بەيسەنبى, 28 ناۋرىز 2024
قۇيىلسىن كوشىڭ 10618 6 پىكىر 5 ماۋسىم, 2019 ساعات 16:00

قاپىدا قالما، قانداس!

قۇدايعا شۇكىر، بۇگىنگى تاڭدا الىس-جاقىن شەتەلدەردەن كوشىپ كەلىپ، قازاقستان رەسپۋبليكاسىنىڭ ازاماتتىعىن الام دەگەن قانداستارىمىز ءۇشىن زاڭنامالىق تۇرعىدان ەش كەدەرگى جوق. باتىل شەشىم قابىلداپ، شيراق قيمىلداعان ازاماتقا تۇراقتى تىركەۋگە تۇرۋ، ازاماتتىق الۋ – تۇك تە قيىن ەمەس!

سوڭعى ونشاقتى جىلدىڭ كولەمىندە كوشى-قون ساياساتىنىڭ باسى-قاسىندا جۇرگەن، «حالىقتىڭ كوشى-قونى تۋرالى» زاڭىنا ەلەۋلى وزگەرتۋلەر مەن تولىقتىرۋلار ەنۋىنە ىقپال ەتكەن ازامات رەتىندە مەن وسىلاي دەپ كەسىپ ايتا الامىن!

سوعان قاراماستان، مىڭداعان قانداستارىمىز «ورالمان» مارتەبەسىنىڭ مەرزىمىن وتكىزىپ الىپ، قاتتى قينالدى. ونىڭ وزىندىك سەبەپتەرى دە بولدى.

بىرىنشىدەن، ورالمان مارتەبەسiن العان ادامدار مەن ولاردىڭ وتباسى مۇشەلەرi: 1) ورالمانداردى بەيiمدەۋ جانە ىقپالداستىرۋ ورتالىقتارىندا تەگiن بەيiمدەۋ جانە ىقپالداستىرۋ قىزمەتتەرiن كورسەتۋمەن; 2) قازاقستان رەسپۋبليكاسىنىڭ دەنساۋلىق ساقتاۋ سالاسىنداعى زاڭناماسىنا سايكەس مەديتسينالىق كومەكپەن; 3) قازاقستان رەسپۋبليكاسىنىڭ ازاماتتارىمەن تەڭ جاعدايدا مەكتەپتەردە جانە مەكتەپكە دەيiنگi ۇيىمداردا ورىندارمەن، قازاقستان رەسپۋبليكاسىنىڭ ۇكiمەتi ايقىندايتىن كولەمدە تەحنيكالىق جانە كاسiپتiك، ورتا بىلىمنەن كەيiنگi جانە جوعارى بiلiم بەرەتiن وقۋ ۇيىمدارىنا وقۋعا تۇسۋگە بولiنگەن كۆوتاعا سايكەس بiلiم الۋ مۇمكiندiگiمەن; 4) قازاقستان رەسپۋبليكاسىنىڭ ازاماتتارىمەن تەڭ جاعدايدا الەۋمەتتiك قورعالۋمەن; 5) قازاقستان رەسپۋبليكاسىنىڭ زاڭناماسىنا سايكەس جۇمىسپەن قامتۋعا جاردەمدەسۋمەن قامتاماسىز ەتiلەدi. وسى جەڭىلدىكتەردەن پايدالانۋ ءۇشىن قانداستارىمىز «ورالمان» مارتەبەسىن الىپ الادى دا، ارى قاراي قازاقستان رەسپۋبليكاسىنىڭ ازاماتتىعىنا قۇجات وتكىزبەي، «ۇزىن ارقاۋ، كەڭ تۇساۋ» دەپ، ەكى جاققا جالتاقتاپ ءجۇرىپ ۋاقىت وتكىزىپ الادى.

ەكىنشىدەن، قىتاي حالىق رەسپۋبليكاسىندا تۋىنداعان ساياسي جاعداي دا ءوز اسەرىن تيگىزدى.

وسى ماسەلەنى شەشۋ ءۇشىن، «حالىقتىڭ كوشى-قونى تۋرالى» زاڭ جوباسى 2017 جىلى ماجىلىستە تالقىلانعان كەزدە شاما كەلگەنشە شىعار جول ۇسىنىپ، ارەكەت جاسادىق. وكىنىشكە وراي، ەڭبەك جانە حالىقتى الەۋمەتتىك قورعاۋ مينيسترلىگىنىڭ كوشى-قون كوميتەتى باسشىلارىنىڭ كەسىرىنەن ول ۇسىنىستارىمىز وتپەي قالدى. وتسە دە جارىم-جارتىلاي قاناعاتتاندىرىلدى. بۇل تۋرالى كەزىندە ايتتىق تا، جازدىق تا...

مىنە، ۋاقىت تالابىنا ساي، سول تۇيكىلمەن قوسا، وزگە دە ماسەلەلەردى زاڭنامالىق تۇرعىدان تۇبەگەيلى شەشۋ ءۇشىن پارلامەنتتە «حالىقتىڭ كوشى-قونى تۋرالى» زاڭىنا تاعى دا وزگەرتۋلەر مەن تولىقتىرۋلار ەنگىزۋ جۇمىسى قاراستىرىلعالى جاتىر.

ءبىز ءوز تاراپىمىزدان قاجەتتى ۇسىنىستارىمىزدى الدىن-الا بەردىك. ول ۇسىنىستاردىڭ ءبىر ءبولىمى زاڭ جوباسىنا ەنگەنى دە بەلگىلى بولدى. ەنبەگەنىن ماجىلىستەگى جۇمىس توبىنىڭ تالقىسى بارىسىندا دەپۋتاتتار ارقىلى ەنگىزۋگە ارەكەت جاسايمىز.

اللا قالاپ، حالىق قالاۋلىلارى قولداپ، ول ۇسىنىستارىمىز ءوتىپ جاتسا، «حالىقتىڭ كوشى-قونى تۋرالى» زاڭى ودان ارى كەمەلدەنىپ، كوشىپ كەلۋشىلەردىڭ قۇجاتتانۋى ءتىپتى دە وڭتايلانا تۇسەتىنىنە سەنىمدىمىن.

بىراق، بۇل وزگەرىستى كۇتپەي-اق، قانداستارىمىزدىڭ تالاپ-تىلەگىن ەسكەرگەن ۇلت كوشباسشىسى نۇرسۇلتان نازارباەۆ پرەزيدەنتتىك وكىلەتتىگىن توقتاتۋدىڭ از-اق الدىندا – 16 ناۋرىزدا ورالماندار مارتەبەسىن جەڭىلدەتىلگەن تارتىپپەن 2019 جىلدىڭ 31 جەلتوقسانىنا دەيىن ءبىر مارتە ۇزارتىپ بەرۋ تۋرالى شەشىم قابىلداپ كەتتى.

ەلباسىنىڭ بۇلاي شەشىم قابىلداۋىنا ۇسىنىس جاساعان قر ىشكى ىستەر ءمينيسترى، پوليتسيا گەنەرال-لەيتەنانتى ەرلان تۇرعىمباەۆ ەكەنىن ۇمىتپايىق، اعايىن!

ەلباسىنىڭ ەتنيكالىق قازاقتاردىڭ پروبلەمالىق ماسەلەلەرىن شەشۋ تۋرالى سول تاپسىرماسىنا سايكەس، ەلىمىزدىڭ اۋماعىنداعى بارلىق ەتنيكالىق قازاقتارعا، ۋاقىتى قاي كەزدە وتكەنىنە قاراماستان، ورالمان مارتەبەسىنىڭ جارامدىلىق مەرزىمىن ۇزارتۋ بويىنشا ءبىر رەتتىك اكتسيا جۇرگىزىلۋدە.

سونداي-اق، «ورالمان» مارتەبەسىنىڭ مەرزىمى ءوتىپ كەتۋىنە جانە وزگە دە سەبەپتەرگە بايلانىستى ۆيزاسىنىڭ، تولقۇجاتىنىڭ ۋاقىتى ءوتىپ كەتكەن قانداستارىمىزدى «مەملەكەتتىك كورسەتىلەتىن قىزمەتتەر ستاندارتتارىن بەكىتۋ تۋرالى» قازاقستان رەسپۋبليكاسى ىشكى ءمينيسترىنىڭ 2015 جىلعى 7 ساۋىردەگى №315 بۇيرىعىنا سايكەس، الدىمەن «ازاماتتىعى جوق تۇلعا» دەپ تانىپ، ارى قاراي قۇجاتتاندىرۋ جۇمىسى قولعا الىنىپ جاتىر.

سوندىقتان، ەلباسىمىزدىڭ وسىناۋ قامقورلىعىنىڭ اياسىندا جاسالىپ جاتقان جەڭىلدىكتەن قانداستارىمىز قاپى قالماۋى كەرەك. وزدەرى تۇرعان ورىننىڭ كوشى-قون مەكەمەلەرىنەن قۇجاتتارىن دۇرىستاپ العانى ءجون.

ال، تۋىنداعان ماسەلەلەر بولسا، «Nur Otan» پارتياسى باستاعان قوعامدىق ۇيىمدارعا بارىپ، زاڭگەرلەر مەن مەدياتورلاردىڭ كومەگىنە جۇگىنسە بولادى.

بۇل جەڭىلدىكتەن اسىرەسە تاۋەلسىزدىك جىلدارى وزبەكستان رەسپۋبليكاسىنان كەلىپ، بەلگىلى سەبەپتەرمەن قازاقستان ازاماتتىعىن الا الماي جۇرگەن تۋىسقاندار تولىق حابار تاۋىپ، جىلدىڭ سوڭىنا دەيىن قۇجاتتانىپ العانى دۇرىس بولار ەدى.

سول ءۇشىن، قۇرمەتتى تۋىسقاندار، ينتەرنەت الەمىنىڭ  «Facebook»، «WhatsApp»، «WeChat»، «Instagram»، «telegram»... جەلىلەرىن پايدالانىپ، وسى ماقالانى ءوز توپتارىڭىزعا جاپپاي بولىسۋلەرىڭىزدى وتىنەم!

قانداستارىمىز قاپىدا قالماسىن!!!

اۋىت مۇقيبەك

05.06.2019

نۇر-سۇلتان قالاسى

Abai.kz

6 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2251
عيبىرات

قايسار رۋحتى عازيز جان

مۇحتار قۇل-مۇحاممەد 3505