جاڭاقورعان اۋدانىندا بيىل قاربىز شىرىنىن شىعاراتىن تسەح العاشقى ءونىمىن شىعاردى. جوبانى جۇزەگە اسىرۋعا نەمىس كومپانياسى نيەت بىلدىرگەن، - دەپ حابارلايدى اباي-اقپارات.

ينۆەستورى «نوكينا» شارۋاشىلىعىنىڭ وكىلى يوحانن مارتس پەن «KazExpertTrade» جشس-ءنىڭ ماماندارى تسەحتى ىسكە قوسقان. نەمىس تەحنولوگياسى ارقىلى وڭدەلەتىن شىرىن ارنايى بۇراندالى قاقپاشاسى بار پوليەتيلەنگە قۇيىلىپ، نارىققا جول تارتتى. شىرىن تازا، ءارى تابيعي حيميكاتسىز قاربىزدان جاسالعان.

– ءبىز بۇل قۇرىلعىنى 2014 جىلى الماتىداعى «نوكينا» شارۋاشىلىعىندا ىسكە قوستىق. شاعىن عانا تسەح ساعاتىنا 1600 كەلى المانى وڭدەۋگە ارنالدى. الىناتىن ءونىم 50 پايىز بولاتىن. بيىل وسى تابيعي شىرىندى قاربىزدان الۋ ويعا كەلدى. بۇل – قازاقستانداعى العاشقى قاربىز شىرىنى. ءدامى كەرەمەت! ءبىز مۇندا شىرىندى شىن مانىندە شىعارۋعا بولاتىنىن كورسەتۋگە كەلدىك. ءارى قاراي قاربىزدى الماتىعا تاسىمالداپ، سوندا شىعارامىز. سۋسىن شىعارىلعان سوڭ، 83 گرادۋس تەمپەراتۋرادا قىزدىرىلادى. ودان سوڭ سالقىنداتامىز. ءونىمنىڭ جارامدىلىعى 12 ايعا جەتەدى، - دەيدى «نوكينا» شارۋا قوجالىعىنىڭ وكىلى يوحانن مارتس.

قازىرگى تاڭدا وندا 12 ادام جۇمىس ىستەيدى. جالپى، بيىلعى جىلى 1000 توننا قاربىزدى وڭدەۋ جوسپارلانعان. كەلەر جىلى جاڭاقورعان اۋدانى، جايىلما اۋىلىندا ستاندارتقا ساي قويما سالىنباق.

– «باتىس ەۋروپا – باتىس قىتاي» ءاۆتودالىزىنىڭ بويىندا ورنالاسقان شاعىن كاسىپورىن قاربىزدان ساعاتىنا 1 توننا 100 ليتر تابيعي سۋسىن ءوڭدىرىپ، ارنايى قويمادا ساقتاۋعا قاۋقارلى. جايىلما اۋىلى بويىنشا جىلىنا ورتا ەسەپپەن 400-600 گەكتارعا جۋىق اۋماققا باقشا داقىلى ەگىلەدى. بۇل جوبادان تۇسەتىن پايدا دا مول بولادى. بيىلعى جىلى تەك تاجىريبە جۇزىندە ىسكە قوسىلعان تسەح الداعى ۋاقىتتا جايىلمالىقتار ءۇشىن تولىق قۋاتىندا جۇمىس ىستەيتىن كاسىپورىنعا اينالاتىنى ءسوزسىز، - دەيدى اۋىل اكىمى تالعات زەيداليەۆ.

سونداي-اق اۋىل اكىمى نەمىس كومپانياسىنىڭ وڭتۇستىك استاناعا وزدەرىمەن بىرگە 20 توننا قاربىزدى الىپ كەتكەنىن، تاعى دا 30 توننا قاربىزدى جونەلتۋگە دايىندالىپ جاتقانىن حابارلادى. الماتى قالاسىندا وڭدىرىلەتىن جەرگىلىكتى ءونىم «جايىلما شىرىنى» دەگەن اتاۋمەن ەلىمىزدەگى بارلىق دۇكەن سورەلەرىنەن ءوز ورنىن تاپپاق.

Abai.kz