سەنبى, 21 ءساۋىر 2018
ءوز ءسوزى 1059 0 پىكىر 13 ءساۋىر, 2018 ساعات 08:38

نازارباەۆ: لي كۋان ءيۋدى دە اۆتوكرات دەگەن

قازاقستان پرەزيدەنتى نۇرسۇلتان نازارباەۆ استانادا "رۋحاني جاڭعىرۋ" باعدارلاماسىنا ءبىر جىل تولۋىنا وراي وتكەن جيىندا ءسوز سويلەپ، دەموكراتيا ءبىر ساتتە قالىپتاسا سالمايدى دەپ، قۇراما شتاتتار تاريحىن مىسالعا كەلتىردى.

«مەن تاۋەلسىزدىكتىڭ العاشقى كۇنىنەن باستاپ ەلدى باسقارىپ كەلەمىن. حالىقتىڭ سەنىمىن اقتاپ كەلەمىن. باتىس قانشاما رەت ايتتى: ء"بىز سياقتى، امەريكا سياقتى، باتىس سياقتى دەموكراتيانى ەنگىزىڭدەر دەدى. ءبىز قازاقپىز، ءبىز نە امەريكالىق، نە نەمىس، نە اعىلشىن ەمەسپىز عوي. وندا تۇرعان نە بار؟» - دەدى نازارباەۆ. «ءبىزدىڭ ءوزىمىزدىڭ سانامىز، تاريحىمىز، ءتىلىمىز، ءدىنىمىز، ءداستۇرىمىز بار»،- دەپ اتاپ ءوتتى ول.

پرەزيدەنت سوزىندە «ءبىر كۇندە مىڭجىلدىق ءىستى اتتاپ وتە المايتىنىن» ايتىپ، «قۇراما شتاتتارعا قانشا جىل؟ 250? ەلۋ جىل بۇرىن قارا جانە اق ناسىلدىلەر ءبىر اۆتوبۋستا وتىرا المايتىن. ايەلدەر سايلاۋعا قاتىسپادى. نەگە وسىنى ۇمىتاسىزدار؟» - دەپ مالىمدەدى نازارباەۆ.

ول سينگاپۋردىڭ ءبىرىنشى پرەمەر-ءمينيسترى لي كۋان ءيۋدى كەزىندە «ءداستۇردى ۇستانۋعا شاقىرعانى ءۇشىن» اۆتوكرات دەپ اتاعانىن تىلگە تيەك ەتتى. «مەنىڭ مارقۇم دوسىم لي كۋان ءيۋدى ءومىر بويى ديكتاتور، اۆتوكرات دەپ اتادى. قالايشا اۆتوكرات؟ بەس جىلدان كەيىن سايلانعان ادامدى قالايشا ديكتاتور، اۆتوكرات دەپ اتايدى؟ ءبىزدىڭ ءوزىمىزدىڭ جولىمىز بار»،- دەپ مالىمدەدى نازارباەۆ.

Abai.kz

0 پىكىر