىنداعى «بايقوڭىر» عارىش ايلاعىن رەسەي فەدەراتسياسى جالعا الۋ جاعدايىندا «بايقوڭىر» عارىش ايلاعى قىزمەتكەرلەرىنە، بايقوڭىر قالاسىنىڭ جانە تورەتام، اقاي اۋىلدارىنىڭ تۇرعىندارىنا،  مەديتسينالىق قىزمەت كورسەتۋ» كەلىسىمىنە وزگەرىس ەنگىزۋ تۋرالى حاتتاماعا قول قويدى.

حاتتامادا «بايقوڭىر» كەشەنىندە، اقاي جانە تورەتام كەنتتەرىندە تۇراتىن جانە جۇمىس ىستەيتىن قازاقستاندىقتارعا مەديتسينالىق قىزمەت كورسەتۋ جۇيەسىن جەتىلدىرۋ كوزدەلەدى.

قول قويىلعان قۇجاتتار «بايقوڭىر» عارىش ايلاعى تۋرالى بۇرىننان بار ەكى جاقتى نورماتيۆتىك-قۇقىقتىق بازانى تولىقتىرادى ءارى  قازاقستان مەن رەسەي ىنتىماقتاستىعىن دامىتۋدا ماڭىزدى ەلەمەنت بولىپ تابىلادى.

Abai.kz

1 پىكىر