جۇما, 29 ناۋرىز 2024
جاۋاپ 4815 6 پىكىر 7 قازان, 2019 ساعات 14:23

قمدب رەسمي جاۋاپ: بىرەۋدىڭ وقىپ تۇرعان نامازىن بۇزۋ دۇرىس پا؟

وتكەندەگى "اسىل ارنا" تەلەارناسىنىڭ ديرەكتورى مۇحامەدجان تازابەكتىڭ قوعامدىق لەكتسيالارىنىڭ مونتاجدالعان نۇسقاسى الەۋمەتتىك جەلىگە تاراپ، ەل-جۇرت الگى ۆيدەودا ايتىلعان اڭگىمەنى اجەپتاۋىر تالقى جاسادى. اسىرەسە، اراب ساقشىلارىنا مۇسىلمانداردىڭ قاسيەتتى ورنى سانالاتىن قاعبادا، جۇرتتىڭ جولىندا تۇرىپ ناماز وقىعان ادامعا بىرنەشە مارتە ەسكەرتۋ جاساپ نامازىن بولۋگە، وعان كونبەسە قۇيرىعىنان تەۋىپ توقتاتۋعا رۇقسات ەتىلگەن دەگەن اۋانداعى سوزدەر ەل اراسىندا ءارتۇرلى پىكىر تۋعىزدى.

قۇدايعا قۇلشىلىق جاساپ تۇرعان ادامنىڭ نامازىن بۇزۋعا بولا ما؟ قاسيەتتى قاعبانىڭ وزىندە نامازحاندى تەبۋگە رۇقسات بەرىلسە، وندا وزگە مەشىتتەردە قالاي؟ بۇل قانشالىقتى شاريعات شەڭبەرىنە سىيىمدى اڭگىمە؟

ءبىز قازاقستان مۇسىلماندارى ءدىني باسقارماسىنا حابارلاسىپ، پىكىر سۇرادىق. بىزگە قمدب ءپاتۋا جانە شاريعات ءبولىمى مەڭگەرۋشىسىنىڭ ورىنباسارى حاسان امانقۇلوۆ جاۋاپ بەردى.

حاسان امانقۇلوۆ، قمدب وكىلى:

- شاريعات بويىنشا باستاعان نامازدى سوڭىنا دەيىن وقىپ ءبىتىرۋ مىندەت. ال سەبەپسىز ءوزىنىڭ نامازىن بۇزۋ نەمەسە بىرەۋدىڭ وقىپ تۇرعان نامازىنا كەدەرگى جاساۋ حارام، ياعني كۇنا بولىپ سانالادى. مۇسىلمان ادام مۇنداي ارەكەتكە بارماۋى ءتيىس.

يسلامنىڭ العاشقى جىلدارىندا مۇسىلماندار ءدىنىن جاسىرىن ۇستاۋعا ءماجبۇر بولعان. مۇسىلمان بولۋعا، ناماز وقۋعا ءدىن دۇشپاندارى (كاپىرلەر) كوپ كەدەرگى جاساعان. ءتىپتى، قاعباعا باراتىن جولعا تىكەن تاستاپ، پايعامبارىمىزدى (وعان اللانىڭ سالاۋاتى مەن سالەمى بولسىن) ناماز وقۋدان توساتىن، ساجدەدە جاتقاندا ۇستىنەن تۇيەنىڭ قارىن ىشەكتەرىن تاستاپ قورلايتىن.

قازىرگى تاڭدا جىلدا ميلليونداعان ادام قاجىلىققا بارادى. ماعان دا بيىل اللا تاعالا قاسيەتتى مەككەگە بارىپ، قاجىلىق عيباداتىن اتقارىپ كەلۋدى ءناسىپ ەتتى. سول جەردە تارتىپكە قارايتىن ارنايى ساقشىلار (پوليتسيا) قىزمەت ەتەدى ەكەن. قاعبانىڭ اينالاسىندا، اسىرەسە، ءدال قارا تاستىڭ جانىندا كەپتەلىستىڭ بولۋى، ادامدار جۇرەتىن جولدا كەيبىرەۋلەر ناماز وقىپ تۇرىپ الۋى، ودان باسقا ءبىرىن-ءبىرى ءتۇرتىپ، الىسىپ جاتۋى كوپ قيىندىق تۋعىزادى ەكەن.

سولاي بولسا دا، ساقشىلاردىڭ قاجىلارعا قاباق شىتقانىن بايقامادىم. قايتا قۇلاسا، جەردەن تۇرعىزىپ، قاجىلاردى سالقىنداتۋ ءۇشىن ۇستىلەرىنەن سۋ سەۋىپ، جول سۇراعانعا جىلى شىرايمەن جولىن ايتىپ، قانشا ءتارتىپ بۇزسا دا، وعان سابىرلىقپەن ءتۇسىندىرىپ، ەسكەرتىپ جاتقاندىعىن كوردىم. ءتىپتى، مىنانداي ءبىر جاعداي بولدى. قاعبانى ءتاۋاپ ەتىپ بولعان سوڭ شەتكە شىعىپ ەكى راكاعات ناماز وقۋ بار. سوندا قاجىلاردىڭ ءبىرى ساقشىلاردىڭ ەسكەرتۋىنە قاراماي، تارتىپكە باعىنباي، تۋرا جولعا تۇرىپ الىپ نامازىن باستاپ كەتتى. سوندا دا، ساقشى سول ادامدى نامازى بىتكەنگە دەيىن كۇتىپ تۇردى. نامازىن اياقتاعان سوڭ ادەپپەن بىلاي جاساۋعا بولمايتىنىن ايتتى.

اللا تاعالا بارشامىزعا ءبىر-بىرىمىزگە مەيىرىمدى بولۋدى جازسىن!

Abai.kz

6 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1576
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2272
عيبىرات

قايسار رۋحتى عازيز جان

مۇحتار قۇل-مۇحاممەد 3590