بەيسەنبى, 24 مامىر 2018
اباي.tv 4033 69 پىكىر 26 ءساۋىر, 2018 ساعات 09:05

Qazkom مەملەكەتتىك تىلدە سويلەمەۋ ارقىلى تىلدىك جانجال تۋعىزىپ وتىر

قاي مەكەمەدە بولسىن، مەملەكەتتىك تىلدە سويلەۋدى تالاپ ەتۋگە ءار ازاماتتىڭ حاقى بار. وتكەن جىلى "ەير استانا" اۋە كومانياسىمەن قازاق ءتىل ءۇشىن سوتتاسىپ جەڭىسكە جەتكەن تۇرىك ازاماتى وعىز دوعان Qazkom بانكىنىڭ استانا قالاسىنداعى سارىارقا فيليالىنا بارىپ، مەملەكەتتىك تىلدە ەسەپشوت اشتىرا الماي، ءبىراز قيىندىققا تاپ بولعانىن جاريالادى. مەملەكەتتىك تىلدە جاۋاپ بەرۋگە جاراماعان بانك قىزمەتكەرلەرىنىڭ زاڭدى بەلشەسىنەن باسىپ، ازاماتتاردىڭ قۇقىعىن تاپتاپ، تالاپ ەتكەن تىلدە سويلەمەۋى، سويلەگىسى كەلمەۋى بۇل جاعدايدى سوتقا دەيىن جەتكىزۋى ابدەن مۇمكىن. 

الدىمەن وعىز دوعان جاريالاعان ۆيدەو-جازبانى كورىپ الالىق.

وزدەرىڭىز كورىپ وتىرعانداي، ۆيدەو-جازبانى ءتۇسىرۋشى مۇمكىندىگىنشە مادەنيەتتى. ەموتسياعا، يا مىنەزگە بوي الدىرىپ تۇرعان جوق. سۇرلارى قازاق بولا تۇرا ءبىر اۋىز ءسوز قازاقشا ءتىل قاتا الماعان قىزمەتكەرلەردىڭ جايى تاۋەلسىزدىك العانىنا 30 جىل بولعان ەل ءۇشىن، مەملەكەت ءۇشىن ۇيات جاعداي.

ۆيدەوعا كوز سالساق، بانك مەنەدجەرىنىڭ قازاق تىلىندە سويلەۋدەن باس تارتقانىن كورۋگە بولادى. فيليالدىڭ باسشىسى دەپ تانىستىرعان ءاليا ەسىمدى ازاماتشا دا وعىز دوعاننىڭ شاعىمىن قۇلاعىنا دا ىلگىسى كەلمەي رەسمي تىلدە سويلەپ، قاسارىسىپ تۇرىپ الدى.

بۇل بىرىنشىدەن، زاڭدى بەلىنەن باسىپ، ازاماتتىڭ قۇقىعىن تاپتاۋ.

ەكىنشىدەن، پرەزيدەنت نۇرسۇلتان نازارباەۆتىڭ ءتىل تۋرالى جۇرگىزىپ وتىرعان ساياساتىن قۇلاققا ىلمەۋ. مەملەكەتتىك تىلدە قىزمەت ەتۋىن تالاپ ەتكەن ازاماتقا مەملەكەتتىك تىلدە قىزمەت كورسەتپەۋ - الدىمەن بيلىككە قارسىلىق. ەلباسىنىڭ تالابىن شىبىن شاققان قۇرلى كورمەۋ ارقىلى بۇلار قازاق بولا تۇرا ەلىمىزدەگى مەملەكەتتىكتى قۇراۋشى قازاق ۇلتىنا، قازاق تىلىنە دەگەن جەككورنىشتەرىن ايشىقتاپ وتىر.

ۇشىنشىدەن، بۇل جەككورىنىش وسى ەكى قىزمەتكەردىڭ عانا جەكە تۇلعالىق سيپاتى ەمەس. بۇل Qazkom-نىڭ جالپى بەينەسى دەپ تۇسىنۋگە بولادى. ەلىمىزدەگى بىلدەي بانك قازاق تىلىنە سۋىق قاراپ، قىزمەتكەر العان كەزدە ونىڭ مەملەكەتتىك ءتىلدى ءبىلۋىن تالاپ ەتپەگەن بولىپ وتىر. وعىز دوعانعا ورىسشا "ۋبەريتە كامەرۋ" دەپ زەكىپ جۇرگەن قىزمەتكەرلەر بۇل ءسوزدى بۇكىل بانكتىڭ اتىنان ايتىپ تۇر. تۇتىنۋشىعا "ۋبەريتە" دەپ بۇيرىق بەرۋگە Qazkom-نىڭ قۇقىعى جوق.

تورتىنشىدەن، "نە ءۇشىن ۆيدەوعا تۇسىرۋگە بولمايدى؟" دەگەن سۇراققا بانك قىزمەتكەرلەرىنىڭ ءبىرى دە ماردىمدى جاۋاپ بەرە المادى. بۇل دا - ساۋاتسىزدىق.

بەسىنشىدەن قازاقشا سويلەي بىلەتىن بانكتىڭ قىزمەتكەرلەرى (كۇزەتشىلەرى) كليەنتتى، ياعني وعىز دوعاندى يتەرىپ-يتەرىپ، بانكتەن قۋىپ شىقتى. بۇل وعىز دوعاندى بانكتەن يتەرىپ شىعارۋ ەمەس، مەملەكەتتىك ءتىلدى بانكتەن الاستاۋ دەپ تۇسىنبەك ءلازىم.

التىنشىدان، 7 مينۋت بويى كليەنتكە قازاقشا قىزمەت كورسەتۋگە ىنتا تانىتپاعان بانكتى سوتقا بەرۋ - وعىز دوعاننىڭ عانا ەمەس، جالپى قازاققا ورتاق ءىس.

جەتىنشىدەن، بانك قىزمەتكەرلەرىنىڭ توڭمويىندانىپ، قازاق تىلىندە سويلەمەي قويۋى ەلىمىزدەگى ورىستىلدىلەر مەن رەسەيدەگى شوۆينيستەردىڭ اشۋ-ىزاسىنا تيەرى انىق. ياعني، Qazkom بانكى تۇتىنۋشىنىڭ قۇقىعىن تاپتاپ قانا قويماي، مەملەكەتتىك تىلدە سويلەمەۋ ارقىلى تىلدىك جانجال تۋعىزىپ وتىر.

ءتۇيىن

ءبىر قازاق ازاماتى وعىز دوعانداي قادام جاساپ، مەملەكەتتىك ءتىلدى تالاپ ەتسە، ول ۇلتشىل، جىكشىل بولىپ شىعا كەلەر ەدى. تۇرىك ازاماتتىڭ قازاق ءتىلى ءۇشىن شىرىلداۋى بىزگە - ولجا. ورىستىلدىلەر مەن تۇرىك ازاماتىنىڭ ايقاسى قازاققا تەك پايداسىن تيگىزگەي دەگىمىز كەلەدى.

ءشارىپحان قايسار

Abai.kz

69 پىكىر