بەيسەنبى, 18 قاڭتار 2018
دەپ جاتىر 1945 14 پىكىر 8 قاڭتار, 2018 ساعات 10:29

كوپەن امىربەك. شىن ونەردى قورلاعان سەريالدى قورعاۋعا بولا ما؟   

«بايان سۇلۋ" سەريالى - سەنىمسىز، جاساندى، حالىققا كورسەتەتىندەي دەڭگەيدە ەمەس»

قازاقتىڭ كورنەكتى ساتيرا ساردارى، قازاقستاننىڭ ەڭبەك سىڭىرگەن قايراتكەرى كوپەن امىربەك ۇلتتىق ارنادان كورسەتىلىپ، ۇلكەن داۋعا اينالعان "قوزى كورپەش - بايان سۇلۋ" سەريالىنا قاتىستى ءوز پىكىرىن وسىلاي جەتكىزدى، - دەپ حابارلايدى "قازاق ءۇنى" ۇلتتىق پورتالىنىڭ ءتىلشىسى.

- ءبىزدىڭ قازاق كينوسى تاريحىندا ءدال وسى "بايان سۇلۋ" سەريالىنداي داۋ-داماي تۋعىزعان سەريال بولعان جوق. نەگە؟ بۇل جانجال قايدان شىقتى؟ نەگىزگى سىنشى حالىق ەمەس پە؟ حالىق - ەلەك. ونەردى - ءبىر قاپ ۇن دەپ قارايتىن بولساق، ۇنىڭدى يلەگەندە كەرەگى ءبىر جاقتا، كەبەگى ءبىر جاقتا قالماي ما؟ وسى سەريالدى ەلەكتەن وتكىزسەك، بۇنىڭ كەرەگى شامالى، كەبەگى كوپ دۇنيە. سوندىقتان دا، كوپشىلىك كوڭىلىنەن شىقپاعاننان كەيىن نارازى.

"حالىق ۇيعارسا، حان تۇيەسىن سويادى" دەگەن اتالى ءسوز بار. وسى سەريالدىڭ اينالاسىندا تەر توكپەسە دە، ەڭبەكتەنگەندەرگە، ولاردىڭ شاشباۋىن كوتەرگەندەرگە ايتارىم - شىن ونەردى قورلاۋعا بولمايدى!

قازاق حالقى باعزىدان بەرى ءوزىنىڭ سالت-ساناسىن، ادەت-عۇرپىن ساقتاپ كەلۋ ارقىلى قازاق بولىپ كەلە جاتقان جوق پا؟ سەريالدى تۇسىرۋشىلەر ادەبيەتىمىزدىڭ التىن قورىنا اينالعان ۇلى داستانىمىزدى الىپ شىعا الماعان. جىبەكتەي دۇنيەمىزدى جۇلمالاپ ءجۇن-جىرعاسىن شىعارعان. ارقايسىسىنىڭ رولىنە جەكە-جەكە توقتالۋعا بولار ەدى، ونى ارتىق ساناپ وتىرمىن. سەبەبى، جالپى العاندا سەريال جاساندى، سەنىمسىز، حالىققا كورسەتەتىندەي دەڭگەيدە ەمەس.

ال، ەندى بىرەۋلەر شىعىپ "ويباي، ول جىردىڭ بالەنباي نۇسقاسى بار" دەپ جاتىر.  مەيلى، قانشا نۇسقاسى بولسا دا، حالىقتىڭ جۇرەگىندە، كوكىرەگىندە "قوزى-كورپەش - بايان-سۇلۋ" جىرى شولپان جۇلدىزداي ءبىر عانا نۇسقادا جارقىراپ تۇر. بۇلار سونى جارقىراتا المادى. ونىڭ نەسىن قورعايدى؟ ومىردە ەكى نارسە بار: ءبىرى - قورعاۋ، ەكىنشىسى - قورلاۋ. جارتى عاسىر بۇرىن تۇسىرىلگەن "تاقيالى پەرىشتە" مەن "قىز جىبەكتى" قاراڭىزشى. قانداي كوركەم دۇنيە! ال، بايان ەسەنتاەۆانىڭ مىنا سەريالىن ءوزىنىڭ جاقتاستارى مەن جاقىندارىنان باسقا جاقتاپ، قولپاشتاپ وتىرعان ادامدى كورمەدىم.

ءبىز پروديۋسەردىڭ مۇددەسىن ەمەس، ەلدىڭ، كوزى اشىق كورەرمەننىڭ مۇددەسىن ويلاۋىمىز كەرەك. ەلدىڭ مۇددەسى - مەملەكەتتىڭ مۇددەسى. مەملەكەت مۇددەسى مەن مەنمەندىك مۇددە دەگەن ەكەۋى ەكى ءتۇرلى. ءبىزدى قۇرتاتىن وسى مەنمەندىك مۇددە. اتىم شىققان دەپ، وسىلاي جاساۋعا بولا ما؟

ەل اۋزىندا مىنانداي ءافسانا بار: "قوتىر ەشكى ايتقان ەكەن: "مەنى كىم سويسا دا، قاساپشى سويسا ەكەن" دەگەن. بۇلار قازاق كينوسىنىڭ قاساپشىسى دا بولا المادى.

قازاقتا "تۇششىمدى" دەگەن ۇعىم بار. شەگەن قۇدىقتىڭ سۋىنان ارتىق سۋ جوق. ال، قازىر "كوكا-كولا" سەكىلدى بەر جاعى جىلتىراپ تۇرعان، ار جاعى مەيىرىڭدى قاندىرمايتىن قۇر ءتاتتى سۋ كوپ. ونىمەن حالىقتىڭ مەيىرىن قاندىرا المايسىڭ. بۇلار سول "كوكا-كولا" سەكىلدىلەر عوي.

Abai.kz

 

14 پىكىر