بەيسەنبى, 18 قاڭتار 2018
ادەبيەت 673 0 پىكىر 8 قاڭتار, 2018 ساعات 13:44

وليۆەر گەنري. شاتىرداعى بولمە

الدىمەن پاركەر حانىم سىزگە ەكى قوناق بولمەسىن كورسەتەدى. بۇلاردىڭ ەرەكشەلىكتەرى مەن 8 جىل بويى وسىندا تۇرعان ەر ادامنىڭ وزىنە جاققان قاسيەتتەرىن ايتىپ جاتقاندا، ونىڭ ءسوزىن بولۋگە باتىلىڭىز جەتپەيدى. قاسقىر كورگەن قويانداي قوبالجىپ تۇرىپ، دارىگەر دە، ءتىس دارىگەرى دە ەمەس ەكەنىڭىزدى اقىرىندا ازەر ايتاسىز. سودان سوڭ پاركەر حانىمنىڭ قوناق بولمەلەرىن جالداۋ شارتتارىنا ساي كەلەتىن ماماندىقتارعا باعىتتاماعانى ءۇشىن ىشتەي اتا-اناڭىزعا ءبىر كەيىپ الۋىڭىز مۇمكىن.

ودان ءارى باسپالداقپەن جوعارى كوتەرىلىپ، ەكىنشى قاباتتىڭ ارتقى جاعىنداعى سەگىز دوللارلىق بولمەگە باراسىز. قوجايىن سىزگە نەگىزى بۇل جەر ايىنا 12 دوللار تولەۋگە لايىق ەكەنىن; فلوريداعا، باۋىرىنىڭ پالم جاعالاۋى ماڭىنداعى اپەلسين پلانتاتسياسىنا يەلىك ەتۋگە كەتكەن تۋزەنبەرري مىرزا بۇعان دەيىن سونشا اقشا تولەپ كەلگەنىن جەتكىزەدى. كورشى بولمەدە تۇراتىن ماكينتاير حانىمنىڭ ءار قىسىن سول ولكەدە وتكىزەتىنىن دە ايتىپ ۇلگەرەدى. ءسىز بۇدان ارزانىراق بولمە كەرەك ەكەنىن مىڭگىرلەۋگە ءماجبۇر بولاسىز.

پاركەر حانىمنىڭ كەكەسىنىن ەلەمەۋگە شاماڭىز جەتسە، ودان ءارى ءۇشىنشى قاباتتاعى سكيددەر مىرزا تۇراتىن ۇلكەن بولمەنى كورەسىز. ول وسىندا شىلىم شەگىپ وتىرىپ، كۇنى بويى پەسا جازادى. بۇل بولمە بوس بولماسا دا، پاتەر جالداعىسى كەلگەن ءار ادامدى ءۇي يەسى مىندەتتى تۇردە ەرتىپ اكەلىپ، ولاردىڭ ءساندى تەرەزە ماڭدايشاسىن كورىپ، سۇيسىنگەنىن تاماشالاعاندى جانى سۇيەدى. ەكىنشى ۇتاتىنى – سكيددەر مىرزا دا ۇيرەنىسىپ قالعان باسپاناسىنان ايرىلىپ قالۋدان قاۋىپتەنىپ، پاتەراقىنىڭ ءبىر بولىگىن تولەيدى.

اقىرى ءۇش دوللارىڭىزدى قىسىپ ۇستاعان كۇيى قالتاڭىزدىڭ جۇقا ەكەنىن كۇمىلجىپ ايتقان سوڭ، پاركەر حانىم ءۇي بولمەلەرىن ارالاتىپ كورسەتۋدى توقتاتادى. قۇلاق تۇندىرار اششى ۇنمەن «كلارا!» دەپ ايقايلاپ، قىزمەتشىنى شاقىرادى دا، بۇرىلىپ تومەن ءتۇسىپ كەتەدى. سودان سوڭ قاراتورى كەلىنشەك – كلارا كەلىپ، كىلەم توسەلگەن باسپالداق ارقىلى جوعارى، ءتورتىنشى بولىككە ەرتىپ اپارىپ، شاتىرداعى بولمەنى كورسەتەدى. ءۇيدىڭ قاق ورتاسىندا ورنالاسقان بولمەنىڭ ەنى 7, ۇزىنداعى 8 فۋت. مۇلىك اتاۋلىدان تەمىر كەرۋەت، ورىندىق، سۋىرمالى جيھاز جانە قول جۋاتىن ورىن بار. ەڭسەنى باسقان كۇڭگىرت ءتورت قابىرعا تابىت ىشىندە تۇرعانداي اسەر قالدىرىپ، وكپەڭىز قىسىلىپ، جايسىز كۇي كەشكەن سوڭ، تاماعىڭىزدى قىرناپ الۋعا ءماجبۇر بولاسىز. سوندا دا دەم جەتپەي قينالعاندىقتان، باسىڭىزدى كوتەرگەندە، توبەدەگى ءتورت بۇرىشتى تەرەزەدەن تاڭعاجايىپ كورىنىس – كوگىلدىر اسپاندى كورەسىز. كورەسىز دە، جانىڭىز راحات تاۋىپ، تەرەڭ ءبىر تىنىستاپ الاسىز.

– باعاسى ەكى دوللار، – دەيدى كلارا كەكەتكەن، مەنسىنبەگەن مانەرمەن.

ءبىر كۇنى جالدامالى پاتەر ىزدەپ جۇرگەن قولىندا ماشينكاسى بار ليسون حانىم دا وسى ۇيگە تاپ بولدى. كوزى تاناداي، شاشى ۇزىن بولعانمەن، بويى دا، دەنەسى دە شاعىن ارۋعا پاركەر حانىم الدىمەن ەكى قوناق بولمەسىن كورسەتتى.

– مەديتسينالىق زاتتاردى مىنا جيھازعا ورنالاستىرۋعا بولادى، – دەدى ءۇي يەسى.

ليسون حانىم:

– مەن دارىگەر دە، ءتىس دارىگەرى دە ەمەسپىن، – دەپ جاۋاپ بەردى قوبالجىعان ۇنمەن.

پاركەر حانىم ادەتتەگىدەي، بۇل بولمەنى جالداۋ شارتىنا ساي كەلمەيتىن پاتەر ىزدەۋشىلەرگە ارنايتىن تابالاعان تاكاپپار كوزقاراسپەن جاس قىزدى اتا قارادى دا، ەكىنشى قاباتقا قاراي جول باستادى. مۇنداعى بولمەنىڭ جالعا بەرىلەتىن قۇنىن ەستىگەن سوڭ ليسون حانىم:

– 8 دوللار دەيسىز بە؟! بۇل تىم قىمبات! مەن كۇنىن ارەڭ كورىپ جۇرگەن اداممىن. ماعان جوعارى قاباتتاردان باعاسى ارزانىراق بولمەنى كورسەتىڭىز، – دەدى.

ەسىك قاعىلعاندا، سكيددەر مىرزا ورنىنان اتىپ تۇرىپ، جينالىپ قالعان تەمەكى تۇقىلىن ەدەنگە بايقاماي شاشىپ الدى. ونىڭ ءوڭى بۇزىلىپ، ءتۇرى كۇرەڭىتىپ كەتكەنىن اڭعارعان سوڭ:

– ايىپ ەتپەڭىز، سكيددەر مىرزا، – دەدى پاركەر حانىم سۋىق جىميىپ، – ءسىزدىڭ ىشتە ەكەنىڭىزدى بىلگەن جوقپىن. حانىمعا بولمەدەگى ءساندى تەرەزە ماڭدايشاسىن كورسەتپەك ەدىم.

– وتە ادەمى ەكەن! – دەدى ليسون حانىم پەرىشتە كەيىپتە كۇلىمسىرەپ.

ولار شىعا سالىسىمەن، سكيددەر مىرزا جالما-جان ءالى قويىلماعان سوڭعى پەساسىنداعى قارا شاشتى، ۇزىن بويلى كەيىپكەردى ءوشىرىپ، ورنىنا بويى كىشكەنتاي، شاشى اشىق ءتۇستى ارۋدىڭ بەينەسىن جازا باستادى.

– اننا حالد بۇل رولگە تالاساتىن بولادى، – دەدى وزىنە-ءوزى كۇبىرلەپ. تەرەزە ماڭدايشاسىنا قاراي اياعىن كوتەرىپ وتىردى دا، بۇلتقا ەنگەن ۇشاقتاي تەمەكى تۇتىنىنەن كورىنبەي كەتتى.

كەنەتتەن شىققان «كلارا!» دەگەن اسپان تىتىرەردەي اششى ۇننەن ليسون حانىمنىڭ قانشا اقشاسى بار ەكەنى بەلگىلى بولدى. الدەبىر قاپ-قارا ەلەس ونى جارىقتىڭ جىلدامدىعىمەن سۇيرەي جونەلىپ، باسپالداق ارقىلى ءۇيدىڭ ەڭ جوعارعى قاباتىنداعى بولمەگە اكەلدى دە، «ەكى دوللار!» دەپ دۇڭك ەتتى.

– الامىن! – دەدى دە، ليسون حانىم ابدەن قۇرعاعان تەمىر كەرۋەتكە شيقىلداتىپ وتىرا كەتتى.

ول كۇن سايىن جۇمىسقا بارىپ، كەشكىسىن ءبىر بۋما قولجازبا اكەلىپ، ماشينكامەن تەرىپ ءجۇردى. ال بوس بولعان كەشتەردە ۇيدەگى وزگە تۇرعىندارمەن بىرگە ەڭ جوعارعى باسپالداقتىڭ باسقىشتارىندا وتىرىپ، اڭگىمە-دۇكەن قۇراتىن. نەگىزى، ليسون حانىمنىڭ حانشايىمداي عاجايىپ بولمىسى قويما ەسەبىندەگى بولمەدە تۇرۋعا لايىق ەمەس ەدى. كۇندەي جايدارى، گۇلدەي نازىك، قيالى قۇستاي ۇشقىر ارۋ بولاتىن. بىردە سكيددەر مىرزانىڭ ءالى جاريالانباعان «ول ءسابي ەمەس نەمەسە جەراستى جولىنىڭ مۇراگەرى» اتتى ۇلى كومەدياسىنان ءۇزىندىنى ىقىلاسپەن تىڭداپ شىقتى.

ليسون حانىم باسپالداقتا وتىرۋعا ءبىر-ەكى ساعات ۋاقىت تاپقاندا، ۇيدەگى جىگىتتەر قاۋىمى قۋانىپ قالاتىن. نە ايتساڭىز دا، «قويشى، راس پا؟!» دەپ قيسىق جاۋاپ بەرەتىن، مەكتەپتە جۇمىس ىستەيتىن ۇزىن بويلى، سارى شاشتى لونگنەكەر حانىم ەڭ جوعارعى باسقىشتا وتىرىپ، ۇنەمى ليسون حانىمدى كەكەتەتىن. جەكسەنبى سايىن تيردەگى قوزعالىپ بارا جاتقان ۇيرەك بەينەسىن اتۋعا باراتىن، امبەباپ دۇكەندە جۇمىس ىستەيتىن دورن حانىم بولسا، تومەنگى باسقىشقا جايعاسىپ، ەبىن تاۋىپ، ليسون حانىمدى مۇقاتۋعا تىرىساتىن. بىراق ورتاداعى باسقىشتا وتىرعان ليسون حانىمنىڭ اينالاسىنا جىگىتتەر بالعا ۇيمەلەگەن اراداي توپتالىپ جينالىپ قالاتىن. اسىرەسە، ونى قيالىنداعى رومانتيكالىق ءومىر-دراماسىنىڭ باس كەيىپكەرى دەپ ەسەپتەيتىن سكيددەر مىرزا; جاسى 45-تەگى تولىق، باي، اقىماقتاۋ حۋۆەر مىرزا; ليسون حانىمنىڭ «تەمەكى شەگۋدى قويساڭىزشى» دەگەن جاناشىر ءسوزىن ەستىگىسى كەلىپ، ادەيى وتىرىك جوتكىرىنەتىن جاس يۆەنس مىرزا ونىڭ جانىنان شىقپايتىن. ەر ادام اتاۋلى الەمدەگى ەڭ تارتىمدى، ەڭ قىلىقتى ارۋ دەپ ويلاعانمەن، جوعارعى جانە تومەنگى باسقىشتاعى كەكەسىندى كۇلكىلەر تىيىلمايتىن.

***

سىزدەردەن ۇيدەگى «حور» «ساحنانىڭ» جيەگىنە كەلىپ، حۋۆەر مىرزانىڭ سەمىزدىگىنە «قاسىرەت شەگىپ»، جاس توككەنشە حيكايا-قويىلىمىمىزدى ءسال توقتاتا تۇرۋدى سۇرايمىن. كوڭىل سىبىزعىسىنان تولىقتىق پەن ارتىق سالماقتىڭ كەساپاتى، قايعىسى جونىندە «مۇڭلى» اۋەندەر اقتارىلادى. نەگىزىندە، تىرىسسا، تولىق فالستاف* جىپتىكتەي رومەودان وتكەن رومانتيك بولا الادى. عاشىق جان كۇرسىنسە دە، كۇدەر ۇزۋگە قاقىسى جوق. دەگەنمەن، سەمىز ادامدار ءومىر ساپارىن مازاق-پويىزىندا قامالىپ وتكەرۋ كەرەك. سوندىقتان قارنى 52 ديۋيم حۋۆەر مىرزانىڭ عاشىق جۇرەگى بوسقا ۇمىتتەنىپ، تەككە دامەلەنەدى. كوزىڭدى جوعالت، حۋۆەر! 45 جاستاعى باي ءارى اقىماق حۋۆەر تاڭعاجايىپ ەلەنانىڭ ءوزىن ەس-ءتۇسسىز «اسىق» قىلادى! 45-تەگى داۋلەتتى، اقىلسىز، سەمىز حۋۆەر ارمانىنا قول جەتكىزە الماي، ماحاببات ورتىنە جانىپ ءوتۋى ءتيىس! ودا ەشقانداي ءۇمىت تە، مۇمكىندىك تە جوق!

ءۇي تۇرعىندارى حۋۆەر مىرزانى وسىلاي مازاق قىلاتىن.

جازدىڭ ادەمى ءبىر كەشىندە پاركەر حانىمنىڭ ۇيىندەگى قاۋىم جينالىپ وتىرعاندا، ليسون حانىم كوككە قاراعان كۇيى كەنەت بالاشا شاتتانىپ، كوڭىلدى ۇنمەن داۋىستاپ جىبەردى:

– بيللي دجەكسون نەگە انا تۇستا تۇر؟ مەن ونى وسىننان، تومەننەن دە كورە الادى ەكەنمىن.

جۇرتتىڭ ءبارى جوعارى قارادى: كەيبىرى بۇلتتارمەن تالاسقان ءزاۋلىم عيماراتتاردىڭ تەرەزەلەرىنە كوز توقتاتسا، كەيبىرى اسپاننان دجەكسون جۇرگىزىپ كەلە جاتقان اۋە كەمەسىن تابۋعا تىرىستى.

– انە، انا جۇلدىز، – دەپ ءتۇسىندىردى ليسون حانىم ءجىپ-جىڭىشكە ساۋساعىمەن نۇسقاپ، – جارقىراپ تۇرعان ۇلكەنى ەمەس، سونىڭ جانىنداعى كوگىلدىر ءتۇستىسى. ونى ءار ءتۇنى بولمەمنىڭ شاتىرداعى تەرەزەسىنەن كورەمىن. بۇل جۇلدىزدى بيللي دجەكسون دەپ اتادىم.

– قويىڭىزشى، راس پا؟! – دەدى لونگنەكەر حانىم، – ءسىزدىڭ استرونوم ەكەنىڭىزدى بىلمەپپىن.

– ءيا، ارينە، – دەدى الاپات ۇلكەن اسپان الەمىنىڭ كىشكەنتاي زەرتتەۋشىسى، – مەن مارستا كويلەك جەڭىنىڭ قانداي ءتۇرى الداعى كۇزدە ساندە بولاتىنىن ەشبىر استرولوگتەن كەم بىلمەيمىن.

– قويىڭىزشى، – دەدى لونگنەكەر حانىم، – ءسىز كورسەتكەن جۇلدىز – كاسسيوپەيا جۇلدىزدار شوعىرىنداعى گامما. ۇلكەندىگى جاعىنان ەكىنشى، ال مەريدياندى كەسىپ ءوتۋ جولى ... .

– وھ، – دەپ سوزگە ارالاستى وتە جاس يۆەنس مىرزا، – مەنىڭشە، بۇل جۇلدىزدى بيللي دجەكسون دەپ اتاعان دۇرىس.

– سونداي-اق، – دەپ حۋۆەر مىرزا لونگنەكەر حانىممەن كەلىسپەيتىنىن ءبىلدىرىپ، داۋسىن كوتەرە سويلەدى، – ليسون حانىم بۇرىنعى استرولوگتەر سەكىلدى قاي جۇلدىزدى قالاي اتاسا دا ءوز ەركى دەپ ويلايمىن.

– قويىڭىزشى، راس پا؟! – دەپ مۇقاتتى ونى لونگنەكەر حانىم.

– بۇل اعىپ تۇسەتىن جۇلدىز با ەكەن؟ – دەپ قىزىعۋشىلىق تانىتتى دورن حانىم، – جەكسەنبى كۇنى مەن تيردە اتقان وق توعىز ۇيرەككە جانە ون قوياننىڭ بىرەۋىنە ءدوپ ءتيىپ ەدى.

– مۇننان، تومەننەن اسا ادەمى كورىنبەيدى، – دەدى ليسون حانىم، – مەنىڭ بولمەمنەن قاراساڭىزدار عوي. بىلەسىزدەر مە، قۇدىقتىڭ تۇبىنەن جۇلدىزدار كۇندىز دە كورىنەدى. ءۇي شاتىرىنىڭ توبەسىندەگى تەرەزە شاحتانىڭ وقپانى ءتارىزدى بولعاندىقتان، بيللي دجەكسون قارا بارقىت ءتۇن-شەكپەنىنىڭ ءوڭىرىن قىستىرعان جارقىراعان الماس تۇيرەۋىشتەي ەلەستەيدى.

ءبىر ۋاقىتتاردا ليسون حانىم ماشينكامەن تەرۋ ءۇشىن ۇيگە ەشقانداي قولجازبا اكەلمەيتىن بولدى. كۇن سايىن تاڭەرتەڭ جۇمىسقا بارۋدىڭ ورنىنا ءار كەڭسەنىڭ تابالدىرىعىن توزدىرسا دا، مادەنيەتسىز قىزمەتكەرلەردىڭ تاپسىرىس جوقتىعىن دورەكى تۇردە جەتكىزۋى – جاس ءارى جالىندى جۇرەككە مۇزداي سۋ قۇيىپ جىبەرگەندەي اسەر ەتىپ، كوڭىلىن سۋىتاتىن. مۇنداي قيىن كۇندەر سوڭى كورىنبەيتىن سالقار كوشتەي بىتپەي، جالعاسا بەردى.

ءبىر كۇنى كەشتە پاركەر حانىمنىڭ ۇيىندەگى باسپالداقپەن ابدەن سىلەسى قاتىپ شارشاعان، قاجىعان كۇيدە جوعارى كوتەرىلدى. بۇل ادەتتە مەيرامحانادان كەشكى اسىن ءىشىپ كەلەتىن ۋاقىتى بولسا دا، ءنار تاتپاعان ول اشقۇرساق ەدى.

قوناق بولمەسىنىڭ تۇسىنان وتە بەرگەندە، الدىنان حۋۆەر مىرزا جولىعىپ، مۇمكىندىگىن قالت جىبەرگەن جوق. تولىق ادامنىڭ بار دەنەسىمەن ۇمسىنىپ، ۇيلەنۋگە ۇسىنىس جاساۋى قىزعا تاۋدان قار كوشكىنى قۇلاپ كەلە جاتقانداي اسەر قالدىردى. سوندىقتان تورداعى ەلىكتىڭ لاعىنداي قاشقاقتاپ، باسپالداق جاقتاۋىنا تىعىلا بەردى. مىرزا قىزدىڭ قولىنان ۇستاۋعا تالپىنىپ ەدى، ول بەتىنەن شاپالاقپەن جەڭىل تارتىپ جىبەردى. تىعىرىققا تىرەپ، سوڭىنان قالماي، قامالاعان حۋۆەر مىرزادان زورعا سىتىلىپ، ءار قادامىن ارەڭ باسىپ، جوعارىعا اۋپىرىمدەپ كوتەرىلىپ بارادى. سكيددەر مىرزانىڭ بولمەسىنىڭ جانىنان ءوتىپ بارا جاتقاندا، ول قىزىل سيامەن كومەدياسىندا مەرتل دەلورمنىڭ (ليسون حانىم) ساحنادا ءجۇرۋ باعىتىن جازىپ وتىر ەدى. ساحنانىڭ سول جاق بولىگىنەن گراف تۇرعان تۇسقا بارۋى كەرەك بولاتىن. كىلەم توسەلگەن باسپالداقپەن جوعارعى قاباتقا ارەڭ جەتىپ، ليسون حانىم شاتىرداعى بولمەنىڭ ەسىگىن اشتى. جارىقتى جاعۋعا دا، كيىمىن شەشۋگە دە شاماسى جەتپەي، تەمىر كەرۋەتكە قۇلاي كەتكەن قىزدىڭ ءۇزىلىپ كەتەردەي نازىك دەنەسىنەن تەمىر سىمدار يىلمەگەن دە سياقتى. قاپ-قاراڭعى تۇنەكتە شالقاسىنان جاتقان ارۋ كىرپىگىن زورعا قيمىلداتىپ، كوزىن اشتى دا، رياسىز شاتتىقپەن كۇلىمسىرەدى. ويتكەنى، توبەدەگى تەرەزەدەن ول ءۇشىن بيللي دجەكسون شىراداي جانىپ، جارقىراپ تۇر ەدى. وزگە الەمنىڭ ءبارى ليسون حانىمنىڭ ەسىنەن شىعىپ كەتكەن. تۇنەكتىڭ ءتۇپسىز تۇڭعيىعىنا باتقان ول ءتورت بۇرىشتى بۇلىڭعىر جارىقتىڭ ورتاسىنداعى جۇلدىزدى عانا كورەدى. بالكىم، لونگنەكەر حانىمنىڭ ايتقانىنداي بۇل بيللي دجەكسون ەمەس، كاسسيوپەيا جۇلدىزدار شوعىرىنداعى گامما شىعار. بىراق ارۋ ونى گامما رەتىندە قابىلداي الار ەمەس. شالقاسىنان جاتقان قالپىندا قولىن ەكى رەت كوتەرۋگە تىرىستى. تەك ءۇشىنشى تالپىنىسىندا عانا ەكى سۇيرىكتەي جىڭىشكە ساۋساعىن ەرنىنە تيگىزىپ ءسۇيدى دە، قاراڭعىلىقتىڭ تەرەڭ قويناۋىنان بيللي دجەكسونعا قاراي اۋە ءسۇيىسىن جولدادى. قولى بىردەن قايتىپ سىرعىپ ءتۇسىپ كەتتى. «قوش بول، بيللي، – دەپ كۇبىرلەدى ارۋ، – سەن مەنەن ميلليونداعان ميل قاشىقتاسىڭ. بىردە-ءبىر رەت ءتىل قاتقان دا جوقسىڭ. الايدا مەن مۇنداعى تۇنەكتە قينالىپ، اداسىپ جۇرگەندە، سەن ءاردايىم جوعارىدا جارقىراپ، جانىپ تۇردىڭ. سولاي ەمەس پە؟ ميلليونداعان ميل... قوش بول، بيللي دجەكسون».

قاراتورى ءۇي قىزمەتشىسى كلارا كەلەسى كۇنى ساعات وندا كەلىپ، بولمەنىڭ ىشتەن كىلتتەۋلى ەكەنىن بىلگەن سوڭ، ەسىكتى بۇزدىرۋعا ءماجبۇر بولدى. ەس-ءتۇسسىز جاتقان ليسون حانىمدى تۇرعىزۋعا ەشقانداي امال پايدا بەرمەگەن سوڭ، الدەكىم جەدەل جاردەم شاقىردى. سالدەن سوڭ، دابىلداتىپ جەدەل جاردەم كولىگى كەلدى دە، ىشىنەن وزىنە سەنىمدى، شيراق قيمىلدايتىن اق حالاتتى جاس دارىگەر شىعىپ، جاناشىر كەيىپتە ءارى الاڭداۋلى كۇيدە ەسىكتى قاقتى.

– 49-شى ۇيگە جەدەل جاردەم قىزمەتى شاقىرىلدى، – دەدى ول قىسقا دا نۇسقا سويلەپ، – نە بولىپ قالدى؟

– ا، ءيا، دارىگەر مىرزا، – دەدى ءۇي ىشىندەگى جاعداي ونىڭ جەكە كوڭىل-كۇيىنە دە اسەر ەتەتىنىن اڭعارتقىسى كەلگەن پاركەر حانىم ۋايىمداۋلى جۇزبەن، – وعان نە بولعانىن تۇسىنە الار ەمەسپىن. ەسىن جيعىزۋ ءۇشىن نە ىستەسەك تە، ناتيجە بولعان جوق. ەلسي حانىم، ءيا ەلسي ليسون حانىم دەگەن جاس قىز عوي. مەنىڭ ۇيىمدە بۇرىن-سوڭدى مۇنداي...

– قاي بولمە؟ – دەپ ىشقىنا ايقايلاپ جىبەردى دارىگەر. مۇنداي جان شوشىتار داۋىستى پاركەر حانىم بۇعان دەيىن ەستىمەگەن بولاتىن.

– شاتىرداعى بولمە. ول...

دارىگەر باسپالداقتىڭ بىردەن ءتورت باسقىشىن اتتاپ، شاتىرعا قاراي جۇگىرە جونەلدى. پاركەر حانىم پاڭ كەيىپتە ماڭعازدانا باسىپ، ونىڭ سوڭىنان ىلەستى. شاتىرداعى بولمەگە جەتىپ ۇلگەرمەستەن، قولىنا استرونومدى كوتەرىپ، تومەن ءتۇسىپ كەلە جاتقان دارىگەر الدىنان شىقتى. ول ايتقان پىشاقتاي وتكىر الدەبىر ءسوزدى ەستىگەن سوڭ، پاركەر حانىم قابىرعاعا قاعۋلى شەگەدەن سىرعىپ تۇسكەن ورامالداي ءبىر ۋىس بولىپ، شوگىپ قالدى. بۇل وقيعادان كوپ ۋاقىت وتكەننەن كەيىن دە، الگى ءسوز جادىنان وشپەي، جان-جۇرەگىن ءوزىن-ءوزى كىنالاۋ سەزىمى قيناپ ءجۇردى. كەيدە ءۇي تۇرعىندارى قىزىعۋشىلىق تانىتىپ، دارىگەردىڭ نە ايتقانىن سۇرايتىن. «سىزدەر بىلمەي-اق قويىڭىزدار، – دەيتىن ول، – ونداي ءسوزدى ەستىگەنىم ءۇشىن كەشىرىلسەم عانا جانىم جاي تابادى».

دارىگەردىڭ ءورت سوندىرگەندەي تۇنەرگەن، ەڭ جاقىن ادامىنان ايرىلعانداي قايعىرىپ، قاسىرەت شەككەن بەينەسىن كورىپ، جينالىپ قالعان جۇرت ىعىسىپ جول بەردى. كولىككە وتىرعان سوڭ، دارىگەردىڭ جانسىز دەنەنى ارنايى ورىنعا جاتقىزباعانىن بايقادى. ءتىپتى، جۇرگىزۋشىگە «زىمىرا، ۋيلسون!» دەگەنىن دە انىق ەستىدى.

بار بولعانى – وسى. بۇل دا حيكايا بولىپ پا؟ كەلەسى كۇنى تاڭەرتەڭ گازەتتەن وقىعان قۇلاققاعىس اقپارات وقيعانى ەگجەي-تەگجەيلى تۇسىنۋىمە سەبەپ بولعانى سياقتى، سىزگە دە سەپتىگى ءتيۋى مۇمكىن. وندا كەشە بەلۆيۋ اۋرۋحاناسىنا شىعىس ... كوشەسىندەگى №49 ۇيدەن ۇزاق مەرزىمدى اشتىقتان ابدەن السىرەگەن جاس قىز اكەلىنگەنى حابارلانىپتى. مالىمەت بىلاي تۇيىندەلەدى:

«العاشقى كومەك كورسەتكەن دارىگەر ۋيليام دجەكسون ناۋقاستىڭ جازىلىپ كەتەتىنىن ايتادى».

*فالستاف – شەكسپيردىڭ درامالىق شىعارماسىنداعى تولىق كەيىپكەر

اعىلشىن تىلىنەن اۋدارعان الپامىس فايزوللا

Abai.kz      

 

 

0 پىكىر