بەيسەنبى, 24 مامىر 2018
وسى عوي ەندى... 587 0 پىكىر 13 ءساۋىر, 2018 ساعات 08:59

اقتوبەدە "پارا بەرمەك بولعان" پروكۋرور ءىسى قارالا باستادى

اقتءوبە قالالىق سوتى "قازاقستان باس پروكۋراتۋراسىنا 40 مىڭ دوللار پارا بەرمەكشى بولدى" دەپ ايىپتالعان پروكۋرور ەسەنتۋر قادىروۆتىڭ ءىسىن قاراي باستادى. 11 سءاۋىردە ءوتكەن العاشقى سوت وتىرىسىندا "قادىروۆ پارا بەرمەكشى بولعان" باس پروكۋراتۋرا قىزمەتكەرلەرىنىڭ دە اتى اتالدى.

مەملەكەتتىك ايىپتاۋشىنىڭ سوزىنە قاراعاندا، 2017 جىلعى تامىز ايىندا قازاقستان باس پروكۋراتۋراسى ءوز مىندەتىنە سالعىرت قاراعان اقتوبەلىك ارىپتەستەرىنىڭ ۇستىنەن قىلمىستىق كودەكستىڭ 371 بابى 2-ءبولىمى ("سالعىرتتىق") بويىنشا ءىس قوزعاعان. باس پروكۋراتۋرانىڭ باقىلاۋىنا الىنعان بۇل ءىس 17 تامىز كۇنى اتىراۋ وبلىسىنداعى ارنايى پروكۋرورعا تاپسىرىلعان.

- كۇدىكتىلەردىڭ ءبىرى - ەسەنتۋر قادىروۆ جاۋاپكەرشىلىكتەن قۇتىلىپ، لاۋازىمدى قىزمەتكە قول جەتكىزۋ ءۇشىن اقتوبە وبلىسى پروكۋرورىنىڭ ىشكى قاۋىپسىزدىكتى قامتاماسىز ەتۋشى اعا كومەكشىسى ايبول تولەگەنوۆ ارقىلى باس پروكۋراتۋرانىڭ ىشكى تەكسەرۋلەر دەپارتامەنتىنە پارا بەرمەك بولدى، - دەدى مەملەكەتتىك ايىپتاۋشى ەكس-ارىپتەسى تۋرالى .

العاشقى سوت وتىرىسىنا "ەسەنتۋر قادىروۆ دەلدال رەتىندە پايدالانباقشى بولعان" اقتوبە وبلىسى پروكۋرورىنىڭ ىشكى قاۋىپسىزدىكتى قامتاماسىز ەتۋشى اعا كومەكشىسى ايبول تولەگەنوۆ تە قاتىستى. ايبول تولەگەنوۆتىڭ سوزىنە قاراعاندا، ول اقتوبە وبلىستىق پروكۋراتۋراسىنىڭ شتاتىندا تۇر. بىراق فۋنكتسينالدىق مىندەتتەرىنە ساي تىكەلەي باس پروكۋراتۋراعا باعىنادى، ياعني، باس پروكۋراتۋراداعى ىشكى تەكسەرۋلەر دەپارتامەنتىنىڭ اقتوبە وبلىسىنداعى جالعىز وكىلى. ول العاشقى سوت وتىرىسىنا كۋا رەتىندە شاقىرىلىپ، 2017 جىلعى 6 قاراشادان باستاپ ەسەنتۋر قادىروۆتىڭ ءوزىن ءجيى مازالاي باستاعانىن، پارا بەرۋدىڭ اۋىر قىلمىس ەكەنىن ارىپتەسىنە ەسكەرتكەنىن ايتتى.

- ەسەنتۋر قادىروۆ 40 مىڭ اقش دوللارىن مەن ارقىلى باس پروكۋراتۋراداعى ىشكى تەكسەرۋلەر دەپارتامەنتىنىڭ قىزمەتكەرى جۋكقا بەرمەك بولدى. اقتوبە وبلىسى بويىنشا كۋراتور جۋك ول قارجىنى باس پروكۋراتۋراداعى ىشكى تەكسەرۋلەر دەپارتامەنتىنىڭ سول كەزدەگى باسشىسى بادانوۆقا بەرسە، قىلمىستىق جاۋاپكەرشىلىكتەن قۇتىلامىن دەپ ويلادى. مەن قادىروۆتان قوماقتى قارجىنى قايدان العانىن سۇرادىم. ول اتا-انام كومەكتەستى دەدى. مەن بۇل جايتتى 8 قاراشا كۇنى باس پروكۋراتۋراعا حابارلادىم. 12 قاراشا كۇنى ەسەنتۋر قادىروۆ مەنىڭ كولىگىمدە 40 مىڭ دوللار پارا بەرگەننەن كەيىن ۇستالدى، - دەيدى ايبول تولەگەنوۆ.

العاشقى سوت وتىرىسىندا ەسەنتۋر قادىروۆ وزىنە تاعىلعان ايىپپەن كەلىسپەيتىنىن ايتتى. قازىر ءۇي قاماقتا وتىرعان پروكۋروردى قورعاۋشى 3 ادۆوكاتتىڭ ءبىرى جۇماباي ارىستانوۆ ءوز قورعاۋىنداعى سوتتالۋشىنىڭ پارا بەرىپ جاتقان ساتىندە ۇستالماعانىن ايتادى.

- قىلمىس جاسالعان كەز ۆيدەوعا تۇسىرىلمەگەن، ايعاق بولار ادامدار دا جوق. تولەگەنوۆ "قادىروۆ پاراعا بەردى" دەگەن 40 مىڭ اقش دوللارىن كولىگىنە سالىپ الىپ، ءبىر ساعات 50 مينۋت بويى جۇرگەن، كريميناليستەرگە بىردەن بارماعان. قادىروۆقا ارانداتۋ جاسالعان بولۋى دا مۇمكىن، - دەيدى ادۆوكات.

36 جاستاعى ەسەنتۋر كادىروۆقا قاتىستى سوت وتىرىسى 13 ءساۋىر كۇنى جالعاسادى. قىلمىستىق ءىستى اقتوبە قالالىق سوتىنىڭ سۋدياسى ەربول ابدىحالىقوۆ قاراپ جاتىر.

Abai.kz

0 پىكىر