Beysenbi, 15 Qaraşa 2018
Süyinşi! 2320 29 pikir 13 Mausım, 2018 sağat 19:26

6 mıñ jıldıq tarihı bar - dombıra

Memleket basşısı Nwrswltan Nazarbaevtıñ Jarlığımen  şildeniñ birinşi jeksenbisi  Wlttıq dombıra küni bolıp belgilendi, - dep habarlaydı Aqordanıñ baspasöz qızmeti.

Qazir Elbası Nwrswltan Nazarbaevtiñ «Bolaşaqqa bağdar: ruhani jañğıru» attı maqalasınıñ  aynalasında talay keleli ister jüzege asırıluda. Sol maqalada «Jahandıq ömirdegi zamanaui Qazaqstan mädenieti» mäselesi de söz bolğan edi.

«Jahandıq ömirdegi zamanaui Qazaqstan mädenietin» älemge tanıtu üşin aldımen 6 mıñ jıldıq tarihı bar dombırağa köñil bölinui tegin bolmasa kerek.

Endi şildeniñ birinşi jeksenbisi "Wlttıq dombıra küni" bolıp bekitildi. Ükimetimiz osı Jarlıqtı iske asıru boyınşa jwmıstar jasaytın boladı. Ol jwmıstardıñ orındalu barısın QR Prezidenttik äkimşiligi qadağalamaq.

Bwl bireulerge qısqa ğana jarlıq bolıp körinui mümkin. Sonda da Qazaqstan Respublikasınıñ Prezidenti Nwrswltan Äbişwlı Nazarbaev qol qoyğan bwl qwjat bükil qazaqtı ruhani twrğıda bir serpilterine kümän joq.

Qadır aqınnıñ "Nağız qazaq - qazaq emes, nağız qazaq - dombıra" deytininiñ janı bar.

Bizdiñ dombıramızdıñ tüp-tarihı 6 mıñ jıldıqtardıñ ar jağınan bastaladı.

Tarihqa köz jügirter bolsaq, Almatı oblısı, Jambıl audanındağı Maytöbe jaylauınnan tabılğan tastağı bilep jürgen tört adam men dombıra suretiniñ osıdan 6 mıñ jıl bwrın qaşalıp jasalğanın zertteuşiler däleldegen bolatın.

Endi osınday mıñ-san deregimizdi aldımen qazaqqa, sosın älemge moyındatar kez tudı.

Aytpaqşı sol tastağı suretti 1986 jılı professor S. Aqataev etnograf Jağda Babalıqwlınıñ kömegimen tapqan bolatın.

Ol tas 1993 jılı mwrajaydan joğalıp ketken. 2008 jılı Abai.kz aqparattıq portalı "Dombıra - qazaqtıñ brendi boluı kerek" degen bastama köterip, ğılımi konferenciya ötkizgen edi. Sol konferenciyanıñ soñınan jurnalister zertteu jasap, tarihi qwndılıq sanalatın atalmış tastı sol kezdegi "Ana tili" gazetiniñ jurnalisi Qanat Äbilqayır (qazir bizdiñ Abai.kz portalında şef-redaktor) ekinşi ret tauıp, mwrajayğa qoyğızdı.

Osı quanıştı sätte Jağda Babalıqwlı kemseñdep jılap, dombıranıñ küni tuıp kele jatqanın aytqan edi . Sol söz, mine, rasqa aynaldı!

Özi de qolınan dombırasın tastamaytın Elbasımız - memleketimizde qazaq ruhaniyatınıñ saltanat qwruına mümkindik tuğızdı.

Bwl Elbasınıñ «Bolaşaqqa bağdar: ruhani jañğıru» attı maqalasındağı  «Jahandıq ömirdegi zamanaui Qazaqstan mädenieti» mäselesine şınayı  köñil böline bastağanınıñ belgisi desek te boladı.

Qoldap äketer, halıq aman bolğay!

Nwrzat Toğjan

Abai.kz 

29 pikir