سەيسەنبى, 20 اقپان 2018
دەجا ۆيۋ 1396 12 پىكىر 9 قاڭتار, 2018 ساعات 17:21

ساناسىنا سايتان سارىعان سالەريلەر ورتامىزدا ءالى دە بار...

بۇل تەاتردىڭ تاريحىن ايتىپ جاتۋدىڭ قاجەتى جوق. كاسىبي تەاتردىڭ نەگىزىن قالاعان ساحنا ساڭلاقتارى ەڭبەك ەتكەن، سوڭعى ەكى جىلدا الەمنىڭ الپاۋىت ەلدەرىندە ونەر كورسەتىپ جۇرگەن قاسيەتتى قارا شاڭىراق. بۇل كەزەڭ –تەاتر ۇجىمىنىڭ بىرلەسە وتىرىپ، تالاي اسۋلاردى باعىندىرۋعا دايىن كەزى دەپ ويلايمىن. ءبىز، ەسكى كوزدەر، ارتىمىزدان ەرگەن ءىنى-قارىنداستاردىڭ، جاستاردىڭ قانداي ەكەنىن باعالاۋعا شامامىز كەلەدى. مەن تالاي جەردە تەاترىمىزدىڭ بۇگىنگى كۇنى جاقسى باعىتتا، بىلىكتى باسشىلىقپەن ىنتىماق-بىرلىكتە قازاق ونەرىنە قىزمەت ەتىپ جۇرگەنىن ماقتانىشپەن ايتىپ ءجۇردىم. وسى جاسقا كەلگەندە، شىندىقتى مەن  ايتپاسام كىم ايتادى؟! مەندەگى قالعانى تەك قانا تازالىق. جالتاراتىن جاستا ەمەسپىن. كەشەگى بولعان جاعداي، بارشامىزدىڭ جانىمىزعا قاتتى باتتى...

ەرلاننىڭ قانداي ادال ازامات ەكەنىن مەن ەمەس، حالىق ايتادى. وسى ۇجىمنىڭ 99 پايىزى وسى جاعدايدى ەستىگەلى جۇگىرىپ ءجۇر. اسىرەسە، جاستار ەرلاندى قورعاپ-قولداپ، جانىنان تابىلىپ، جاقسى سوزدەرىن اياپ جاتقان جوق.

وركەنيەتتى ەلدەردە پارا بەرۋشىنى دە زاڭ الدىندا جاۋاپقا تارتادى! سوندىقتان، پارا بەرۋشىنى دە سوتتاۋ كەرەك. ...ساناسىنا سايتان سارىعان سالەريلەر ورتامىزدا ءالى دە بار...  ونەردى، ونەر ءۇشىن تۋعان ورەندى ساتۋ – وتانىن ساتۋ!   سەبەبى، وتانىن ساتقان ادام، ءبارىن دە ساتادى. سوندىقتان، مەن وسىنى ۇيىمداستىرعان بازبىرەۋلەردى دە سوتقا شاقىرامىن!

ەرلان – كوز الدىمىزدا قازاق ونەرىنە قىزمەت ەتىپ كەلدى. ءالى دە قىرۋار شارۋانى اتقارادى. سەبەبى ول، شىعارماشىلىقتىڭ، ساحنانىڭ ادامى. بىراق، بۇل جاعداي بۇكىل ونەر ادامدارىنا كۇيە جاققانمەن بىردەي بولدى. سىرتتان ەستىگەن جۇرت، سولاي ەكەن عوي دەپ ويلايدى... ءبىز ەلباسىنىڭ «رۋحاني جاڭعىرۋ» اياسىنداعى تاپسىرمالارىن ءتاستۇيىن ورىنداپ، ونەر ءۇشىن وزەگى ورتەنىپ جۇرگەن ازاماتىمىزدى جاۋعا بەرمەيمىز!

مەن، بارشا ونەرگە قىزمەت ەتىپ جۇرگەن جانداردان وسى ماسەلەگە بايىپپەن قاراۋلارىڭىزدى سۇرايمىن. جەردەن جەتى قويان تاپقانداي، جارىسا جازىپ، جارىسا ايتىپ، سۇيىنشىلەۋدىڭ قاجەتى قانشا؟!

ءومىر بولعان سوڭ، بۇنداي پارادوكستار ورىن الىپ قالادى. دەي تۇرعانمەن، اقتى اق دەپ، قارانى قارا دەۋ پارىزىمىز. «جاڭىلمايتىن جاق، سۇرىنبەيتىن تۇياق جوق» - دەيدى... بىراق، جاقسى ازاماتتى  جاعىنان جاڭىلدىرعان، تەگىس جەردە اياعىنان سۇرىندىرگەن كىم؟ بۇل ماسەلەنىڭ سەبەپ پەن سالدارىنا سالماقتىلىقپەن، سالقىنقاندىلىقپەن  قاراعان ءجون. ءىستىڭ مانىسىنە بارماي جاتىپ، ايعاي-اتتانداپ، ونەرگە، تەاتر تاريحىنا كۇيە جاعىپ،  ەل اراسىنا ىرىتكى سالۋدىڭ تۇككە قاجەتى جوق!

ءاسانالى ءاشىموۆ،

قازاقستان تەاترلارى اسسوتسياتسياسىنىڭ پرەزيدەنتى، قازاقستاننىڭ ەڭبەك ەرى، كسرو جانە قازاقستاننىڭ حالىق ءارتيسى

Abai.kz

12 پىكىر