جۇما, 15 قاراشا 2019
959 4 پىكىر 11 قازان, 2019 ساعات 11:53

قازاقستاندا بالالارىن ميتينگىگە ەرتىپ اپارعان اتا-انالاردى جازالاۋدى ۇسىندى

سەنات دەپۋتاتتارى كامەلەتكە تولماعان بالالاردى ميتينگىگە ەرتىپ اپارعان اتا-انالارعا 100 ايلىق ەسەپتىك كورسەتكىش (شامامەن 645 دوللار) كولەمىندە ايىپپۇل سالۋ نەمەسە ون كۇنگە دەيىن قاماۋدى ۇسىندى.

جەرگىلىكتى اقپارات قۇرالدارىنىڭ جازۋىنشا، دەپۋتاتتار مەملەكەتتىك قىزمەت جانە جەمقورلىققا قارسى ءىس-قيمىل اگەنتتىگىنىڭ كەيبىر ماسەلەلەرى تۋرالى زاڭ جوباسىنا وسىنداي تۇزەتۋ ەنگىزۋدى ۇسىنعان. قازىر اكىمشىلىك كودەكستىڭ 128-بابىندا بالالاردى اكىمشىلىك زاڭ بۇزۋعا يتەرمەلەگەنى ءۇشىن 50 اەك كولەمىندە ايىپپۇل سالۋ جازاسى قاراستىرىلعان.

زاڭ جوباسىنا قوسىمشا تۇسىنىكتەمەدە قازاقستاندا رۇقسات ەتىلمەگەن ميتينگىلەرگە كەيبىر اتا-انالاردىڭ بالالارىن ەرتىپ اپاراتىنى جازىلعان. قۇجات اۆتورلارىنىڭ پىكىرىنشە، بۇل بالالاردىڭ دەنساۋلىعىنا، پسيحيكالىق دامۋىنا كەرى اسەر ەتەدى.

بۇعان دەيىن سەنات دەپۋتاتى ساۋلە ايتپاەۆا رۇقسات ەتىلمەگەن ميتينگىگە قاتىسۋ بالالاردىڭ ءومىرى مەن دەنساۋلىعىنا قاۋىپ توندىرەتىنىن ايتقان. بۇل قوعامدا قىزۋ تالقىلانعان داۋلى ماسەلەلەردىڭ ءبىرى. كەيبىر ماماندار "ەگەر بيلىك بالالارعا ميتينگىلەرگە بارۋعا تىيىم سالسا، وندا وليمپيادا، پارتيا فورۋمى سياقتى رەسمي شارالاردا دا بالالاردى تۇرعىزىپ قويۋعا تىيىم سالۋى كەرەك" دەپ سانايدى.

قازاقستاندا نارازىلىق كەزىندە پوليتسيانىڭ بالالاردى ۇستاۋ وقيعالارى كەزدەسىپ تۇرادى. 21 قىركۇيەكتە شىمكەنت پەن نۇر-سۇلتاندا پوليتسيا كامەلەتكە تولماعان بالالاردى ۇستاپ، كەيىننەن بوساتقان. نارازىلار "بالالاردى اتا-اناسىنان ايىرعان" پوليتسيا جۇمىسىن سىناعان.

Abai.kz

4 پىكىر