بەيسەنبى, 28 ناۋرىز 2024
انىق 14621 18 پىكىر 15 تامىز, 2019 ساعات 10:58

مەن نەگە «جەمقور» باسشىنى قورعاۋعا مىندەتتىمىن؟

وسى جۇرت يسلام ءابىشتى بىلە مە ەكەن؟..

ءيا، بۇرىن بىلمەسە دە كەيىنگى كەزدەگى «قازاق ءۇنى»، «اباي.كز» سايتى مەن «قازاق ءۇنى» گازەتىنىڭ ارقاسىندا ءبىرشاما بىلەتىن بولعانى ءسوزسىز. بىراق، كىم دەپ بىلەدى؟ وڭتۇستىكتىڭ قازاعى 2008 جىلعا دەيىن «جامان اتى شىقپاعان ىسكەر ادام» دەپ، ال، 1996 جىلدان 2009 جىلعا دەيىن ول باسقارعان ورداباسى اۋدانىنىڭ حالقى «وعان دەيىن دە، ودان كەيىن دە يسلام ابىشتەي اكىم بىزدە بولعان ەمەس» دەپ بىلسە، 2008 جىلعى كەلەستەگى سۋ تاسقىنىناڭ كەيىن وبلىس تۇرعىندارى اراسىندا «ءابىش ىسكەر عانا ەمەس ادىلەتتى، قامقور باسشى ەكەن» دەگەن پىكىر قالىپتاستى. ونى قولداۋعا شاقىرعان اشىق حاتقا 100 مىڭنان استامنىڭ قول قويۋى سونىڭ ايقىن دالەلى.

راس، ونىڭ ىشىندە كۇنگەيدەن باسقا ولكەلەردىڭ ازاماتتارى دا بار. دەگەنمەن، شىمكەنتتەن سىرت وڭىردە (وسكەمەندى قوسپاعاندا) جوعارىداعىداي جاعىمدى پىكىر قالىپتاسىپ ۇلگەرمەگەنى وكىنىشتى. ولار «جەمقور كوپ باسشىنىڭ ءبىرى-داعى، ۇستالىپ قاپتى عوي» دەپ بىلەدى. ونىڭ ار جاعى ولاردى قىزىقتىرمايدى دا.

وكىنىشتى. وتە وكىنىشتى. بىراق، ول ءۇشىن قالىڭ كوپشىلىكتى جازعىرا المايسىز. سەبەبى، كازىرگى قازاققا «باسشى» دەسەڭىز، ونىڭ كوز الدىنا بىردەن جەمقور-پاراقوردىڭ، ۇرى-قاراقشىنىڭ كوك تەمىردەي سۋىق بەينەسى كولبەڭدەپ تۇرا قالادى. يسلام ءابىش ديناميت جارا المايتىن ماڭگى مۇز توڭىنداي  سىرەسىپ، قاتىپ قالعان سول پسيحولوگيالىق قالىپتىڭ، سول بەينەنىڭ قۇربانى بولىپ وتىر. سول بەينەنى قالىپتاستىرعان دا بيلىكتىڭ ءوزى. «بايىڭدار!» دەدى. «العاشقى بايلىق ادال ەڭبەكپەن كەلمەيدى!..» دەدى. ال، مەملەكەت بايلىعىن ۇرلاۋ مەن توناۋ كىمنىڭ قولىنان كەلەدى؟ ارينە، تەك قانا قولىندا بيلىك باردىڭ عانا! ولارعا دا كەرەگى وسى ەدى - ۇرلاعان-توناعاندارىن ەكى رەت اقشالاي، ءبىر رەت زاتتاي زاڭداستىرىپ، «ادالداپ» الدى. وزدەرىنەن وزدەرى اياسىن با؟ «دانىككەننەن قۇنىققان جامان»، ءبىر جەپ، ەكى اساپ ۇيرەنىپ قالعان اۋىز جامان ادەتىن ولسە قويا ما ەندى؟.. سودان كەيىن مۇحتار شاحانوۆ اكىمدەردى «ۇرى»، دەپۋتاتتاردى «جەپۋتات» دەمەي نە دەسىن؟ ۆيتسە-مينيستر ايەل (!) 11 ملن.تەڭگە پارا الىپ، جارتىسىن «قۇسىپ» ەدى، ءبىر ايعا جەتپەي جايتاڭداپ بوستاندىققا شىعا كەلدى. سودان كەيىن «پارا المايتىن» باستىق بولادى دەگەنگە جۇرت قايتىپ سەنسىن؟

جوق، بولادى. قالىڭ نۋ ورماندا دا، ميداي جازىق دالادا دا  جالىنى كوكتى شارپىعان ورتتەن ءار جەردە قۇدايدىڭ قۇدىرەتىمەن تال-تەرەك تە، قاۋ-قاۋ اققاۋدان ءشوپ تە امان قالاتىن بار. ءدال سول سەكىلدى ەل بولعان سوڭ ونىڭ ىشىندە پارادان تازا ەرلەرى دە تابىلادى. سونىڭ ءبىرى، دالىرەگى بىرەگەيى – يسلام ءابىش.

«دالەلىڭىز قانە؟» دەيسىز عوي. مىنەكەي! 2013 جىلى ول بيۋدجەتكە «بولىسكە» ءتۇسۋ ءۇشىن ادەيى ارتىق سالىنعان 300 ملرد.تەڭگەنى قازىناعا قايتاردى. ونىڭ اياعى نەگە اپارىپ سوعارىن بىلە تۇرا ىستەدى. سول ءۇشىن قىزمەتىنەن بوساتىلىپ، ءبىر جىل ۇيىندە بوس وتىردى. ارناۋلى ورىندار ونىڭ كاسىپكەرلىكتى باستاعان سوناۋ 90-جىلداردان بەرگى قىزمەتىن قوپارا تەكسەردى. تۇك تاپپادى، ءابىش بۇرىنعى ورنىنا قايتا باردى. (جالپى، ءبىر ورىنعا ەكىنشى رەت بارۋ كىمنىڭ دە بولسىن مىقتىلىعىن كورسەتەتىن فاكتور). كەشەگى سوتتا ءوزى ايتقانداي، سول 2013 جىلى ءۇي-ىشىندەگىلەر «مەملەكەتتىڭ اقشاسىن ۇنەمدەيمىن دەپ نەڭىز بار ەدى؟» دەگەن ەكەن. «مەن سوندا ولارعا «الدا تاعى وسىنداي جاعداي قايتالانسا، حالىقتىڭ نەسىبەسىن تاعى دا تالان-تاراجعا سالدىرمايمىن» دەگەنمىن. سوزىمدە تۇردىم. بۇل ۇستانىمنان ەشقاشان اينىمايمىن. ال، سىزدەر نە ىستەيسىزدەر، ونى وزدەرىڭىز بىلىڭىزدەر». بۇنى ەستىپ وتىرعان سۋديا ت.سىرلىباەۆ قانداي كۇي كەشكەنى بىزگە بەيمالىم، بىراق، ءوزىمىز تاريحي وقيعانىڭ كۋاسى بولىپ، تاريحي ءسوزدى ەستىپ وتىرعانىمىزدى سەزىندىك...

ەشنارسەنىڭ شەكسىز بولمايتىنىن، ەندى قايتىپ ورالمايتىن 28 جىلدىق «ەرتەگى داۋرەننىڭ» دە ءبىتىپ كەلە جاتقانىن ءبىلىپ وتىرعاندار بۇگىن ميلليارد ەمەس، تريلليونداردى بولىسكە سالا باستادى. يسلام ابىشەۆ وسى كەزدە شىنىندا دا سوزىندە تۇردى –  جەمقورلاردىڭ جولىنا «ابىلاي اسپاس ارقانىڭ سارى بەلى» بولىپ جاتىپ الدى. ايتۋعا وڭ-ا-ا-ي... ال، ونداي ىسكە بارىپ وتىرعاندار «وڭاي ادامدار» ەمەس قوي!.. ولار كوميتەت توراعاسىن ون وراپ الاتىن ورىنداردا وتىر عوي! ناعىز باتىرلىق وسىندا – جەڭىلەتىنىڭدى كورىپ تۇرىپ، وزىڭنەن الدەقايدا كۇشتىمەن كۇرەسكە شىققاندا! بۇل جولى وتكەندەگىدەي ءبىر جىل «جۇمىسسىزدىقپەن» قۇتىلمايتىنىڭدى» ءبىلىپ تۇرىپ،  باسىڭدى بايگەگە تىگىپ، تاعدىرىڭدى ءبىر اللاعا تاپسىرىپ شىققاندا! جولبارىس جۇرەكتى ماحامبەت بابامىز:

«اق بوكەننىڭ ورعىتىپ،
جۇگىرمەگى مايدان-دى،
باتىر بولماق ويدان-دى.
ايعايلاسىپ جاۋعا تي
ءتاڭىرىم بىلەر، جىگىتتەر،
اجالىمىز قايدان-دى!» دەپ وسىنداي جاعدايدى ايتىپ كەتكەن بولاتىن.

ناتيجە كۇتكەندەي بولدى – تريلليون ۇنەمدەگەن ازامات تۇرمەگە ءتۇستى...

بەس اي بويى تەرگەۋدە يسلام ابىشەۆ ىستەمەگەن قىلمىسىن مويىنداعان جوق. «ارى بارسا 15 جىل بەرەرسىڭدەر، ابىرويىمنان ارتىق پا ول؟» دەپ وتىر. جانە ءجاي وتىرعان جوق، ءوزى قۇرباندىعىنا اينالعان جۇيەنى قالاي جوندەۋدىڭ باعدارلاماسىن جازىپ جاتىر. راس، تۇرمەگە تۇسپەسە، جوسىقسىز جۇيەنىڭ جازىقسىز قۇرباندىعىنا اينالماسا، ءوزى ايتقانداي، كۇنى-ءتۇنى ەكى بۇكتەتىلىپ وتىرىپ بۇل باعدارلامانى جازباسى انىق ەدى.

راس، تۇبەگەيلى جوندەۋ ءۇشىن قولىڭدا جوعارعى بيلىك، جۇرەگىڭدە ساياسي جىگەر بولۋى ءتيىس. ءازىر ونداي مۇمكىنشىلىكتىڭ اۋىلى الىس. ءارى ءسوزدىڭ ەمەس، ءىستىڭ ادامى بولعان سوڭ العاشقى قادام رەتىندە قوعامدى تولعاندىراتىن ماسەلەلەرگە تالداۋ جاسادى. «نە ىستەۋ كەرەك» ەكەنىن ايتتى. «وندايدى ايتىپ جۇرگەن ادام كوپ قوي» دەرسىز. سوندىقتان، ول اناليزبەن شەكتەلگەن جوق، №2 ۇندەۋ-حاتىندا سينتەزگە، ياعني، «قالاي ىستەۋ كەرەككە» كوشتى. حالىقتى 5 جىل ىشىندە قالاي تۇرعىن ۇيمەن قامتاماسىز ەتۋدىڭ ەسەپ-قيسابىن كورسەتتى. قر پرەمەر-ءمينيسترىنىڭ رەسمي سايتىنا سەنسەك  2019 جىلعى 1 قاڭتارعا ءۇي الۋ كەزەگىندە 487 مىڭ وتباسى تۇر ەكەن، و.ءى. 220 مىڭ وتباسى الەۋمەتتىك وسال توپتان،  31,7 مىڭى - كوپ بالالى ەكەن.

ۇكىمەت 7 جىلدا:

- 585 ملرد.تەڭگەگە 46 مىڭ پاتەر سالامىز (220 مىڭ جانە 31.7 مىڭ وتباسى جايلى جاق اشپايدى);

-1ترلن.680 ملرد.تەڭگەگە اۋىلدىق ەلدى مەكەندەردى اۋىز سۋمەن جابدىقتايمىز;

-1 ترلن. 400 ملرد،تەڭگەگە جەرگىلىكتى اۆتوموبيل جولدارىن جوندەۋدەن   وتكىزەمىز;

-700 ملرد.تەڭگەگە تۇرعىن ۇيلىك القاپتارعا ينفراقۇرىلىم جۇرگىزەمىز دەيدى.

يسلام ابىشەۆ:

-5 جىلدا 1,4 ترلن.تەڭگەگە 487,0 مىڭ پاتەر سالامىز، و.ءى. العاشقى 3 جىلدا الەۋمەتتىك وسال توپتاعى 220 مىڭ وتباسىنى تۇگەل قامتاماسىز ەتەمىز;

-3 جىلدا 320,0 ملرد. تەڭگەگە بارلىق اۋىلدىق ەلدى مەكەندى ورتالىقتاندىرىلعان اۋىز سۋمەن 100 پايىز قامتاماسىز ەتەمىز;

-3 جىلدا 300,0 ملرد. تەڭگەگە 5000,0 كم جەرگىلىكتى اۆتوموبيل جولدارىن جوندەيمىز;

-5 جىلدا 600,0 ملرد.تەڭگەگە بارلىق تۇرعىن ۇيلىك القاپتارعا ينفراقۇرىلىم جۇرگىزەمىز دەيدى.

قاتە جازعان جوقپىز – 46 مىڭ پاتەر ەمەس، 487 مىڭ پاتەر سالۋعا بولادى دەيدى.

وسىنىڭ  1 745 ملرد. تەڭگە ۇنەم جاسالادى.

ي.ءابىشتىڭ بۇل سوزىنە سەنۋگە بولا ما؟ بولعاندا قانداي! ويتكەنى، ونىڭ بۇنداي ىستە ۇلكەن تاجىريبەسى بار: 2008 جىلى جوعارىدا ايتىلعان تاسقىن سۋدىڭ سالدارىنان بۇزىلعان 2000-نان استام (قابىرعاسى - كۇيگەن كىرپىش، شاتىرى – مەتالل جابىنىنان، گازبەن جىلىتىلعان، سانيتارلىق تورابى مەن كارىز-سەپتيگى بار،  تەرەزەسى - پلاستيك، ەدەنى – اعاش) ءۇيدى، 7 مەكتەپتى (باسقا  نىسانداردى ايتپاعاندا) بار-جوعى 3 ايدىڭ ىشىندە بۇگىنگى ارىستاعىداي 17 وبلىس كومەكتەسپەي-اق، پرەزيدەنت تۇرماق پرەمەر-مينيستر ءبىر رەت كەلىپ كورمەي-اق، قۇرىلىس ماتەريالىن 180-200 شاقىرىم جەردەن تاسىپ، بۇگىنگىدەي 38 ملرد.ەمەس، 18 ملرد.تەڭگەگە جاڭادان سالىپ تا، كۇردەلى جوندەۋدەن وتكىزىپ تە ۇلگەرگەن-تۇعىن. سالعان ءۇيدىڭ 1 ش.م. 38 مىڭ تەڭگەدەن تۇسكەن ەدى.

ءبىز يسلام ءابىشتى قورعاۋعا مىندەتتىمىز بە؟

ارىس دەمەكشى، ءۇش تاۋەلسىز جۋرناليست 7-8 تامىز كۇندەرى ارىستا بولىپ، 60 ششاقتى ءۇيدى ارالاعانىمىزدا كورگەنىمىز، ءبىر اۋىز سوزبەن ايتار بولساق، رەسمي ورگانداردىڭ «قالاداعى جوندەۋدى، قايتا سالۋدى قاجەت ەتەتىن ۇيلەردىڭ 90 پايىزىنىڭ جۇمىسى ءبىتتى» دەگەن اقپاراتپەن مۇلدەم قابىسپايتىنىن كورسەتتى. ىستەلگەندى جوققا شىعارمايمىز، باسشىلار ايانىپ جاتىر دەپ تە ايتپايمىز، تەك ۇيىمداستىرۋشىلىق جاعى اقساپ جاتقانى كوزگە ۇرىپ تۇردى. ءالى كۇنگە دەيىن قۇرىلىسشى جۇمىسشىلار ماسەلەسى شەشىلمەگەن! ءار جەردە كوسەنىڭ ساققالىنداي ەكى-ءۇش ادام ءجۇر. بۇل بەتىمەن جۇمىس قارا كۇزگە، اق جاۋىنعا دەيىن بارارى انىق...

سويلەسۋدىڭ ءساتى تۇسكەن قونىسبەك بالقىبەكوۆ، تولەۋباي ىسقاباەۆ، باتىر يسلامبەكوۆ سەكىلدى ارداگەرلەر، ەرعازى مەدەتتبەكوۆ، عالىمجان قۇماربەكوۆ ءتارىزدى اۋدان ءماسليحاتىنىڭ دەپۋتاتتارى كەلىسىپ قويعانداي «شىركىن، وسىنداي جەردە يسلام ابىشتەي ىسكەر ادام بولسا عوي» دەسىپ جاتتى. اق نيەتتەن تۋعان ىزگى تىلەكتەردىڭ، پەرىشتەلەر قۇلاعىنا شالىنىپ قالۋى دا عاجاپ ەمەس قوي...

ال، ءدال سول كەزدە قايناعان قازاننىڭ ورتاسىندا، الىپ قۇرىلىستى ۇرشىقشا ءيىرىپ جۇرۋگە ءتيىس يسلام ءابىش قاراڭعى قاپاستا ءوز ۇندەۋلەرىن جازىپ جاتىر... №3 ۇندەۋىندە ول وتاندىق جەمقورلىقتىڭ جارقىن ۇلگىسى بولىپ تۇرعان «LRت-استانا» قۇرىلىسىن 3 ەسە ارزانداتۋعا بولادى!» دەسە، №4 ۇندەۋدە «...شىعارماشىلىق ادامدارىنىڭ بويىندا ءبىزدىڭ بيزنەسمەندەرىمىزگە ءتان «ساتىپ الىپ - ساتۋعا» دەگەن يكەمدىلىك جوق»، سوندىقتان  «شىعارماشىلىق وداقتاردى وتەۋسىز قارجىلاندىرۋمىز قاجەت» دەپ وتىر.  جالاڭ سوزگە ۇيىرسەكتىك - ي.ابىشەۆتىڭ جانىنا جات. «ءۇيت، ءبۇيت» دەمەيدى، قولىنان كەلگەنىن ايانباي ىستەپ، ءوزى ەلگە ۇلگى كورسەتەدى. سوناۋ 1999 جىلى  ورداباسى اۋدانىنا اكىم بولعاننان كەيىن ول اۋداندىق گازەتتىڭ رەداكتورى، بەلگىلى اقىن نارماحان بەگاليەۆتىڭ جالاقىسىن 9 مىڭ تەڭگەدەن 18 مىڭ تەڭگەگە كوتەرىپ، اۋداندىق قارجى ءبولىمى مەڭگەرۋشىسىنىڭ جالاقىسىمەن بىردەي ەتىپ قويدى. وبلىسقا اۋىسار الدىندا تاعى دا كوتەرىپ كەتتى. ءوز ەسەبىنەن ناراعاڭ، جانبولات اۋپباەۆ، تەمىرحان مەدەتبەك، عالىم جايلىباي، ت.ب. ءبىر توپ تانىمال اقىن، جۋرناليست، جازۋشىلاردى ءبىر اپتا بويى سوزاقتى، تۇركىستاندى، اقسۋ-جاباعىلى مەن وگەمدى ارالاتىپ، ساپار سوڭىندا شاردارا تەڭىزىندە دەمالدىرىپ كۇتتى. تاۋدى دا، قۇمدى دا، سۋدى دا كورسەتتى. سول ءداستۇر سوڭعى ون شاقتى جىل بويى شىعارمىشىلىق ادامداردى مەركە، قاپال-اراسان، بۋراباي، ت.ب. ساناتوريلاردا دەمالدىرۋ ارقىلى جالعاسىپ كەلدى.

ي.ءابىش الداعى ۋاقىتتا «سىبايلاس جەمقورلىقتى جويۋ جولىندا بىرنەشە ۇسىنىس» پەن «تۇرمەدەگى ادام سانىن ون ەسە ازايتۋعا بولادى!» دەگەن تاعى ەكى ۇندەۋىن جاريالايدى. ءيا، بۇنىڭ ءبارىن جاساپ جاتقان ازامات - كوپ ادام بىلمەسە دە، تانىماسا دا سىرتىنان جەمقور-پاراقوردىڭ قاتارىنا قوسىپ قويعان ادام. ىسكەرلىكتىڭ ۇلگىسىن اۋدانعا اكىم بولعانعا دەيىن-اق كورسەتىپ، قۇس فابريكاسىن جۇرگىزگەن، اتى بار دا زاتى جوق كىرپىش زاۋىتىن اياققا تۇرعىزعان، كەيىن ونىڭ قاتارىن كوبەيتكەن، بىرنەشە اۋداننىڭ تۇرعىندارىن جارىقپەن قامتاماسىز ەتىپ، وبلىس باسشىلىعىنىڭ نازارىن ەرىكسىز وزىنە اۋدارعان ادام. وسىنداي ادام ادىلەتسىزدىككە تاپ بولسا، ءسىز نە ىستەر ەدىڭىز؟

ونى ءوزىڭىز بىلەسىز، ال، ءبىز توننىڭ ىشكى باۋىنداي ەتەنە ارالاسپاساق تا ادال ازاماتتاردى ارقاشان قولداۋعا، كەرەك كەزدە اراشا تۇسۋگە دايىنبىز. ءجۋرناليستىڭ باستى مىندەتىنىڭ ءبىر وسى دەپ بىلەمىز. ءوزىمىز ارىپتەستەردەن  ەستىگەندى دە (وسكەمەننەن استاناعا اۋىسىپ، ەلەۋسىز عانا ەكى-ءۇش ماشينامەن اەروپورتقا كەتىپ بارا جاتقانىن ەستىگەن قاراپايىم جۇرت بىرىنە ءبىرى دەرەۋ حابارلاپ، ەسكورت سانىن ەكى ءجۇز ماشينادان اسىرىپ جىبەرگەنىن جازباۋ جۋرناليستىك اتىمىزعا سىن بولار ەدى), 2009 جىلعى ارىستاعى العاشقى جارىلىستاعى ەرلىگى سەكىلدى كوزبەن كورگەندى دە جازدىق. بۇكىل مەملەكەتىمىزدى، ۇلتىمىزدى  ماسقارالاپ «جەڭىل ءجۇرىستى ەل» دەپ جازاتىن جانە سونىسى ءۇشىن بيلىكتەن ەشقانداي قاعاجۋ كورمەيتىن، «سەكسەۋىلدى سەكسەۋىلمەن ۇرۋ» قاعيداسىنان قىلداي تايماي قازاق باسشىلاردى قازاقتىڭ قولىمەن ءتۇپ-تۇگەل جەمقور ەتىپ كورسەتۋدىڭ ۇشىعىنا شىققان ءورىستىلدى باسىلىمنىڭ حرەستوماتيالىق ۇلگىسىندەي بولعان مىنا ىسىنە توقتالماي كەتە المادىق. يسەكەڭ «ۆرەميا» گازەتىڭدەگى «تاپسىرىس» ماقالانى تەرىسكە شىعارىپ بەرۋدى ءوتىندى. ءوتىنىشتى ورىندادىق، بىراق ونى گازەتكە جاريالاتا المايتىنىڭ ەسكەرتتىك... ءبىراز كۇننەن كەيىن شاقىرعان سون بارساق، الگى جۋرناليست يسەكەڭنىڭ كابينەتىندە وتىر ەكەن. ءبىر كەزدە ەكى كوزى بۇلاۋداي بولىپ شىقتى... سويتسەك، «ۆرەميانىڭ» رەداكتورى وعان «مىنا ماقالاعا قارسى ءۋاج تاۋىپ جاز، سوندا ەكەۋىن گازەتكە قاتار باسامىز، ولاي ەتە الماسان ارىزىڭدى بەر دە كەت» دەپتى. يسەكەڭ «ماقالا باسىلماي-اق قويسىن، جەپ وتىرعان نانىنان ايىرامىن با...» دەدى. قانشا ادامنىڭ ءوزى جايلى تەرىس ويدا قالاتىنىن ءبىلىپ تۇرسا دا.

مىنە، بۇگىن تاعى دا سونداي جاعداي. 2018 جىلدىڭ اياعىنان باستاپ كوميتەت توراعاسىنىڭ ايتقان ءسوزىنىڭ ءبارىن ءۇش اي تىنباي جاسىرىن جازۋمەن بولعان، سوندا دا قولىنا ەشتەڭە ىلىكپەيتىنىن سەزگەن پوليتسيا اقىرى 2019 جىلدىڭ 15 ناۋرىزى كۇنى ونى «پارا الۋعا دەگەن ارەكەت-نيەتى بولدى» دەگەن ايىپپەن اباقتىعا جاۋىپ تىندى. «پارا الدى» دەي المادى. سودان 5 اي(!) دەگەندە بارىپ ايىپتاۋ قورىتىندىسىن قۇراستىرىپ شىقتى.

اققا كۇيە جاعۋ دەگەنىمىز وسى. قوعامدا «جەل تۇرماسا ءشوپتىڭ باسى قيمىلدامايدى»، وزىنەن دە بار شىعار» دەگەن تەرىس وي تۋعىزۋدىڭ، تەرىس پىكىر قالىپتاستىرۋدىڭ تەرىس ۇلگىسى بۇل. ويتكەنى، ولار وسىنداي وزبىرلىعى ءۇشىن ايىپتالۋشى ادام ەرتەڭ اقتالىپ شىققاندا دا – ال، يسلام ءابىشتىڭ اقتالىپ شىعاتىنىنا كۇمان جوق، بۇگىن بولماسا ەرتەڭ اقتالادى - ەشقانداي جازاعا تارتىلمايتىنىن جاقسى بىلەدى. ءبىز وسىنداي جۇيە جاساپ العانبىز...

بۇگىن ءبىز ءبارىمىز دە ءبىر ازاماتتىڭ تار قاپاستا، تىشقانداردىڭ اراسىندا تاماق جەپ وتىرعانىنا، دەنساۋلىعىنىڭ ناشارلىعىنا قاراماي، قيسايىپ كەتكەن سول جۇيەنى تۇزەتۋگە قولىنان كەلگەنىنشە قيمىلداپ جاتقانىنا كۋا بولىپ وتىرمىز. ال، بوستاندىقتا بالپاڭ-بالپاڭ باسىپ جۇرگەن ءبىز نە ىستەيمىز؟ جۇيەنى جوندەۋگە ءبىز دە بەلدى بۋا، بىلەكتى سىبانا اتسالىسۋعا كىرىسەمىز بە؟ جوق الدە قاپاستاعى ادامنان ۇيالماي، قۇدايدان قورىقپاي، «سوعىس جوق، سوعان شۇكىر، تاۋبە!» دەپ، «كوپپەن كورگەن ۇلى توي» دەپ، «مەن كىشكەنتاي اداممىن، مەنىڭ قولىمنان نە كەلەدى؟» دەپ، «باسشىلار بار عوي، ەل قامىن ويلاۋ – سولاردىڭ مىندەتى، وعان باسىمدى ىسكەنى نە؟» دەپ، ەڭ اقىرى «ءتۇبى قىتاي الماي قويمايدى ەكەن عوي، باسشىلار دا قىتايشا ۇيرەنىڭدەر دەپ جاتىر، سوعان دايىندالا بەرگەن دۇرىس شىعار» دەپ قاراپ وتىرا بەرەمىز بە؟ «ەلىم!» دەگەن ەرگە ەڭ بولماسا رۋحاني قولداۋ كورسەتۋدىڭ ورنىنا وسكەمەن قالاسىنىڭ بۇرىنعى اكىمىن ماقانشى-سەمەي جولىنىڭ سالىنباي قالعانىنا(؟) كىنالاۋدى جالعاستىرا بەرەمىز بە؟

2016 جىلى ساۋىردە شىمكەنتتەگى جاسى 50-مەن 70-ءتىڭ اراسىنداعى 7 جىگىت قازاق جەرىن شەتەلدىكتەرگە جالعا بەرۋگە، ساتۋعا رۇقسات ەتەتىن زاڭعى قارسى كۇرەستى باستاعاندا بىزگە كۇلگەن بيلىك ادامى كوپ بولىپ ەدى. (وبلىستىق جەر كوميسسياسىنىڭ 35 مۇشەسىنىڭ 28-ءى اكىم-قارالار بولاتىن). بىراق، ءبىز سياقتى «اپەندىلەر» بارلىق وبلىستان تابىلدى. مىڭ-مىڭداپ تابىلدى.  ناتيجەسىندە زاڭعا موراتوري جاريالاندى...

يسلام ءابىشتى قولداۋ-قولداماۋدى دا اركىم ءوزى شەشەدى.

تەك ءبىر ماسەلەنىڭ ارتىندا ءبىر ادامنىڭ عانا ەمەس، بار قازاقتىڭ تاعدىرى تۇر.

تاڭداۋ – ءوز قولىمىزدا...

ومىرزاق اقجىگىت

قوسىمشا: Abai.kz اقپاراتتىق پورتالى ەركىن اقپارات الاڭى. مۇندا وي جارىستىرىپ، پىكىر الماستىرۋعا اركىم قۇقىلى. جوعارىداعى سپيكەردىڭ پىكىرى رەداكتسيا ۇستانىمىن بىلدىرمەيدى. الداعى ۋاقىتتا ماقالادا ەسىم-سويلارى اتالعان جەكەلەگەن ازاماتتار رەداكتسيامىزعا جاۋاپ بەرۋگە نيەتتى بولسا، ولاردىڭ دا پىكىرىن بەرۋگە ءازىرمىز. 

Abai.kz

18 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3530