جۇما, 23 اقپان 2018
46 - ءسوز 778 5 پىكىر 13 اقپان, 2018 ساعات 10:11

ەرتەڭ جاڭعىرۋعا بولىنگەن اقشانى دا جەپ قويۋى مۇمكىن

مۋرات باقتيارۇلى ءوزىنىڭ فب پاراقشاسىندا تومەندەگىدەي وي تاستاپتى.
«قازاقستان تەرريتوريا كولەمى جاعىنان الەمدە 9-ورىندى يەلەنەدى. بۇل جەرمەن 300 ملن حالىقتى ازىق-تۇلىكپەن تولىق قامتاماسسىز ەتۋگە بولادى. الايدا وسىنداي جەردەن جىلىنا نەبارى 2ملرد دوللار كولەمىندە عانا ازىق-تۇلىك ءونىمىن الادى. ال جەر كولەمى جاپىرقتاي گوللانديا مەملەكەتى شەتەلدەرگە 100 ملرد دوللار ازىق-تۇلىك ونىمدەرىن ساتادى. ونىڭ باسىم بولىگى گۇلدەر مەن ىرىمشىكتەر. وسىنداي ۇلكەن ايىرماشىلىقتىڭ باستى سەبەبى جۇمىستى دۇرىس ۇيىمداستىرا الماۋشىلىق پەن وسى سالانى جاۋلاپ، شىرماپ العان جەمقورلىق دەپ بىلەمىن. وسىدان تەز ارادا ارىلۋىمىز كەرەك» دەپتى.
وسىعان وراي كوپتەن ويدا جۇرگەن پىكىرلەرىمدى ورتاعا سالۋعا تۇرتكى بولدى.
رۋحاني جاڭعىرۋ، سانانى جاڭا ساپاعا كوتەرۋ تۋرالى كوپ ايتىلدى. الايدا ەسكىدەن ارىلماي، جاڭانى سىڭىرە المايمىز. سوندىقتان ۇلتتىڭ دامۋىنا ءبىرىنشى كەزەكتە كەرى اسەرى بار ادەتتەردەن ارىلۋ قاجەت. ونسىز ازىق-تۇلىك ءوندىرىسى بولسىن، باسقا قاي سالا بولسىن ادىمى اشىلمايتىن بولادى.
سول ارىلۋعا ءتيىس ادەتتىڭ ءبىرى - جەمقورلىق!
ەگەر ۇلتتىق جاڭعىرۋعا، دامىعان ەلدەر قاتارىنا ەنە الماۋىمىزعا ءبىر كەدەرگى الدىمىزدان شىعار بولسا، ول – جەمقورلىق. تاۋەلسىزدىكتىڭ 25 جىلى ىشىندە جەمقورلار مەملەكەتتىڭ نەشە ميلليونداعان اقشاسىن جەپ قويدى، تالان-تاراجعا سالدى. الدى شەت ەلگە قاشىپ كەتتى. قالعاندارى الەمنىڭ ەڭ باي ادامدارى قاتارىندا ءجۇر. قانشاسى ۇستالىپ، سوتتالدى. بىراق جەمقورلىق توقتار ەمەس. مەملەكەتتى توناۋى بىلاي تۇرسىن، مۇگەدەكتەردىڭ، جەتىمدەر مەن قارتتار ءۇيىنىڭ نەسىبەسىن جەگەندەر، زەينەتاقى قورىنا قول سالعاندار دا بار. حالىقتىڭ، ءسىز بەن ءبىز سياقتى سالىق تولەۋشىلەردىڭ ەسەبىنەن جالاقى الىپ وتىرعاندار قالاي ميلليونەرلەر قاتارىنان كورىنىپ ءجۇر؟ ولار حالىقتىڭ نەسىبەسىن قاي كەزدە، قالاي، كىمنىڭ كومەگىمەن ۇرلاپ ۇلگەردى؟ وسىنىڭ سۇراۋى بولۋى ءتيىس.
ەرتەڭ ۇلتتىق جاڭعىرۋعا بولىنگەن اقشانى دا جەرىنە جەتكىزبەي جەپ قويۋى دا مۇمكىن عوي.
ارينە، ءبىز قاي ءبىر ەلدەر سياقتى جەمقورلىقپەن ۇستالعاندارعا اتۋ، ۇرلىق جاساعانداردىڭ قولىن كەسۋ سياقتى جازالار قولدانا المايمىز. جاستاردىڭ ساناسىندا «ۇلكەن قىزمەتكە قول جەتكىزسەم، ۇلكەن اقشا ۇرلاپ، بايۋىما بولادى ەكەن-اۋ» دەگەن وي سۇيەكسىڭدى بولىپ بارادى.
ەگەر ۇلت ساناسىن جاڭعىرتامىز دەسەك، ەڭ الدىمەن جەمقورلىقتى ءتۇپ تامىرىمەن جويۋدىڭ ەڭ قاتال ءارى ىمىراسىز جولىن تاڭداۋىمىز جانە بالا-باقشادان باستاپ جەمقورلىقتى جەك كورىپ وسەتىندەي تاربيە بەرۋىمىز قاجەت.

ادىلبەك قابا

Abai.kz

5 پىكىر