سارسەنبى, 17 قاڭتار 2018
740 2 پىكىر 5 جەلتوقسان, 2017 ساعات 09:18

سەيىتقازى ماتاەۆ: «كەك الۋ ويىمدا جوق»

سۋرەت ازاتتىق راديوسىنىڭ سايتىنان الىندى

ءبىر جىلدان استام ۋاقىت تۇرمەدە وتىرعان قازاقستان جۋرناليستەر وداعىنىڭ توراعاسى سەيىتقازى ماتاەۆ 4 جەلتوقساندا شارتتى جازامەن بوستاندىققا شىقتى.

الماتى وبلىسى زارەچنىي اۋىلىنداعى جالپى قونىستانۋ كولونياسى الدىندا ماتاەۆتىڭ تۋىستارى، ارىپتەستەرى، جاقتاستارى مەن باق وكىلدەرى جينالدى. ول جۋرناليستەرگە جۇمىسقا كىرىسپەس بۇرىن، ۋاقىت قاجەت ەكەندىگىن ايتتى.

«مەندە اسا قۋانىش جوق. سەبەبى، ۇلىم تۇرمەدە وتىرعاندا، ءوزىمدى بوستاندىققا شىقتىم دەپ ەسەپتەمەيمىن. ءبىز كىنامىزدى مويىنداعان جوقپىز. بارلىق ايىپتاردى تەرىسكە شىعاردىق. ءبىزدىڭ ۇلىمىز ەكەۋمىزدىڭ رۋحىمىز بار. سول رۋحتىڭ ارقاسىندا بەرىك بولدىق. كەك الۋدى ويلامايمىن»، - دەدى سەيىتقازى ماتاەۆ.

قاپشاعاي قالاسىنىڭ سوتى 16 قاراشا كۇنى سەيىتقازى ماتاەۆتىڭ ءوزىن مەرزىمىنەن بۇرىن شارتتى جازامەن بوساتۋ تۋرالى ءوتىنىشىن قاراپ، ونى تۇرمەدەن بوساتۋعا شەشىم شىعارعان.

2016 جىلى 3 قازاندا استانانىڭ ەسىل اۋداندىق سوتى ماتاەۆتى "قارجى جىمقىردى" جانە سالىقتان جالتاردى" دەگەن ايىپتارمەن التى جىلعا، ال قازتاگ اگەنتتىگىنىڭ ديرەكتورى اسەت ماتاەۆ "قارجى جىمقىردى" دەگەن ايىپپەن بەس جىلعا سوتتاعان. ۇكىم بويىنشا ماتاەۆتار اقپارات جانە كوممۋنيكاتسيا مينيسترلىگىنە - 169 ميلليون تەڭگە، "قازاقتەلەكوم" كومپانياسىنا 140 ميلليون تەڭگە قايتارۋى ءتيىس بولعان. ماتاەۆتار وزدەرىنە تاعىلعان ايىپتى مويىندامايدى. جەرگىلىكتى جانە حالىقارالىق قۇقىق قورعاۋ ۇيىمدارى ماتاەۆتىڭ سوتتالۋىن ايىپتاعان بولاتىن.​

بيىل ءساۋىر ايىندا سەيىتقازى ماتاەۆتىڭ جازاسىن راقىمشىلىققا بايلانىستى ەكى جىل سەگىز ايعا قىسقارتقان.

Abai.kz

2 پىكىر