كولسايعا العاش رەت 2004 جىلى – وقۋدى ەندى ءبىتىرىپ، تەلەارناعا جۇمىسقا ورنالاسقان جىلى باردىم. «نتك»- دا وڭشەڭ جاستار جۇمىس ىستەدى.

سودان ءبىر كۇنى ءبارىمىز جينالىپ، شارىن مەن كولسايعا باراتىن بولدىق. جولدان شارىنعا سوقتىق. شارىندى سول كەزدە العاش رەت كوردىم. امەريكانىڭ كوۆبويلار تۋرالى فيلمدەرىندەگى كانوندارعا ۇقسايدى ەكەن. ارى قاراي كولسايعا تارتىپ، وعان كەش باتا جەتتىك تە، سول كۇنى كولدىڭ جاعاسىندا قوندىق. ەرتەڭىندە تاڭ اتىسىمەن اۋەستىگىم ۇستاپ ەرتە تۇرىپ الدىم دا، كولدىڭ شەتىن جاعالاي ءجۇرىپ وتىرىپ، ءبىر اينالىپ شىقتىم. شىرشا، قاراعاي، قايىڭ كوپ ەكەن. ءالى ەشكىمنىڭ اياعى باسپاعان مۇلگىپ تۇرعان تاعى تابيعاتتىڭ اراسىنا كىرىپ كەتكەندەي بولدىم. كولسايدىڭ ادامدى تارتىپ تۇراتىنى دا وسى قاسيەتى.

قازىر سونىڭ جاعاسىندا قۇرىلىس ءجۇرىپ جاتىر ەكەن. كافە، كوتتەدج سالماقشى عوي دەيمىن. مەنىڭشە، كولسايعا تيىسپەي، ونى سول كۇيى، تاعى، تۇمسا تابيعات كۇيىندە قالدىرا سالۋ كەرەك. جول سالىپ جاتقانى دۇرىس. قۇرىلىس جۇمىستارىن جۇرگىزىپ، ول جەرگە وركەنيەتتىڭ جەتىستىگىن الىپ كەلگەننەن كولساي كوركەيىپ كەتپەيدى. اقشا، اقشا دەپ جۇرگەندە ەرتەڭ كولدىڭ ماڭى قوقىستان اياق الىپ جۇرە المايتىن جەرگە اينالىپ، الماتىنىڭ شەتىندەگى ەلدىڭ ءبارى بارىپ سۋعا تۇسەتىن پلياج سەكىلدى بولىپ شىعا كەلەدى.

كولسايعا بارۋ كەرەك تە، تابيعاتىنا تامسانىپ، قىدىرىپ، ول جەردى لاستاماي، قايتا قايتىپ كەتۋ كەرەك. تۇنەپ شىعاتىن قوناق ءۇي مەن كافە-رەستورانداردى سالا باستاسا، كولساي بولاشاقتا تىنىشتىقتان مۇلگىپ كەتكەندەي بولىپ تۇراتىن وسى ءبىر ادەمى كەيپىنەن، ادامدى تارتىپ تۇراتىن تاعىلىعىنان ايىرىلىپ قالا ما دەپ قورقامىن...