سەيسەنبى, 22 مامىر 2018
267 1 پىكىر 14 مامىر, 2018 ساعات 08:44

يران ءمينيسترى "يادرولىق كەلىسىم" ەلدەرىنە ساپارىن باستادى

Iran's Foreign Minister Mohammad Javad Zarif is interviewed by The Associated Press, in New York, Tuesday, April 24, 2018. (AP Photo/Richard Drew)

يران سىرتقى ىستەر ءمينيسترى موحامماد جاۆاد زاريف بۇگىن قىتايعا باردى. يران ءباسپاسوزىنىڭ حابارلاۋىنشا، يران ءمينيسترى تەگەراننىڭ يادرولىق باعدارلاماسى بويىنشا يران مەن التى دەرجاۆا اراسىندا جاسالعان كەلىسىمنەن اقش شىعىپ كەتكەننەن كەيىن، كەلىسىمگە قاتىسۋشى ەلدەرگە ساپارىن قىتايدان باستاپ وتىر.

پەكينگە جەتكەن سوڭ زاريف تەگەراننىڭ ەندىگى قادامدارى تۋرالى ماسەلەنى قىتايمەن تالقىلايتىنى تۋرالى حابارلاعان. ول يراننىڭ "بارلىق ۆاريانتتارعا دايىن" ەكەنىن ايتقان. قىتاي سىرتقى ىستەر ءمينيسترى ۆان يمەن كەلىسسوز وتكىزەتىن زاريف يران مەن قىتاي قارىم-قاتىناستارىنا جوعارى باعا بەرگەن.

يران سىرتقى ىستەر ءمينيسترى بۇل ساپارىنا تاياۋ شىعىستا كۇردەلى جاعداي قالىپتاسىپ وتىرعان شاقتا اتتاندى. بۇدان بىرنەشە كۇن بۇرىن يزرايل كۇشتەرىنىڭ سيرياعا جاساعان اۋە شابۋىلىنان وسى ەلدە جۇرگەن يراندىق ساربازداردىڭ كەمىندە 11-ءى قازا تاپقان.

2015 جىلى شىلدەدە يران مەن التى مەملەكەت - اقش، گەرمانيا، قىتاي، ۇلىبريتانيا، رەسەي جانە فرانتسيا اراسىندا قول قويىلعان كەلىسىم بويىنشا، تەگەران يادرولىق باعدارلاماسىن شەكتەيتىن بولسا يرانعا قارسى بۇۇ قاۋىپسىزدىك كەڭەسى سالعان حالىقارالىق سانكتسيالاردى جانە اقش پەن ەۋروپا وداعىنىڭ سانكتسيالارىن جۇمسارتۋ كوزدەلگەن ەدى.

Abai.kz

1 پىكىر