سەنبى, 21 ءساۋىر 2018
جاعىمدى جاڭالىق 402 0 پىكىر 16 ءساۋىر, 2018 ساعات 11:34

جازۋشىلار وداعى مەن كاسىپوداق فەدەراتسياسى كەلىسىم جاساستى

13 ءساۋىر كۇنى قازاقستان جازۋشىلار وداعى جانە قازاقستان رەسپۋبليكاسى كاسىپوداقتار فەدەراتسياسى اراسىندا ىنتىماقتاستىق تۋرالى مەموراندۋمعا قول قويۋ ءراسىمى ءوتتى، دەپ حابارلايدى «Ult.kz» پورتالى.

قۇجاتقا كاسىپوداق فەدەراتسياسى اتىنان توراعا باقىتجان ءابدىرايىم جانە قازاقستان جازۋشىلار وداعى اتىنان توراعا ۇلىقبەك ەسداۋلەت قول قويدى.

كاسىپوداقتاردىڭ ەلىمىزدەگى ەڭبەككەرلەردىڭ قۇقىعىن، تاۋەلسىزدىگى مەن زاڭدى مۇددەلەرىن قورعاۋ، قۇقىقتىق مادەنيەت قۇرۋ باعدارى ەلباسىنىڭ «قازاقستان – 2050»، «ۇلت جوسپارى – 100 ناقتى قادام», «بولاشاققا باعدار: رۋحاني جاڭعىرۋ» باعدارلامالارىندا قويعان مىندەتتەرىمەن ۇندەس بولىپ كەلەدى.

مەموراندۋم اياسىندا قازاقستان جازۋشىلار وداعىندا سالالىق كاسىپوداق قۇرۋ قاراستىرىلعان.

مەموراندۋم شىعارماشىلىق ادامدارىنىڭ الەۋمەتتىك-ەكونوميكالىق جانە ەڭبەك قۇقىقتارى مەن مۇددەلەرىن قورعاۋ جۇيەسىن دامىتۋدى، ءوزارا بايلانىس پەن قۇرىلىمدى ارىپتەستىكتى قامتاماسىز ەتۋدى كوزدەيدى.

ەكى جاقتى كەلىسىلگەن باعدارلامالاردان، جوبالاردان تىس كاسىپوداقتار فەدەراتسياسى تاراپىنان زەينەتكەر جاسىنا جەتكەن قازاقستان جازۋشىلار وداعىنىڭ مۇشەلەرى ءۇشىن كاسىپوداق شيپاجايلارىنا جەڭىلدىك ادىسىمەن جولداما ءبولۋ ماسەلەسى قارالدى.

بۇدان كەيىن زەينەتكەر جاسىنا جەتكەن وداق مۇشەلەرى شيپاجايلاردا جەڭىلدىكپەن ەم قابىلداپ، كوكەيدە جۇرگەن شىعارمالارىن جازا الۋعا مۇمكىندىك الادى.

قازاقستان جازۋشىلار وداعىنىڭ نەگىزگى مىندەتى قاشاننان ەل ادەبيەتىن جاسايتىن قالامگەرلەرگە جاعداي جاساۋ، ۇنەمى قامقور بولا ءبىلۋ. وسىنداي ابىرويلى مىندەتتىڭ ءبىر پاراسى مەموراندۋمنىڭ اياسىندا جاسالماق.

بۇرىن اقىن-جازۋشىلارعا جاسالعان جاعداي تۋرالى، ءارتۇرلى شيپاجايلاردا، شىعارماشىلىق ۇيلەرىندە جازىلعان تۋىندىلار جايلى كوپ ەستيتىنبىز. ەندى مىنە، تاۋەلسىز قازاقستان ادەبيەتىنىڭ مايتالماندارى – وسى زامانعى قالامگەرلەردىڭ ەركىن شىعارماشىلىقپەن اينالىسۋىنا جاعداي جاسالىپ جاتىر.

قازاقستان جازۋشىلار وداعى الداعى كۇندەرى دە قالامگەرلەردىڭ ەركىن شىعارماشىلىقپەن اينالىسۋىنا جاعداي جاساۋ جولىندا قىرۋار جۇمىس اتقاراتىن بولادى.

Abai.kz

0 پىكىر