بەيسەنبى, 28 ناۋرىز 2024
دابىل 3971 14 پىكىر 9 اقپان, 2018 ساعات 18:03

نازارباەۆ ساعىنتاەۆتىڭ بايانداماسىن "ساموكريتيكا" جوق دەپ سىنادى

بۇگىن قر پرەزيدەنتى نۇرسۇلتان نازارباەۆتىڭ قاتىسۋىمەن كەڭەيتىلگەن ۇكىمەت وتىرىسى ءوتتى. پرەمەر-مينيستر باقىتجان ساعىنتاەۆ قازاقستاننىڭ 2017 جىلعى الەۋمەتتىك-ەكونوميكالىق دامۋ باعىتتارى تۋرالى بايانداما جاساپ، جولداۋدىڭ قالاي ورىندالىپ جاتقانى جايىندا مالىمەتتەر بەردى. پرەزيدەنت باقىتجان ساعىنتاەۆتان «سوڭعى جولداۋدى ورىنداۋ بويىنشا نە ىستەدىڭدەر؟» - دەپ سۇرادى.

«سوڭعى جولداۋ ناتيجەسى بويىنشا ۇكىمەتتە جالپى ۇلتتىق باعدارلاما قابىلداندى. سالا-سالا بويىنشا كورسەتىلگەن 10 مىندەتكە سايكەس ءار مينيسترلىككە تاپسىرمالار بەرىلدى. ينديكاتورلار قويىلدى. جىلدىڭ سوڭىنا دەيىن تاپسىرمالار ورىندالاتىن بولادى»، - دەپ جاۋاپ بەردى باقىتجان ساعىنتاەۆ.

مەملەكەت باسشىسى پرەمەر-ءمينيستردىڭ بايانداماسىنا «جاقسى باياندادىڭ، بىراق ساموكريتيكا جوق» دەپ باعا بەردى.

كەيبىر اكىمدەر «رۋحاني جاڭعىرۋدى» بۇرمالاپ جاتىر

قر پرەزيدەنتى نۇرسۇلتان نازارباەۆ «رۋحاني جاڭعىرۋ» باعدارلاماسىنىڭ قالاي ورىندالىپ جاتقانىن ايتىپ، بىرقاتار ءوڭىردى سىنعا الدى.

«بىرقاتار ءوڭىر «رۋحاني جاڭعىرۋعا» قاتىستى جۇمىستارىمەن تىڭعىلىقتى اينالىسۋدا. حالىقتىڭ كوپشىلىگى باعدارلامانى جاقسى قابىلداعانىن بىلەمىز. ال كەيبىر اكىمدىكتەر كۇندەلىكتى وزدەرىنىڭ جۇمىستارىن «رۋحاني جاڭعىرۋ» اياسىندا اتقارىپ جاتىرمىز دەپ جاريالايدى. مىسالى، جىل سايىنعى مەرەكەلىك جارىستاردى، فەستيۆالدەردى، سپورتتىق شارالاردى «رۋحاني جاڭعىرۋعا» جاتقىزا سالادى»، - دەپ توقتالدى پرەزيدەنت.

وسى ورايدا مەملەكەت باسشىسى باعدارلاماعا قاتىستى بۇنداي مالىمدەمەلەر تازا بۇرمالاۋ ەكەنىن ءارى «رۋحاني جاڭعىرۋدىڭ» مارتەبەسىنە نۇقسان كەلتىرەتىنىن اتاپ ءوتتى.

«تۇككە تۇرمايتىن نىسانداردى، باياعى قۇلاپ قالعان قابىرلەردى، مازارلاردى الىپ كەلەدى دە «مىناۋ ساكرالدى ورىن» دەپ ايتادى. تەلەديداردان كوردىم. ول وڭتۇستىك قازاقستان وبلىسىندا عوي دەيمىن. قاراتاۋدىڭ باسىندا باياعىدان بەرى اعىپ جاتقان سارقىرامانى بىرنەشە ادام بارىپ كەلىپ، ءتۇسىرىپ «مىناۋ قازاقستاننىڭ ساكرالدى ۋچاستوگى» دەيدى. ءبىز ولارعا وبلىستان بىرنارسە تاپ دەپ وتىرعان جوقپىز عوي. جوق بولسا جوق، بار نارسەنى ايتىپ وتىرمىز. سوندىقتان ءوز مۇمكىندىكتەرىن ىسكە اسىرماي وتىرعان وبلىستار بار. مىسالى، سقو، ماڭعىستاۋ، پاۆلودار وبلىستارى. قوعامدىق سانانى جاڭعىرتۋ دەگەن ءبىر جىلمەن عانا شەكتەلمەيتىن ماسەلە. كوپ جىل جۇمىس ىستەيدى. جاڭا ءتاسىلدى تالاپ ەتەتىن جۇمىس. ءبىر جىلدا شەشىپ تاستايمىز دەپ ماقسات قويىپ وتىرعان جوقپىز. سولاي عوي؟»

ەلباسى دەگەنمەن ءوزىنىڭ مۇمكىندىكتەرىن ىسكە اسىرماي وتىرعان وبلىستار بار ەكەنىن قاداپ ايتتى. بۇل تۇرعىدا سولتۇستىك قازاقستان، ماڭعىستاۋ، پاۆلودار وبلىستارىندا جۇمىستاردىڭ بەلسەندى جۇرگىزىلۋى كەرەكتىگىن تاپسىردى.

جەڭىس قاسىمبەك قايدا قاراپ وتىر؟

مەملەكەت باسشىسى نۇرسۇلتان نازارباەۆ «قازاۆتوجول» ۇلتتىق كومپانياسىنىڭ جۇمىسىن دا سىنعا الدى.

«قۇقىق قورعاۋ ورگاندارى «قازاۆتوجولدىڭ» بارلىق  باسشىلىعىن قاماۋعا الدى. ىشىندە ايماقتىق فيليالداردىڭ جەتەكشىلەرى دە بار. ارينە، بۇل جاقسىلىقتىڭ نىشانى ەمەس. وسىنىڭ ءوزى قارجىنى ءتيىمدى يگەرۋ جانە جول ساپاسى بويىنشا ۇلكەن كەمشىلىكتەردىڭ بار ەكەنىن كورسەتىپ وتىر. جەڭىس قاسىمبەك (ينۆەستيتسيالار جانە دامۋ ءمينيسترى - رەد.) سوندا قايدا قارادى؟ نە بولدى؟ «قازاۆتوجولدىڭ» ءبارى ۇرى بولىپ شىقتى ما؟»، - دەپ سۇرادى ن.نازارباەۆ ۇكىمەتتىڭ كەڭەيتىلگەن وتىرىسىندا.

مينيستر جەڭىس قاسىمبەك «قازاۆتوجول» ۇلتتىق كومپانياسى بويىنشا سىبايلاس جەمقورلىققا قاتىستى قىلمىستىق ىستەردىڭ قوزعالعانىن جەتكىزدى. وسى ورايدا، پرەزيدەنت نورماتيۆتەردى وزگەرتۋ قاجەتتىلىگىنە توقتالدى.

«جۇمىستى ورىنداعاندا ءبىز نورماتيۆكە قارايمىز. قازىرگى نورماتيۆ ەسكىردى. جولدىڭ ساپاسىنا باسا نازار اۋدارۋ قاجەت. ايتپەسە، نورماتيۆپەن سالادى، نورماتيۆپەن اقشا الادى. مەملەكەتتە اقشا كوبەيسە، تابەتتەرى دە اشىلادى. مينيسترلىك نە ءۇشىن كەرەك؟ مەملەكەتتىك قارجىنىڭ جۇمسالۋىن قاداعالاۋى قاجەت. بۇل - سەنىڭ (جەڭىس قاسىمبەكتىڭ - رەد) جۇمىسىڭداعى كەمشىلىك»، - دەدى ن.نازارباەۆ.

ايتا كەتەيىك، سوڭعى ءۇش جىلدا اۆتوموبيل جولدارىن قۇرىلىسىنا بيۋدجەتتەن 630 ملرد تەڭگە بولىنگەن.

ۇكىمەتتىڭ كەڭەيتىلگەن ماجىلىسىندە نۇرسۇلتان نازارباەۆ قارجى مينيسترىنە مەملەكەتتىك قارىزدى ازايتۋدى تاپسىردى.

قارجى قايدا قۇيىلىپ جاتىر؟ بيۋدجەتكە مە، الدە ۇلتتىق قورعا ما؟  

مەملەكەت باسشىسى جيىن بارىسىندا پرەمەر-ءمينيستردىڭ ورىنباسارى ەربولات دوساەۆ پەن قارجى ءمينيسترى باقىت سۇلتانوۆقا اتالعان باعىتتاعى جۇمىستاردى باقىلاۋعا الۋدى جۇكتەدى.

"مەملەكەتتىك قارىزدى ءبىر دەڭگەيدە ۇستاۋ كەرەك. ۇلعايتپاي، كەرىسىنشە قالاي كەمىتۋدى ويلاستىرىپ وتىرۋ كەرەك. ءار ءتۇرلى جاعدايلار بولادى، سوندىقتان كەڭ بولۋعا ءتيىسپىز. قاجەت كەزدە قارىز الاتىن مۇمكىنشىلىك بولۋى قاجەت. كەيىنگى كەزدە ءبىز قۇرىلىسقا، جولدارعا، ءۇي سالۋعا كوبىرەك الىپ جىبەردىك",  — دەگەن پرەزيدەنت پرەمەر-ءمينيستردىڭ ورىنباسارى ەربولات دوساەۆقا قارجىنى باقىلاۋعا الۋدى تاسىردى.

وتىرىستا قارجى ءمينيسترى باقىت سۇلتانوۆ جەكەشەلەندىرۋ بارىسىن باياندادى. وتكەن جىلى 289 وبەكتىنىڭ 190-ى 108 ميلليارد تەڭگەگە ساتىلعان.

"قارجىنى بيۋدجەتكە مە، الدە ۇلتتىق قورعا جىبەرىپ جاتىرسىزدار ما؟", — دەپ سۇرادى نازارباەۆ.

"ۇلتتىق قورعا 7,4 ميلليارد تەڭگە سالدىق. بيىلعى جىلى ەكى ايدىڭ ىشىندە 7,3 ميلليارد تەڭگە جىبەرىلەتىن بولادى. بۇل بىلتىر جەلتوقساندا ساتىلعان وبەكتىلەردەن تۇسكەن قاراجات", — دەپ جاۋاپ بەرگەن مينيسترگە مەملەكەت باسشىسى مۇنىڭ دۇرىستىعىن ايتتى.

ەستەرىڭىزگە سالا كەتەيىك، بۇگىن قازاقستان پرەزيدەنتى نۇرسۇلتان نازارباەۆتىڭ توراعالىمەن ەل ۇكىمەتىنىڭ كەڭەيتىلگەن ءماجىلىسى ءوتتى.   وتىرىس بارىسىندا ۇكىمەت باسشىسىنىڭ، بىرقاتار مينيسترلەردىڭ، وبلىس اكىمدەرىنىڭ باياندامالارى تىڭدالدى.

Abai.kz

14 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3513